1 Kings 7:1-51
7 Nidi Sálaman tʼáá bí bikin ííléehgo tááʼtsʼáadah nááhaijįʼ tsʼídá ałtso áyiilaa.
2 Lébanan kéyahdę́ę́ʼ dilkʼis dantsaazii bee kin ályaa: náásee tʼááłáhídi neeznádiindóó baʼaan ashdladiindi ké silá áníłnééz, tsostsʼidiindóó baʼaan ashdladi ké silá áníłtéél, índa dego dízdiindóó baʼaan ashdladi ké silá ánízah; táaʼgo hadiitʼiʼgo dilkʼis hashtʼeʼnibídaʼatsélígíí áyah daniiʼáago áádóó tʼáá éí dilkʼis bee áah sitáán áyiilaa.
3 Áyah daniiʼáhígíí dízdiindóó baʼaan ashdlaʼgo éí tʼááłáʼí hadiitʼiʼgo adaazʼáhígíí ashdlaʼáadahgo adaazʼáago bikáaʼgi dilkʼis hashtʼeʼnibídaʼatsélígíí shizhoozh.
4 Ahíłkʼą́ąhgo yah adaʼdeezdíin doogo ałtsʼą́ą́hjí táaʼgo hadiitʼiʼgo ályaa.
5 Áko dáádílkał áádóó bá adaazʼáhígíí índa yah ahoolʼáago yah adaʼdeezdínígíí tʼáá ałtso dadikʼą́; yah adaʼdeezdínígíí éí ałtsʼą́ą́hjí táaʼgo hadiitʼiʼ.
6 Áko kin bidáahjigo hazʼánígíí bíyah daniiʼáa dooígíí ályaa; éí náásee tsostsʼidiindóó baʼaan ashdladi ké silá áhoníłnééz índa dízdiindóó baʼaan ashdladi ké silá áhoníłtéél; éí bidáahjigo chahaʼohígíí bíyah daniiʼá; éí bidáahjigo bikááʼ dilkʼis nitsaazígíí béétséelgo haʼnaa naníʼá.
7 Nítʼééʼ bikááʼdóó hootʼáałii bikááʼdóó ánihodiiʼaah doo biniyé ánihodiyiitʼaah bá hazʼą́ą dooígíí áyiilaa; biyiʼdę́ę́ʼ tʼáá átʼé dilkʼis tsin neheeshjííʼ shizhoozhgo ályaa.
8 Chahaʼoh bichʼijígo hazʼánígi kin yiiʼ bighan dooleełii tʼáá bikááʼdóó hootʼáałii áyiilaa yę́ęgi átʼéego áyiilaa. Áádóó Féro bitsiʼ éí Sálaman beʼasdzą́ą dooleełgo néidiiłtínígíí yá kin áyiilaa; tʼáá chahaʼoh ályaa yę́ęgi átʼéego kin áyiilaa.
9 Díí kin ádaalyaaígíí tʼáá átʼé éí tłʼóóʼdę́ę́ʼ áádóó biyiʼdę́ę́ʼ tʼáá bitłʼááh nástłʼindóó dego bikááʼ naanídaazʼáajįʼ áádóó níléí tłʼóoʼjigo ayóó áníłtso hazʼánígíí bichʼįʼgóó tsé ílíinii bídaʼnéélʼąądígíí bikʼehgo hashtʼeʼnibídaʼastséelii bee niʼiichʼiishí bee nidahaashchʼiizh.
10 Atłʼááh nástłʼinii éí tsé ílíinii ayóó ádaníłtsogo, łaʼ ashdlaʼáadahdi, łaʼ éí naakitsʼáadahdi ké naazlá ádaníłtsogo ádaalyaa.
11 Áádóó éí bikáaʼdi tsé ílíinii bídaʼnéélʼąądígíí bikʼehgo hashtʼeʼnibídaʼastsélígíí ahidaneeznil índa éí bikááʼ dilkʼis bídáátsélígíí haʼnaa nidaazʼą́.
