1 Samuel 12:1-25
12 Áko Sámuel éí Ízrel dineʼé tʼáá ałtso ábizhdííniid, Ádashidooniidígíí tʼáá ałtso nihá disétsʼą́ą́ʼ, áko aláahgo naatʼáanii nihinantʼáago ánihiishłaa.
2 Shoo, kʼad éí aláahgo naatʼáanii nihá yigááł; shí éí hasistihgo shitsiiʼ yiibaʼ; jó, shiyeʼké nihił yikah, índa shí éí tʼáá ániid naasháádą́ą́ʼ díí jı̨́įjįʼ nihinááł níyá.
3 Shoo, kǫ́ǫ́ sézı̨́; Bóhólníihii binááł áádóó akʼah yikʼi yayiiziidgo yiyíísı̨́įʼii binááł shaa dahołneʼ. Háishąʼ bibéégashii bigha nishtı̨́? Háishąʼ bitélii bigha nishtı̨́? Háishąʼ biʼdéloʼ? Háishąʼ bide íinisin? Háishąʼ bee nahoʼdiiniihii sheinínilgo shíniʼ ííłdingo áyiilaa? Éí nihił kʼéédahodeeshdǫǫł.
4 Áko ádahodííniid, Doo nihinisíníloʼ da, doodaiiʼ tʼáadoo nihide íininizı̨́įʼ da, doodaiiʼ tʼáadoo leʼé łaʼ tʼáadoo diné bigháínídláa da.
5 Áko ábizhdííniid, Bóhólníihii éí ooʼíinii nilı̨́ áádóó díí jı̨́ akʼah yikʼi yayiiziidgo yiyíísı̨́įʼii éí ooʼíinii nilı̨́įgo haʼátʼíhída tʼáadoo shílákʼeedóó nídadooláa da, áko ádaaní, Jó, bí ooʼíinii nilı̨́ı̨́ lá.
6 Áko Sámuel éí diné áyidííniid, Bóhólníihii éí Mózes áádóó Éran niinínilgo danihizhéʼé yę́ę Ííjip kéyahdę́ę́ʼ chʼíiníʼeezh.
7 Éí bąą kʼad hazhóʼó nidasoozı̨́; Bóhólníihii binááł tʼáá ákogi átʼéego Bóhólníihii nihá áátʼįįdígíí áádóó danihizhéʼé yę́ę yá áátʼįįdígíí bídadéétʼiʼii bee nihichʼįʼ haasdziih.
8 Áko Ííjip kéyahgóó Jéíkab ííyáago áádóó danihizhéʼé yę́ę Bóhólníihii nídayooskango Bóhólníihii éí Mózes áádóó Éran ákǫ́ǫ́ yiyííłʼaadgo Ííjip kéyahdę́ę́ʼ danihizhéʼé yę́ę chʼíiníʼeezh áádóó díí kéyahgi kééhojitʼı̨́įgo áhoolaa.
9 Nidi Bóhólníihii haDiyin God baa dadziyooznah, áko Héízor kin haalʼáádóó siláo binanitʼaʼí Sísera áádóó Filístiya dineʼé índa Móʼab dineʼé binanitʼaʼí bichʼįʼ nidahoʼdiizniiʼgo bił daʼahijigą́ą́ nítʼééʼ.
10 Áko Bóhólníihii nídayookąąhgo ádadííniid, Ádił nidaʼayiilzíihgo Bóhólníihii yóóʼadadiitʼą́ą́ lá, áádóó edaʼalyaii Béíyal wolyéii índa Áshtarath wolyéii bá nideiilʼaʼ nítʼééʼ. Nidi kʼad nihidaʼanaʼí bílákʼeedę́ę́ʼ háánihíʼníiłgo ná nideiilʼaʼ doo.
11 Áko Jerabéíyal áádóó Bíídan* áádóó Jéfthah índa Sámuel éí Bóhólníihii dabííłʼaadgo nihiʼanaʼí bitsʼą́ąjįʼ yisdádanihiiznil, áko hasih hazʼą́ągi kéédahohtʼı̨́.
12 Áko Áman dineʼé aláahgo binanitʼaʼí Néíhash wolyéii nihichʼįʼ nídiibaaʼgo ádashidooniid, Doodayéi, aláahgo naatʼáanii yeeʼ łaʼ nihinantʼáa doo, azhą́ Bóhólníihii nihiDiyin God aláahgo nihinantʼáa nidi ákódadooniid.
13 Éí bąą kʼad aláahgo naatʼáanii nídadoołtíinii danółʼı̨́, eii dahonohsinii ájítʼı̨́; jó, Bóhólníihii aláahgo naatʼáanii jílíinii nihinazhnitʼáago áhoolaa.
