1 Peter 3:1-22
3 Tʼáá ákótʼéego, eʼasdzą́ą́ danohłíinii, nihadahastiin bídahwíínółnííh. Łaʼ Diyin God bizaad doo yikʼeh dahółʼı̨́į da nidi beʼasdzą́ą́ yáʼátʼéehgo dahinánígíí binahjįʼ daʼiidoodląął. Azhą́ tsʼídá doo haʼátʼíhída dabidohníi da nidi,
2 tʼáadoo bee nihikʼídahótʼahígóó áádóó dahodíínóhsingo dahinohnánígíí dayooʼı̨́įgo bí ałdóʼ daʼiidoodląął.
3 Tʼáadoo nihikááʼdóó átʼéii dadíínóhshóní. Nihitsiiʼ tʼáadoo ayóogo nidaahchʼąąhí, áádóó óola bee naʼádíchʼąąhii, índa ééʼ nidaashchʼąąʼii bee ádadíínółzhóní biniyé tʼáadoo bee háádadoohtʼįįhí.
4 Nidi tʼáá aaníí nihiyiʼdi átʼéii dadíínóhshóní. Aʼohgo ádaʼdíínółzin, áádóó tʼáadoo ádił nídahodołchiłí. Ákódanohtʼéego Diyin God tʼáá íiyisí bił nilı̨́.
5 Ałkʼidą́ą́ʼ sáanii dahodísinii Diyin God yaa dadzólíhígíí ákótʼéego ádadílzhóní nítʼééʼ, badahastiin yídahółnííh nítʼééʼ,
6 Sarah éí Éíbraham bóhonishníihii yiłníigo yikʼeh hółʼı̨́ yę́ęgi átʼéego. Áko nihí ałdóʼ, yáʼátʼéehgo ádaahníiłgo, áádóó tʼáadoo nihił yééʼ ádahóleʼígóó Sarah bikʼehgo ádaahtʼı̨́į doo.
7 Tʼáá ákótʼéego, ahastiin danohłíinii, nihidaʼasdzą́ą́ hazhóʼó baa nitsídaahkeesígíí bikʼehgo bił dahinohná, háálá asdzání wolyéii nihiʼohgo bidziilígíí bąą nihił danilı̨́, háálá tʼáá aheełtʼéego iiná bee nihaa hojoosbaʼígíí bee dahinohná. Kótʼéego dahinohnáago sodołzingo nihisodizin doo dínóotłʼah da.
Yáʼátʼéehgo ájooníłígíí bąą tiʼhodiʼyoolnííh
8 Áko ánihidishní, Aheełtʼéego nitsídaahkees, ahaa aʼááh danohsin, ałkʼisóó danohłı̨́įgo ayóóʼádaʼahíínóhʼní, nihá ádahwiinítʼı̨́ʼígo, índa aʼohgo ádaa nitsídaahkees.
9 Nihichʼįʼ doo yáʼátʼééhgóó ádaatʼíinii tʼáadoo bichʼįʼ doo yáʼátʼééhgóó ánídaahtʼíní, áádóó danihódziihgo tʼáadoo nídeínóhdziihí, nidi bidiníná tʼóó bá sodadołzin, háálá bee akʼihojidlíii Diyin God yee nihikʼizhdoodliił biniyé nihíká ádííniid.
10 Háálá iiná bee níʼdeeshdįįłínda yáʼátʼéehgo shíyoołkáał dooleeł jinízinígíí,saad doo adaaníinii tʼáadoo bee yájíłtiʼí,índa tʼáadoo naʼadloʼgo yájíłtiʼí doo.
11 Doo yáʼádaatʼéehii bitsʼázhdoogáałgo yáʼátʼéehii baa nijigháa doo;bee achʼįʼ hózhǫ́ náhásdlı̨́įʼii hájítʼı̨́įgo, dziilí bee bíká ájítʼı̨́į doo.
