1 Kings 4:1-34
4 Áko aláahgo naatʼáanii Sálaman éí Ízrel dineʼé tʼáá átʼé binanitʼaʼí jílı̨́.
2 Díí naatʼáanii danilı̨́įgo dah jooʼishígíí éí nááʼiiłniihii Zéídak biyeʼ Azaráíyah lá,
3 áádóó Sháísha biyeʼké Elihóref áádóó Aháíjah éí naaltsoos ííłʼíní nilı̨́, áádóó Aháílad biyeʼ Jiiháshafat éí naatʼáaniishchíín nilı̨́,
4 áádóó Jiihóíyada biyeʼ Biinéíyah éí siláo dah deínéehii yinanitʼaʼí nilı̨́, índa Zéídak áádóó Abáíyathar éí nááʼiiłniihii nilı̨́,
5 áádóó Néíthan biyeʼ Azaráíyah éí naatʼáanii danilíinii yilą́ąjįʼ sizı̨́, índa Néíthan biyeʼ Zábad éí agháago naatʼáanii nilı̨́įgo aláahgo naatʼáanii yikʼis nilı̨́,
6 áádóó Aháíshar éí hooghan hazʼą́ągi hólónígíí tsʼídá tʼáá ałtso bee hóhólnííh, áádóó Ábda biyeʼ Adonáíram éí naanish bíʼnílchééh bee hóhólnííh.
7 Sálaman éí naakitsʼáadahgo naatʼáanii danilíinii Ízrel dineʼé tʼáá ałtso yindantʼáago ájiilaa; éí aláahgo naatʼáanii índa bighandóó danilíinii tʼáá ałtso bá chʼiyáán áłah ádadzósin: tʼááłáʼí jinítínígo nínáhahjįʼ tʼááłáʼí nínádíziʼjįʼ chʼiyáán nishódajiyoołtʼeehgo ałkééʼ dziznil.
8 Díí éí dabízhiʼ: Her biyeʼ éí Dził Íífreiyimdę́ę́ʼ chʼiyáán nináyiijááh.
9 Dííkar biyeʼ éí Méíkaz kin shijaaʼdę́ę́ʼ, Sheiyálbim kin shijaaʼdę́ę́ʼ, Beth-shíímesh kin shijaaʼdę́ę́ʼ índa Íílan-beth-héínan kin shijaaʼdę́ę́ʼ chʼiyáán nináyiijááh.
10 Híísed biyeʼ éí Arábath nahósʼaʼdę́ę́ʼ, tʼáá éí Sókoh kin haalʼá bídéétʼiʼgo áádóó Híífer kéyah tʼáá átʼé bitsʼą́ą́dę́ę́ʼ chʼiyáán nináyiijááh.
11 Abínadab biyeʼ éí Dor kéyah tʼáá átʼé bitsʼą́ą́dę́ę́ʼ chʼiyáán ninááyiijááh; Sálaman bitsiʼ Téífath éí hweʼasdzą́ą́;
12 Aháílad biyeʼ Béíyana éí Téíyanak kin haalʼáádę́ę́ʼ áádóó Megído kin haalʼáádę́ę́ʼ índa Beth-shíyan nahósʼaʼ tʼáá átʼé bitsʼą́ą́dóó éí Jézriyel kin haalʼá biyeigóó Zartéínah hazʼání bíighahgóó nahósʼaʼígíí índa Beth-shíyan kin haalʼáádóó Éíbel-miihólah kin shijaaʼjįʼ éí Jákniyam kin shijaaʼ bilááhdę́ę́ʼ chʼiyáán nináyiijááh.
13 Gííber biyeʼ éí Réímath-gíliyad kin haalʼáádę́ę́ʼ áádóó Manáseh biyeʼ Jéíyer bikin dah naazhjaaʼígíí, tʼáá éí Gíliyad kéyahgi nahósʼaʼdóó áádóó Béíshan kéyahgi Árgab nahósʼaʼgi hastą́diingo kin hadaasʼá ditą́ągo binaa ahéédaʼastłʼinii áádóó béésh łitsoii bee dáńʼdaʼdilkałgo ádaalyaaídę́ę́ʼ chʼiyáán nináyiijááh.
