1 Samuel 14:1-52
14 Ákódzaago łaʼa jı̨́ Saul biyeʼ Jánathan éí dinééh habee naʼabaahí há neijaahígíí ábizhdííniid, Tįʼ, Filístiya dineʼé dah yinéłígóó hidiitʼashgo bikʼi ahiʼdíníilchééł. Nidi hazhéʼé tʼáadoo bił hojilneʼí ájítʼı̨́.
2 Saul éí Gíbiyah kin haalʼáhí biyeijígo Mígran hazʼánígi tsin sikaadii pámgrenit* wolyéii biyaagi nijighá. Diné hastą́ądi neeznádiin daatsʼí yiltʼéego hoł naakai.
3 Íílai biyeʼ Fíniyas wolyéii biyeʼké Aháítab áádóó Íkabad wolyé. Áko Aháítab biyeʼ éí Aháíjah joolyéii Sháílohgi Bóhólníihii bá nááʼiiłniihii jílı̨́įgo íífad wolyéii biih níjídááh nítʼééʼ. Áko Jánathan dah diiyáhígíí diné doo bił béédahózin da.
4 Áádóó Jánathan éí Filístiya dineʼé baa nihizhdoodááł biniyé tsétaʼ góneʼ ajííyáago, łahjí tsé dah deeshzhago deezʼáii éí Bózez wolyé, łahjígo deezʼáhígíí éí Sííneh wolyé.
5 Łaʼ tsé deezʼáhígíí éí náhookǫsjí Míkmash báhátis bichʼįʼgo deezʼá, łaʼígíí éí shádiʼááhjí Gíbiyah kin haalʼáii bichʼįʼgo deezʼá.
6 Jánathan éí dinééh habee naʼabaahí há neijaahígíí ábizhdííniid, Hágo, doo bąąh nídahineeshgizhii dah yinéłígíí baa nihidiitʼash. Bóhólníihii nihá nidoolnishgo daʼátʼé, háálá Bóhólníihii tʼáadoo binółtłʼahígóó ląʼígo, doodaiiʼ tʼáá díkwíhí nidi choyoołʼı̨́į doo biniyé yisdáyiinííł.
7 Áko habee naʼabaahí há neijaahígíí áhodííniid, Nijéí bee baa nitsíníkeesígíí tʼáá átʼé ánílééh, áádóó jó, baa nitsíníkeesii bikʼehgo nił honishłǫ́.
8 Ákohgo Jánathan ájíní, Shoo, diné bichʼįʼ tséʼnaa diitʼash, áádóó tʼáá nihí bichʼįʼ ádééhodiilzįįł.
9 Tʼáá ákweʼé sooké danihidííniidgo éí tʼáá ákweʼé siikée doo, índa doo ákóde bichʼįʼ diitʼash da.
10 Nidi, Hágo, nihaa nohʼaash, danihidííniidgo éí ákóde bichʼįʼ diitʼash, háálá Bóhólníihii nihílákʼee hodííʼą́ą doo, áko éí bee ééhózin doo.
11 Ákohgo Filístiya dineʼé dah yinéełii bichʼįʼ yitʼíní ízhʼdiilyaa, áádóó Filístiya dineʼé ádadííniid, Shoo, Hííbrew dineʼé léiʼ adahasdzą́ą́góó náʼádeesʼı̨́ı̨́ʼdę́ę́ʼ haazhʼáázh lá.
12 Áko diné dah yinéłígíí éí Jánathan áádóó habee naʼabaahí há neijaahígíí ádeidííniid, Hágo, nihaa nohʼaash. Díí dínóołʼįįł. Áko Jánathan éí habee naʼabaahí há neijaahígíí ábizhdííniid, Hágo shikééʼ yínááł, háálá Bóhólníihii éí Ízrel dineʼé yílákʼee hodííʼą́.
13 Áádóó Jánathan éí hálaʼ áádóó hakeeʼ bee hadzisʼnaʼ áádóó habee naʼabaahí há neijaahígíí ałdóʼ hakééʼ haasʼnaʼ. Áko Jánathan éí siláo naʼayídziisxaal áádóó habee naʼabaahí há neijaahígíí hakééʼdę́ę́ʼ yigáałgo ałtso neistseed.
14 Áko Jánathan áádóó habee naʼabaahí há neijaahígíí bił tsʼídá áłtsé diné nidzistseedígíí éí dáʼákʼehgi tʼááłáʼí náhásdzo ałnííʼ bíighahgo bikáaʼgi naadiingo diné nidzistseed.
