1 Samuel 22:1-23
22 Éí bąą David áádóó dashdiiyáago Adálam kin haalʼá bíighahgi tséʼáán góneʼ ajoolwod, áko hakʼisóó danilíinii índa hazhéʼé bighandóó danilíinii tʼáá ałtso haa dahodiiztsʼą́ąʼgo ákǫ́ǫ́ hachʼįʼ aheeskai.
2 Áko diné bichʼįʼ nidahwiiʼnáanii áádóó bąąh hadaazʼáii índa Saul binahatʼaʼ doo bił yáʼádaatʼéehii tʼáá ałtso haa haaskaigo binanitʼaʼí dzizlı̨́ı̨́ʼ. Áko diné dı̨́įdi neeznádiin daatsʼí bił nijikai.
3 Áádóó David dah náázdiidzáago Móʼab kéyahgi Mízpeh kin haalʼáajįʼ jiníyá, áádóó Móʼab dineʼé aláahgo binanitʼaʼí ábizhdííniid, Nánooshkąąh, bíniʼ shimá áádóó shizhéʼé kweʼé dooʼashgo Diyin God shá ádooníłígíí shił bééhoozinjįʼ kweʼé nił naháaztą́ą doo.
4 Áádóó Móʼab dineʼé aláahgo binanitʼaʼí baa hoʼdeetʼeezhgo tʼáá ákǫ́ǫ́ bił nidzíiztą́ą́ nítʼééʼ; David éí bidziilgo nahazʼą́ągi nahontʼindi nijighá.
5 Ákohgo Diyin God yá halneʼii Géed wolyéii David áyidííniid, Tʼáadoo tʼóó nahontʼingi nanináhí, nidi dah diináahgo Júdah kéyahgóó dínááh. Áádóó David dashdiiyáago tsintahgo hodíłchʼildi Héíreth hoolyéegi jiníyá.
6 Saul éí díí yaa hodiiztsʼą́ą́ʼ: David áádóó diné bił nijikaígíí yikʼídaaskai lá, (íídą́ą́ʼ Gíbiyah kin haalʼáadi Réímah nahósʼaʼgi Saul tsinyaagi dzizdáago hatsiidétáán dah jootı̨́įłgo há nidaalʼaʼí hanánaazı̨́).
7 Áádóó Saul éí bá nidaalʼaʼí binaagóó naazínígíí áyidííniid, Bénjamin dineʼé nohłíinii, daʼíísínółtsʼą́ą́ʼ, daʼ tʼááłáʼí nootínígo kéyah índa chʼil naʼatłʼoʼii kʼéédílyéeh doogi Jésii biyeʼ wolyéiísh nihaa hodidooʼááł índa daʼ tʼáásh ánółtso siláo miilgo binanitʼaʼí danohłı̨́įgo índa siláo neeznádiingo binanitʼaʼí danohłı̨́įgo ánihidoolííł?
8 Daʼ éísh biniinaa tʼáá ánółtso shindahosooʼą́? Shiyeʼ nilíinii éí Jésii biyeʼ yił ahaʼdeetʼánígíí doo łaʼda bee shił hoołneʼ da; tʼáá łah dinołtʼéhí nidi doo łaʼ shikʼédí nohłı̨́į da, índa shiyeʼ éí shá naalʼaʼí shikʼijįʼ nilı̨́įgo áyiilaago tʼáadoo bee shił dahoołneʼ da, áko éí díí jı̨́ı̨́góó atíshidoolíiłgo shaa naaʼnaʼ.
9 Áádóó Íídam dineʼé jílíinii Dóweg joolyéii éí Saul bá nidaalʼaʼí yinanitʼaʼí nilı̨́įgo áhodííniid, Jésii biyeʼ éí Nob kin shijaaʼjįʼ Aháítab biyeʼ Ahímelek yichʼįʼ yigáałgo yiiłtsą́.
10 Áko éí Bóhólníihii bichʼįʼ David yá sodoolzin, áádóó chʼiyáán łaʼ yaʼníłtsood, índa Filístiya diné Goláíyath bidiltłish yeinítą́.