12 Hótsaago ahééhoolʼáhígíí tsé hashtʼeʼnibídaʼastséelii tááʼ ałkʼi yítłʼingo bikáaʼgi dilkʼis bídáátsélígíí bikʼi daníʼáago ahééhoolʼá; éí Bóhólníihii bikin biiʼ sohodizingi náádaʼiiłniihii bá hazʼánígi átʼéego índa yah aʼatiindę́ę́ʼ chahaʼoh ályaaígi átʼéego áhoolaa.
Háíram éí kin biiʼ sohodizin góneʼ binaanish (2Chr. 2:13,14; 3:15-5:1)
13 Áádóó aláahgo naatʼáanii Sálaman iʼííłʼaʼgo Táir kin haalʼáádę́ę́ʼ Háíram yił nídaaskai.
14 Áko Háíram éí Náftalai dineʼé bitsʼą́ą́dóó asdzání bąąh áhásdįįdii biyáázh jílı̨́ índa hazhéʼé yę́ę éí Táir kin haalʼáádóó diné nilı̨́ı̨́ nítʼééʼ; éí béésh łitsoii yinaalnishii nilı̨́ı̨́ nítʼééʼ. Háíram éí béésh łitsoii binaʼanishjí tʼáá ałtso jiichįįh áádóó bee hódzáanii índa akʼidiʼyiitįįhii hwiiʼ hólǫ́. Áko aláahgo naatʼáanii Sálaman baazhníyáago díí tʼáá ałtso bá binjishnish.
15 Béésh łitsoii doolyı̨́įʼgo naaki ííʼáa dooleełígíí áyiilaa. Tʼáá áłah dego naadiin tsostsʼidi ké silá áníłnééz índa tseebíítsʼáadahdi ké silá bíighahgo níyiz.
16 Béésh łitsoii ííʼáa dooígíí ałʼąą bílátah dah dooʼnil biniyé béésh łitsoii doolyı̨́įʼgo naaki nímazgo áyiilaa: nímazígíí łaʼ dego tsostsʼidóó ałnííʼ ké silá áníłtso; náánáłaʼígíí dego tʼáá ákónááníłtso.
17 Béésh łitsoii naneesdizígíí áádóó daʼahólzhaʼgo náhineestsʼeeʼgo éí béésh łitsoii ííʼáa dooígíí bílátah dah dooʼniłígíí biniyé áyiilaa; éí dah dooʼniłígíí yá tsostsʼidgo, náánáłaʼígíí ałdóʼ yá tsostsʼidgo áyiilaa.
18 Áko béésh łitsoii ííʼáa dooígíí áyiilaa, áádóó bílátah dah dooʼniłígíí bá naneesdizígíí bąąh pámgrenit aneestʼąʼ bééʼályaago yił yikʼídeistiʼ; łahjí dah siʼą́ą dooígíí ałdóʼ ákótʼéego yá ádayiilaa.
19 Áko béésh łitsoii ííʼáa dooígíí bílátah dah dooʼniłígíí éí yah aʼatiindę́ęʼgo hastą́ą́h ké silá áníłtsogo chʼilátah hózhóón lílii wolyéii nahalin.
20 Béésh łitsoii naakigo ííʼáa dooígíí bílátah dah dooʼniłígíí binahjįʼ naneesdizígíí níyizgo ahééníʼáhígíí pámgrenit wolyéii naakidi neeznádiingo naakigo ahéénítʼiʼgo bikʼi sinilgo áyiilaa; bílátah dah dooʼniłígíí náánáłaʼígíí ałdóʼ tʼáá ákónáánátʼé.
21 Kin biiʼ sohodizin yah aʼatiinídę́ę́ʼ béésh łitsoii ííʼáa dooleełígíí ayíítsih: nishʼnáájí ayíítsiígíí éí Jéíkin yee yiyíízhiʼ, nishtłʼají ayíítsiígíí éí Bóʼaz yee yiyíízhiʼ.
