1 Samuel 1:1-28
1 Dził Íífreiyimdi Reimathéíyim-zófim kin shijaaʼdóó diné léiʼ Elkéínah wolyé; éí Jiiróham biyeʼ, Jiiróham éí Iiláíhu biyeʼ, Iiláíhu éí Tóhu biyeʼ, Tóhu éí Íífreiyim dineʼé Zuf biyeʼ jílı̨́.
2 Éí hweʼasdzą́ą́ naaki, łaʼ éí Hánnah wolyé, łaʼígíí éí Piinínah wolyé. Áko Piinínah baʼáłchíní hólǫ́, nidi Hánnah éí baʼáłchíní tʼah doo haleeh da.
3 Díí diné éí tʼáá nináháhááh bikʼeh hakin shijaaʼdóó Sháíloh hazʼáníjįʼ ałnáájídááh nítʼééʼ. Tʼáá ałtsoní bee Bóhólníihii bichʼįʼ nináhojiłaah doo áádóó bichʼįʼ nááʼjiiłniih doo biniyé ałnáájídááh. Ákwii Íílai biyeʼ Háfnai índa Fíniyas éí nááʼiiłniihii nilı̨́įgo Bóhólníihii yá naalʼaʼ.
4 Áko Elkéínah náázhdiʼyoołnihjįʼ anéíłkáahgo hweʼasdzą́ą́ Piinínah índa biyáázhké áádóó bichʼéʼéké tʼáá ałtso éí náájiiłniihígíí łahjįʼ baa nízhdíʼááh,
5 nidi Hánnah éí tʼáá doozhǫǫgo baa nízhdíʼááh, háálá ayóóʼájóʼní, nidi Bóhólníihii éí Hánnah doo ałchíígóó áyósin.
6 Bóhólníihii éí doo ajiłchíígóó áhósinígíí bąą hade íinízinii* hwéʼétsʼihgo áhósin.
7 Ákohgo tʼáá nináháhááh bikʼeh Bóhólníihii bikin biiʼ sohodizingóó* ałnáájíkahgo Piinínah éí Hánnah yéʼétsʼihgo tsʼádoolnihgo áyiilaa. Éí bąą Hánnah éí doo ajóyą́ą́ʼ átʼéégóó tʼóó jicha.
8 Áko hahastiin Elkéínah áhodííniid, Hánnah, haʼátʼíísh baa nicha? Haʼátʼíísh biniinaa doo íyą́ą da? Haʼátʼéegoshąʼ doo nił hózhǫ́ǫ da? Niyáázhké neeználtʼéego éí biláahgoósh shí doo nił yáʼáníshtʼéeh da?
9 Ákohgo Sháíloh hazʼánígi daʼjííyą́ą́ʼ índa doodlı̨́įłii dajoodlą́ą́ʼdóó bikʼijįʼ Hánnah nízhdiiʼnaʼ. Áko nááʼiiłniihii Íílai éí Bóhólníihii bikin biiʼ sohodizinii bichʼéédą́ąʼgi dah sidá.
10 Áko Hánnah tʼáá íiyisí yínííł jílı̨́įgo Bóhólníihii bichʼįʼ sozdoolzin áádóó jicha.
11 Áko ádee hadzoodzíiʼgo ádee nihozhdeetʼaahgo ázhdííniid, Tʼáá ałtsoní bee Bóhólníihii nílíinii, íinínízingo shí ná naalʼaʼí nishłíinii shichʼįʼ nahwiiʼnánígíí baa ákonínízingo shéénílniih áádóó tʼááká shaa yóónééh, nidi íinínízingo shiyáázh hodooleełgo beʼiinaʼ ninítʼiʼ bijı̨́įjįʼ tʼáá átʼé nííʼ dooleeł; bitsiiʼ tsʼídá doo kʼídoogish da.*
12 Ákohgo Hánnah éí Bóhólníihii bichʼįʼ tʼáá sozdilzingo Íílai haa ákoniizı̨́įʼgo hazéeʼjįʼ déezʼı̨́ı̨́ʼ.
13 Hánnah éí tʼáá hajéí biyiʼídi sozdilzin, hadaaʼ tʼéí nahaʼná, nidi hwiinééʼ éí doo diitsʼaʼ da; éí bąą Íílai éí Hánnah yiyiiłtsą́ągo hoł honeezdo lá, niizı̨́ı̨́ʼ.
14 Áko Íílai áhodííniid, Haa lá nízáágóó nił honeezdo dooleeł? Wáin nahjįʼ nidiníʼaah.
15 Nidi Hánnah ádííniid, Ndayeeʼ, bóhonishníihii; jó, asdzání yínííł nilíinii yeeʼ nishłı̨́, wáin áádóó tó diłhił doo yishdlą́ą da, áko tʼáádóo nídí Bóhólníihii bichʼįʼ sodiszin.
