1 Kings 8:1-66
8 Áko Ízrel dineʼé aląąjįʼ naazíinii áádóó Ízrel ałʼąą dóoneʼé aląąjįʼ naazíinii éí dabizhéʼé yę́ę baʼáłchíní náás ahoolchíłígíí yá aląąjįʼ naazíinii danilı̨́įgo aláahgo naatʼáanii Sálaman wolyéii Jerúsalemgi yaa áłah áyiilaa; Bóhólníihii bitsitsʼaaʼ dílzinii bee ahaʼdeetʼáanii biiʼ sinilii David bikin haalʼáhídóó Dził Záíyan hoolyéhídóó chʼídeidooʼááł biniyé.
2 Áádóó Ízrel dineʼé diné danilínígíí tʼáá ałtso tʼáá bí hodílzingo áłah náʼádleeh góneʼ aláahgo naatʼáanii Sálaman yaa áłah silı̨́ı̨́ʼ; tsostsʼid nídízííd Ííthanim nídízídígíí binih dayiiłʼaʼ.
3 Áko Ízrel dineʼé aląąjįʼ naazíinii neheeskaigo náádaʼiiłniihii éí Bóhólníihii bitsitsʼaaʼ dílzinii nídeidiiʼą́.
4 Áádóó Bóhólníihii bitsitsʼaaʼ dílzinii índa níbaal biiʼ dahozdísinii áádóó łeetsʼaaʼ dadiyinii níbaal biiʼ hodílzinii biyiʼ chodaoʼínígíí éí náádaʼiiłniihii índa Líívai dineʼé áádę́ę́ʼ hadayiizhjaaʼ.
5 Áko aláahgo naatʼáanii Sálaman áádóó Ízrel dineʼé baa áłah silı̨́ʼígíí tʼáá bił tsitsʼaaʼ dílzinii bidááhdóó nijíkaigo dibé áádóó béégashii doo jóołtaʼ ánéelą́ą́ʼgóó didlidgo nááhániihii náádajiisniiʼ.
6 Áádóó náádaʼiiłniihii éí Bóhólníihii bitsitsʼaaʼ dílzinii bee ahaʼdeetʼáanii biiʼ sinilii kin biiʼ sohodizin biyiʼ tʼáá bá hazʼą́ąjįʼ tsʼídá agháago hodiyingo hazʼánígíí diyingo naalʼaʼí chérabim bitʼaʼ biyaajįʼ nideizʼą́.
7 Háálá diyingo naalʼaʼí chérabim bitʼaʼ tʼáá áłah tsitsʼaaʼ dílzinii bá hazʼánígíí yikʼijįʼ yiníłbaal áádóó chérabim bitʼaʼ éí tsitsʼaaʼ dílzinii índa tsin níyizii bee naʼatʼáhígíí ałdóʼ yikʼijįʼ yiníłbaal.
8 Áádóó tsin níyizii bee naʼatʼáhígíí éí nineezgo biniinaa tsʼídá agháago hodiyingo hazʼánígíí bidáahjigo hodiyingo hazʼánídóó yitʼı̨́, nidi tłʼóóʼdę́ęʼgo éí doo yitʼı̨́į da, áádóó éí díísh jı̨́įjįʼ tʼah tʼáá ákótʼé.
9 Tsé naakigo bikáaʼgi bikʼeh óʼooʼníiłii bee akʼeʼashchínígíí tʼéiyá tsitsʼaaʼ dílzinii biiʼ sinil; éí Mózes joolyéii Dził Hórebgi biih jíínil; Bóhólníihii éí Ízrel dineʼé yił ahaʼdeetʼą́; íídą́ą́ʼ Ííjip kéyahdę́ę́ʼ nááʼnéełgo ákóyiilaa.
10 Nítʼééʼ náádaʼiiłniihii hodiyingo hazʼą́ą́dę́ę́ʼ chʼékaigo Bóhólníihii bikin biiʼ sohodizin góneʼ kʼos niʼ nihisheegizh,
11 áko kin biiʼ sohodizin góneʼ kʼos niʼ nihisheegizhígíí biniinaa náádaʼiiłniihii doo nidaolʼaʼ átʼée da, háálá Bóhólníihii bee biʼoh hodidilyéehii Bóhólníihii bikin biiʼ sohodizin góneʼ hadeezbin.