14 Bóhólníihii dadíínóhsinígíí bá nidaałʼaʼgo áádóó bizaad bikʼeh dahonołʼı̨́įgo índa Bóhólníihii bibikʼeh óʼooʼníiłii doo bichʼįʼ nidaałteehgóogo nihí áádóó aláahgo naatʼáanii nihinantʼáago Bóhólníihii nihiDiyin God bikééʼ dayínóhkáah dooleeł.
15 Nidi Bóhólníihii bizaad doo bikʼeh dahonołʼı̨́ı̨́góogo índa bibikʼeh óʼooʼníiłii bichʼįʼ nidaałteehgo Bóhólníihii danihizhéʼé yę́ę atíyííłʼįįd yę́ęgi átʼéego yee atíʼéłʼíinii yee nihikʼijįʼ nilı̨́į doo.
16 Éí bąą kʼad hazhóʼó nisoozı̨́įgo tʼáadoo leʼé ayóó átʼéii dadínóołʼįįł; éí Bóhólníihii nihinááł íidoolííł.
17 Díí jı̨́ı̨́sh doo tłʼoh naadą́ą́ʼ dadiigaii da? Bóhólníihii baa néideeshkąąłgo adiʼníigo nahałtingo íidoolííł, áko baa ákodadínóohsįįłígíí índa dadínóołʼįįłígíí éí tsʼídá ayóó átʼéego doo yáʼáshónígi ádaotʼįįdígíí yeeʼ Bóhólníihii binááł ádaotʼįįd; jó, aláahgo naatʼáanii ádá dayínóokeed.
18 Ákohgo Sámuel éí Bóhólníihii náyooskango tʼáá éí bijı̨́ Bóhólníihii éí adiʼníigo nahałtingo áyiilaa; nítʼééʼ diné tʼáá ałtso ayóó átʼéego Bóhólníihii índa Sámuel yikʼee bił yééʼ dahazlı̨́ı̨́ʼ.
19 Áko diné tʼáá ałtso Sámuel ádeidííniid, Ná naalʼaʼí niidlíinii, Bóhólníihii niDiyin God bichʼįʼ nihá náʼiinikąąh, áko doo dadíníiʼnéeł da, háálá tʼóó yówehda ádił nináádaʼayiilzíihgo doo yáʼáshónígi áńdeiitʼįįhgo aláahgo naatʼáanii ádá nídeíníikiʼ.
20 Áko Sámuel éí diné áyidííniid, Tʼáadoo ádił dahonołyéʼí; tsʼídá doo yáʼáshónígi ánáádaahtʼı̨́įgo tʼáadoo yeeʼ tʼą́ąjįʼ dahohjahí; Bóhólníihii bikééʼ dayínóhkááh, ákótʼéego nihijéí tʼáá átʼé bee Bóhólníihii bá nidaałʼaʼ.
21 Áádóó tʼáadoo tʼą́ą́ʼ anáhóhjeehí; éí tʼáadoo nídandlíní da; doo bee ínáʼiideeł da, índa doo bee yisdáhóótʼiʼ da, háálá éí tʼáadoo nídandlíní da.
22 Jó, Bóhólníihii bidineʼé tsʼídá doo yóóʼiidóʼááł átʼéégóó bízhiʼ ayóó átʼéego bee baa haʼniih doo, háálá Bóhólníihii bił hózhǫ́ǫgo tʼáá bí ádá bidineʼé danohłı̨́įgo ánihidoolííł.
23 Áádóó ałdóʼ díí tsʼídá doo nisin da: nihá sodiszingo nideeshtʼihígíí bee Bóhólníihii bichʼįʼ ádił adeesih, nidi nizhónígo índa yáʼátʼéehgo dahinohnáa dooleełii tʼéiyá bínanihinishtin doo.
24 Tʼáá hazhóʼó Bóhólníihii tʼéí dadíínóhsin, áádóó nihijéí tʼáá átʼé bee tsʼídá tʼáá aaníinii bikʼehgo bá chodaohʼı̨́, háálá nabikʼítsáhákeesgo tsʼídá ayóó ádaatʼéii nihá áyiilaa.
25 Nidi doo yáʼáshónígi ánáádaahtʼı̨́ı̨́ ládą́ą́ʼ éí aláahgo nihinanitʼaʼí tʼáá bił ádanihidiʼdooldįįł.
Footnotes
^ Bíídan éí Bérak ałdóʼ óolyé. Judg. 4:6.