16 Asdzání ná naalʼaʼí doo yáʼáshóonii nilı̨́ nahalingo tʼáadoo shaa nitsíníkeesí, háálá ayóó átʼéego bąąh shíniʼii áádóó baa yínííł áníshtʼéii éí biniinaa sodiszin nítʼééʼ.
17 Ákohgo Íílai ánáádooʼniid, Nílááh, nichʼįʼ hózhǫ́ǫgo yínááł, áko Ízrel dineʼé biDiyin God baa néinikąąhgo bííníkeedígíí neididooʼááł.
18 Áko Hánnah ázhdííniid, Hániʼdii ná naalʼaʼí nishłı̨́įgo ajoobaʼ bee shichʼoninée leʼ. Ákohgo chʼéédzídzáago ajííyą́ą́ʼ, áko doo yínííł náázhnoolnin da.
19 Áko tʼah abínígo nízhdiijééʼ áádóó Bóhólníihii bichʼįʼ nidahodzisá, áko dah nízhdiikaigo Réímah kin shijaaʼdi haghangi níjíkai. Áádóó Elkéínah beʼasdzą́ą́ Hánnah yił ałtʼááʼáázh, áko Bóhólníihii éí Hánnah yénáálniiʼ.
20 Ákódzaadóó Hánnah iʼniiltsąądgo azhdoołchíiłjįʼ ahoolzhiizh, áko ashkii jishchı̨́įgo Sámuel bee jíízhiʼ, háálá ájíní, Eii Bóhólníihii bííníshkeed nítʼééʼ.
21 Áko Elkéínah haghandóó danilíinii tʼáá ałtso bił dashdiikaigo tʼáá nináháhááh bikʼeh Bóhólníihii bichʼįʼ nááʼiiniih nídajiiłʼaahígíí bikʼehgo náázhdiyoołnih áádóó ádee hazdoodzihígíí bizhdoolííł biniyé dashdiikai.
22 Nidi Hánnah éí doo ákǫ́ǫ́ deeyáa da, háálá hahastiin ábizhdííniid, Shí doo ákǫ́ǫ́ deesháał da, awééʼ iʼdíítʼóodgo índa ákǫ́ǫ́ bił deeshʼash, áko bíniʼdii Bóhólníihii yichʼįʼ nidoogáałgo beʼiinaʼ ninítʼiʼjįʼ ákwii hólǫ́ǫ doo.
23 Áko hahastiin Elkéínah áhodííniid, Bidííʼnítʼóodjįʼ tʼáá ni nił yáʼátʼéhígi átʼéego ánílééh, nidi Bóhólníihii tʼáá bí tʼéí bizaad chánah íidoolííł. Áko Hánnah hayáázh hoʼdíítʼóodjįʼ tʼáá ákweʼé biʼjiiłtʼoʼ nítʼééʼ.
24 Áko bizhʼdíítʼóodgo ákǫ́ǫ́ bił jiníʼáázh; dóola yázhí táaʼgo ákǫ́ǫ́ deizhʼeezh, áádóó akʼáán éí íífa tʼááłáhídi haaką́ągo índa wáin éí tó abid bee ałdóʼ ákǫ́ǫ́ dajizhjaaʼ; íídą́ą́ʼ Sháíloh hazʼánídi Bóhólníihii bikin biiʼ sohodizin góneʼ bił yah ajííʼáázh; hayáázh éí tʼah áłtsʼísí.
25 Ákohgo dóola yázhí łaʼ dadziisxı̨́ áádóó ashkii éí Íílai bichʼįʼ bił dadziskai.
26 Áko Hánnah ázhdííniid, Bóhonishníihii, tʼáá aaníí hiníná; ákótʼéego, bóhonishníihii, shí asdzání nishłı̨́įgo kweʼé sézı̨́įgo Bóhólníihii bichʼįʼ sodiszin nítʼééʼ yę́ę áshtʼı̨́.
27 Díí ashkii bíká sodiszin nítʼééʼ, áko Bóhólníihii baa náoshkąąhgo bííníshkeedígíí éí sheidiníʼą́.
28 Éí bąą Bóhólníihii baa náhodiníʼą́; tsʼídá tʼáá hweʼiinaʼ ninítʼiʼjįʼ Bóhólníihii baa náhodiníʼą́ągo bííʼ jílı̨́į dooleeł. Áko Íílai éí Bóhólníihii bichʼįʼ nahodzisá.
Footnotes
^ Hade íinízinii éí Piinínah ááhyiłní.
^ Bóhólníihii bikin biiʼ sohodizin, nínígíí éí íídą́ą́ʼ Bóhólníihii biníbaal biiʼ hodílzinii tʼéiyá hólǫ́.
^ Bitsiiʼ doo kʼídoogish da, nínígíí éí Názarait nilı̨́į dooleełgo óolyé. Num. 6:5.
