1 Samuel 13:1-23
13 Saul nantʼáago tʼááłáʼí nááhai áádóó Ízrel dineʼé yinantʼáago naaki nááhaigo
2 Saul éí Ízrel dineʼé táadi míilgo néidiinil; naakidi mííl éí tʼáá Míkmash báhátis índa Béthel kin shijaaʼgi Saul yił naakai nítʼééʼ, áádóó miilgo éí tʼáá Bénjamin bikéyah Gíbiyah kin haalʼáagi Jánathan yił naakai nítʼééʼ, áádóó łahjįʼ yidziihígíí éí dabiníbaalígóó anídziisʼaʼ.
3 Gííba kin shijaaʼgi Jánathan éí Filístiya dineʼé yikʼeh deesdlı̨́įʼgo Filístiya dineʼé baa dahodiiztsʼą́ą́ʼ. Áádóó tʼáá ałtsogóó ayóó íitsʼaʼgo Saul éí deenástsʼaaʼ bideeʼ bee íʼdílzoołí yee áníigo ání, Hániʼdii Hííbrew dineʼé daʼdiitsʼı̨́ı̨́h.
4 Áko Ízrel dineʼé tʼáá ałtso áháʼnínígíí deidiiztsʼą́ą́ʼ; Saul éí Filístiya dineʼé yikʼeh deesdlı̨́ı̨́ʼ lá, áko Ízrel dineʼé éí Filístiya dineʼé doo deíłdin da daazlı̨́ı̨́ʼ. Áádóó Gílgal hazʼánígi diné éí Saul bididoohkah dabiʼdooʼniid.
5 Áko Filístiya dineʼé éí Ízrel dineʼé yił daʼahidoogą́ą́ł biniyé áłah silı̨́ı̨́ʼ, tádiindi mííl tsindaabąąs bijáád naakiígíí índa łı̨́ı̨́ʼ yee nidaabaahígíí éí hastą́ądi mííl; tónteel bibąąhgóó séí ánéelą́ʼígi átʼéego diné tʼóó ahayóí niheezná, áko Beth-éíven kin shijaaʼdóó haʼaʼaahjígo Míkmash báhátis dahaazná.
6 Ízrel dineʼé tsístłʼah dabidiʼneeskaadgo bił béédahoozin, (háálá diné nitsinákah) áko aʼáán dahasdzą́ą́góó, áádóó dahodíłchʼilgóó, áádóó tsétahgóó, áádóó nooh nídaʼachííhgóó, índa tó bíká idaʼasʼnil yę́ęgóó nídadeestʼı̨́ı̨́ʼ.
7 Łaʼ Hííbrew dineʼé ałdóʼ éí Jórdan tséʼnaagóó Géed kéyahgóó áádóó Gíliyad kéyahgóó aheeskai. Saul éí tʼáá Gílgaldi naaghá, áádóó diné tʼáá ałtso bitah dahoditłidgo hakééʼ yíkai.
8 Áko Saul éí Sámuel yee nihoníʼáanii bibaʼ ájítʼéego tsostsʼid yiską́, nidi Gílgal hazʼánígi Sámuel tʼah doo yígháah da, áko Saul éí tʼóó diné hatsʼą́ą́ʼ taozhjééʼ.
9 Áko Saul ádííniid, Didlidgo nááhániihii índa hózhǫ́ǫ́jí náádahaniihii shichʼįʼ kółééh. Áko didlidgo nááhániihii nááyiisniiʼ.
10 Didlidgo nááhániihígíí ałtso náádziisniiʼgo, shoo, Sámuel níyá, áko bidááshníyáago kʼé bizhdííniid.
11 Nítʼééʼ Sámuel ání, Haʼátʼíishąʼ baa nisíníyá? Áko Saul ání, Nihwííníʼáníjįʼ ayííłką́ yę́ędą́ą́ʼ tʼáadoo yíníyáágóó bąą diné tʼóó shitsʼą́ą́ʼ taozhjééʼ, áko Filístiya dineʼé éí Míkmash báhátisgi áłah silı̨́ı̨́ʼ.
