1 Samuel 11:1-15
11 Áman dineʼé łaʼ Néíhash yolyéego bidineʼé yił Jéíbesh-gíliyad kin haalʼáhígíí bichʼįʼ anaaʼ ádahodoolíiłgo yikʼijįʼ danilı̨́įgo yinaagóó nidahaazná, áádóó Jéíbesh dineʼé tʼáá ałtso Néíhash ádeidííniid, Nihił ahadiʼnítʼaahgo ná nideiilnish doo.
2 Nidi Néíhash éí Áman dineʼé nilíinii Jéíbesh dineʼé ábizhdííniid, Díí áhootʼéhígíí bee nihił ahadadiʼnishtʼą́ągo danihinááʼ nishʼnáájíígíí habídiʼyeeshxish, áko índa Ízrel dineʼé tʼáá ałtso baa yáhásinígi íishłaa doo.
3 Jéíbesh dineʼé yá aląąjįʼ naazíinii ádadííniid, Tsostsʼid jı̨́ nihadiʼníʼaahgo Ízrel dineʼé bitahgóó tʼáá átʼé haneʼ ádadiilnííł. Doo łaʼ yisdánihónííł átʼéégóogo éí tʼóó naa ádadidiitʼááł.
4 Ákohgo Saul bikin haalʼáii Gíbiyah kin haalʼáadi nidaalʼaʼí haneʼ haa deizʼą́ągo diné tʼáá ałtso bee bił dahóóneʼ áádóó diné tʼáá ałtso hadadeeshghaazhgo dááchxa.
5 Áko dáʼákʼehdę́ę́ʼ Saul éí béégashii bee nihwiildlaadii bikééʼ níjoodáałgo ázhdííniid, Dinéshąʼ bichʼįʼ haa dahóótʼįįdgo daachxa? Ákohgo Jéíbesh dineʼé baa haneʼ yee hoł dahoolneʼ.
6 Áko Diyin God biNíłchʼi Saul bikʼi hooleʼgo haneʼ yidiiztsʼą́ʼígíí bikʼee ayóó átʼéego báhóóchįįd.
7 Saul éí béégashii bee nihwiildlaadii neistseedgo niyiishgizh, áko naalʼaʼí danilíinii éí Ízrel dineʼé kéédahatʼı̨́ı̨́góó adayiizhjaaʼgo ádaaní, Tʼáá háiida Saul índa Sámuel doo bikééʼ dashdiiyáhígíí éí habéégashii ałdóʼ bichʼįʼ ákóhodoonííł. Ákohgo diné éí ayóó átʼéego Bóhólníihii yikʼee bił yééʼ dahazlı̨́įʼgo tʼáá łahjįʼ chʼíníjééʼ.
8 Áko Bíízek kin shijaaʼjįʼ diné chʼíheezhjéʼígíí jííłtaʼ; nítʼééʼ Ízrel dineʼé éí táadi neeznádiindi mííl yiltʼéé lá, índa Júdah dineʼé éí tádiindi mííl lá.
9 Áko naalʼaʼí yíkaígíí ádeiłní, Jéíbesh-gíliyad dineʼé ádabididoohniił, Yiską́ągo honiigaigo yisdádoohkah. Áko naalʼaʼí yíkaigo Jéíbesh-gíliyad dineʼé haneʼ yee yił dahoolneʼgo tʼáá íiyisí yaa bił dahóózhǫǫd.
10 Éí bąą Jéíbesh dineʼé éí Néíhash ádeidííniid, Yiską́ągo tʼáá nihí tʼóó nihichʼįʼ diikahgo tʼáá nihí danohsinígi ádanihidoohłííł.
11 Áko náábiiskání Saul éí diné táaʼgo dah yinéełgo áyiilaa, áádóó baa jíishjéeʼ doo biniyé Áman dineʼé dah deínéhígi abínígo jíkai, áko ałníníʼą́ąjįʼ bikʼi jiijéeʼgo nidadzistseed; chʼéékaígíí éí taozhjéeʼgo nidiltʼé nidi doo łaʼ tʼááłáhígi naaʼaash da nítʼééʼ.
12 Ákohgo Ízrel dineʼé éí Sámuel ádeidííniid, Háishąʼ ánihiłní, Daʼ Saul wolyéiísh nihinantʼáa doo? Éí diné ádanihizhdííniidígíí náhodiiʼéeshgo nidahodiiltsxił.
13 Nidi Saul ání, Díí jı̨́ diné doo łaʼ diyoolyéeł da, háálá díí jı̨́ Bóhólníihii éí Ízrel dineʼé yee yisdádookahii áyiilaa.
14 Nítʼééʼ Sámuel éí diné áyidííniid, Tįʼ, Gílgal hazʼánígóó diikahgo áadi aláahgo bee óhólníihii ániidí áńdadiilnííł.
15 Ákohgo diné tʼáá ałtso Gílgalgóó dah diikai, áádóó Gílgalgi Bóhólníihii binááł Saul éí aláahgo naatʼáanii ádayiilaa. Áadi nááhidoonihii hózhǫ́ǫ́jí nááhániihii Bóhólníihii binááł náádayiisniiʼ, áko áadi Saul índa Ízrel dineʼé tʼáá ałtso ayóó átʼéego bił dahóózhǫǫd.
