1 Kings 6:1-38
6 Áko Ííjip kéyahdę́ę́ʼ Ízrel dineʼé chʼínáʼnáádóó bikʼijįʼ dı̨́įdi neeznádiindóó baʼaan tseebídiin nááhaijįʼ ahoolzhiizhgo Sálaman éí Ízrel dineʼé binazhnitʼáago dı̨́ı̨́ʼ náhááh góneʼ, naaki nídízííd góneʼ Zif yiziłígíí binih Bóhólníihii yá kin áyiʼniilaa.
2 Aláahgo naatʼáanii Sálaman éí Bóhólníihii yá kin áyiilaii éí náhástʼédiindi ké silá áhoníłnééz, áádóó tádiindi ké silá áhoníłtéél, índa dego dízdiindóó baʼaan ashdladi ké silá ánízah.
3 Kin biiʼ sohodizin bidáahjigo béédiníʼą́ągo chahaʼohígíí éí tádiindi ké silá áhoníłnééz; éí naaniigo kin áníłtélígíí tʼáá bił aheeníłtso; kin bidáahjigo ashdlaʼáadahdi ké silá áníłtéél.
4 Áádóó wóneʼdę́ę́ʼ tłʼóoʼjigo hadadiitsʼóozgo áádę́ę́ʼ yah adaʼdeezdíin doo biniyé áyiilaa.
5 Kin bá ahééʼítłʼinígíí binahjįʼ tsé ahéédaastłʼingo kin bináztʼiʼ; kin áádóó hodiyingo hazʼánígíí ałdóʼ tłʼóóʼdę́ę́ʼ binaagi ahéédaʼastłʼingo éí tʼáá átʼé biiʼ dahooghango áyiilaa.
6 Áłtséhé góneʼ dahooghanígíí éí tsostsʼidóó ałníiʼgo ké naazlá ádahoníłtso, náʼádeí góneʼ dahooghanígíí náhástʼéí ké naazlá ádahoníłtso, áádóó índa tááʼ náʼádeí góneʼ dahooghanígíí éí neeznáádóó ałníiʼgo ké naazlá ádahoníłtso, háálá á daníʼáhígíí éí doo kin bá nídaastłʼinígíí bighá daazʼáa da doo biniyé kin bá nídaastłʼinígíí bąąh dah náhástʼą́ągo ahééhoolʼáago áyiilaa, áko á daníʼáhígíí bikáaʼgi dah naaztą́.
7 Áádóó kin álnéehgo tsé hashtʼedaalneʼdi tʼáá íłdįįd hashtʼedaalyaago áádę́ę́ʼ nidayiizhjaaʼ, áko bee atsidí áádóó tséniłda índa béésh bee nidaʼanishígíida doo chodaoʼı̨́ı̨́góó tʼáadoo íitsʼaʼí kin ályaa.
8 Áłtséhé góneʼ dahooghanígíí shádiʼááhdę́ęʼgo yah aʼatiin, áádóó bikááʼ góde háádaʼaldahígíí náʼádeídi dahooghaníjįʼ haazʼá, áádóó tááʼ náʼádeídi dahooghaníjįʼ haazʼá.
9 Kótʼéego kin ííléehgo á daníʼáhígíí áádóó akááʼ naazhoozhígíí éí dilkʼis tsin neheeshjííʼ yee ałtso áyiilaa.
10 Kin tʼáá átʼé binahjįʼ dahooghango áyiilaa; hooghan tʼááłáʼí níʼánígo dego tsostsʼidóó ałnííʼ ké naazlá ádanízah. Dilkʼis bídáátsélígíí haʼnaa nidaazʼáago kin bidadiiʼá.
11 Áádóó Bóhólníihii éí Sálaman yichʼįʼ haadzíiʼgo ání,
12 Díí kin áníléhígíí bee nichʼįʼ haasdziih; bee nihodiyéʼáanii bikʼehgo yínááł ládą́ą́ʼ áádóó bee nihodiyiishʼaahii biʼíínísin ládą́ą́ʼ índa shibikʼeh óʼooʼníiłii tʼáá átʼé bikʼeh honíłʼı̨́įgo yínáałgo nizhéʼé David yę́ę bichʼįʼ bee haasdzííʼ yę́ę éí ná biʼdeeshłííł,
13 áko Ízrel dineʼé bitahgi honishłǫ́ǫgo shidineʼé Ízrel doo yóóʼadideeshʼáał da.
