1 Kings 9:1-28
9 Nítʼééʼ Sálaman éí Bóhólníihii bikin biiʼ sohodizin áádóó aláahgo naatʼáanii bighan índa ádeeshłííł nízinígíí tʼáá ałtso bił hóshǫ́ǫgo ííléehgo ałtso áyiilaago,
2 Gíbiyandi Bóhólníihii éí Sálaman yichʼįʼ yitʼíní íʼdiilyaa yę́ęgi átʼéego yichʼįʼ yitʼíní ínááʼdiilyaa.
3 Áko Bóhólníihii ábíłní, Shichʼįʼ sodíínílzinígíí áádóó náʼiisíníkanígíí disétsʼą́ą́ʼ: díí kin hoolʼáágóó shízhiʼ bee wójíii íinilaaígíí diyingo íishłaa; tʼáá áłahjįʼ haasíid doo índa shijéí tʼáá átʼé bee ákwii honishłǫ́ǫ doo.
4 Áádóó tʼáá nizhéʼé David yę́ę shinááł naayáhígi átʼéego nijéí doo binaʼadloʼgóó áádóó tʼáá ákóneʼ ánítʼéego shinááł yínáałgo áádóó bee nichʼįʼ haasdzíʼígíí bikʼeh honíłʼı̨́įgo ááníiłgo índa bee nihoníʼáanii áádóó bee nihodiishʼaahii baa honíyáago
5 Ízrel dineʼé bá hootʼáałii hoolʼáágóó bikááʼdóó nanítʼáii niłdzilgo ádeeshłííł, tʼáá nizhéʼé David yę́ę baa diníʼánígi átʼéego kódíshníigo, Naʼáłchíní náás ahoolchíiłii ninahjįʼ doo Ízrel bá bikááʼdóó nahatʼáii yiʼoh dínóolʼąął da.
6 Nidi ni, doodaiiʼ naʼáłchíní shikééʼ deínóhkáhígíí bitsʼą́ąjigo dah doohkaigo shibikʼeh óʼooʼníiłii índa bee nihoníʼáanii nihidáahgi nihá niníláhígíí doo bikʼeh dahonołʼı̨́ı̨́góó áádóó diyin dabidiʼníinii łaʼ bá nidaałʼaʼgo índa bichʼįʼ nidahołáago,
7 áko Ízrel dineʼé kéyah baa diníʼánígíí bitsʼą́ąjįʼ kóhodeeshłííł, áádóó shízhiʼ baa haʼniih doo biniyé díí kin diyingo áshłaaígíí chʼíhideeshxą́ąłgo doo nááyideestséeł da, índa dadineʼé tʼáá átʼé bitahgóó Ízrel dineʼé há nidahatʼiʼgo áádóó haa niyáʼáhoʼditiʼii dajílı̨́įgo áhodeeshłííł,
8 áádóó díí kin éí aláahdi átʼéhígíí yíighah dah hidikáhígíí tʼóó bił adahayóigo, Tłehee yéiʼ, daaníi doo, áádóó kódaaníi doo, Haa léitʼéego Bóhólníihii díí kéyah áádóó díí kin kóyiilaa lá?
9 Áko ádadidooniił, Bóhólníihii haDiyin God éí Ííjip kéyahdę́ę́ʼ dahazhéʼé yę́ę chʼíiníʼeezhígíí baa dajiyooznah, áko diyin dabidiʼníinii dajiiłtsoodgo bichʼįʼ nidahojiłá índa bá nidajilʼaʼ; éí biniinaa Bóhólníihii éí díí doo yáʼáshóonii tʼáá átʼé hakʼijįʼ kóyiilaa.
Sálaman nááʼáłdóʼ yaa nináánásdzáhígíí (2Chr. 8:1-18)
10 Áko Sálaman naadiin nááhaijįʼ kin naakigo éí Bóhólníihii bikin biiʼ sohodizin áádóó aláahgo naatʼáanii bighan ałdóʼ ałtso áyiilaago,
11 (nítʼééʼ Táirdóó aláahgo naatʼáanii Háíram éí Sálaman dilkʼis tsin áádóó tsin sáípres wolyéhígíí índa óola tʼáá yinízinígi ánéelą́ąʼgo yąąh niyiizyı̨́,) áko Sálaman éí Gálilii kéyahdi naadiingo kin haalʼáii Háíram yeidiníʼą́.
12 Áko Háíram éí kin hadaasʼáii Sálaman haa yidiníʼánígíí jidínóołʼįįłgo Táirdę́ę́ʼ jiníyá; nítʼééʼ doo hoł yáʼíítʼéeh da.
13 Áko ání, Díísh haʼátʼíí kin hadaasʼáii shı̨́ı̨́ átʼéego shaa dííníʼą́, shikʼis? Áádóó éí kéyahígíí Kéíbul yee yiyíízhiʼgo díí jı̨́įjįʼ ákótʼéego wójí.
