1 Samuel 20:1-42
20 Áádóó Réímah nahósʼaʼgi Néíyathdóó David dah náázhdíníichą́ąʼgo Jánathan baazhníyáago ábizhdííniid, Haalá yítʼįįd? Haʼátʼíísh bee doo ákwii íítʼįįd da? Índa nizhéʼé binááłshąʼ haʼátʼíí bee ádił niʼiisíihgo biniinaa hodiyeeshxééł shóʼní?
2 Áko áhodííniid, Dooda lą́ą! Doo dadíítsaał da. Jó, shizhéʼé éí haʼátʼíida ayóó átʼéii, doodaiiʼ áłtsʼísígo átʼéii tʼáadoo yee shił halneʼé doo áyóleʼ átʼée da, áko haʼátʼíí biniyé shizhéʼé díí shitsʼąą neiniłʼin doo? Dooyeeʼ ákótʼı̨́į da.
3 Áádóó David ánáádooʼniidgo ání, Nizhéʼé tsʼídá tʼáá yíní átʼéego bił bééhózingo éí ajoobaʼ bee shichʼoninéego shaa nitsíníkeesígíí bąą ání, Hániʼdii Jánathan díí doo bił bééhózin da leʼ, doodago éí yínííł dooleeł. Nidi tsʼídá tʼáá aaníí Bóhólníihii hiná, índa ni ałdóʼ hiníná; ákótʼéego dadeestsaałjįʼ tʼááłáhídi nináádiʼdooltał hadziih.
4 Ákohgo Jánathan éí David áyidííniid, Tʼáá haʼátʼíhída bídin nílı̨́įgo éí naa jooshbaʼ doo.
5 Áko David éí Jánathan áyidííniid, Jó, yiską́ągo dah yiitįįh; aláahgo naatʼáanii bikááʼ adání bichʼįʼ bił dah dínéeshkeełgo doo deesih da, nidi shíniʼ yishááł, tááʼ yiską́ą́dóó hiłiijı̨́įjįʼ hootsotahgi nídideeshtʼı̨́ı̨́ł.
6 Nizhéʼé shíhoosaʼ ládą́ą́ʼ kóbijiniih, David tsʼídá haleebee náshookąąhgo badiʼníʼą́ągo Béthlehem tʼáá bí bikin shijaaʼígóó anáádzá, háálá tʼáá nínáhah bikʼeh bikʼéí tʼáá ałtso nááʼiiniih bá néitʼaah.
7 Yáʼátʼééh lą́ą, dííniidgo éí ná naalʼaʼí bił hózhǫ́ǫ doo, nidi tʼáá íiyisí báhóóchįįdgo éí tʼáá aaníí doo yáʼátʼééhgóó shąąh tsídookos.
8 Éí bąą ná naalʼaʼí tʼáá íiyisí baa jiiníbaah, háálá Bóhólníihii binááł bee ahaʼdeetʼáanii bee ná naalʼaʼí bił ahaʼdíínítʼą́. Nidi doo ákwii éʼétʼéii shiiʼ hólǫ́ǫgo tʼáá ni shidiyííłhééł; haʼátʼíísh ałdóʼ biniyé nizhéʼé bichʼįʼ shił dííʼash?
9 Áádóó Jánathan áhodííniid, Doo ákóndiʼdoolníił da! Háálá tsʼídá tʼáá yíní átʼéegi shił bééhózingo shizhéʼé doo yáʼátʼéhígi ándoolíiłgo doósh nił hodeeshnih da?
10 Ákohgo David éí Jánathan ábijiní, Nizhéʼé tʼáá naʼníleʼdii nichʼįʼ haadzíiʼgoshąʼ, éí háí shił hodoolnih?
11 Áádóó Jánathan éí David áyidííniid, Tįʼ, hootsogóó diitʼash. Áko tʼáá ájíłah ákǫ́ǫ́ jiníʼáázh.
12 Áko Jánathan éí David áyidííniid, Ízrel biBóhólníihii Diyin God binááł! Yiską́ągo, doodaiiʼ naakiiską́ągo tʼáá kweʼé nahalzhiishgo shizhéʼé naa nitsíkeesígíí shił bééhodoozįįł; ákohgo yáʼátʼéehgo naa nitsíkees ládą́ą́ʼ doósh nił nínáhodeeshnih da?
