1 Samuel 21:1-15
21 Áádóó Nob kin shijaaʼgi David éí Ahímelek nááʼiiłniihii yaa níyá, áádóó Ahímelek éí hatah hoditłidgo David bidááshníyáago ábizhdííniid, Haʼátʼéegoshąʼ tʼáá sáhí naniná? Dinéésh doo łaʼ bił naniʼaash da?
2 Áádóó David éí nááʼiiłniihii Ahímelek ábizhdííniid, Aláahgo naatʼáanii tʼáadoo leʼé yee shichʼįʼ haadzííʼ áádóó tʼáadoo leʼé bichʼįʼ nidéłʼaʼígíí índa bee nichʼįʼ haasdzíʼígíí diné tʼáadoo łaʼ bił bééhóziní doo, áádóó shá nidaalʼaʼí łahgo bił ahándahonishtʼą́.
3 Éí bąą kʼadshąʼ haʼátʼíí nee hólǫ́? Bááh ashdlaʼgo, doodaiiʼ tʼáá haʼátʼíhída nee hólónígíí shaa díínił.
4 Áko nááʼiiłniihii éí David áyidííniid, Tʼáá ákwíí jı̨́ bááh daadánígíí shee ádin, nidi bááh dílyinii tʼéí hólǫ́; tʼáá hazhóʼó tsíłkéí éí asdzání yitsʼąą ádaa ádahalyáanii tʼéiyá bá átʼé.
5 Áko David éí nááʼiiłniihii áyidííniid, Tʼáá aaníí tááʼ yiskánídą́ą́ʼ chʼíníyá yę́ędóó wóshdę́ę́ʼ asdzání nihitsʼąą báháná, áádóó tʼóó nideikaigo tsíłkéí bitsʼíís dílzin, áko díí jı̨́ baa neiikaígíí biniinaa tsʼídá agháago dílzin.
6 Áko nááʼiiłniihii éí bááh nááhániihii hainínil, háálá bááh daadánígíí doo łaʼ hólǫ́ǫ da, nidi bááh nááhániihii tʼéiyá hólǫ́; éí Bóhólníihii binááł nahjįʼ aheʼníłígíí bitsáskʼeh góneʼ bááh tʼah sidogo anáháʼnííł nítʼééʼ.
7 Éí bijı̨́ diné léiʼ Saul bá naalʼaʼí nilı̨́įgo ákwii naagháá lá, Bóhólníihii binááł tʼóó naʼáhodidlá; éí Dóweg wolyéego Íídam dineʼé nilı̨́įgo, Saul bilı̨́ı̨́ʼ yaa ádahalyáanii yinanitʼaʼí nilı̨́.
8 Áádóó David éí Ahímelek áyidííniid, Daʼ tsiidétáán, doodaiiʼ diltłishísh łaʼ nee hólǫ́? Jó, shidiltłish, doodaiiʼ shibee naʼabaahí tʼáadoo łaʼ níláa da, háálá aláahgo naatʼáanii binaanish tsxı̨́įłgo łaʼdoonííł.
9 Áko nááʼiiłniihii áhodííniid, Íílah yíldzisdi Filístiya diné Goláíyath síníłhínígíí bidiltłish tʼéiyá hólǫ́; jó, naʼatʼą́hí bił yisdisgo íífad wolyéii bineʼjí sitą́; nínízingo éí nídiitįįh; tʼáá éí tʼéí hólǫ́. Áádóó David ádííniid, Jó, łahgo ánáánátʼéhígíí ádin lá; tʼáá éí shaa nítįįh.
10 David nízhdiiʼnaʼ áádóó yóóʼajoolwod; Saul béédzíldzidgo tʼáá éí bijı̨́ Gath kin haalʼáagi aláahgo naatʼáanii Éíkish bichʼįʼ yóóʼajoolwod.
11 Áko Éíkish bá nidaalʼaʼí ádahodííniid, Daʼ díísh doo kéyahdóó David aláahgo naatʼáanii átʼı̨́į da? Daʼ díísh doo haniinaa Ízrel dineʼé dahataałgo daʼalzhishgo ahidiníłnáago kódaʼahidooʼniid da, Saul éí damíilgo neistseed, índa David éí neeznáá damííl biláahgo neistseed?
12 Áko David díí saadígíí hajéí biiʼ baa ákozniizı̨́įʼgo Gath kin haalʼáagi aláahgo naatʼáanii Éíkish tʼáá íiyisí béédzísdzííd.
13 Áádóó dabinááł hashtʼezhdítʼéé nítʼééʼ yę́ę łahgo ájiilaago diigisgi átʼéego ízhʼdiilyaago chʼéʼétiingi dáńʼdítı̨́hí bikʼiniʼdzizoh áádóó hazhééʼ éí hadághaaʼ bąąh náálı̨́įgo ájiilaa.
14 Nítʼééʼ Éíkish éí bá nidaalʼaʼí áyidííniid, Shoo, díí diné diigis nilı̨́ı̨́ lá! Áko haʼátʼíísh biniyé bił shaa noohkai?
15 Daʼ diné diigis nilíiniísh bídin jílı̨́ dashíínóhʼníigo díí diné diigis nilíinii shá nidooneeł biniyé bił shaa noohkai? Daʼ díísh shighan góneʼ yah adoogááł lá?