14 Ído biyeʼ Ahínadab éí Méíhanéíyim kin shijaaʼdę́ę́ʼ chʼiyáán nináyiijááh.
15 Ahímeiyaz éí Náftalaidę́ę́ʼ chʼiyáán nináyiijááh; Sálaman bitsiʼ Básmath hweʼasdzą́ą́.
16 Húshai biyeʼ Béíyanah éí Ásher dineʼé bikéyahdę́ę́ʼ áádóó Éílath nahósʼaʼdę́ę́ʼ chʼiyáán nináyiijááh.
17 Parúwah biyeʼ Jiiháshafat éí Ísakar dineʼé bikéyahdę́ę́ʼ chʼiyáán nináyiijááh.
18 Íílah biyeʼ Shímiyai éí Bénjamin dineʼé bikéyahdę́ę́ʼ chʼiyáán nináyiijááh.
19 Yúrai biyeʼ Gííber éí Gíliyad kéyahgi Ámor dineʼé aláahgo binanitʼaʼí Sáíhan yę́ę bikéyah nítʼééʼ yę́ędę́ę́ʼ áádóó Béíshan dineʼé aláahgo binanitʼaʼí Ag yę́ę bikéyah nítʼééʼ yę́ędę́ę́ʼ chʼiyáán nináyiijááh; tʼáá bí tʼéiyá díí kéyahgi chʼiyáán yinanitʼaʼí nilı̨́.
Sálaman bibee hódzą́ áádóó náás adeezlá
20 Júdah dineʼé áádóó Ízrel dineʼé éí tónteel bibąąhgóó séigi ánéelą́ąʼgo tʼóó ahóóyóí; éí daʼayą́ągo áádóó daʼadlą́ągo bił nidahoozhǫǫh.
21 Sálaman yinantʼáii éí Yufréítiiz toohdóó Filístiya dineʼé bikéyahjįʼ índa Ííjip dineʼé bihoodzodóó aláahgo bee ídahólníihgo bił nidahazʼáanii tʼáá átʼé yee bóhólnííh, áko aa dadoolyéełii Sálaman bichʼįʼ adajiijáahgo Sálaman niʼníłdįįd bijı̨́įjįʼ bá nidajilʼaʼ nítʼééʼ.
22 Sálaman bighan hazʼą́ą́dóó éí łaʼa jı̨́ akʼáán kor* wolyéhígíí tádiin bíighahgo dabichʼiyąʼ, índa tłʼoh naadą́ą́ʼ bideeʼí akʼáán kor wolyéhígíí hastą́diin bíighahgo dabichʼiyąʼ,
23 áádóó béégashii daneeskʼahígíí neeznáá áádóó dahootsogóó béégashii danilkʼahígíí naadiingo áádóó dibé neeznádiingo áádóó bįįhkąʼ daalchíʼígíí áádóó jádí áádóó jádítsoh índa naatʼaʼii daneeskʼahígíí ałdóʼ dabichʼiyąʼ.
24 Jó, Yufréítiiz tooh eʼeʼaahjigo Tífsah kin shijaaʼdóó níléí Géíza kin haalʼáajįʼ díí kéyah tʼáá náhwiistʼą́ą́ nítʼééʼ; ákǫ́ǫ́ aláahgo naatʼáanii dajílínígíí tʼáá ádzíłtso hwee ádíhólnííh, áko hakéyah tʼáá níłtéél nítʼééʼ binaagóó diné bił dahodéezyéelgo kééhojitʼı̨́.
