1 Samuel 18:1-30
18 Saul bichʼįʼ ałtso niyázhníłtiʼgo Jánathan biiʼ sizíinii éí David biiʼ sizíinii yił łáʼí silı̨́ı̨́ʼ, áádóó Jánathan tʼáá bí biiʼ sizíinii ayóóʼáyóʼnínígi átʼéego ayóóʼáhóʼní.
2 Áko íídą́ą́ʼ Saul náhodiiłtı̨́, áádóó doo tʼáá kʼad hazhéʼé bighangóó hwééʼníłniiʼ da.
3 Jánathan éí David yił ahaʼdeetʼą́, háálá tʼáá bí biiʼ sizíinii ayóóʼáyóʼnínígi átʼéego ayóóʼáhóʼní.
4 Áádóó Jánathan biʼééʼ akáaʼgiígíí haidiiltsoozgo David yeiníłtsooz; biʼééʼ áádóó bidiltłish, beʼałtı̨́ı̨́ʼ índa yee áká nálzisígíí ałdóʼ hainínil.
5 Áko David tʼáá hizhdighááhgóó Saul ákǫ́ǫ́ nahałʼaʼgo ádaa áhojilyą́, áko Saul éí diné anadaʼałʼíinii yá hoosįʼ. Áko Ízrel dineʼé tʼáá ałtso índa Saul bá naalʼaʼí dabinááł baa nijigháhígíí bił yáʼádaatʼééh.
Saul éí David yoołchʼı̨́ı̨́d silı̨́ı̨́ʼ
6 Ákódaadzaadóó bikʼijįʼ nináhaazhjééʼ, David ałdóʼ Filístiya diné jiisxı̨́ı̨́dę́ę́ʼ nídzídzáago Ízrel dineʼé bikin dah naazhjaaʼdę́ę́ʼ sáanii dahataał áádóó daʼalzhish índa ásaaʼ yigádígíí bił dahózhǫ́ǫgo tsin deiłtązhgo aláahgo naatʼáanii Saul yidááh yíkai.
7 Áko sáanii ahá dahataałgo bił dahózhǫ́ǫgo ádaaní, Saul éí damíilgo neistseed, índa David éí neeznáá damííl biláahgo neistseed.
8 Áko Saul tʼáá íiyisí báhóóchįįd áádóó áhodooʼniidígíí yikʼee doo bił hóózhǫǫdgóó ádííniid, David éí neeznáadi daamííl íísdįįdgo yá hadaasdzííʼ, nidi shí éí daamíilgo áséłdįįdgo shá hadaasdzííʼ. Haʼátʼíísh hábínéidoolyééł? Jó, aláahgo bee óhólníihii tʼéí yidziih.
9 Éí bijı̨́ı̨́dóó Saul éí David hajisíidgo hodeeshzhiizh.
10 Ákódaadzaadóó biiskání Diyin God éí níłchʼi doo yáʼáshóonii Saul yikʼijįʼ yiʼníłniiʼ; Saul hakin góneʼ hakʼi nááhoodleʼgo tʼáá ádzaagóó yájíłtiʼgo áhoolaa, áádóó David tʼáá há nináʼneeh yę́ęgi átʼéego há nináánásʼneʼ. Saul éí bitsiidétáán anáhálghą́hígíí dah yootı̨́ı̨́ł,
11 áko Saul éí tsiidétáán yee iijíísxiʼ, háálá ájíní, Kin bikʼijįʼ David bighá deesxih, áko David hatsʼąą naalyizgo naakidi jisiih.
12 Áko Saul éí David yénáldzid, háálá Bóhólníihii éí David yił hólǫ́, áádóó hó éí hatsʼą́ą́ʼ dah hodiileʼ.
13 Éí bąą Saul ádítsʼáhoníłʼaʼgo siláo miilgo bee hóhólníihgo áhoolaa, áko diné binááł chʼééjídááh áádóó ninájiidááh.
14 David ádaa hojíyą́ągo tʼáá ałtsojįʼ hojíyą́ągo ájoonííł, háálá Bóhólníihii hoł hólǫ́.
15 David tʼáá íiyisí ádaa hojíyą́ągo ájooníłígíí Saul yooʼı̨́įgo hakʼee bił yééʼ.
16 Nidi Ízrel dineʼé áádóó Júdah dineʼé tʼáá ałtso David ayóóʼádayóʼní; jó, dabinááł chʼééjídááh áádóó ninájiidááh.
17 Ákohgo Saul éí David áyidííniid, Jó, doo shá nináhinílyéésgóó Bóhólníihii bá anaaʼ áníłʼı̨́įgo tʼéiyá shitsiʼ alą́ąjįʼígíí Míírab neʼasdzą́ą́ dooleeł biniyé naa deeshtééł, háálá Saul kwíizniizı̨́ı̨́ʼ, Shí éí doo atíhodeeshłíił da, nidi hániʼdii Filístiya dineʼé éí atídahodoolííł.