Kin biiʼ sohodizin diyingo nideetʼą́ (2Chr. 6:1-7:10)
12 Áádóó Sálaman haadzíiʼgo ání, Bóhólníihii kóníi niʼ, Kʼos diłhił biiʼ honishłǫ́ǫ doo.
13 Áko Sálaman ázhdííniid, Tʼáá aaníí kin ayóó átʼé biiʼ kééhótʼı̨́į dooleełii ná áshłaa; éí biiʼ honílǫ́ǫgo ahóyéelʼáa doo.
14 Áádóó aláahgo naatʼáanii náhaayáago Ízrel dineʼé tʼáá ałtso áłah silı̨́ʼígíí yikʼijisdliʼ índa Ízrel dineʼé tʼáá ałtso deizįʼgo yikʼijisdliʼ,
15 áko ádííniid, Ízrel dineʼé biBóhólníihii Diyin God baa haʼniih leʼ; éí shizhéʼé David yę́ę yichʼįʼ yee haadzíʼígíí łaʼ yiyiilaago kóní,
16 Shidineʼé Ízrel éí Ííjip kéyahdę́ę́ʼ chʼíníʼeezh bijı̨́ı̨́dóó Ízrel dineʼé ałʼąą dóoneʼé danilíinii bikin hadaasʼáhígóó doo łahgo kin biiʼ sohodizin shá ádoolníiłgo biiʼ shízhiʼ baa haʼniih dooígíí doo bee hoołʼaʼ da, nidi David tʼéí shidineʼé Ízrel dineʼé binazhnitʼáa doo biniyé náhodiiłtı̨́.
17 Áko shizhéʼé David yę́ę díí bíniʼ nilı̨́ı̨́ nítʼééʼ: éí kin biiʼ sohodizin ádoolníiłgo biiʼ Ízrel dineʼé biBóhólníihii Diyin God bízhiʼ baa haʼniih doo, nízin nítʼééʼ.
18 Nítʼééʼ Bóhólníihii éí shizhéʼé David yę́ę áyidííniid niʼ, Kin biiʼ sohodizin ádíílíiłgo biiʼ shízhiʼ baa haʼniih dooígíí níniʼ nilı̨́ı̨́ nítʼééʼ yę́ę éí yáʼátʼéhígi átʼéego baa nitsísíníkééz.
19 Azhą́ ákótʼée nidi ni éí doo kin shá ádíílíił da, nidi niyeʼ tʼáá ni ná yizhchínígíí éí kin íidoolíiłgo biiʼ shízhiʼ baa haʼniih doo, níi niʼ.
20 Áko Bóhólníihii tʼáá bí bizaad yee haadzíʼígíí bohoolyaago shizhéʼé David yę́ę bitsáskʼehjįʼ ííyá áádóó Bóhólníihii yee haadzíʼígi átʼéego Ízrel dineʼé bá bikááʼdóó nahatʼáii bikááʼdóó dah nédá índa kin íishłaago biiʼ Ízrel dineʼé biBóhólníihii Diyin God bízhiʼ baa haʼniih doo.
21 Áko tsitsʼaaʼ dílzinii bá hazʼą́ą dooígi hashtʼehooshłaa; Bóhólníihii bibee ahaʼdeetʼáanii danihizhéʼé yę́ę yił ahadaʼdeestʼánígíí éí biiʼ sinil; Ííjip kéyahdę́ę́ʼ nááʼnéełgo yił ahadaʼdeestʼą́.
22 Nítʼééʼ Sálaman éí Bóhólníihii bibikááʼ nááʼiiniihí bidáahjigo Ízrel dineʼé áłah nilínígíí yinááł yiizįʼgo dego yáʼąąshjigo yadidiilniiʼ
23 áádóó ání, Ízrel dineʼé biBóhólníihii Diyin God nílíinii, yáʼąąshdi índa nahasdzáán bikáaʼgi nigi átʼéego diyin doo łaʼ hólǫ́ǫ da; ni tʼéiyá ná nidaalʼaʼí dabijéí tʼáá átʼé yee ninááł deíkáhígíí bee ahaʼdeetʼáanii áádóó aa aʼááh hasinii bił hashtʼeyínísin.