25 Áádóó Júdah dineʼé áádóó Ízrel dineʼé doo áchʼįʼ nidaʼjódlíígóó kéédahojitʼı̨́įgo tʼááłáʼí jinítínígo Dan kin haalʼáádóó Bíyer-shííba kin shijaaʼjįʼ hachʼil naʼatłʼoʼii áádóó hatsin fig sikaadii bee dahozdíltsíidgo Sálaman abíyííłką́.
26 Áko Sálaman ałdóʼ tsindaabąąs bijáád naakiígíí łı̨́ı̨́ʼ bighą́ą́h nídadiʼniłígíí dízdiindi mííl índa siláo éí łı̨́ı̨́ʼ yee nidaabaahígíí naakitsʼáadahdi mííl bee hólǫ́.
27 Sálaman yidooyı̨́įłii índa náʼádı̨́įhgi ákwii diné nidaʼadı̨́hígíí tʼáá ałtso bá chʼiyáán binanitʼaʼí ádahoʼdiilyaaígíí hatah hoolzhishgo nínádíziʼjįʼ chʼiyáán nidajiiyeeh nítʼééʼ; tʼáadoo bídin hóyéʼégóó ádajósin nítʼééʼ.
28 Łı̨́ı̨́ʼ áádóó łı̨́ı̨́ʼ nidaʼayéhígíí deidoołchoshii nidahidoohééł dahodooʼniid yę́ęjįʼ tʼááłáʼí jinítínígo tłʼoh naadą́ą́ʼ bideeʼí índa tłʼoh naadą́ą́ʼ bitsǫz ákwii nidajiiyeeh nítʼééʼ.
29 Diyin God éí Sálaman ayóó átʼéego yee hodooyąąłii áádóó agháago akʼidiʼdootı̨́įłii índa hótsaago ił ééhodoozįįł yeidiníʼą́; tʼáá tónteel bibąąhgóó séí ánéelą́ʼígíigi ánéelą́ąʼgo hódzą́ yeidiníʼą́.
30 Áko Sálaman habee hódzáanii tsʼídá agháago ayóó átʼé; haʼaʼaahjigo kéyahgóó kéédahatʼínígíí tʼáá átʼé bibee hódzáanii áádóó Ííjip dineʼé tʼáá átʼé bibee hódzáanii éí bilááh átʼé.
31 Jó, diné tʼáá ałtso biláahgo hojíyą́; Ézrah dineʼé Ííthan joolyéii áádóó Hííman joolyéii, Kálkal joolyéii, Dárda joolyéii, éí Méíhal biyeʼké dajílíinii biláahgo hojíyą́, áko hanaagóó ałʼąą dineʼé bitahgóó tʼáá átʼé hwééhoʼdílzin.
32 Áko Sálaman éí saad bee hodoodząąłii táadi míilgo yee yáłtiʼ nítʼééʼ, áádóó biyiin éí miildóó baʼaan ashdlaʼ ánéelą́ą́ʼ nítʼééʼ.
33 Tsin yílʼáhígíí yaa yáłtiʼii éí gad naazkaadii Lébanan kéyahgi deílʼáhígíí níléí hísap kódaníshéhígo ałʼąą ádaatʼéii tsé yítłʼin bitákʼizdę́ę́ʼ hadaneesánígíí yaa yáłtiʼgo hahaasdzííʼ; nidaaldlooshii ałdóʼ, nidaatʼaʼii, nidaaʼnaʼii índa łóóʼ yaa yáłtiʼgo hahaasdzííʼ.
34 Áko ałʼąą anaʼí tʼáá átʼé bitahdę́ę́ʼ łaʼ nidahaaskaigo Sálaman bibee hódzáanii deidiiztsʼą́ą́ʼ; nahasdzáán bikááʼdóó aláahgo naatʼáanii tʼáá ałtso Sálaman bibee hódzáanii yaa dahodiiztsʼą́ʼígíí nidaʼiisʼaʼ.
Footnotes
^ Kor bee íʼneelʼąąhí éí bilasáanaa bee naakáhígíí hastą́ą́dóó baʼaanígo bíighahgo áníłtsoígíí óolyé.
