1 Samuel 15:1-35
15 Sámuel éí Saul áyidííniid, Bóhólníihii éí akʼah nikʼi yeideesiłgo bidineʼé Ízrel binantʼáa doo biniyé shiníłʼaʼ. Éí bąą kʼad Bóhólníihii bizaad yísíníłtsʼą́ą́ʼ.
2 Tʼáá ałtsoní bee Bóhólníihii ání, Ámalek dineʼé éí Ízrel dineʼé ádajííłʼįįdígíí bénáshniih. Jó, Ííjip kéyahdę́ę́ʼ chʼékai yę́ędą́ą́ʼ bidááh nijiyeekai.
3 Kʼad nílááh, Ámalek dineʼé nidadoołtsił índa bee dahólónígíí tʼáá ałtso ádadoołdįįł, doo łaʼ áádadoohsįįł da, nidi diné áádóó asdzání, awééʼchíʼí índa awééʼ tʼah daʼałtʼoʼii, béégashii áádóó dibé, ghą́ą́ʼaskʼidii índa télii ałtso ádadoołdįįł.
4 Áádóó Saul éí Tiiléíyim kin haalʼáagi diné áłah ájiilaago jííłtaʼgo diné tʼáá niʼ nidaabaahígíí naakidi neeznádiindi mííl lá índa Júdah dineʼé éí neeznáadi mííl lá.
5 Áko Saul éí Ámalek dineʼé bikin haalʼáagi jiníyá áádóó yíldzisdę́ę́ʼ baa nidziyeedzá.
6 Áádóó Saul éí Kííni dineʼé ábizhdííniid, Nihílááh, dah doohkáahgo Ámalek dineʼé bitsʼánóhkááh, doodago éí tʼáá bił ánihideeshdįįł, háálá Ízrel dineʼé tʼáá ałtso Ííjip kéyahdę́ę́ʼ chʼékai yę́ędą́ą́ʼ baa dajiisoohbaʼ. Áko Kííni dineʼé éí Ámalek dineʼé bitsʼájíkai.
7 Áádóó Saul éí Ámalek dineʼé neistseed; Hávilah nahósʼaʼdóó Shur nahósʼaʼgóó Ííjip kéyah bíighahjįʼ ákwáátʼįįd.
8 Áko Ámalek dineʼé aláahgo binanitʼaʼí Éígag tʼáá hináago nízhdiiłtı̨́, nidi diltłish bee diné ałtso nidadzistseed.
9 Nidi Saul áádóó diné danilíinii éí Éígag yiʼoh ádaʼasdįįdgo dibé áádóó béégashii áádóó béégashii yáázh daalkʼai índa dibé yázhí agháadi bił yáʼádaatʼéhígíí áádóó haʼátʼíhída bił yáʼádaatʼéhígíí tʼáá ałtso tʼáadoo ádeisdįįd da, nidi tʼáá ałtsoní tʼóó badaaʼihígíí índa doo danoodzı̨́ı̨́ʼ ádaatʼéhígíí éí ałtso ádeisdįįd.
10 Bóhólníihii bizaad yee haadzíiʼgo Sámuel áyidííniid,
11 Saul aláahgo naatʼáanii nilı̨́įgo áshłaaígíí bąąh shíniʼ, háálá doo shikééʼ yigáał da silı̨́ı̨́ʼ índa shibikʼeh óʼooʼníiłii doo yikʼehgóó átʼée da. Áko Sámuel éí baa yínííł dzizlı̨́ı̨́ʼ áádóó Bóhólníihii níjookąąhgo yiską́.
12 Áko Sámuel tʼah abínídą́ą́ʼ nízhdiiʼnaʼgo Saul bidááh deeshááł jiniizı̨́ı̨́ʼ; nítʼééʼ Sámuel hoł hóóneʼ, Kármel kin shijaaʼgi Saul níyá, hodooʼniid, índa áadi tsé bee ééhániihii ádá áyiilaa, áádóó tʼóó Gílgal hazʼání góyaa ííyá ni.
13 Áádóó Sámuel éí Saul yaa níyá, áko Saul áhodííniid, Bóhólníihii nikʼijidlí, shí éí Bóhólníihii yee haadzíiʼii bikʼeh ásdzaa.
14 Áádóó Sámuel ádííniid, Áko haʼátʼéegoshąʼ díí dibé índa béégashii ádaaníigo diistsʼaʼ?
15 Áádóó Saul ánáádooʼniid, Ámalek dineʼé bitsʼą́ą́dę́ę́ʼ nídeineeskaad, háálá diné éí dibé índa béégashii agháadi yáʼádaatʼéehii áádeisįįd, éí Bóhólníihii niDiyin God bichʼįʼ náádahaniih doo biniyé, áádóó łahjįʼígíí éí ałtso ádasiildįįd.
16 Ákohgo Sámuel áhodííniid, Átʼahálo, tłʼéédą́ą́ʼ Bóhólníihii áshidííniidígíí bee nił hodeeshnih. Áádóó áhozhdííniid, Haaʼíyeeʼ, baa hólneʼ.
17 Áko Sámuel ázhdííniid, Ayáhígo ádíínílzin yę́ędą́ą́ʼ Ízrel dineʼé biląąjįʼ sínízı̨́įgo áńʼdiilyaa, Ízrel dineʼé aláahgo binanitʼaʼí nílı̨́įgo binanítʼáa doo biniyé Bóhólníihii akʼah nikʼi yayiiziidgo niʼdoolzı̨́įʼ niʼ.