14 Kótʼéego Sálaman kin ííléehgo ałtso áyiilaa.
15 Áko kin biyiʼdę́ę́ʼ dilkʼis tsin neheeshjííʼ tsé bikʼijįʼ nideiskaadgo ahééhoolʼá; niʼdóó dego tsé bikʼijįʼ ádayiilaa, índa sáípres wolyéii tsin dantłʼizii tsin neheeshjííʼ ályaago niʼgóó nideiskaad.
16 Kin wóniijí tádiindi ké silá bíighahjįʼ dilkʼis tsin neheeshjííʼ bee niʼdóó dego tsé bikʼijįʼ sikaad ályaago ahééhoolʼá; kótʼéego kin biyiʼ hodílzin bichʼįʼgo agháago hodiyingo hazʼánígíí bá ahééhoolʼá.
17 Éí agháago hodiyingo hazʼánígíí bidáahjigo hastą́diin ké silá áníłnééz.
18 Kin biyiʼdę́ę́ʼ dilkʼis tsin neheeshjííʼ niilkaadígíí bikʼi naʼashkʼaazhgo adeeʼ áádóó chʼilátah hózhóón béédaʼalyaago naashchʼąąʼ. Dilkʼis tsin neheeshjííʼ tsé bikʼijįʼ niilkaadígíí bee tsé doo daatʼı̨́ı̨́góó ályaa.
19 Kin biyiʼ agháago hodiyingo hazʼání góneʼ Bóhólníihii bitsitsʼaaʼ bee ahaʼdeetʼáanii nidootʼáłígi yá hashtʼehoolaa.
20 Agháago hodiyingo hazʼánígíí éí tádiindi ké silá áhoníłnééz áádóó tádiindi ké silá áhoníłtéél índa dego tádiindi ké silá ánízah, áádóó óola tʼáá bízhání bikʼéstiʼgo áyiilaa. Bikááʼ nááʼiiniihí éí dilkʼis tsin neheeshjííʼ bee ałdóʼ áyiilaa.
21 Kótʼéego Sálaman éí kin áyiilaaígíí biyiʼdę́ę́ʼ óola tʼáá bízhání bikʼéstiʼgo áyiilaa, áádóó agháago hodiyingo hazʼánígíí bidáahgi óola daʼahólzhaʼí haʼnaa naneelzheeʼgo ałtsʼą́ą́hjí bidíníilzheeʼígi dilkʼis tsin neheeshjííʼ ałtsʼą́ą́hjí haʼnaa naníʼáhígíí óola bikʼéstiʼgo áyiilaa.
22 Áko kin tʼáá átʼé biyiʼdę́ę́ʼ óola bikʼéstiʼgo tsʼídá ałtso kin haidiilaa, áádóó ałdóʼ agháago hodiyingo hazʼánígíí bíighahgi bikááʼ nááʼiiniihí niiníʼą́ągo tʼáá átʼé óola yikʼíístiʼ.
23 Agháago hodiyingo hazʼání góneʼ áliv tsin bee chérabim diyingo naalʼaʼí naakigo dego ashdlaʼáadahdi ké silá áníłnéezgo áyiilaa.
24 Chérab bitʼaʼ łaʼ éí tsostsʼidóó náʼáłnííʼ ké silá áníłnééz, áádóó chérab náánáłahjiígíí éí ałdóʼ tsostsʼidóó náʼáłnííʼ ké silá áníłnééz, índa bílátah bitaʼgi ashdlaʼáadahdi ké silá ánízah.
25 Chérab náánáłaʼígíí ashdlaʼáadahdi ké silá bitaʼ ánízah; éí chérab tʼáá áłah tʼáá aheeníłtso áádóó tʼáá aheełtʼéego ályaa.