11 Ákohgo aláahgo naatʼáanii éí Aháítab biyeʼ Ahímelek nááʼiiłniihii áádóó Nob kin shijaaʼgi hazhéʼé bighandóó danilíinii tʼáá ałtso éí nááʼiiłniihii danilíinii bíká iʼjííłʼaʼ, áádóó aláahgo naatʼáanii yaa haaskai.
12 Áádóó Saul ádííniid, Aháítab biyeʼ nílíinii, shííníłtsʼą́ą́ʼ. Kǫ́ǫ́ naashá, bóhonishníihii, bizhdííniid.
13 Áko Saul áhodííniid, Haʼátʼíishąʼ biniinaa ni áádóó Jésii biyeʼ bił shinahosooʼą́? Jó, bááh béíníʼą́, áádóó diltłish béínítą́ índa Diyin God bichʼįʼ bá náʼiisíníkango éí díí jı̨́ı̨́góó atíshidoolíiłgo shaa naaʼnaʼ.
14 Áko Ahímelek éí aláahgo naatʼáanii áyidííniid, Háishąʼ tʼáá aaníí David baʼahódlíii aláahgo naatʼáanii yaadaaní nilínígi átʼéego ná nidaalʼaʼí bitahgi baʼahódlí? Áádóó naa ádahalyáanii yinanitʼaʼí nilı̨́, índa nighan góneʼ ił nilı̨́.
15 Daʼ tʼáásh éí tʼéí Diyin God bichʼįʼ bá náʼiisiskan? Doodayéii, hániʼdii aláahgo naatʼáanii bá naalʼaʼí nishłíinii, doodaiiʼ shizhéʼé bighandóó danilíinii tʼáá ałtso doo yáʼátʼéehii doo łaʼ ádá nihił béédahózin da, áko shí tʼéí díí tʼáá kóníshéhígo shił bééhózin.
16 Áko aláahgo naatʼáanii áhodííniid, Ni Ahímelek índa nizhéʼé bighandóó danilíinii tʼáádóo nídí tʼáá ánółtso dínóohnééł.
17 Áko aláahgo naatʼáanii binaagóó bisiláo naazínígíí áyidííniid, Nídaahisgo, Bóhólníihii bináádaʼiiłniihii nidaałtseed, háálá David yichʼą́ą́h nidaakai, índa yóóʼeelwodgo tʼáadoo yee shił dahoolneʼ da. Nidi aláahgo naatʼáanii bá nidaalʼaʼí éí Bóhólníihii bináádaʼiiłniihii tʼáadoo nideistseed da.
18 Áádóó aláahgo naatʼáanii éí Dóweg áyidííniid, Náhínáahgo, náádaʼiiłniihii naniłtsxeed. Áko éí bijı̨́ Íídamdóó diné Dóweg názyizgo náádaʼiiłniihii éí íífad wolyéii naʼatʼą́hí łigaii ditsʼidgo ályaii yee hadadítʼéhígíí tsebídiindóó baʼaan ashdlaʼ yiltʼéego neistseed.
19 Áádóó Nob kin shijaaʼgi náádaʼiiłniihii bikin haalʼáhídi diné áádóó asdzání áádóó áłchíní áádóó tʼah daʼałtʼoʼígíí áádóó béégashii, télii índa dibé ałtso diltłish bee nidzistseed.
20 Nidi Aháítab biyeʼ Ahímelek wolyéii biyeʼ łaʼ Abáíyathar wolyéego éí yisdáálwodgo David yikééʼ eelwod.
21 Áko Abáíyathar éí David bił hojoolneʼgo ájíní, Saul éí Bóhólníihii bináádaʼiiłniihii neistseed.
22 Áádóó David éí Abáíyathar áyidííniid, Íídamdóó diné Dóweg hoołtsą́ bijı̨́ı̨́dą́ą́ʼ tʼáá íídą́ą́ʼ tʼáá aaníí Saul bił hozhdoolnih lą́ą niizı̨́ı̨́ʼ. Shiniinaa nizhéʼé bighandóó danilíinii tʼáá ałtso nidaaztseed.
23 Tʼáá kǫ́ǫ́ shił naniʼaash, tʼáadoo nił yéʼí, háálá shizééʼ yidootʼįįłii ni ałdóʼ nizééʼ yidootʼįįł, nidi shił naniʼaashgo éí nidziih doo.