22 Áko béésh łitsoii yaaʼáhígíí bílátahgi chʼilátah hózhóón lílii wolyéhígíí beʼelyaago áyiilaa; kótʼéego béésh łitsoii ííʼáhígíí ałtso binaʼazhnish.
23 Áádóó biiʼ táʼádígisí nitsaaígíí béésh łitsoii doolyı̨́įʼgo bee ályaa, éí názbąsgo haʼnaa ashdlaʼáadahdi ké silá áhonízah áádóó dego tsostsʼidóó náʼáłnííʼ ké silá ánízah índa bidááʼ gónaa dízdiindóó baʼaan ashdladi ké silá ahééhoolʼá.
24 Bidááʼ gónaa biyaadóogo tʼááłáʼídóó náʼáłnííʼ ké naazlá ádanízahgo neeznáá adeeʼ béédaʼalyaago béésh łitsoii doolyı̨́įʼgo naaki ałkʼinítʼiʼgo bídadiilyı̨́įʼgo ahééhoolʼá.
25 Béésh łitsoii bee dóola ályaaígíí naakitsʼáadahgo naazı̨́, táaʼgo náhookǫsjigo dadéezʼı̨́ı̨́ʼ, táaʼgo eʼeʼaahjigo dadéezʼı̨́ı̨́ʼ, táaʼgo shádiʼáahjigo dadéezʼı̨́ı̨́ʼ índa táaʼgo haʼaʼaahjigo dadéezʼı̨́ı̨́ʼ; dabitłʼaaʼ ahidadiiʼáago bikáaʼgi biiʼ táʼádígisí nitsaaígíí dah yistʼą́.
26 Dı̨́ı̨́ʼ bikʼehgo íídéetą́ą́ʼ, áádóó bidááʼ gónaa éí bee adlání bidááʼ gónaaígíí nahalingo chʼilátah hózhóón lílii wolyéii bee naashchʼąąʼ; tʼááłáhídi neeznádiindóó baʼaan náhástʼédiin tóshjeeh bíighahgo bee tó siką́.
27 Áádóó biiʼ táʼádígisí bá siʼą́ą dooleełígíí neeznáá béésh łitsoii yee áyiilaa; tʼááłáʼí níʼánígo éí hastą́ądi ké naazlá ádaníłnééz áádóó hastą́ądi ké naazlá ádaníłtéél índa dego dı̨́ı̨́ʼdóó náʼáłnííʼ ké naazlá ádanízah.
28 Kótʼéego ádaalyaa: biiʼ táʼádígisí bá naaznil dooleełígíí dadeekı̨́ı̨́góó nihidadiiʼáhígíí éí bitaʼ gónaa dah naazkaadígíí biih daazʼá,
29 áko náshdóítsoh bitsiijįʼ daditłʼooígíí áádóó dóola índa diyingo nidaalʼaʼí chérabim wolyéii bidaʼalyaa; bikááʼ gónaa áádóó biyaa gónaa béésh łitsoii ałkʼídaasgizgo bee bikʼi nidaashchʼąąʼ.
30 Biiʼ táʼádígisí bá naazʼą́ą dooleełígíí tʼááłáʼí níʼánígo tsinaabąąs bijáád nahalingo áádóó bitaʼ nidaazʼáhígíí éí tʼáá áłah béésh łitsoii bee ádaalyaa; tʼáá dı̨́įʼgo naanídaazʼáhígóó biiʼ táʼádígisí bee niłdzil dooígíí naashchʼąąʼgo bídadiilyı̨́ı̨́ʼ.
31 Chʼah biih hodzánígíí nahalingo názbąs, áko éí dego tʼááłáʼídóó náʼáłnííʼ ké silá ánízah; biiʼ táʼádígisí bá naaznilii biih dahasdzą́ągo ályaaígi átʼéego názbąsgo ahénálchʼahgo ályaa, áádóó naakidi ké naazláádóó tááʼ dah alzhin bíighahgo yaago biih hoolʼá; biih hoodzánígíí bíighahgóó dah naazkaadígíí éí nidaaskʼęęʼgo nidaashchʼąąʼ áádóó éí doo nídaazbąs da, nidi dadikʼą́.