24 Ni éí ná naalʼaʼí shizhéʼé David yę́ę bee bichʼįʼ hahíínídzíʼígíí hashtʼeyínísin nítʼééʼ; tʼáá aaníí bee háínídzíiʼgo díí jı̨́ átʼéhígi átʼéego biʼiinilaa.
25 Éí bąą kʼad, Ízrel dineʼé biBóhólníihii Diyin God nílíinii, ná naalʼaʼí shizhéʼé David yę́ę bee bá nihwííníʼánígíí hashtʼeyínísin; jó, ábidííniid, Naʼáłchíní ádaa dahóyą́ągo tʼáá ni shinááł yínááł yę́ęgi átʼéego shinááł deíkáahgo Ízrel dineʼé bá bikááʼdóó nahatʼáii bikááʼdóó dah dínóodaałii tsʼídá doo łaʼ yiʼoh dínóolʼąął da.
26 Kʼad Ízrel dineʼé biDiyin God nílíinii, díí baa nánooshkąąh: ná naalʼaʼí shizhéʼé David yę́ę bichʼįʼ háínídzíʼígíí éí tʼáá aaníi leʼ.
27 Nidi Diyin Godísh tʼáá aaníí nahasdzáán yikáaʼgi kééhatʼı̨́į doo? Jó, yádiłhił índa yáʼąąsh tʼáá náhwiistʼą́ą́ nítʼééʼ doo nihóoghah da, índa díí kin ná áshłaaígíí ádiyooshéhí yeeʼ.
28 Ákótʼée nidi ná naalʼaʼí bisodizin áádóó náʼookąąhgo yíísíníłtsʼą́ą́ʼ, Bóhólníihii shiDiyin God nílíinii, díí jı̨́ ná naalʼaʼí nichʼįʼ náʼookąąhgo sodoolzingo bá disínítsʼą́ą́ʼ,
29 áko tłʼéeʼgo áádóó jı̨́įgo díí kin siʼánígi shízhiʼ baa haʼniih doo, dííníniid yę́ę bikʼi díníʼı̨́įʼ doo, áko ná naalʼaʼí díí hazʼánígíí yichʼįʼgo déezʼı̨́įʼgo nichʼįʼ sonídílzįįhgo bá nídiitsʼı̨́įh dooleeł.
30 Ná naalʼaʼí áádóó nidineʼé Ízrel kojįʼ dadéezʼı̨́įʼgo nichʼįʼ nídaʼookąąhígíí yíísíníłtsʼą́ą́ʼ; yáʼąąshdi honílónídę́ę́ʼ íísíníłtsʼą́ąʼgo ádił nidaʼiisíihgo bá yóóʼahidíʼaah doo.
31 Diné łaʼda yił kééhatʼíinii yichʼįʼ bee hazʼáanii kʼíinítiʼgo éí ádee habidiʼyooldzíiʼgo díí kin biiʼ bikááʼ nááʼiiniihí bidááhdóó nidoogáałgo ádee hadidoodzihgo
32 yáʼąąshdi didíítsʼı̨́įłgo ná naalʼaʼí nidiltʼéhígíí tʼáá haʼátʼéegoda ádíílíiłgo baa nídíítʼįįł; doo yáʼáshǫ́ǫ́góó ádzaaígíí yá ninádootłishgo bee bá nihodííʼááł, índa tʼáá ákogi ááníiłii éí bitʼáá ákogi átʼéii bikʼehgo bikʼijiidíídliił.
33 Nidineʼé Ízrel nichʼįʼ nidaʼiisíiʼgo biniinaa biʼanaʼí bikʼeh dadeesdlı̨́įʼgo áádóó nízhiʼ dayózhíigo nichʼįʼ ninákaigo índa díí kin biyiʼ nídaʼookąąhgo sodadilzingo
34 yáʼąąshdi didíítsʼı̨́įłgo nidineʼé Ízrel nidaʼiisíʼígíí bá yóóʼadidííʼááł áádóó dabizhéʼé yę́ę kéyah baa dííníʼánígíí áajįʼ ninádííʼish.