12 Háálá tsʼídá tʼáá ákogi ádajítʼéii Bóhólníihii hakʼidéezʼı̨́ı̨́ʼ,áádóó bichʼįʼ sodazdilzingo hwíistsʼą́ą́ʼ.Nidi doo yáʼátʼééhgóó ádajooníiłii éí Bóhólníihii honíłʼı̨́įgo hakʼijįʼ nilı̨́.
13 Tsʼídá yáʼádaatʼéehii tʼéiyá baa naasháa dooleeł danohsinígíí, háishąʼ yiniinaa atínihidoolííł?
14 Azhą́ tsʼídá tʼáá ákogi ádaahtʼínígíí biniinaa tiʼdahoohníih nidi, nihikʼidahojidlíigo átʼé. Áádóó yee ił dahółhéeʼii tʼáadoo bikʼee nihił daayéʼí, índa tʼáadoo ádił dahonohdlání.
15 Nidi nihijéí tłʼááhdę́ę́ʼ Christ nihiBóhólníihii nilı̨́įgo nihił dadiyin doo. Biniyé nihił chodahooʼínígíí éí diné łaʼda yíndanihídíłkidgo bee bił nídahodoołnihígíí áłahjįʼ bee hashtʼeʼádaʼdíínółzin, ákondi aʼohgo ídaʼdíínółzingo índa Diyin God dadíínóhsingo bił dahołneʼ.
16 Doo yáʼátʼééh ádaatʼı̨́į da danihiłníi nidi, doo ádaahtʼı̨́ı̨́góó baa ákodanohsin leʼ, áko Christ bee yáʼátʼéehgo dahinohnánígíí nihąąh deiʼı̨́įgo nichǫ́ʼógo nihaa yádaałtiʼii ádaa yádadínóodzįįł.
17 Háálá Diyin God íinízingo yáʼátʼéehgi ádaahtʼı̨́įgo biniinaa tiʼdahoohníhígíí éí yáʼátʼééh, nidi doo yáʼátʼéehgi ádaahtʼı̨́ı̨́góó biniinaa tiʼdahoohníhígíí éí doo yáʼátʼéeh da.
18 Christ tʼááłáhídi ałtso nihá łazhʼdoolíiłgo tʼáá hó hwee Diyin God baa náhidiikah biniyé tsʼídá tʼáá ákogi ájítʼéii éí doo tʼáá ákwii ádaatʼíinii bá dadziztsą́. Hatsʼíís seesyı̨́, nidi Níłchʼi Diyinii bee jiináago áhoʼdiilyaa.
19 Tʼáá éí bee ałdóʼ daneeznáanii biníłchʼi dabiʼdótąʼii baa hozhníleʼgo bił nahojisneʼ.
20 Tʼáá átséedi Nóah tsinaaʼeeł ííléehgo yoołkááł yę́ędą́ą́ʼ Diyin God doo yikʼeh dahółʼı̨́ı̨́góó bił nahojisneʼ. Íídą́ą́ʼ Diyin God chʼééh bibaʼ haʼólníigo hoolzhiizh. Diné tʼáá díkwíí tsinaaʼeeł biih jookai, tʼáá tseebíjíltʼéhégo tó bee yisdájookai.*
21 Tʼáá éigi átʼéego kʼad tó bee alzı̨́hígíí éí Jesus Christ daaztsą́ą́dę́ę́ʼ náábiʼdiilzáii bee yisdájiikáhígíí yaa halneʼ, tʼóó tó bee hatsʼíís chin bąąh táádaagisgo éí dooda, nidi, Tʼáá ákogi ááshníiłgo bee ádaa ákonisdzingo áshílééh, dajiníigo Diyin God baa nídajookąąh.
22 Jó, Christ yáʼąąshgóó anáádzáago Diyin God yinishʼnáájí dah sidá, áadi diyingo nidaalʼaʼí áádóó bídahólníihii índa ayóó ádabóodziilii bídahółnííh.
Footnotes
^ Tsinaaʼeeł éí tó bikááʼ dah naaʼeełgo bee yisdájookaigo ááhyiłní. Gen. 6:1-7:24; 2Pet. 2:4.
