1 Samuel 16:1-23
16 Bóhólníihii éí Sámuel áyidííniid, Haash nízáágóó Saul baa yínííł nílı̨́į doo; shą́ą́ʼ, nináałgo Ízrel dineʼé binanitʼaʼí jílı̨́ı̨́ nítʼééʼ nidi doo honiizı̨́įʼ da? Akʼah niʼadeeʼ biiʼ hadíłbin, áádóó Béthlehem kin shijaaʼdóó diné nilíinii Jésii bighangóó nideeshʼaał, háálá éí biyeʼké bitahdóó łaʼ aláahgo naatʼáanii dooleełgo ádá nídiishtı̨́.
2 Áko Sámuel ádííniid, Haash yitʼéego ákǫ́ǫ́ deeshááł? Jó, Saul shaa hodidootsʼı̨́įłgo shidiyoołhééł. Áádóó Bóhólníihii ádííniid, Béégashii yáázh biʼádígíí łaʼ yílóosgo kódidííniił, Bóhólníihii bichʼįʼ náádiʼyeeshnih biniyé níyá.
3 Áádóó nááʼayíłniihjįʼ Jésii hágo bididííniił, áádóó ádííníłígíí nił bééhodeesįįł, índa bízhiʼ bee nił hodeeshnihii akʼah bikʼi yeidííziłgo díísı̨́ı̨́ł.
4 Áko Sámuel éí Bóhólníihii hachʼįʼ yee haadzíiʼii bikʼeh ádziidzaago Béthlehem kin shijaaʼgi jiníyá. Áko kin shijaaʼdóó hastóí bichʼįʼ joogáałgo hakʼee bitah dahoditłidgo ádaaní, Kʼéésh bił yíníyá?
5 Áko ázhdííniid, Kʼé bił níyá, Bóhólníihii bichʼįʼ náádiʼyeeshnih biniyé diyingo atsʼáʼádadidoohtʼááł, áko shił náádadiʼyoołnih. Áádóó Jésii índa biyeʼké diyingo atsʼábizhdiníʼą́ągo náádiʼyoonihjįʼ hágo bizhdííniid.
6 Áádóó ákódzaago nidahaaskaigo Sámuel éí Iiláíyab jinééłʼı̨́įʼgo íizniizı̨́įʼgo ázhdííniid, Tʼáá aaníí Bóhólníihii akʼah yikʼi yeidooziłii binááł dzizı̨́.
7 Nidi Bóhólníihii éí Sámuel áyidííniid, Bííyis jinoolninígíí, doodaiiʼ ázníłtsooígíí tʼáadoo nabikʼítsíníłkeesí, háálá doo honisin da; jó, diné haʼasíidgo aníłʼínígi átʼéego Bóhólníihii éí doo diné haisíidgo yiníłʼı̨́į da, háálá nihokááʼ dineʼé éí diné ánoolninígíí yiníłʼı̨́, nidi Bóhólníihii éí ajéí haisíidgo yiníłʼı̨́.
8 Jésii éí Abínadab hágo yidííniidgo Sámuel bidáahgi nijigháago áhoolaa. Áko Sámuel ájíní, Díí ałdóʼ doo Bóhólníihii náhodiiłtı̨́į da.
9 Áádóó Jésii éí Shámmah hadáahgi ánááyiidlaa. Áko ábijiní, Díí ałdóʼ doo Bóhólníihii náhodiiłtı̨́į da.
10 Jésii éí biyeʼké tsostsʼidígíí Sámuel bidáahgi nídíkahgo áyiilaa. Áádóó Sámuel éí Jésii áyidííniid, Díí doo Bóhólníihii néidiinil da.
11 Áko Sámuel éí Jésii áyidííniid, Naʼáłchíníísh tʼáá ałtso kweʼé? Áko ázhdííniid, Akéédę́ʼígíí tʼéiyá tʼah doo yígháah da; éí dibé yaa áhályą́. Áádóó Sámuel éí Jésii ánéidooʼniid, Łaʼ ákǫ́ǫ́ díłʼáago áádę́ę́ʼ doogááł, háálá doo díníibįįł da, jiníyáago índa.