18 Áko David éí Saul áyidííniid, Shíshąʼ, éí haʼátʼíí nishłı̨́? Haash yitʼéego hinishná? Áádóó Ízrel dineʼé bitahgi shizhéʼé bighandóó danilíinii haʼátʼíísh danilı̨́įgo aláahgo naatʼáanii baadaaní yishłeeh doo?
19 Nidi ákwii hoolzhish yę́ędą́ą́ʼ Saul bitsiʼ Míírab éí David baa yílteeh nítʼééʼ yę́ę; jó, Éídriyal wolyéii Miihólath dineʼé nilı̨́įgo baa yíltı̨́.
20 Áko Máíkal éí Saul bitsiʼ nilı̨́įgo David ayóóʼáyóʼní, áko Saul yił dahoolneʼgo yaa bił hóózhǫǫd.
21 Áko Saul ádííniid, David éí tsístłʼazhdoogááł biniyé Máíkal haa deeshtééł, áko Filístiya dineʼé hachʼįʼ nidahwiiłnáa doo. Éí bąą naakidi aleeh góneʼ Saul éí David ánááyidooʼniid, Kʼad lą́ índa shaadaaní dííleeł ni.
22 Áko Saul éí bá nidaalʼaʼígíí yichʼįʼ haadzíiʼgo ání, Tʼáá nantʼinee hazhóʼó David bił ahił dahodoołnihgo ádabididoohniił, Aláahgo naatʼáanii naa bił nihoozhǫǫh, áádóó bá nidaalʼaʼí tʼáá ałtso ayóóʼádanóʼní, éí bąą kʼad aláahgo naatʼáanii baadaaní dííleeł.
23 Áádóó Saul bá nidaalʼaʼí éí David yichʼįʼ yee hadaasdzííʼ. Áádóó David ádííniid, Aláahgo naatʼáanii baadaaní yishłeehgo tʼįįhdígo haniih átʼéii átʼéego shaa nitsóhkees? Jó, diné hojoobaʼ átʼéii áádóó doo aláahgo chʼíbiʼditʼáahii yeeʼ nishłı̨́.
24 Saul há nidaalʼaʼí éí David yee hahaasdzíʼígíí yee hoł nídahoolneʼ.
25 Áko Saul áhodííniid, Kótʼéego David bichʼįʼ hadahidoohdzih, Aláahgo naatʼáanii éí doogehii doo yinízin da, nidi tʼáá hazhóʼó Filístiya dineʼé bichoʼ bílátahgi bichoʼazis ahénálgizhígíí neeznádiingo níʼdoojih nízin, áko aláahgo naatʼáanii jílíinii éí bee hweʼanaʼí kʼéézhdidoodlííł. Nidi Saul íinízin, David éí Filístiya dineʼé tsʼídá tʼáá dahodiyoołhéłí.
26 Áko Saul bá nidaalʼaʼí díí saad bee David yił dahoolneʼgo aláahgo naatʼáanii baadaaní jidooleełígíí tʼáá íiyisí baa hoł hóózhǫǫd. Ákohgo tʼah doo baa yíłkaah da.
27 Éí bąą David nízhdiiʼnaʼgo diné bił nijikaígíí bił dashdiikaigo Filístiya dineʼé naakidi neeznádiingo nidadzistsxeed, áko achoʼ bílátahgi achoʼazis ahénálgizhii tʼáá átʼé biniitʼaa aláahgo naatʼáanii baadaaní jidooleeł biniyé baa dajizhjaaʼ. Áko Máíkal éí Saul bitsiʼgo hweʼasdzą́ą́ dooleeł biniyé hainíłtı̨́.
28 Áko Saul díí yaa ákonízin áádóó bił bééhózin: Bóhólníihii éí David yił hólǫ́, áádóó Saul bitsiʼ Máíkal éí David ayóóʼáyóʼní.
29 Saul tʼah nááyówehígo David binínáádzísdzííd. Ákohgo Saul éí David biʼanaʼí jílı̨́įgo hodideeshzhiizh.
30 Ákohgo Filístiya dineʼé binanitʼaʼí anaaʼ nídahałeehgo David tʼáá íiyisí hózhǫ́ ádaa hojíyą́ągo Saul bá nidaalʼaʼí biláahgo anaaʼ áńjiilʼįįh; éí bąą házhiʼ aláahgo átʼéii silı̨́ı̨́ʼ.
