1 Samuel 2:1-36
2 Áko Hánnah sozdoolzingo ájíní,
Dooládóʼ shijéí bee Bóhólníihii tʼáá íiyisí baa shił nihoozhǫǫh da;Bóhólníihii bee shidziil sélı̨́ı̨́ʼ.Shide ádeinízinii tʼóó bá nahashtʼiʼ,háálá nibee yisdáʼiildéehii tʼáá íiyisí baa shił nihoozhǫǫh.
2 Bóhólníihiigi átʼéego doo łaʼ náádíyin da,háálá nigi átʼéii doo łaʼ nááhódlǫ́ǫ da;nihiDiyin God éí tsé bineʼ naʼadziʼígi átʼéego doo łaʼ nááhódlǫ́ǫ da.
3 Tʼáadoo ayóó átʼéego ádaa hóʼniihgo yáníłtiʼí;tʼáadoo ádaa hodzódlí bee hahídziihí,háálá Bóhólníihii Diyin God tʼáá ałtsoní bił bééhózin,áádóó bí tʼéiyá baa nidaʼaldeehígíí tʼáá ákóneʼ yeinítʼı̨́.
4 Diné ayóó ádaatʼéii beʼałtı̨́ı̨́ʼ nidahaastǫʼ,áádóó bijáyah daʼnijilii bidziilgo áńdeidleʼ.
5 Tʼáadoo bídin dajílíní da yę́ę kʼad éí tʼáá bídin hóyéeʼgo daʼjiyą́,nidi dichin danilı̨́ı̨́ nítʼééʼ yę́ę éí doo dichin danilı̨́į da daazlı̨́ı̨́ʼ.Doo ałchíii yę́ę baʼáłchíní tsostsʼid hazlı̨́ı̨́ʼ, nidi łaʼ baʼáłchíní tʼóó ahayóí yę́ę éí doo ałchíi da silı̨́ı̨́ʼ.
6 Bóhólníihii naʼałtseed áádóó hinááh áńdaʼadleʼ;jishcháaʼjįʼ iʼiiłnííh áádóó jishchááʼdę́ę́ʼ nááʼdiʼyiiłjeeh.
7 Bóhólníihii éí ahojoobáʼígo óʼoolííł, áádóó atʼı̨́įgo ałdóʼ óʼoolííł,ayáhígo óʼoolííł, áádóó ayóó éʼétʼéego ałdóʼ óʼoolííł.
8 Ayóó ádaatʼéii yił dah naháaztą́ą doo biniyéáádóó bikááʼdóó nahatʼáii bitsʼádiʼnílíidii bííʼ dadooleeł biniyébadahojoobáʼíii éí łeezh dibahí bitsʼą́ą́dę́ę́ʼ náyiilááháádóó daʼdókeedii éí chąąʼ biłeeshchʼiih tahdę́ę́ʼ hááyiiʼnííł,háálá nahasdzáán bee niłdzilii éí Bóhólníihii bííʼ,áádóó éí bikáaʼgi nahasdzáán niiníʼą́.
9 Bidiyı̨́ı̨́ʼ danilíinii deíkááhgóó yaa áhályą́,nidi doo yáʼádaashóonii éí chahałheeł yiiʼ dadéesxéel doo,háálá diné bibee adziilii doo yee akʼeh doodleeł da.
10 Bóhólníihii biʼanaʼí danilíinii deididooséí;yáʼąąshdę́ę́ʼ iiʼniʼ nahalingo hachʼįʼ hadoodzih.Bóhólníihii éí nahasdzáán nidahoneesʼą́ąjįʼ aa nídóotʼįįł,áádóó bee adziilii éí há aláahgo naatʼáanii nilíinii yeididooʼááł,áko tʼáá hó akʼah bikʼi yajiidziidii ayóó átʼéego ázhdoolííł.
11 Áko Elkéínah dah nízdiidzáago Réímah kin shijaaʼídi haghangi nídzídzá. Áádóó ashkii Sámuel éí nááʼiiłniihii Íílai binááł Bóhólníihii yá nihidiilʼaʼ.
Íílai baʼáłchíní bikʼijįʼ haʼoodzííʼ
12 Áko Íílai biyeʼké éí diné doo yáʼáshóonii nilı̨́; Bóhólníihii doo yééhósin da.