13 Nidi nitsʼąą díníłʼı̨́įʼgo Bóhólníihii éí Jánathan yinishyéii atíshidoolííł, áádóó tʼah yówehígi átʼéego shichʼįʼ áhodoonííł. Shizhéʼé tsʼídá atínídoolííł tʼéí yaa nitsíkeesgo éí bee nił hodeeshnih áádóó háájída andeeshʼaałgo hózhǫ́ǫgo nanináa doo. Áko Bóhólníihii éí shizhéʼé yił hólǫ́ǫ́ nítʼééʼ yę́ęgi átʼéego nił hólǫ́ǫ doo.
14 Tʼah hinishnáago Bóhólníihii bee ajoobaʼ yee ayóóʼóʼóʼníinii doo tʼáá shí tʼéí shił bééhózingo ádíílíił da, ákótʼéego doo dadeestsaał da.
15 Áko neʼajoobaʼii shaʼáłchíní náás ahoolchíiłii hoolʼáágóó doo bitsʼą́ąjįʼ ádíílíił da. Bóhólníihii éí David biʼanaʼí tʼááłáʼí nítínígo nahasdzáán bikáaʼgi áyoołdįįłgo doo nihitsʼą́ąjįʼ kódíílíił da.
16 Jánathan éí bee ahaʼdeetʼáanii binahjįʼ David baʼáłchíní yił ahadaʼdeestʼą́ągo ání, Hániʼ Bóhólníihii éí David biʼanaʼí kʼéididoodlííł.
17 Áko Jánathan binahjįʼ David ádee hanááyiyííłdzííʼ, háálá ayóóʼájóʼní; jó, tʼáá hó hwiiʼ sizíinii ayóóʼájóʼnínígi átʼéego David ayóóʼájóʼní.
18 Áádóó Jánathan éí David áyidííniid, Yiską́ągo dah yiitįįh; dah nánídaah yę́ęgi doo dah sínídáágóó nídahozdoosah.
19 Tááʼ yiską́ągo díí baa nídiildeeʼgo tsʼídá tsxı̨́įłgo nídidíítʼı̨́ı̨́łgóó díínááł, áádóó Íízel tsé siʼánígi shibaʼ sínídáa doo.
20 Áko índa kʼaaʼ táaʼgo bee yíníshtʼóóh nahalingo tʼóó bíighah góneʼ bee iizhdiyeeshtʼoh.
21 Áádóó, shoo, ákǫ́ǫ́ ashkii deeshʼaałgo, Nílááh, kʼaaʼ náhílááh, bidideeshniił. Áádóó ashkii ánáábidideeshniił, Shoo, kʼaaʼ wóshchʼishjígo ahineezdeeʼ; náhílááh, bidííniidgo áádę́ę́ʼ chʼídíínááł; nichʼįʼ kʼé hólǫ́ǫgo tʼáadoo atínóleʼígóó hinínáa doo; tsʼídá tʼáá aaníí Bóhólníihii hiná; ákótʼéego hinínáa doo.
22 Nidi ashkii, Kʼaaʼ niláahdi ahineezdeeʼ, bidííniidgo éí nílááh yínáał doo, háálá Bóhólníihii ákǫ́ǫ́ anííłʼaʼ doo.
23 Jó, bee ahadiʼniitʼą́ągo ałchʼįʼ bee haiidzíiʼii bídéétʼiʼgo ádíshní, Bóhólníihii nihitaʼgi hoolʼáágóó hólǫ́ǫ leʼ.
24 Áko hootsogi David nídeestʼı̨́ı̨́ʼ, áádóó dah yiitą́ągo aláahgo naatʼáanii adooyı̨́ı̨́ł yiniyé dah neezdá.
25 Áádóó bee nástłʼahjí aláahgo naatʼáanii dah nánídaahígi dah neezdá, áádóó Jánathan yiizįʼ, áádóó Ábner éí Saul bíighahgi dah neezdá; David dah nánídaah yę́ęgi éí doo naagháhí da.
26 Nidi éí bijı̨́ı̨́dą́ą́ʼ Saul éí doo haʼátʼíhída dííniid da, háálá íinízin, Tʼáadoo leʼégi daatsʼí hachʼįʼ áhóótʼįįd. Jó, tʼóó haaʼih; tʼáá aaníí, tʼóó haaʼih, nízin.
27 Áádóó biiskání naaki jı̨́ı̨́ góneʼ David dah nánídaah yę́ęgi tʼáá bíniʼ nááhástʼą́. Áko índa Saul biyeʼ Jánathan nayídééłkidgo ání, Haʼátʼéegoshąʼ Jésii biyeʼ adą́ą́dą́ą́ʼ áádóó jı̨́ı̨́dą́ą́ʼ nídaʼiidı̨́įhgi tʼáadoo níyáa da?
