1 Samuel 10:1-27
10 Ákohgo Sámuel éí akʼah néidiiką́ągo hatsiitʼáagi yayiiziid, áádóó haztsʼǫsgo áhodííniid, Bóhólníihii éí Ízrel dineʼé néidiinilgo bííʼ silı̨́įʼii binanitʼaʼí dííleełgo nidoosįh biniyé áshtʼı̨́.
2 Díí jı̨́ shitsʼą́ą́ʼ dah dooʼáazhgo Réíchel yóóʼályaaígi Zélzahdi Bénjamin dineʼé bikéyahgi diné nidiltʼéego yiʼashgo bidááh doohʼash, áádóó ánihididooniił, Télii há anootą́ą́ʼ yę́ę éí shónáoztʼeʼ, áádóó nizhéʼé éí télii yaa yooznahgo nijígo tʼáá íiyisí nikééʼ bíniʼ ííʼá, kóníigo, Shiyeʼ shónéidootʼeeł biniyé kʼadshąʼ haa deeshnííł?
3 Áádóó nówehjįʼ náás dah náádoohtʼáazhgo Téíbor chéchʼil sikaadíjįʼ wohʼashgo diné táltʼéego Béthel hazʼání góde Diyin God yichʼįʼ nidahodoohłaał yiniyé yikahgo bidááh doohʼash: łaʼ éí tłʼízí yázhí táaʼgo yoojih doo, náánáłaʼ éí bááh táaʼgo yoojih doo, áádóó náánáłaʼígíí éí tó abid yee wáin yoołtsos doo.
4 Áko, Yáʼátʼééh, danihididooniiłgo bááh naakigo nihaidooniłígíí nídidoohnił.
5 Áádóó bikʼijįʼ Diyin God biyanáalkʼidjįʼ hadoohʼash; ákweʼé Filístiya dineʼé bisiláo dah yinééł, áádóó áadi kʼadę́ę kintahjįʼ chʼínóhʼaashgo yanáalkʼidę́ę́ʼ Diyin God yá dahalneʼii nááʼnéełgo tsin tłʼóół neeznáá bąąh daneelzheeʼgo bee nidaʼaʼnéii áádóó ásaaʼ yilghaałígíí áádóó tsin bee íʼdílzoołí índa tsin tłʼóół naakitsʼáadah bąąh daneelzheeʼgo bee nidaʼaʼnéii yee nidaanéhígíí alą́ąjįʼ deíkáah doo. Bikéédę́ę́ʼ éí Diyin God yá dahalneʼii dahalneʼgo deíkáah doo.
6 Índa Bóhólníihii biNíłchʼi Diyinii nikʼi hwiidooleełgo ni ałdóʼ Diyin God yá dahalneʼii atah dííleełgo Diyin God bá hólneʼ doo, áádóó diné łahgo átʼéii dííleeł.
7 Áko díí bee éédahózinii nichʼįʼ ádzaago baa nidíínaałígíí baa nanináa doo, háálá Diyin God nił hólǫ́.
8 Áko Gílgal hazʼání góyaa shilą́ąjįʼ díínááł, áádóó, jó, shí ałdóʼ ákóyaa nichʼįʼ deesháałgo didlidgo nááhániihii áádóó nááhidoonihii hózhǫ́ǫ́jí nááhániihii ałdóʼ nááhidiilnih. Tsostsʼid jı̨́ shibaʼ sínídáa doo; naa níyáago índa ádíílíłígíí nił bééhodeesįįł.
9 Áádóó Sámuel bitsʼą́ą́ʼ dashdiiyáago Diyin God éí Saul hajéí łahgo ánáyiidlaa, áádóó díí bee éédahózinii tʼáá ałtso tʼáá éí bijı̨́ bidahoolyaa.
10 Áko yanáalkʼidjįʼ jiníʼáazhgo, shoo, Diyin God yá dahalneʼii hadááh yíkai, áádóó Diyin God biNíłchʼi Diyinii hakʼi hooleʼgo éí bitahgi Diyin God bá hojoolneʼ.
11 Áádóó diné tʼáá ałtso hwéédahósinii Diyin God yá dahalneʼii éí bił Diyin God bá hojilneʼgo dahoołtsą́, áko díí diné ádaʼahidooʼniid, Kish biyeʼshąʼ haʼátʼíí yee atah náánásdlı̨́ı̨́ʼ? Saul wolyéiísh ałdóʼ Diyin God yá dahalneʼii yidiiyáá lá?
12 Áko diné léiʼ tʼáá áádóó naagháhígíí ádííniid, Háíyeeʼ bizhéʼégo ádaatʼı̨́? Éí bąągo diné tʼáá ałtso kódaaní silı̨́ı̨́ʼ, Daʼ Saul wolyéiísh ałdóʼ Diyin God yá dahalneʼii yidiiyáá lá?
13 Ákohgo Diyin God bá ałtso nahodzisneʼgo yanáalkʼidjįʼ hajiyá.