12 Éí bąą ádíshní, Jó, Gílgal hazʼánígi Filístiya dineʼé tʼóó shikʼi dah yijeehgi átʼé; Bóhólníihii doo náoshkąąhgóó, ákohgo tʼáá shí tʼáá bizááká didlidgo nááhániihii nááháłniiʼ.
13 Áko Sámuel éí Saul áyidííniid, Jó, doo áhólyą́ą́góó ánítʼı̨́; Bóhólníihii niDiyin God bibikʼeh óʼooʼníiłii yee nichʼįʼ haadzíiʼii doo biʼiinilaa da; jó, Bóhólníihii kʼad aláahgo bee níhólníihii chánahgo ná hashtʼeyiilaago hoolʼáágóó Ízrel dineʼé binanítʼáa doo nítʼééʼ.
14 Nidi aláahgo bee níhólníihii doo tʼáá yitʼih da doo; Bóhólníihii éí diné bił hózhǫ́ǫgo bikʼeh hółʼíinii há néidéezʼı̨́ı̨́ʼ, áádóó Bóhólníihii néidiiłtíinii éí bidineʼé yinantʼáa doo, háálá Bóhólníihii yee nichʼįʼ haadzíiʼii doo biʼiinilaa da.
15 Áko Sámuel nídiiʼnaʼgo Gílgal hazʼánídóó dah nídiidzáago Bénjamin bikéyahdi Gíbiyah kin haalʼáajįʼ níyá. Áádóó Saul éí diné hoł naakaígíí jííłtaʼgo éí hastą́ądi neeznádiin ánéelą́ą́ʼ lá.
16 Áko Saul áádóó hayeʼ Jánathan índa diné hoł naakaígíí éí tʼáá Bénjamin bikéyahgi Gíbiyah kin haalʼáadi dah yinééł, nidi Filístiya dineʼé éí Míkmash báhátisdi dah yinééł.
17 Áko Filístiya dineʼé dah yinéłígíí bitsʼą́ą́dóó siláo hatʼááh doojahii táaʼgo dah yinééł chʼíníná, łaʼ éí Áfra bichʼįʼgo Shúwal bikéyah nahósʼaʼjįʼ ííná,
18 náánáłaʼ éí Beth-hóran yichʼįʼgo ííná, áádóó náánáłaʼ Ziibówim hóteel nahazʼą́ą́góó honoojí yichʼįʼgo ííná.
19 Áko Ízrel dineʼé bikéyah nahósʼaʼgi tʼáá átʼéé nítʼééʼ diné doo łaʼ béésh yitsidii nilı̨́į da, háálá Filístiya dineʼé ádaaní, Hííbrew dineʼé tʼáá bí diltłish áádóó tsiidétáán ádá ádeidoolíiłgo daʼátʼé.
20 Nidi Ízrel dineʼé danilíinii tʼááłáʼí nítínígo éí hatłʼoh bee yilzhéhí áádóó habee nihwiildlaadí áádóó hatsénił índa hatłʼoh bee nágodí ałtsʼą́ą́ʼ deenínígíí háádahizhdookʼash biniyé Filístiya dineʼé bichʼįʼ ałnáádajikah.
21 Tłʼoh bee yilzhéhí áádóó bee nihwiildlaadí áádóó tłʼoh bee naaljoołí áádóó tsénił índa béégashii bee náníljishí bikʼą́ą́h daʼiizhaazhii háádahakʼashgo éí naadiin naaki shékel* wolyéii bą́ą́h ílı̨́.
22 Ákódzaago anaaʼ hazlı̨́ı̨́ʼ bijı̨́ Saul áádóó Jánathan éí diné hoł naakaígíí éí diltłish áádóó tsiidétáán bee ádaadin, nidi Saul áádóó biyeʼ Jánathan éí diltłish áádóó tsiidétáán neijaah.
23 Filístiya dineʼé nidaabaahígíí tségiizh góde Míkmash báhátisjįʼ aheezhjééʼ.
Footnotes
^ Tádiindóó baʼaan naaki shékel wolyéii éí tʼááłáʼí dah hidiidloh.