12 Áko ákǫ́ǫ́ iʼjííłʼaʼgo yił nídaaskai. Áko éí tʼóó jilchííʼ lá áádóó ázhnoolninígíí éí tʼáá íiyisí dinééh bííyisii jílı̨́ı̨́ lá. Áádóó Bóhólníihii ádííniid, Nídiidáahgo akʼah bikʼi yeidííziłgo díísı̨́ı̨́ł, háálá díí éí átʼı̨́.
13 Áko Sámuel éí akʼah adeeʼ biiʼígíí nízhdiiʼą́ áádóó bikʼis bitahgi akʼah yikʼi yayiiziid, áko Bóhólníihii biNíłchʼi Diyinii éí David bikʼi hooleʼ bijı̨́ı̨́dóó bił hólǫ́ǫgo hahoolzhiizh. Ákohgo Sámuel nízhdiiʼnaʼgo Réímah kin haalʼáágóó aníjoodzá.
David éí tsin tłʼóół bąąh daneelzheeʼgo bee nidaʼaʼnéii yee Saul yá naazneʼ
14 Nítʼééʼ Bóhólníihii biNíłchʼi Diyinii éí Saul bitsʼáhoníleʼ, áádóó Bóhólníihii éí níłchʼi doo yáʼáshóonii hachʼįʼ nahwiiłnáago áhoolaa.
15 Áko Saul há nidaalʼaʼí ádahodííniid, Jó, kʼad Diyin God éí níłchʼi doo yáʼáshóonii nichʼįʼ nahwiiłnáago ániilaa.
16 Bídahwííníilníihii, bíniʼdii kóoní ná nidaalʼaʼí éí diné łaʼ tsin tłʼóół bąąh daneelzheeʼgo bee nidaʼaʼnéii yiyiichįįhígíí ná hadeidínóotaał. Áko éí ná yee naanéego Diyin God éí níłchʼi doo yáʼáshóonii nichʼįʼ nahwiiłnáago ániilaaígíí nitsʼą́ąjįʼ kónéidoodlíiłgo yáʼátʼééh nídíídleeł.
17 Áko Saul há nidaalʼaʼí ábizhdííniid, Diné yáʼátʼéehgo naanéhígíí tʼáá kʼad shá bił nánóhkááh.
18 Ákohgo há nidaalʼaʼígíí łaʼ ánáádooʼniid, Jó, Béthlehem kin shijaaʼdóó Jésii biyeʼ éí tsin tłʼóół bąąh daneelzheeʼgo bee nidaʼaʼnéii yee naané yiyiichįįhgo yishʼı̨́, índa dinééh bidziilii doo nánílyéesii nilı̨́, índa dinééh anaʼałʼíinii ałdóʼ nilı̨́, áádóó yáʼátʼéehgo yáłtiʼ, áko Bóhólníihii bił hólǫ́ǫgo dinééh yáʼátʼéehii nilı̨́.
19 Éí bąą Saul éí haneʼ nideiʼáhí łaʼ Jésii bichʼįʼ ajííłʼaʼgo ábizhdííniid, Niyeʼ David naʼniłkaadígíí shaa dííłʼaał.
20 Áádóó Jésii éí bááh áádóó tó abid bee wáin áádóó tłʼízí yázhí ałdóʼ éí télii béédzíiztłʼingo hayeʼ David éí Saul yichʼįʼ ayíílóóz.
21 Áko David éí Saul yaa níyáago yichʼįʼ yiizįʼ, áko Saul tʼáá íiyisí ayóóʼáhóʼní, áádóó bibee naʼabaahí bá nijijaahii dzizlı̨́ı̨́ʼ.
22 Áko Saul éí Jésii yichʼįʼ iʼííłʼaʼgo ání, Hániʼdii David shaʼałkʼee sidáa dooígíí baa nánooshkąąh, háálá hachʼohaʼné dzizlı̨́įʼgo haa nitséskees.
23 Áádóó ákódzaago Diyin God éí níłchʼi doo yáʼáshóonii Saul yikʼijįʼ kóyiilaaígíí bikʼi nááhoodleʼgo David tsin tłʼóół bąąh daneelzheeʼgo bee nidaʼaʼnéii há yee naazneʼgo Saul bikʼéé hóótaad áádóó yáʼátʼééh ánábiidlaa índa níłchʼi doo yáʼáshóonii bitsʼáldoh.