14 Saul áádóó bá naalʼaʼí tʼáá bił Saul bizhéʼé yázhí nabídééłkid, Háágóoshąʼ nishooʼáázh? Áko ázhdííniid, Télii haniitáá nítʼééʼ, nidi tʼáadoo shónéísiiltʼeʼgóó tʼóó Sámuel baa niitʼáázh.
15 Áádóó Saul bizhéʼé yázhí ánááhodooʼniid, Nánooshkąąh shił hólneʼ, Sámuelshąʼ haʼátʼíí nihidííniid?
16 Áádóó Saul hazhéʼé yázhí ábizhdííniid, Sámuel hazhóʼó nihił hoolneʼgo ánihidííniid, Télii éí shónídaoztʼeʼ. Nidi Saul éí aláahgo naatʼáanii jidooleełgo Sámuel hoł hoolneʼii tʼáadoo bee hazhéʼé yázhí bił hojoolneʼ da.
17 Áko Sámuel éí diné hágo bizhdííniidgo Mízpeh kin shijaaʼgi Bóhólníihii bá áłah ájiilaa,
18 áádóó Ízrel dineʼé ábizhdííniid, Ízrel dineʼé biBóhólníihii Diyin God kóníigo haadzííʼ, Ííjip kéyahdę́ę́ʼ Ízrel dineʼé chʼíníʼeezh, áko Ííjip dineʼé bílákʼeedóó índa aláahgo yee bídahólníihgo bił hazʼáanii yee nihide ádahósinii bitsʼą́ąjįʼ yisdánihíínil.
19 Nidi díí jı̨́ nihiDiyin God doo danoozı̨́įʼ da; éí yee nihikʼijįʼ danilíinii tʼáá ałtso áádóó bikʼee tiʼdahoohníihii yitsʼą́ąjįʼ tʼáá bí yisdánihíínil, nidi nihí ádabidooniid, Doo nił daniidlı̨́į da; aláahgo naatʼáanii łaʼ nihá ółééh. Éí bąą kʼad dineʼé danohłíinii índa mííl danołtʼé bikʼehgo Bóhólníihii binááł ádéé dahonołzįįh.
20 Áko Sámuel éí Ízrel dineʼé tʼáá ałtso átʼáahjįʼ áłah ájiilaa. Áko Bénjamin dineʼé éí nídiiʼnil.
21 Sámuel éí Bénjamin dineʼé tʼááłáʼí hooghandóó danilíinii átʼáahjįʼ áłah ánáájiidlaa, áádóó Méítrai baʼáłchíní nídiiʼnil, áadi índa Sámuel éí Méítrai baʼáłchíní átʼáahjįʼ áłah ánáájiidlaago Kish biyeʼ Saul nídiiltı̨́. Nidi Saul há dahozdéezʼı̨́ı̨́ʼ nítʼééʼ tʼáadoo shójooztʼeʼ da.
22 Éí bąą Bóhólníihii nídayookąąhgo nidayídééłkid, Díí dinéésh kweʼé níyá? Áádóó Bóhólníihii ádííniid, Jó, hééł tahgi náʼádeesʼı̨́ı̨́ʼ.
23 Áko ákǫ́ǫ́ níjéeʼgo áádę́ę́ʼ hoł nídaaskai, áádóó diné bitahgi dziizįʼ nítʼééʼ tʼáá hawosígo ádaníłtsogo diné tʼáá ałtso bilááh ázníłnééz.
24 Áádóó Sámuel éí diné tʼáá átʼé áyidííniid, Shoo, dahonółʼı̨́. Eii Bóhólníihii nihá náhodiiłtı̨́. Diné tʼáá ałtso bitahgi doo łaʼ hógi átʼée da. Áko diné tʼáá ałtso hadadeeshghaazhgo ádaaní, Aláahgo naatʼáanii asʼahgóó hináa leʼ!
25 Ákohgo Sámuel éí aláahgo naatʼáanii yinantʼáa dooígíí bee diné bił hojoolneʼ, áádóó Sámuel éí naaltsoos yikááʼ áyiilaago Bóhólníihii yinááł niiníʼą́. Índa Sámuel éí diné, Tʼáá ánółtso nídayínóhkááh, bizhdííniidgo tʼááłáʼí nítínígo tʼáá bí bighangóó anídahaaskai.
26 Saul ałdóʼ Gíbiyah kin haalʼáadi bighango ákǫ́ǫ́ dah nídiidzá áádóó Diyin God éí diné bijéí deidiisnáʼígíí ałdóʼ ákǫ́ǫ́ hoł nákai.
27 Nidi diné doo yáʼádaashóonii ádadííniid, Haitʼéegoshąʼ díí diné yisdánihidoonił? Áádóó dahojoołxáago bąą tʼáadoo hadaʼiiznil da. Nidi tʼáadoo baa nídzístʼįįd da.
