1 Kings 5:1-18
5 Áádóó Táir kin haalʼáádóó aláahgo naatʼáanii Háíram éí Sálaman bizhéʼé yitsáskʼehgi aláahgo naatʼáanii náánídlı̨́į doo biniyé akʼah yikʼi yayiidziidgo bíísı̨́įʼgo yaa hóóniiʼgo bá nidaalʼaʼí ákǫ́ǫ́ ayííłʼaʼ, háálá Háíram éí David yę́ę áłahjįʼ ayóóʼáyóʼníí nítʼééʼ.
2 Áádóó Sálaman éí Háíram yichʼįʼ iʼííłʼaʼgo ání,
3 Díí nił bééhózin: shizhéʼé David yę́ę Bóhólníihii haDiyin God bízhiʼ binahjįʼ kin biiʼ sohodizin ázhdoolíiłgo tʼáadoo yee hadiʼníʼą́ą da, háálá hanaagóó tʼáá ałtsodę́ę́ʼ hachʼįʼ anaaʼ nídahoołeełgo bąą Bóhólníihii ałtso hayaa ayííniljįʼ tʼáadoo há bohónéesdzą́ą da.
4 Nidi kʼad éí Bóhólníihii shiDiyin God hááʼáyı̨́ı̨́h tʼáá ałtsojįʼ sheidiníʼą́, áko anaʼí, doodaiiʼ doo yáʼáshóonii doo haleeh da.
5 Áko, shoo, Bóhólníihii shiDiyin God bízhiʼ binahjįʼ kin biiʼ sohodizin ádeeshłííł nisin; Bóhólníihii éí shizhéʼé David yę́ę yichʼįʼ haadzííʼ yę́ęgi átʼéego, Niyeʼ nitsáskʼehgi bikááʼdóó nahatʼáii bikááʼ dah bidínéeshdaałígíí dah biníłdáago éí shízhiʼ binahjįʼ kin íidoolííł.
6 Éí bąą kʼad díí bee hwiidííłʼaałgo Lébanan kéyahdóó gad nitsaa deílʼáhígíí shá deidootsił, áko shá nidaalʼaʼí éí ná nidaalʼaʼí yił nidaalnish doo, índa ná nidaalʼaʼí éí adeenáago nidaalnish dooleełgo bee hwiidííłʼaałígíí bikʼehgo nihichʼįʼ niʼiishłée dooleeł; jó, nił bééhózin: nihitahdóó Sáídan dineʼé daʼiichįįhgo tsin nidayiichʼiishígi átʼéego doo łaʼ nihee hólǫ́ǫ da.
7 Nítʼééʼ Háíram éí Sálaman haadzíʼígíí yaa hodiiztsʼą́ąʼgo tʼáá íiyisí yaa bił nihoozhǫǫhgo ání, Díí jı̨́ Bóhólníihii baa haʼniih leʼ; éí David yę́ę biyeʼ hóyą́ągo yizhchíinii bidineʼé ayóó ánéelą́ąʼii yinantʼáa doo biniyé beíltı̨́.
8 Áádóó Háíram éí Sálaman yichʼįʼ iʼííłʼaʼgo ííłní, Tʼáadoo leʼé biniyé shichʼįʼ iʼííníłʼaʼígíí baa nitsísíkééz: éí gad dantsaii áádóó sáípres wolyéii tsin dantłʼizii nínízinígíí ná dadiitsił.
9 Áko shá nidaalʼaʼí éí Lébanan kéyahdę́ę́ʼ tónteeljįʼ nideidiyooshoł, áádóó ahídahaastłʼǫ́ǫgo bee hwiiniłʼaʼíjįʼ tónteel bee nihidoolʼoł, índa áadi táłtsʼáhidooʼniłgo nididíínił, áádóó índa chʼiyáán nisinígíí éí shighandóó danilíinii shá baa hidíʼaah doo.
10 Áko Háíram éí Sálaman yinízinii bikʼehgo gad dantsaii áádóó sáípres wolyéii tsin dantłʼizii baazhnínil.
11 Áádóó Sálaman éí Háíram joolyéii tłʼoh naadą́ą́ʼ naadiindi mííl bíighahgo kor bee bíʼnéélʼąądgo éí chʼiyáán átʼéego haghandóó danilíinii yaa néíʼnił nítʼééʼ áádóó tóshjeeh naadiingo bee akʼah doo bąąh chinii yaa néíʼnił nítʼééʼ; Sálaman éí ákwííłʼı̨́įgo nináháhááh nítʼééʼ.
12 Áko Bóhólníihii éí Sálaman bee hódzáanii yeidiníʼą́; tʼáá yee yichʼįʼ haadzííʼ yę́ęgi ádzaa, índa Sálaman áádóó Háíram bitaʼgi hózhǫ́ǫgo hazʼą́ą́ nítʼééʼ, áko ahíłká anáʼahiʼnilchéeh doogo ahaʼdeetʼą́.
13 Nítʼééʼ aláahgo naatʼáanii Sálaman éí Ízrel dineʼé tʼáá ałtso bitahdóó tʼáá bizááká nidaalnish dooígíí tádiindi mííl yiltʼéego náyiizlááʼ.
14 Áádóó tʼááłáʼí náhidizíidgo neeznáadi mííl bíighahgo diné nidadoolnish biniyé Lébanan kéyahgóó bééʼjíłnih; éí tʼááłáʼí nídeezidjįʼ tʼéí Lébanandi ninádaalnish; naaki nídeezidjįʼ bighandi tʼóó nidaakai łeh; Adonáíram éí naanish biniyé diné náhaasdláaʼii ałkééʼ hooʼnił bee hóhólnííh.
15 Áko Sálaman éí tsostsʼidiindi mííl yiltʼéego hééł nideiyéhígíí índa tseebídiindi mííl dziłdi daʼatseełígíí bá nidaalnish nítʼééʼ;
16 náábíláahgo Sálaman yá nidaalnishii agháago bídahólníihii táadi mííldóó baʼaan táadi neeznádiin yiltʼéego diné nidaalnishígíí yindantʼáá nítʼééʼ.
17 Áko aláahgo naatʼáanii díí yichʼįʼ ííłʼaadgo tsé ayóó ádaníłtsoii nidayiizhjaaʼ, éí tsé tʼáá íiyisí daʼílíinii ádaatʼéego hashtʼeʼnibídaʼastséél; éí bee kin bitłʼááh nástłʼinii ádoolnííł biniyé nidayiizhjaaʼ.
18 Ákótʼéego Sálaman bá kin ádeiłʼíinii índa Háíram bá kin ádeiłʼíinii áádóó Gííbal kin haalʼáádóó dineʼé éí kin ádoolnííł biniyé tsin dantsxaazígíí índa tsé hashtʼeʼniyídaʼaztséél.