35 Nidineʼé Ízrel nichʼįʼ nidaʼiisíiʼgo biniinaa níłtsą́ nihééʼniʼ áádóó bichʼįʼ nidahoyíníłnáaʼgo díí hazʼánígíí yichʼįʼgo dadéezʼı̨́įʼgo nichʼįʼ sodadilzingo índa nízhiʼ dayózhíigo nidaʼiisíʼígíí yitsʼą́ąjigo ninákaigo
36 yáʼąąshdi didíítsʼı̨́įłgo ná nidaalʼaʼí éí nidineʼé Ízrel yáʼátʼéehgo honítʼiʼgóó deíkáah dooígíí bee nanítingo nidaʼiisíʼígíí bá yóóʼahidíʼaah doo, índa kéyah daabííʼ dooleełgo nidineʼé baa dííníʼánígíí bikʼijįʼ nidahodoołtı̨́ı̨́ł.
37 Kéyah bikááʼgóó hodííchįįdgo, doodaiiʼ nidahałniihgo, doodaiiʼ nídahooltseigo, doodaiiʼ dláád dahazlı̨́įʼgo, doodaiiʼ nahachagiitsoh dahazlı̨́įʼgo, doodaiiʼ chʼosh ditłʼooí dahazlı̨́įʼgo, doodaiiʼ bikéyahdóó kin hadaasʼáhígíí łaʼ biʼanaʼí yináshzhiizhgo, tʼáá haʼátʼíhída atíʼoolíiłii bidadeesnaʼgo, tʼáá haʼátʼíhída naałniih baa níłniiʼgo,
38 tʼáá háiida diné łaʼ, doodaiiʼ nidineʼé Ízrel tʼáá átʼé éí bijéí biyiʼdi bee bichʼįʼ nidahwiiʼnánígíí bił béédahózingo áádóó díí hazʼáníjįʼ dah dadéelníihgo sodadilzingo áádóó nídaʼookąąhgo
39 yáʼąąshdi kééhótʼı̨́įdi didíítsʼı̨́įłgo nidaʼiisíʼígíí bá yóóʼahidíʼaah doo áádóó tʼááłáʼí nítínígo diné dabijéí nił bééhózingo bá dahonítʼiʼ bikʼehgo bá ádadííliił; (háálá tʼáá ni tʼéiyá nihokááʼ dineʼé tʼáá ałtso dabijéí nił bééhózin;)
40 éí danihizhéʼé yę́ę kéyah baa dííníʼánígíí yikááʼ tʼáá abídayiiską́ bijı̨́įjįʼ dandósin doo biniyé ákódíínííł.
41 Áádóó ałdóʼ déʼéyóní łaʼ doo Ízrel dineʼé nilíinii nízhiʼ ayóó átʼéii biniinaa kéyah nízaadę́ę́ʼ níyáago,
42 (háálá nízhiʼ ílı̨́įgo wójíii áádóó ayóó ánóodziilii índa nigaan bee kʼídíínílniiʼgo yaa dahodidootsʼı̨́ı̨́ł;) éí níyáago díí hazʼánígíí yichʼįʼgo déezʼı̨́įʼgo nichʼįʼ sodidoolzįįłgo
43 yáʼąąshdi kééhótʼı̨́įdi didíítsʼı̨́ı̨́ł áádóó déʼéyóní níyókeedígíí tʼáá ałtso bá biʼdíílííł, áko díí tʼáá nidineʼé Ízrel nízhiʼ deidósinígi átʼéego nihokááʼ dineʼé tʼáá átʼé dandósin doo áádóó díí bił béédahózin: díí kin áshłaaígíí nízhiʼ bee wójí.
44 Nidineʼé biʼanaʼí danilíinii yichʼįʼ dahidibáahgo índa tʼáá háájída hidíłʼáago kin haalʼá nidííníʼánígíí bichʼįʼgo áádóó kin éí nízhiʼ bee wójíigo íishłaaígíí yichʼįʼ dadéezʼı̨́įʼgo Bóhólníihii yichʼįʼ sodadilzingo
45 yáʼąąshdi bisodizin índa bináʼookąąh bá didíítsʼı̨́įłgo índa yiniyé ádaaníinii bá bichʼą́ą́h nihidiʼniłʼáa doo.