15 Áádóó ákwii diné dah deínéhígíí bitah dahoditłid áádóó diné tʼáá ałtso bitahgóó, índa siláo hatʼááh doojahii ałdóʼ bitah dahoditłid; niʼ nahaasnááʼ, áko ayóó átʼéego bił dahóóląądgo bitah dahoditłid.
16 Áádóó Bénjamin bikéyah biyiʼ Gíbiyahgi Saul bihaʼasídí dadééʼı̨́ı̨́ʼ nítʼééʼ, shoo, tʼóó ahojíyóí naʼahídeizhnilghaałgo atídaʼahizhdilʼı̨́.
17 Ákohgo Saul éí diné bił naakaígíí áyidííniid, Diné deínółtaʼ. Háí lá nihitsʼáníyáá lá? Áko diné dajííłtaʼ nítʼééʼ. Jó, Jánathan áádóó bibee naʼabaahí bá neijaahígíí doo hatah naaʼaash da lá.
18 Áko Saul éí Aháíjah áyidííniid, Diyin God bitsitsʼaaʼ dílzinii nídiiʼaah; jó, ákwii hoolzhish yę́ędą́ą́ʼ Diyin God bitsitsʼaaʼ dílzinii Ízrel dineʼé baʼałkʼee siʼą́.
19 Áádóó Saul éí nááʼiiłniihii bichʼįʼ yájíłtiʼgo Filístiya dineʼé dah yinéłídę́ę́ʼ tʼóó yówehda hahodíídláád. Áko Saul éí nááʼiiłniihii ííłní, Nílaʼ yaa kónánídlééh.
20 Ákohgo Saul áádóó diné tʼáá ałtso hoł naakaígíí ahíikaigo anaaʼ baa naʼaldeeh góneʼ ííjééʼ, áádóó jó, diné tʼááłáʼí nítínígo diltłish yee bikʼis nideiłtseed, índa ayóó átʼéego tʼóó bił dahóóląąd.
21 Hííbrew dineʼé łaʼ Filístiya dineʼé dah yinéłíjí daʼjítah nítʼééʼ yę́ę Ízrel dineʼé éí Saul áádóó Jánathan yił naakaígíí bitah nídziiskai.
22 Tʼáá ákótʼéego Dził Íífreiyimgi Ízrel dineʼé tʼáá ádzíłtso nídazdeestʼı̨́ı̨́ʼ yę́ę Filístiya dineʼé dadínéezhchą́ąʼgo baa dahozdiiztsʼą́ą́ʼ, áko hó ałdóʼ bikééʼ dah dazhdiibaaʼ.
23 Ákohgo éí bijı̨́ Bóhólníihii éí Ízrel dineʼé yisdáyíínil; Beth-éíven kin shijaaʼjįʼ bił daʼahijoogą́ą́ʼ.
24 Áádóó éí bijı̨́ Ízrel dineʼé tʼáá íiyisí niseekai, háálá Saul łahgo hazʼą́ yee hoołʼaʼgo diné yichʼįʼ haadzíiʼgo ání, Tʼáadoo eʼeʼaahí diné ajííyą́ąʼii éí hóyéeʼgo há hadoodzih, áko shiʼanaʼí dajílínígíí tsʼídá tʼáá kʼéédahodideeshdlíłí. Áko diné tʼáadoo daʼayání iʼííʼą́.
25 Áko tsintahgi diné tʼáá átʼé nidahaaskai; ákwii tsésʼná bitłʼizh niʼgóó hólǫ́ǫ́ lá.
26 Áko tsintahgi diné neheeskaigo, jó, tsésʼná bitłʼizh nidahidilchʼą́ą́ł, nidi diné tʼáadoo łaʼ yił ázadoolchid da, háálá hóyéeʼgo áhaʼoodzíiʼii bikʼee hoł daayééʼ.
27 Nidi Jánathan hazhéʼé éí hóyéeʼgo diné bá haʼdoodzihgo yee haadzíiʼii tʼáadoo dzidiiztsʼą́ąʼ da, áko hagish hálákʼee sitánígíí bee tsésʼná bitłʼizh biih dzíítsigo bił ázazhdoolchid. Áádóó nítʼééʼ hoł chʼídiʼnídláád.