26 Chérab łaʼ éí ashdlaʼáadahdi ké silá áníłnééz, áádóó náánáłaʼígíí ałdóʼ tʼáá ákóníłnééz.
27 Áko diyingo naalʼaʼí chérabim wolyéhígíí kin wóniidi agháago hodiyingo hazʼánígi niinínilgo éí chérabim bitaʼ kʼíhineezláago áyiilaa, áko łaʼ bitʼaʼ łahjí kin bidiiʼá, áádóó chérab náánáłaʼígíí bitʼaʼ éí ałdóʼ łahjí kin bidiiʼá, índa bitʼaʼ náánáłaʼígíí kin ałníiʼgi ahidiiʼá.
28 Áádóó diyingo naalʼaʼí chérabim wolyéhígíí óola bikʼéstiʼgo áyiilaa.
29 Áko kin biyiʼdę́ę́ʼ ahéédaneeskálígíí tʼáá átʼé tłʼóóʼdę́ę́ʼ áádóó biyiʼdę́ę́ʼ binahjįʼ chérabim wolyéhígíí áádóó tsin sikaadii páam índa chʼilátah hózhóón ąą ádaatʼéego bikʼijįʼ naʼashkʼaazhígóó neizhchʼąąʼ.
30 Áádóó kin biiʼ niʼgóó nideiskaadígíí éí óola bikʼéstiʼgo áyiilaa.
31 Áko agháago hodiyingo hazʼánígíí yah ahóótʼiʼígíí éí áliv tsin bee dáńʼdílkałgo áyiilaa, wódahdi haʼnaa naníʼáhígíí índa ałtsʼą́ą́hjí dáádílkał bá ííʼáhígíí ashdlaʼdę́ęʼgo bídazniikʼą́ągo áyiilaa.
32 Naakigo dáádílkałígíí ałdóʼ áliv tsin bee ályaa; bikáaʼgi diyingo naalʼaʼí chérabim áádóó tsin sikaadii páam índa chʼilátah hózhóón ąą ádaatʼéego bikʼijįʼ naʼashkʼaazhígóó neizhchʼąąʼ, áko óola bikʼéstiʼgo ályaa, índa chérabim áádóó tsin sikaadii páam bikááʼ óola bikʼéstiʼgo ályaa.
33 Áádóó ałdóʼ kin biiʼ sohodizin bidáádílkał ałtsʼą́ą́hjí ííʼáhígíí áliv tsin bee dı̨́ı̨́ʼdę́ę́ʼ bídazniikʼą́ągo áyiilaa.
34 Áádóó naakigo dáádílkałígíí éí tsin sáípres wolyéhígíí bee ályaa. Tʼááłáʼí dáádílkałígíí naakigo ahą́ą́h nániidił, áádóó náánáłaʼ dáádílkałígíí ałdóʼ naakigo ahą́ą́h nániidił.
35 Áko diyingo naalʼaʼí chérabim wolyéhígíí áádóó tsin sikaadii páam índa chʼilátah hózhóón ąą ádaatʼéego bikʼijįʼ naʼashkʼaazhígóó neizhchʼąąʼ áádóó óola ałtʼą́ą́ʼígo bikʼéstiʼgo áyiilaa.
36 Áádóó náádaʼiiłniihii bá hazʼánígi éí tsé hashtʼeʼnibídaʼastséelii tááʼ ałkʼi nítʼiʼgo bikáaʼgi dilkʼis bídáátsélígíí shizhoozhgo áyiilaa.
37 Dı̨́ı̨́ʼ náhááh góneʼ éí nídízííd Zif yiziłígíí binih Bóhólníihii bikin bitłʼááh nástłʼiní ályaa,
38 áádóó łaʼtsʼáadah náhááh góneʼ, tseebíí nídízííd góneʼ Bul yiziłígíí binih kin tsʼídá ałtso hadidzaa; ádoolnííł hodooʼniid yę́ęgi átʼéego tʼáá ákótʼéego ályaa. Áko tʼáá ájíléehgo tsostsʼid nááhai.
