1 Samuel 19:1-24
19 Saul hayeʼ Jánathan índa há nidaalʼaʼígíí tʼáá ałtso éí David dadiyoołhééł, bizhdííniid.
2 Nidi Saul biyeʼ Jánathan éí tʼáá íiyisí David yaa bił nihoozhǫǫh. Áko Jánathan éí David bił hojoolneʼgo ájíní, Shizhéʼé Saul nidiyoołhééł biniyé naa hideesdzá, éí bąą abíníjįʼ tʼáá ni ádaa áhólyą́ągo nahontʼingi náʼádílʼįįh,
3 áko sínídáhígóó deesháałgo shizhéʼé bíighahgi naasháa dooleeł; naa yáshtiʼgo shizhéʼé bił ahił hashneʼgo shił bééhoozinígíí bee nił náhodeeshnih.
4 Áádóó Jánathan hazhéʼé bichʼįʼ nizhónígo David baa yájíłtiʼgo ábizhdííniid, Aláahgo naatʼáanii nílíinii, ná naalʼaʼí David bił ádił óólziih lágo, háálá bí doo nichʼįʼ ádił niʼiilzíih da, índa bí éí binaanish tʼáá íiyisí nizhónígo ná áyoolííł.
5 Háálá nináʼádeetʼą́ągo Filístiya diné yiyiisxı̨́, háálá Bóhólníihii éí bee yisdáʼiildéehii ayóó átʼéii Ízrel dineʼé yá áyoolííł. Éí yiniłtsą́ągo tʼáá íiyisí baa nił hóózhǫǫd, áko haʼátʼéegoshąʼ David tʼáadoo baanígóó biniʼniłhı̨́įgo doo ádąąh dahastʼáanii bidił bitsʼánílı̨́įgo áníléehgo bee ádił iilziih?
6 Áko Jánathan bizaad dzidiiztsʼą́ąʼgo Saul ádee hazdoodzíiʼgo ázhdííniid, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí David doo bidiʼyoolyéeł da.
7 Áko Jánathan éí David hágo bizhdííniid, áádóó Jánathan éí tʼáá ałtsoní hoł ííshjání áyiilaa. Áko Jánathan éí David yił dah diiʼáazhgo Saul bichʼįʼ hoł jiníʼáázh, áko tʼáá binááł nijighá yę́ęgi átʼéego nináájídáá nítʼééʼ.
8 Áádóó anaaʼ nááhásdlı̨́įʼgo David dah diiyáago Filístiya dineʼé yił daʼahoogą́ąʼgo tʼóó ahayóí neistseed, áádóó łaʼ éí hakʼee yóóʼaheezhjééʼ.
9 Níłchʼi doo yáʼáshóonii Bóhólníihii bitsʼą́ą́dóó Saul yikʼi nááhoodleʼ; Saul hatsiidétáán anáhálghą́hígíí dah jootı̨́įłgo hakin góneʼ dzizdá, áádóó David bitsin tłʼóół bąąh daneelzheeʼgo bee nidaʼaʼnéii yee há naazneʼ.
10 Áádóó Saul hatsiidétáán anáhálghą́hígíí bee kin bikʼijįʼ David bighá deesxih jiniizı̨́ı̨́ʼ, nidi David hatsʼąą deesyizgo tsiidétáán tʼóó kin baa ííjil, áádóó tʼáá éí bitłʼééʼ David yóóʼajoolwod.
11 Áádóó Saul bá naalʼaʼí łaʼ David bikingóó ayiisʼaʼgo haa neheekai, abínígo dah hodiyoołhééł biniyé. Nidi David hweʼasdzą́ą́ Máíkal hoł hoolneʼgo ání, Díí tłʼééʼ yisdáʼádidííltééł biniyé doo yóóʼíínílwodgóó yiską́ągo abínídą́ą́ʼ tʼóó dandiyoołhééł.
12 Áko Máíkal éí tsésǫʼ góyaa David hadajííloʼgo yóóʼeelwod.