28 Áádóó Jánathan éí Saul yichʼįʼ haadzíiʼgo ání, David éí haleebee náshoohkąąhgo Béthlehem kin shijaaʼgóó biʼníłniiʼ,
29 David kóníigo bąą, Shíniʼdii yishááł, baa nánooshkąąh, háálá shikʼéí éí kin shijaaʼgi nááʼiiniih dayiiłʼaah, índa shínaaí áadi nanináa doo, shidííniid. Áko kʼad ajoobaʼ bee shichʼoninéego shaa nitsíníkees ládą́ą́ʼ, hániʼdii shínaaíké nídeideestsééł biniyé ákǫ́ǫ́ deeshááł. Díí biniinaa aláahgo naatʼáanii náʼádįįhgi David doo nádáah da.
30 Áádóó Saul éí yikʼee nídiiltáalgo Jánathan yichʼįʼ báhóóchįįdgo áyidííniid, Asdzání beʼádíláahgo naalteehii biyáázh nílíinii, daʼ doósh shił bééhózin da, tʼóó baa yáhásinígi átʼéego Jésii biyeʼ nídiniłtı̨́, índa nimá nidi tʼóó baa yáhásinígi átʼéego tʼáá ákohígo nííníłtʼeʼ?
31 Tʼáá nahasdzáán bikááʼ Jésii biyeʼ hináago ni índa aláahgo naatʼáanii nílı̨́įgo bee níhólníihgo bił hazʼáanii doo chánah dooleeł da. Éí bąą bíká iʼdííłʼaałgo shichʼįʼ nidahodoohłóós, háálá tʼáá aaníí dazdootsaał.
32 Áádóó Jánathan éí bizhéʼé Saul áyidííniid, Haʼátʼíishąʼ biniinaa hodiʼyoolyééł? Haash jíítʼįįd?
33 Áádóó Saul éí tsiidétáán yee hwííníisiʼ, áko Jánathan hoł bééhoozin, hazhéʼé éí David tsʼídá diyoolyéłí, yóʼníí lá.
34 Áko Jánathan éí tʼóó báhádzidgo báhóóchįįdgo bikááʼ adání siʼánídóó nídiiʼnaʼ áádóó naaki jı̨́ı̨́ góneʼ tʼáadoo ajííyą́ąʼ da, háálá David baa yínííł dzizlı̨́ı̨́ʼ; jó, hazhéʼé éí David tʼóó baa yáhásinígi áyííłʼįįd.
35 Áádóó tʼah abínídą́ą́ʼ Jánathan éí hootsogi David bá nihozhníʼáníjįʼ ashkii yázhí bił jiníʼáázh.
36 Áádóó ashkii ábizhdííniid, Kʼaaʼ bee adizhyeeshtʼohígíí nááhidííla biniyé ákǫ́ǫ́ nídidíílwoł. Áko ashkii nídiilwodgo kʼaaʼ bee biláahjįʼ iidziistʼoh.
37 Áádóó ashkii éí Jánathan kʼaaʼ yee adziistʼohíjįʼ yílwodgo Jánathan ábidííniid, Daʼ niláahdiísh kʼaaʼ doo ahineezdeeʼ da?
38 Áádóó Jánathan éí ashkii bíká ázhdííniid, Tsxı̨́įłgo, nánílyeed; tʼáadoo tʼáá aadi nanináhí! Áko Jánathan beʼashkii éí kʼaaʼ náyiizlááʼ áádóó binanitʼaʼí yaa nálwod.
39 Nidi díí biniyé áhóótʼįįdígíí ashkii doo bił bééhózin da; Jánathan áádóó David tʼéiyá bił bééhózin.
40 Áko Jánathan hakʼaayééł éí ashkii baazhnínilgo ábijiní, Nílááh, kin haalʼáágóó díjááh.
41 Áádóó ashkii dah diilwodgo tʼáá áko shádiʼááh bichʼijígo David nízhdiiʼnaʼ áádóó niʼjįʼ nitsizhdinígoʼgo táadi yaa áńdziidzaa áádóó ahidiníłnáago ahidziztsʼǫs índa David yéego hajííchxago ahaa jíícha.
42 Ákohgo Jánathan éí David áyidííniid, Nílááh, hózhǫ́ǫgo yínááł leʼ, shą́ą́ʼ Bóhólníihii bízhiʼ binahjįʼ tʼáá ákótʼéego ałhadiʼniitʼáaniʼ, Bóhólníihii nihitaʼgi hólǫ́ǫ doo, índa shéélchíín áádóó néélchíín bitaʼgi hoolʼáágóó hólǫ́ǫ doo. Áádóó nízhdiiʼnaʼgo dashdiiyá; Jánathan éí kin haalʼáágóó anáádzá.