32 Biiʼ táʼádígisí bá naazʼą́ą dooleełígíí éí tsinaabąąs bijáád bá nidaazʼáhígíí bitłʼááhdóó bídiilyı̨́ı̨́ʼ; bijáád éí dı̨́įʼgo biyaadóó bąąh dah naaznilgo dego naakidi ké naazláádóó tááʼ dah alzhin ádanízah.
33 Tsinaabąąs bijáád naakiígíí bijáád ádaalyaaígi átʼéego dabijáád bitaʼ nidaazʼáhígíí áádóó binídaazʼáhígíí áádóó binídaneeskálígíí índa bitsiitsʼiin éí tʼáá átʼé ahídahidiilyı̨́ı̨́ʼ.
34 Biiʼ táʼádígisí bá siʼą́ą dooleełígíí dı̨́įʼgo naanídaazʼáhígóó bee niłdzil dooleełii éí dı̨́ı̨́ʼ, éí biiʼ táʼádígisí bá siʼą́ą dooleełígíí bił tʼáá łaʼ bizhiʼeego ályaa.
35 Áádóó biiʼ táʼádígisí bá siʼą́ą dooleełígíí bikáaʼgi dego náhástʼéí dah alzhin ánízahgo ahénálchʼah; éí biiʼ táʼádígisí bá siʼą́ą dooleełígíí bibąąhgóó ahéédaazʼáhígíí índa bitaʼ góneʼ naaztánígíí tʼáá łaʼ bizhiʼee ahídadiilyı̨́ı̨́ʼ.
36 Biiʼ táʼádígisí bá siʼą́ą dooleełígíí bibąąhgóó ahéédaazʼáhígíí índa bitaʼ góneʼ naaztánígíí binahjįʼ diyingo nidaalʼaʼí chérabim wolyéii áádóó náshdóítsoh bitsiijįʼ ditłʼooígíí índa tsin sikaadii páam wolyéii tʼáá ádaníłtsooígíí bikʼehgo nidaaskʼęęʼgo nidaashchʼąąʼ.
37 Ákótʼéego biiʼ táʼádígisí bá naaznilígíí neeznáá áyiilaa; éí tʼáá ałtso aheedaníłtsogo índa ahedaałtʼéego ahídahidiilyı̨́ı̨́ʼ.
38 Nááʼáłdóʼ béésh łitsoii biiʼ táʼádazdigisí neeznáá sinilgo áyiilaa; tʼááłáʼí biiʼ táʼádígisí éí hastą́ą́h tóshjeeh bíighahgo bee tó naazką́; biiʼ táʼádígisí éí hastą́ądi ké naazlá ádaníłtéél; biiʼ táʼádígisí bá naazʼą́ą dooígíí éí tʼááłáʼí níʼánígo biiʼ táʼádígisí tʼááłáʼí bikʼeh níʼą́.
39 Áádóó biiʼ táʼádígisí bá naazʼą́ą dooígíí kin biiʼ sohodizin siʼą́ą́dóó nishtłʼajígo ashdlaʼ niinínil, nishʼnáájígo ałdóʼ ashdlaʼ niinínil, áádóó kin biiʼ sohodizin siʼánígíí haʼaʼaahjígo shádiʼááhjí biiʼ táʼádígisí nitsaaígíí niiníʼą́.