46 Nichʼįʼ ádił nidaʼiisíihgo, (jó, diné tʼáá ałtso nidaʼiisííh,) áko hachʼįʼ náhóóchįįdgo áádóó hweʼanaʼí baa hodidííʼáałgo, áko dahodoołnéełgo bikéyahgóó éí nízaadgóó, doodaiiʼ áhą́dígóoda ákǫ́ǫ́ adahodínóołkałgo,
47 nidi éí kéyahgóó yisnááh ádahoʼdiilyaa yę́ędi hajéítłʼáahdi łahgo átʼéego tsíńdazdookosgo áádóó dahasnánígíí bikéyahdi nichʼįʼ nídaʼjookąąhgo kódajiníigo, Nidaʼayeelzííʼ áádóó doo ádahwiilyą́ą́góó doo yáʼáshǫ́ǫ́góó ádeiitʼįįd;
48 hwedaʼanaʼí éí dahasnánígíí bikéyahdi hániʼ tʼáá átʼé bee índa hajéí tʼáá átʼé bee łahgo átʼéego tsíńdazdookosgo áádóó bikéyah éí dabizhéʼé yę́ę baa dííníʼánígíí índa kin haalʼá nidííníʼánígíí áádóó kin nízhiʼ bee wójíigo áshłaaígíí yichʼįʼ dadéezʼı̨́įʼgo nichʼįʼ sodadilzingo
49 yáʼąąshdi kééhótʼı̨́įdi bisodizin áádóó bináʼookąąh didíítsʼı̨́ı̨́ł áádóó yiniyé ádaaníinii bá bichʼą́ą́h nihidiʼniłʼáa doo,
50 áádóó nidineʼé nichʼįʼ ádił nidaʼiisíʼígíí áádóó bee hazʼáanii nidayiitíihgo yee nichʼįʼ ádáátʼįįdígíí bá yóóʼahidíʼaahgo dabisnánígíí binááł haa aʼááh díníízįįł, áko haa aʼááh dadínóozįįł,
51 háálá nidineʼé danilı̨́ áádóó nííʼ danilı̨́; éí kǫʼ hózhdínił nahalingo Ííjip kéyahdi achʼįʼ nahwiiʼná binííʼdę́ę́ʼ háíníʼeezh.
52 Áko níníłʼı̨́įgo ná naalʼaʼí índa nidineʼé Ízrel yaa nídanookąąhii yee nichʼįʼ ádaaní bá yísíníłtsʼą́ąʼgo bináʼookąąhígíí tʼáá ałtso baa ákonínízin doo.
53 Jó, Ííjip kéyahdę́ę́ʼ danihizhéʼé háíníʼeezh yę́ędą́ą́ʼ nihokááʼ dineʼé tʼáá átʼé bitahdóó nííʼ dooleeł biniyé ná naalʼaʼí Mózes bichʼįʼ bee háínídzíʼígíí bikʼehgo atsʼáhodííníʼą́, Bóhólníihii Diyin God nílíinii.
54 Ákohgo Sálaman éí Bóhólníihii yichʼįʼ náʼookąąhgo ałtso sodoolzingo, Bóhólníihii bibikááʼ nááʼiiniihí bidááhdóó yáʼąąshjigo dah doolnihgo nitsidéesgoʼ yę́ędóó nídiiʼnaʼ.
55 Áádóó yiizįʼgo Ízrel dineʼé tʼáá átʼé yikʼijisdliʼgo chánahgo haadzíiʼgo ání,
56 Bóhólníihii baa haʼniih leʼ; bidineʼé Ízrel yee yá nihoníʼánígíí tʼáá átʼé bikʼehgo hááʼáyı̨́ı̨́h yeidiníʼą́; bá naalʼaʼí Mózes yę́ę bá yáłtiʼgo yáʼátʼéehii yee nihwiizʼánígíí tʼááłáʼí nidi tʼáadoo bee biʼohí tʼáá ałtso bohoolyaa.
57 Bóhólníihii nihiDiyin God tʼáá nihizhéʼé yił hólǫ́ yę́ęgi átʼéego nihił hólǫ́ǫ doo, áko doo tʼóó nihiʼdoołnihgo yóóʼanihididooʼáał da.