13 Áko Máíkal éí eʼelyaii néidiiłtı̨́įgo tsáskʼeh yikááʼ niiníłtı̨́, áádóó tłʼízí bighaaʼ tsiiʼááł bitsʼiiyah nizníłtsoozgo bikʼídzístiʼ.
14 Áko Saul bá nidaalʼaʼí éí David háká dabiʼdeelʼaʼ nítʼééʼ asdzání ádííniid, Dajitsaah.
15 Áádóó Saul bá nidaalʼaʼí éí David yichʼįʼ anááyiisʼaʼgo ání, Tsáskʼeh tʼáá biiʼ dziztı̨́įgo shá náhonołteeh, áko hodiyeeshxééł.
16 Áko nidaalʼaʼí yah aakai, nítʼééʼ jó, eʼelyaii léiʼ tsáskʼeh yiiʼ sitı̨́įgo tłʼízí bighaaʼ bitsiiʼáál lá.
17 Áádóó Saul éí Máíkal áyidííniid, Haʼátʼíísh biniyé shiniʼsíníloʼgo shiʼanaʼí shiyaa haalwod? Áko Máíkal éí Saul ánéidooʼniid, Áshidííniidgo ání, Shíniʼdii yishááł, haʼátʼíísh biniyé nidiyeeshxééł?
18 Áko David yóóʼeelwodgo yisdááyá áádóó Réímah nahósʼaʼgi Sámuel baazhníyáago Saul hachʼįʼ áátʼįįdígíí tʼáá átʼé bee bił hojoolneʼ. Áádóó Sámuel bił dashdiiʼáazhgo Néíyath hazʼánígi kééhojitʼı̨́ı̨́ nítʼééʼ.
19 Áko Saul yił dahoolneʼgo ádaaní, Néíyathdi Réímah nahósʼaʼgi David naaghá.
20 Áádóó David shódeidoołtʼeeł biniyé Saul bá nidaalʼaʼí ákǫ́ǫ́ anááyiisʼaʼ, áko Sámuel á sizı̨́įgo Diyin God yá dahalneʼii dahalneʼgo dayiiłtsą́, nítʼééʼ Saul bá nidaalʼaʼí ałdóʼ Diyin God biNíłchʼi Diyinii bikʼi dahooleʼgo Diyin God yá dahoolneʼ.
21 Saul éí bee bił hóóneʼgo bá nidaalʼaʼí łaʼ ákǫ́ǫ́ anááyiisʼaʼ, nítʼééʼ éí ałdóʼ tʼáá ákótʼéego Diyin God yá náádahoolneʼ. Táadi aleeh góneʼ Saul éí nidaalʼaʼí łaʼ ákǫ́ǫ́ anáádziisʼaʼ, nítʼééʼ éí ałdóʼ Diyin God yá náádahoolneʼ.
22 Áko índa Réímah nahósʼaʼgóó dashdiiyáago Sííko kin shijaaʼgi tó hahadleeh ayóó átʼéé léiʼgi jiníyá, áko naʼízhdééłkidgo ájíní, Sámuel áádóó David éí háadi naaʼaash? Áádóó łaʼ áhodííniid, Jó, éí Néíyath hazʼánídi Réímah nahósʼaʼgi naaʼaash.
23 Áádóó Néíyathjįʼ Réímah nahósʼaʼgóó dashdiiyá, áko hó ałdóʼ Diyin God biNíłchʼi Diyinii hakʼi hooleʼgo Réímah nahósʼaʼgi Néíyathdi jiníyáajįʼ Diyin God bá hojilneʼ.
24 Áádóó ałdóʼ haʼééʼ hazhdiiʼnilgo tʼáá ákótʼéego Sámuel binááł Diyin God bá hojoolneʼ índa shá bíighah áádóó tłʼééʼ bíighah haʼééʼ tʼáágééd dziztı̨́. Éí bąą diné kódaaní, Saul wolyéiísh ałdóʼ Diyin God yá halneʼii yidiiyá?