18 Áádóó Bóhólníihii nííłʼaadgo ání, Nílááh, Ámalek dineʼé ádił nidaʼílzíihii áníłdįįh, áádóó ałtso ásíníłdįįdjįʼ bił daʼahígą́ą doo.
19 Haʼátʼíishąʼ biniyé Bóhólníihii bizaad doo bikʼeh hosíníłʼįįdgóó tʼóó diné bindaalyeʼé łaʼ náhínílááʼ, áádóó Bóhólníihii binááł doo yáʼáshónígi íinidzaa?
20 Áko Saul éí Sámuel áyidííniid, Tʼáá aaníí Bóhólníihii bizaad bikʼeh honishʼı̨́ı̨́ nítʼééʼ, índa Bóhólníihii tʼáá shiłʼáágóó bá hidishááh nítʼééʼ, áádóó Ámalek dineʼé aláahgo binanitʼaʼí Éígag bił náníshtʼáázh, nidi Ámalek dineʼé éí ałtso áséłdįįd.
21 Nidi diné éí Ámalek dineʼé bindaalyeʼé bitahdóó dibé índa béégashii ádadooldįįł nítʼéʼígíí agháadi yáʼádaatʼéehii éí Gílgal hazʼánígi Bóhólníihii niDiyin God bichʼįʼ náádahidoonih biniyé nídeidiinil.
22 Áádóó Sámuel ání, Daʼ Bóhólníihii éí didlidgo náádahaniihii áádóó náádahidoonihii Bóhólníihii bizaad bikʼeh hólʼínígíísh biláahgo ayóó átʼéego yaa bił hózhǫ́? Jó, akʼeh hólʼínígíí éí nááhániihii biláahgo yáʼátʼééh, índa adzíistsʼą́ąʼgo éí deenástsʼaaʼ bikʼah nááhániihii biláahgo yáʼátʼééh.
23 Háálá naʼalteeh éí adilgąshiigi átʼéego ádił oodzííʼ átʼé, áádóó doo naʼídídzil éí doo ákwii áhátʼíinii índa edaʼalyaii bichʼįʼ nahadláii átʼé. Háálá Bóhólníihii bizaad doo ninizı̨́įʼ da; bí ałdóʼ aláahgo naatʼáanii nílı̨́į dooígíí doo yiniizı̨́įʼ da.
24 Áko Saul éí Sámuel áyidííniid, Ádił asisziih. Jó, Bóhólníihii bibikʼeh óʼooʼníiłii áádóó nizaad kʼínítiʼ, háálá diné bikʼee shił yéʼígíí biniinaa dabizaad bikʼeh íisdzaa.
25 Éí bąą kʼad, baa nánooshkąąh, ádił niʼayésíʼígíí shá yóóʼanídíʼaah áádóó shił nídítʼaash, áko Bóhólníihii bichʼįʼ nahodeeshłaał.
26 Áko Sámuel éí Saul ánááyidooʼniid, Doo nił nihéédeeshtʼash da, háálá Bóhólníihii bizaad doo ninizı̨́įʼ da, índa Ízrel dineʼé aláahgo binanitʼaʼí nílı̨́į dooígíí éí Bóhólníihii doo yiniizı̨́įʼ da.
27 Áko Sámuel dah diigháahgo Saul haʼééʼ yąąh dah neeshjı̨́įdgo hakʼi nayíízǫ́ǫ́z.
28 Áko Sámuel éí Saul áyidííniid, Bóhólníihii éí Ízrel dineʼé binanitʼaʼí nílíinii díí jı̨́ nąąh néistʼįįd, áádóó bił kééhótʼíinii łaʼ yeidiníʼą́; éí niláahgo yáʼátʼéehii nilı̨́.
29 Áko ałdóʼ Ízrel dineʼé Yee Bidziilii doo biyoochʼíid da, doo nidi łahgo átʼéego tsíńdíkees da, háálá doo diné nilı̨́įgo łahgo átʼéego tsíńdookos da.
30 Áko Saul ázhdííniid, Ádił asisiih, nidi shidineʼé aląąjįʼ naazíinii áádóó Ízrel dineʼé dabinááł shił nílı̨́į dooígíí kʼad baa nánooshkąąh, shił nídítʼaash, áko Bóhólníihii niDiyin God bichʼįʼ nahodeeshłaał.
31 Áko Sámuel éí Saul yił nátʼáázh áádóó Saul éí Bóhólníihii bichʼįʼ nahodzisá.
32 Ákohgo Sámuel ání, Ámalek dineʼé aláahgo binanitʼaʼí Éígag bił nídiitʼaash. Áádóó Éígag éí łı̨́ı̨́ʼ bikétsíín beʼestłʼónígi átʼéego haa níyá. Áko Éígag ání, Dooládóʼ tʼáá aaníí aniné bikʼeʼíyéeʼ da nítʼééʼ.
33 Nidi Sámuel ání, Tʼáá nidiltłish bee asdzání badaʼáłchíní ásíníłdįįdígi átʼéego sáanii bitahgi nimá ałdóʼ baʼáłchíní ádooldįįł. Áko Gílgal hazʼánígi Bóhólníihii binááł Sámuel éí Éígag niyiisneʼ.
34 Áádóó Sámuel éí Réímah kin haalʼáágóó ííyá; Saul éí Gíbiyah kin haalʼáadi bighangóó anáádzá.
35 Áko Sámuel dadziztsą́ bijı̨́įjįʼ Saul tʼáadoo nídziiltsą́ą da, nidi Sámuel éí Saul baa yínííł nijiyá. Bóhólníihii éí Saul wolyéii Ízrel dineʼé aláahgo binanitʼaʼí áyiilaa yę́ę yąąh bíniʼ.