28 Áko Ízrel diné łaʼ ádííniid, Nizhéʼé díí tʼáá íiyisí yee hoołʼaʼgo ání, Díí jı̨́ diné łaʼ ajííyą́ąʼii hóyéeʼgo bá haʼdoodzihii jílı̨́. Áko diné tʼáá íiyisí bąąh nidahwiiskaad.
29 Áádóó Jánathan ájíní, Shizhéʼé díí kéyahgi diné bichʼįʼ hozdiisnááʼ, shoo, nánooshkąąh, tsésʼná bitłʼizh sélįhígíí bąą shił chʼídiʼnídláád.
30 Dooládóʼ tʼah yówehgo anaʼí bindaalyeʼé yikʼídaaskaigo nííkʼeh díí jı̨́ dayííyą́ąʼgo haadashąʼ néelą́ą́ʼ anaʼí naaztseed dooleeł nítʼééʼ. Jó, kʼad Filístiya dineʼé bitahgi alááh ánéelą́ąʼgoósh ábiʼdisdįįd?
31 Íídą́ą́ʼ Míkmash báhátisdóó Áíjalan kin haalʼáajįʼ Filístiya dineʼé ádeisdįįd, áádóó Ízrel dineʼé tʼáá íiyisí bąąh nidahwiiskaad.
32 Áko tʼáá bizááká anaʼí bindaalyeʼé bichʼįʼ ajiizhjéeʼgo dibé áádóó dóola índa béégashii yáázh nidadzistseedgo dił tʼáá bił dajííyą́ą́ʼ.
33 Áko Saul yił dahoolneʼgo ádaaní, Shoo, diné éí Bóhólníihii yichʼįʼ ádił daʼasiih, dił tʼáá yił daʼííyą́ą́ʼ lá! Áko ábijiní, Bee hazʼáanii ádił nidahootiʼ. Aadę́ę́ʼ díí jı̨́ tsé ayóó áníłtsxoii shichʼįʼ ninołmáás.
34 Áko Saul ájíní, Diné bitahgóó dadohkáahgo ádabidohní, Diné tʼááłáʼí nítínígo bidóola, doodaiiʼ bidibéda nideidiyooʼishgo nideidoołtsił áádóó tʼáá kǫ́ǫ́ deidooyı̨́ı̨́ł, ákondi Bóhólníihii doo bichʼįʼ ádił nidaʼayohsíih da doogo atsįʼ tʼáá bił dił tʼáadoo daahsání. Ákohgo tʼáá éí bitłʼééʼ diné tʼááłáʼí nítínígo bidóola nidayiizhʼeezhgo ákwii nideistseed.
35 Áko Saul éí bikááʼ nááʼiiniihí Bóhólníihii yá áyiilaa, jó, éí tsʼídá áłtsé Bóhólníihii yá áyiilaa.
36 Áádóó Saul ájíní, Sołtįʼ, díí tłʼééʼ Filístiya dineʼé bikééʼ hidiikah, áádóó nideiltsxeedgo hwiidoolʼįįł; hániʼdii doo łaʼ doodzih da. Áko ádaaní, Tʼáá nił yáʼátʼéhígi átʼéego ánínééh. Nidi nááʼiiłniihii ání, Haaʼíshąʼ Diyin God bichʼįʼ nidiikahgo sodadidiilzįįł.
37 Áko Saul éí Diyin God kótʼé haʼníinii yíyókeedgo ání, Filístiya dineʼé daatsʼí bichʼįʼ anaaʼ áháshłééh? Ízrel dineʼé daatsʼí bílákʼee dabididííʼááł? Nidi éí bijı̨́ tʼáadoo hachʼįʼ haadzíiʼ da.
38 Saul ání, Haaʼíshąʼ diné yá aląąjįʼ naazíinii danohłíinii tʼáá ánółtso, hágo, áko nihił béédahodoozįįł áádóó dadínóołʼįįł háishąʼ jı̨́ı̨́dą́ą́ʼ ádił niʼiidzííh yaa naayá.
39 Jó, tsʼídá tʼáá aaníí Bóhólníihii Ízrel dineʼé yisdáyiiníiłii hiná; ákótʼéego shiyeʼ Jánathan ádił asiihgo nidi tsʼídá tʼáá aaníí dazdootsaał. Nidi diné bitahdę́ę́ʼ tʼáadoo łaʼ hachʼįʼ haadzíʼí da.