13 Íídą́ą́ʼ náádaʼiiłniihii éí kótʼéego diné yá ádaʼałʼı̨́ı̨́ nítʼééʼ: tʼáá háiida nááʼiiłniihgo nááʼiiłniihii binaalʼaʼí nilíinii bílaʼtáaʼii nineezígíí yootı̨́įłgo yighááh, áko atsįʼ yibéezhgo
14 tseeʼí, doodaiiʼ ásaaʼ nímazí, doodaiiʼ ásaatsoh, doodaiiʼ ásaaʼ éí bílaʼtáaʼii yee yiih atsihgo atsįʼ tʼáá átʼé hayéʼáłtsihígíí éí nááʼiiłniihii bííʼ yileeh. Sháíloh hazʼánídi Ízrel dineʼé tʼáá ałtso nehekáhígíí ákódeiiłʼı̨́ı̨́ nítʼééʼ.
15 Ákohgo atsįʼ bąąh akʼahígíí tʼah doo didlidgóó nááʼiiłniihii binaalʼaʼí yighááh áádóó diné nááʼiiłniihígíí ááhyiłniih, Atsįʼ éí nááʼiiłniihii łaʼ bá dooltʼisígíí baa diníʼaah, háálá atsįʼ shibézhígíí éí doo yinízin da; tʼáá tʼéehgo tʼéiyá yinízin.
16 Áko diné łaʼ áhodííniidgo ání, Bíniʼdii akʼahígíí átsé dadidlid, áko índa tʼáá nínízinígi ánéeltʼeʼgo bá nídidíínił, hałniih, nidi ábijiniih, Dooda, tʼáá kʼad shaa diníʼaah; éí doodago tʼáá shizááká nídideeshʼááł.
17 Éí bąą díí dinééh nidiltʼéego Bóhólníihii binááł ayóó átʼéego ádił niʼiisííʼ, háálá Ízrel dineʼé éí Bóhólníihii yichʼįʼ náádaʼiiłniihgo tʼáá íiyisí ákʼeh dahalʼı̨́ daazlı̨́ı̨́ʼ.
18 Nidi Sámuel éí tʼahdii ashkii yázhí nilı̨́įgo Bóhólníihii yá naalʼaʼ; yisdizígíí bee naʼatʼą́hí łigaii ditsʼidgo ályaii bee íífad wolyéii yił ákászaaz.
19 Áádóó Sámuel hamá éí éétsoh yázhí há ánáyiilʼįįhgo haa néíłtsos; tʼáá nináháhááh bikʼeh Hánnah áádóó hahastiin bił náázhdiʼyoołnihgóó ałnáájítʼashgo nááhidoonihii náájiiłniih.
20 Ákohgo Íílai éí Elkéínah áádóó hweʼasdzą́ą́ yił yikʼijisdliʼgo ání, Bóhólníihii éí díí asdzání binahjįʼ áłchíní neidiyiiʼaahígíí Bóhólníihii baa nídinooʼáanii bitsáskʼehgi nihaʼáłchíní danilı̨́į doo. Áádóó haghangóó aníjootʼáázh.
21 Áko Bóhólníihii éí Hánnah yikʼiníjídliih, áko Elkéínah bá anázʼniiltsąąhgo ashiiké táltʼé índa atʼééké nidiltʼé éí tʼáá ałkééʼ nijiishchı̨́. Áko Bóhólníihii binááł ashkii Sámuel noosééł.
22 Áko Íílai éí tʼáá íiyisí hadzistih, áádóó hayeʼké éí Ízrel dineʼé tʼáá ałtso yichʼįʼ ááníłígíí baa hozdiiztsʼą́ą́ʼ, ákótʼéego níbaal biiʼ dahozdísinii bichʼéédą́ąʼgi asdzání nidaalʼaʼ biniyé áłah nádleehígíí łaʼ bił názhníjahgo baa nijiʼaash lá.
23 Áko Íílai hayeʼké ábizhdííniid, Yáadishąʼ bąą tʼóó nichxǫ́ʼígi óhtʼı̨́. Diné tʼáá ałtso bitsʼą́ą́dóó tʼóó baaʼihígi óhtʼı̨́įgo nihaa hodiistsʼaʼ.
24 Dooda, shiyeʼké, doo yáʼáshónígi óhtʼı̨́įgo nihaa haneʼgo diistsʼaʼ. Bóhólníihii bidineʼé bee hazʼáanii dayiitíihgo íínóhsin lá.
25 Diné łaʼda diné náánáłaʼ yichʼįʼ ádił niʼiilzíihgo ánihwiiʼaahii haa nídóotʼįįł, nidi diné łaʼ Bóhólníihii bichʼįʼ ádił adzisiihgo háishąʼ há naʼakʼíyádoołtih? Azhą́ hayeʼké kóbizhdííniid nidi doo hwíistsʼą́ąʼ da nítʼééʼ, háálá Bóhólníihii áhodeeshdįįł, nízin.