40 Áko Háíram éí biiʼ táʼádazdigisí áádóó łeeshchʼiih bee hadahakaahí índa łeetsʼaaʼda áyiilaa. Áko Háíram éí díí tʼáá ałtso yinaashnishgo aláahgo naatʼáanii Sálaman yá ííléehgo Bóhólníihii bikin biiʼ sohodizin hadidzaa:
41 naaki ííʼáa dooígíí áádóó łeetsʼaaʼ nímazí nahalingo bílátah dah dooʼniłígíí naaki ííʼáii bílátahdi dah sinilgo áyiilaa índa naaki ałnánaneesdizgo yistłʼǫ́ǫgo ályaaígíí éí łeetsʼaaʼ nímazí nahalingo naaki ályaaígíí yikʼíístiʼgo neizhchʼąąʼ;
42 naaki ałnánaneesdizgo yistłʼónígíí bá dı̨́įdi neeznádiin pámgrenit aneestʼąʼ bééʼályaago neizhchʼąąʼ, éí naaki ííʼáhígíí tʼáá áłah bílátahgi łeetsʼaaʼ nímazí nahalingo ályaaígíí béésh łitsoii ahidiníłnádaoztʼiʼgo tʼáá ałʼąą pámgrenit ahąąh ahéénítʼiʼgo bináztʼiʼgo áyiilaa;
43 biiʼ táʼádazdigisí éí neeznáá áádóó bá naazʼánígíí ałdóʼ neeznáá;
44 biiʼ táʼádígisí nitsaaígíí índa biyaadóó dóola naakitsʼáadah naazı̨́įgo áyiilaa.
45 Áko ásaaʼ áádóó łeeshchʼiih bee hadahakaahí índa łeetsʼaaʼda éí Bóhólníihii bikin biiʼ sohodizin góneʼ chodaoʼínígíí tʼáá ałtso Háíram éí aláahgo naatʼáanii Sálaman yá áyiilaaígíí béésh łitsoii bídazdilidgo áyiilaa.
46 Jórdan tooh bíighahgi halgai hóteelgi aláahgo naatʼáanii bíniikʼehgo Sákath hazʼání áádóó Zárthan hazʼání bitaʼgi bis hólónígi béésh łitsoii doolyı̨́įʼgo chodaoʼíinii áyiilaa.
47 Sálaman éí łeetsʼaaʼ chodaoʼínígíí tʼáá átʼé tʼáadoo dah deidiyiiloʼ da, háálá tsʼídá tʼáá íiyisí tʼóó ahayóí; béésh łitsoii doolyı̨́įʼgoígíí dah hidédloʼ ánéelą́ą́ʼ tʼáadoo bééhoozin da.
48 Áko Sálaman bíniikʼehgo Bóhólníihii bikin biiʼ sohodizin biyiʼ góneʼ łeetsʼaaʼ chodaoʼínígíí tʼáá átʼé ályaa; óola bee bikááʼ nááʼiiniihí ályaa áádóó óola bee bikááʼ adání ályaago Diyin God bichʼįʼ bááh nááhániihii nináʼniłgo ályaa;
49 bee dahoolʼiní bá yadaaʼáa dooígíí óola tʼáá bízhání bee ádaalyaa; agháago hodiyingo hazʼánígíí bidááhjí bíighahgi nishʼnáájígo ashdlaʼ sinil áádóó nishtłʼajígo ashdlaʼ sinil; chʼilátah hózhóón áádóó tókǫʼí índa tsííd bee náhádláhí óola bee ádaalyaa,
50 łeetsʼaaʼ danímazí, kǫʼ bee nídahiniltsésí, biiʼ táʼádazdigisí, adeeʼ índa tsííd bee nidaakáhí éí óola tʼáá bízhání bee ádaalyaa; náwóneʼídi tsʼídá agháago hodiyingo hazʼánígíí bidáádílkał áádóó kin biiʼ sohodizin bidáádílkał ąą ánátʼįįh dooleełígíí tʼáá áłah óola bee ádaalyaa.
51 Kótʼéego aláahgo naatʼáanii Sálaman naashnishgo Bóhólníihii bikin biiʼ sohodizin ałtso áyiilaa. Áádóó Sálaman éí bizhéʼé David yę́ę diyingo niidiníʼánígíí, éí béésh łigaii áádóó óola índa łeetsʼaaʼda Bóhólníihii bikin biiʼ sohodizin bíighahgi yódí bá hooghan góneʼ hashtʼeʼniyiiznil.