40 Ákohgo Ízrel dineʼé tʼáá ałtso ábizhdííniid, Tʼááłáhíjí noołʼáa doo, áko shí áádóó shiyeʼ Jánathan bił łahjí siidzı̨́į doo. Áko diné éí Saul ádeidííniid, Tʼáá nił yáʼátʼéhígi átʼéego ánínééh.
41 Éí bąą Saul éí Ízrel dineʼé biBóhólníihii Diyin God ábijiní, Tʼáá aaníí yááʼiiltʼeʼ nihá ánílééh. Áko Saul áádóó Jánathan bikʼi hodiitʼą́, nidi Ízrel dineʼé éí tʼáadoo baa hwiinístʼįįd da.
42 Áádóó Saul ájíní, Shí áádóó shiyeʼ Jánathan nihitaʼgi yááʼiiltʼeʼ ánílééh. Nítʼééʼ Jánathan bikʼi hodiitʼą́.
43 Áko Saul éí Jánathan áyidííniid, Baa nisíníyáhígíí bee shił hólneʼ. Áádóó Jánathan hoł hoolneʼgo ání, Shigish shílákʼee sitánígíí bee tsésʼná bitłʼizh biih yítsigo sélįh. Kǫ́ǫ́ sézı̨́, tʼáá aaníí dadeestsaał.
44 Áko Saul ání, Shígoyeeʼ Diyin God ákóshidoolííł áádóó tʼah yówehígi átʼéego ákóshidoolííł; shoo, Jánathan nílíinii, tʼáá aaníí dadíítsaał.
45 Áádóó diné éí Saul ádeidííniid, Daʼ Jánathan éí bee yisdáʼiildéehii ayóó átʼéii Ízrel dineʼé yá áyiilaaígíísh dadootsaał lá? Tsʼídá dooda lą́ą, tsʼídá tʼáá aaníí Bóhólníihii hiná; ákótʼéego tsʼídá tʼáá aaníí hatsiiʼ tʼááłáʼí nidi doo niʼjįʼ nidoodił da, háálá díí jı̨́ Diyin God bił nijishnish. Kótʼéego diné éí Jánathan yisdádeistı̨́įgo tʼáadoo daaztsą́ą da.
46 Saul éí Filístiya dineʼé bikééʼ joogáałii tʼóó tʼą́ą́ʼ hajííyáago Filístiya dineʼé tʼáá bí bikéyahgóó anídahaaskai.
47 Saul éí Ízrel dineʼé binazhnitʼáago tʼáá ałtsojįʼ hweʼanaʼí bikʼijįʼ nijibaah nítʼééʼ; Móʼab dineʼé áádóó Áman dineʼé áádóó Íídam dineʼé áádóó Zóbah dineʼé aláahgo binanitʼaʼí danilíinii índa Filístiya dineʼé bikʼijįʼ nidzizbaaʼ; tʼáá dah nízhdiidáhíjigo hakʼee chaał nidahoyiinííh nítʼééʼ.
48 Áádóó siláo áłah ájiilaago Ámalek dineʼé nidadzistseed, áádóó Ízrel dineʼé atídabiłʼíinii bitsʼą́ąjįʼ yisdájíínil.
49 Áko Saul biyeʼké éí Jánathan áádóó Íshuwai índa Melkishúwa. Áádóó bitsiʼké éí naaki, alą́ąjįʼ yizhchínígíí éí Míírab áádóó akéédę́ʼígíí éí Máíkal.
50 Saul beʼasdzą́ą́ Ahínowam wolyéego Ahímeiyaz bitsiʼ jílı̨́. Bisiláo binaatʼáanii Ábner éí Ner biyeʼ nilı̨́; Ner éí Saul bizhéʼé yázhí nilı̨́,
51 áádóó Kish éí Saul yizhéʼé nilı̨́, Ner éí Ábner bizhéʼé jílı̨́; Ner éí Éíbiyel biyeʼ nilı̨́.
52 Saul nazhnitʼáago Filístiya dineʼé bił daʼahijigą́ągo hwíiníłką́. Áko Saul éí diné bidziilii, doodaiiʼ diné doo niseedáii jiiłtséehgo tʼáá áko hwííʼ ádajileʼ nítʼééʼ.
Footnotes
^ Pámgrenit aneestʼąʼ éí bikʼǫ́ǫ́ʼ tʼóó ahayóígíí bilasáanagi átʼé.