14 Íídą́ą́ʼ Háíram éí aláahgo naatʼáanii óola tʼááłáhídi neeznádiindóó baʼaan naadiin tálent* bíighahgo yichʼįʼ áyiilaa.
15 Aláahgo naatʼáanii Sálaman éí Bóhólníihii bikin biiʼ sohodizin áádóó tʼáá bí bighan áádóó Míllo hoolyéii áádóó Jerúsalem ditą́ągo binaa ahééʼítłʼinígíí áádóó Héízar áádóó Megído índa Gíízer kin hadaasʼáii ádadoolnííł biniyé naanish bíʼnílchéehii yihodeezʼą́.
16 Háálá bítséédą́ą́ʼ Ííjip dineʼé aláahgo binanitʼaʼí Féro éí Gíízer kin haalʼáii yisnáago yidííłid áádóó Kéínan dineʼé ákwii kéédahatʼínígíí neistseedgo kin haalʼáhígíí aʼílyé biniyé bitsiʼ Sálaman beʼasdzą́ą́ yeidiníʼą́.
17 Sálaman éí Gíízer kin haalʼáii áádóó Beth-hóran wóyahdi kin haalʼáii náhóółbįʼ.
18 Júdah kéyahgi halgaidi Béíyalath índa Tádmor kin haalʼáii ałdóʼ áyiilaa,
19 áádóó Sálaman éí kin hadaasʼáhígíí biiʼ nooh nídaʼachíhígíí índa tsindaabąąs bijáád naakiígíí biih nídaabąsígíí áádóó łı̨́ı̨́ʼ bee nidaʼabaahii dabighan índa Jerúsalemgi áádóó Lébanangi índa kéyah bee hóhólníhígíí tʼáá jinízingóó ákǫ́ǫ́ yá dahasbįʼ.
20 Áko Ámor dineʼé áádóó Het dineʼé áádóó Píírez dineʼé áádóó Háíva dineʼé índa Jííbas dineʼé tʼáá ałtso daadzíʼígíí doo Ízrel dineʼé danilı̨́į dago
21 éí badaʼáłchíní díí kéyah biyiʼ daadzíʼígíí ałtso Ízrel dineʼé nidabidoołtsiłgi tʼáadoo yídanéésʼąąd daígíí Sálaman hanaalteʼ danilı̨́į dooleełgo ádá nízhdiinil, áádóó díí jı̨́ı̨́góó ákótʼé.
22 Áko Sálaman éí Ízrel dineʼé tʼáadoo binaalteʼ áyiilaa da, nidi diné nidaabaahii áádóó bá nidaalʼaʼí, naatʼáanii, siláo yindanitʼaʼí índa tsindaabąąs bijáád naakiígíí áádóó łı̨́ı̨́ʼ yee nidaabaahii yee bídahólníihii danilı̨́įgo niinínil.
23 Díí Sálaman binaanish naatʼiʼgi aląąjįʼ naazı̨́įgo bídahólnííh nítʼééʼ; éí ashdladi neeznádiindóó baʼaan ashdladiin ánéelą́ąʼgo diné nidaalnishígíí yindantʼáá nítʼééʼ.
24 Féro bitsiʼ éí David bikin haalʼáádę́ę́ʼ níyáago Sálaman kin há áyiilaii biih jíínáádóó bikʼijįʼ índa Míllo hoolyéii áyiilaa.
25 Áádóó Sálaman éí Bóhólníihii bichʼįʼ bikááʼ nááʼiiniihí ájiilaaígi bikááʼdóó didlidgo nááhániihii áádóó hózhǫ́ǫ́jí nááhániihii táadi náájiilnih tʼááłáʼí nínáhahjįʼ áádóó Bóhólníihii binááł bikááʼ nááʼiiniihí bikááʼ didlidgo łikání halchin nízhdíłiʼ. Kótʼéego kin ałtso ájiilaa.
26 Íídam kéyahdi Tónteel Łichííʼ bibąąhgóó Íílath bíighahgi Ííziyan-gííbergi aláahgo naatʼáanii Sálaman éí tsinaaʼeeł ląʼí ádayiilaa.
27 Áádóó Háíram bá nidaalʼaʼí éí tónteel bikááʼ naʼalʼeeł bił béédahózinígíí éí Sálaman bá nidaalʼaʼí yił táłkááʼgóó tsinaaʼeeł biyiʼ nidaalnish doo biniyé dayííłʼaad.
28 Áko éí Ófer hoolyéedi bił daʼníʼéél, áádóó óola dı̨́įdi neeznádiindóó baʼaan naadiin tálent bíighahgo shódajostʼeʼ, índa éí aláahgo naatʼáanii Sálaman baa dadziizyı̨́.
Footnotes
^ Tálent wolyéhígíí tsostsʼidiindóó baʼaan ashdlaʼ dah hidiidloh bíighahgo daatsʼí óolyé.