58 Áko Bóhólníihii nihá niyiizlaʼ yę́ę bikʼehgóó deíníikáah doo áádóó bibikʼeh óʼooʼníiłii áádóó yee nihwiizʼáanii índa yee nihodiiʼaahii éí danihizhéʼé bichʼįʼ bee hahínídzíʼígíí bikʼeh dahoniilʼı̨́į doo biniyé danihijéí bee bídin daniidlı̨́įgo ánihósin doo.
59 Bóhólníihii bichʼįʼ díí saad bee náʼiisékanígíí bíniʼ Bóhólníihii Diyin God áhánígi tłʼéeʼgo áádóó jı̨́įgo hólǫ́ǫ doo, áko tʼáá hoolzhish bikʼehgo bá naalʼaʼí áádóó bidineʼé Ízrel yiniyé ádaaníinii bá bichʼą́ą́h nihidiʼniłʼáa doo,
60 áko nihokááʼ dineʼé tʼáá átʼé éí Bóhólníihii Diyin God nilı̨́įgo áádóó doo łaʼ nááhódlǫ́ǫ dago bił béédahodoozįįł.
61 Éí bąą Bóhólníihii nihiDiyin God yee nihwiizʼáanii bikʼehgo deínóhkáahgo áádóó bibikʼeh óʼooʼníiłii bikʼeh dahonołʼı̨́įgo díí jı̨́ átʼéhígi átʼéego danihijéí doo naaki nilı̨́ı̨́góó bee Bóhólníihii bichʼįʼ ádanohtʼée leʼ.
62 Nítʼééʼ aláahgo naatʼáanii áádóó Ízrel dineʼé tʼáá átʼé tʼáá bił Bóhólníihii bichʼįʼ didlidgo nááhániihii náádadziisniiʼ.
63 Áádóó Sálaman hózhǫ́ǫ́jí nááhániihii nááyiisniiʼgo éí naadiin naakidi mííl béégashii índa neeznádiindóó baʼaan naadiindi míilgo dibé éí Bóhólníihii bichʼįʼ didlidgo nááyiisniiʼ. Áko aláahgo naatʼáanii áádóó Ízrel dineʼé tʼáá ałtso éí Bóhólníihii bikin biiʼ sohodizin diyingo nideideezʼą́.
64 Tʼáá éí bijı̨́ aláahgo naatʼáanii éí Bóhólníihii bikin biiʼ sohodizin bidááhdę́ęʼgo nahanííʼ hazʼánígi diyingo atsʼáidiníʼą́; ákwii didlidgo nááhániihii índa akʼáán nááhániihii áádóó hózhǫ́ǫ́jí akʼah nááhániihii nááyiisniiʼ, háálá didlidgo nááhániihii áádóó akʼáán nááhániihii índa hózhǫ́ǫ́jí akʼah nááhániihii éí Bóhólníihii bidáahgi béésh łitsoii bikááʼ nááʼiiniihí bikááʼ doo hózhǫ́ bihóoghah da.
65 Íídą́ą́ʼ Sálaman áádóó Ízrel dineʼé tʼáá ałtso éí Héímath yah ahóótʼiʼdóó Ííjip tooh nílíníjįʼ diné kéédahatʼínígíí tʼóó ahayóí yił áłah silı̨́įʼgo Bóhólníihii yidááhdóó tsostsʼid yiską́ąjįʼ áádóó tsostsʼid nánéíską́ąjįʼ, tʼáá éí dı̨́ı̨́ʼtsʼáadah yiską́ąjįʼ hodílzingo áłah nádleeh.
66 Tseebíí yiską́ąjįʼ diné dabighangóó yééʼiisniiʼ, áko aláahgo naatʼáanii yáʼátʼéehii yee yá hadaasdzííʼ índa Bóhólníihii éí yáʼádaatʼéehii tʼáá átʼé bá naalʼaʼí David yę́ę áádóó bidineʼé Ízrel yá yaa naayáhígíí yaa bił dahózhǫ́ǫgo índa bijéí bił nidahoozhǫǫhgo dabiníbaalgóó anídahaaskai.