26 Áko ashkii Sámuel jinoosééł áádóó tʼááłáhígi átʼéego hachʼohaʼníigo Bóhólníihii índa diné bił jílı̨́ı̨́ nítʼééʼ.
27 Áko Diyin God bitsʼą́ą́dóó diné léiʼ Íílai yaa níyáago áyidííniid, Bóhólníihii kóní, Nizhéʼé yę́ę badaʼáłchíní Ííjip kéyahdi Féro yinaalteʼ danilı̨́ yę́ędą́ą́ʼ bichʼįʼ ííshjání íʼdiishyaa.
28 Áádóó Ízrel dineʼé tʼáá ałtso bitahdóó shinááʼiiłniihii jílı̨́į doo biniyé náhodiiłtı̨́įgo éí tsin bijeeh dilidgo łikání halchingo nááhániihii shibikááʼ nááʼiiniihí bikáaʼjįʼ náájiiłniih doo índa shinááł íífad wolyéii bee hazhdítʼée doo. Áko nizhéʼé yę́ę áádóó baʼáłchíní náás daʼahílchíihii éí didlidgo nááhániihii Ízrel dineʼé baa diníʼą́.
29 Áko haʼátʼéegoshąʼ didlidgo nááhániihii áádóó nááhániihii bee nihoníʼáanii doo nihił danilı̨́ı̨́góó bikʼi naahkai, áádóó haʼátʼéegoshąʼ shiláahgo niyeʼké nił yílįįdgo tʼáá nihí ádadisinoołkʼahgo shidineʼé Ízrel bitsʼą́ą́dóó nááhániihii aláahgo ádaatʼéii bídin óhnééh lá?
30 Éí bąą Ízrel dineʼé biBóhólníihii Diyin God kóní, Díí shí bee nihá nihoníʼą́ą niʼ: nidineʼé áádóó nizhéʼé yę́ę bidineʼé shinááł naaldeehgo hoolʼáágóó shá nidaalʼaʼ doo, nidi kʼad Bóhólníihii ání, Kʼad tʼáá ákódí doo; shił dajílínígíí éí hoł danishłı̨́, nidi doo dashinízinii doo hoł danishłı̨́į da.
31 Jó, bichʼįʼ yoołkááł; nibee adziilii ádeeshdįįł índa nizhéʼé yę́ę bidineʼé bibee adziilii ádeeshdįįł, ákohgo nikʼéí tʼáadoo hadaatihí dadínóonééł.
32 Áko shiníbaal biiʼ hodílzinii biyiʼ éí nighahodidootʼáałii nił bééhodoozįįł; Diyin God éí Ízrel dineʼé tsʼídá yáʼádaatʼéehii yeidiníʼą́ą nidi ákóhodoonííł, áko nighandóó danilíinii bitahgi diné haastihii doo hólǫ́ǫ́góó ahoolʼáa doo.
33 Áádóó bikááʼ nááʼiiniihí shíhígíí tʼáadoo bitsʼą́ąjįʼ nideestsiłígíí éí tʼáá awołí bee daahchago índa nihijéí yínííł danilı̨́įgo ádayósin doo, áádóó nihikʼéí tʼah tsíłkéí danilı̨́įgo dadínóonééł.
34 Áko díí bee nichʼįʼ ééhózin doo: éí niyeʼ nidiltʼéego bikʼi hwiidooleeł, Háfnai áádóó Fíniyas tʼáá łaʼóo jı̨́ tʼáá ájíłah jidínóonééł.
35 Áádóó nááʼiiłniihii baʼahódlíii ádá nídideeshtéłígíí éí shijéí yinízinii áádóó baa nitséskeesii yikʼeh hółʼı̨́į doo, áádóó náás oochííłgóó shá naalʼaʼ doo, índa akʼah bikʼi yaadziidgo yilzı̨́įʼii shíhígíí yinááł hináago ahoolʼáa doo.
36 Áádóó éí ákódaadzaadóó nitsʼą́ą́dóó yichíiłii daadzíʼígíí tʼááłáʼí nítínígo yichʼįʼ nitséédígohgo béésh łigaii łaʼ áádóó bááh łaʼ yíyókeed doo índa ádidooniił, Nánihooshkąąh, nááʼiiłniihii binaanish danilíinii łaʼ shaa diníʼaah, áko bááh łaʼ yishą́ą doo.
