1 Samuel 23:1-29
23 Áádóó David yił dahoolneʼgo ádaaní, Shoo, Filístiya dineʼé éí Kiiʼáílah kin haalʼáagi yikʼiijéeʼgo haʼínídaʼalʼisígi haghadaʼiisʼnil.
2 Éí bąą David éí Bóhólníihii náyooskango ání, Filístiya dineʼé bichʼįʼ deeshbahgo nideestsiłgoósh tʼáá áko? Áko Bóhólníihii éí David áyidííniid, Nílááh, Filístiya dineʼé naniłtseedgo Kiiʼáílah dineʼé yisdánínííł.
3 Áádóó David bidiné ádadííniid, Jó, Júdah kéyahgi nidi tʼáá íiyisí nídeiildzid, ákoshąʼ haitʼéego Kiiʼáílah kin haalʼáágóó diikahgo Filístiya dineʼé bisiláo bikʼiidiijah?
4 Áádóó David éí Bóhólníihii nínááyooskan. Nítʼééʼ Bóhólníihii áhodííniid, Dah diináahgo Kiiʼáílah kin haalʼáá góyaa dínááh, háálá áadi Filístiya dineʼé nílákʼee deeshnił.
5 Áko David índa diné yił naakaígíí Kiiʼáílah kin haalʼáá góyaa yíkaigo Filístiya dineʼé yikʼiijéeʼgo nideistseed áádóó dabilı̨́ı̨́ʼ yitsʼą́ą́ʼ adeineeskaad, áko David éí Kiiʼáílah kin haalʼáagi kéédahatʼíinii yisdááyíínil.
6 Ahímelek biyeʼ Abáíyathar éí David yikééʼ eelwodgo Kiiʼáílah kin haalʼáágóó íífad wolyéii yoołtsosgo David yichʼįʼ níyá.
7 Áko, Kiiʼáílahgi David jiníyá, haʼníigo Saul yił dahoolneʼ. Áádóó Saul ádííniid, Diyin God shílákʼee hodííʼą́, háálá kintahgi dáńʼdadilkał índa bichʼą́ą́h dah nídaatı̨́įhii hólónígi yah ajííyá.
8 Áádóó Saul éí diné tʼáá ałtso áłah áyiilaago Kiiʼáílah góyaa hidiikahgo David áádóó diné yił naakaígíí binídiilzhish daniizı̨́ı̨́ʼ.
9 Áko Saul tʼáá nahontʼinee David bizhʼniiłhínígíí bił bééhoozingo Abáíyathar nááʼiiłniihii áyidííniid, Íífad wolyéii wóshdę́ę́ʼ deʼníłtsóós.
10 Áádóó David ázhdííniid, Ízrel biBóhólníihii Diyin God, ná naalʼaʼí nishłíinii éí Saul shíká dínéeztą́ąʼgo Kiiʼáílah kin haalʼáajįʼ doogáałgo baa hodisétsʼą́ą́ʼ. Éí shiniinaa kin haalʼáhígíí ábizhniiłdįįd lá.
11 Kiiʼáílahdóó dineʼéésh hálákʼee dashdidooʼááł? Tʼáá baa hodisítsʼą́ʼígi átʼéegoósh Saul doogááł? Ízrel dineʼé biBóhólníihii Diyin God nílíinii, nánooshkąąh, ná naalʼaʼí nishłíinii shił hólneʼ. Áádóó Bóhólníihii ádííniid, Éí doogááł.
12 Áádóó David ádííniid, Daʼ Kiiʼáílah dineʼéésh éí shí áádóó diné shił naakaígíí Saul yílákʼee danihididooʼááł? Áádóó Bóhólníihii ádííniid, Yílákʼee danihididooʼááł.
13 Áko David áádóó diné hoł naakaígíí hastą́ądi neeznádiin daatsʼí yiltʼéego nídiijéeʼgo Kiiʼáílah kin haalʼáádóó tʼáá ooleełjigo aheeskai. Áko David éí Kiiʼáílahdóó dah náázdiidzáago Saul bił hóoneʼgo tʼáadoo ákǫ́ǫ́ deeyáa da.
14 Áádóó David éí honoojíidi bidziilgo nahazʼą́ągi dziłtahdi Zif honoojí nahontʼingi nijigháá nítʼééʼ. Áko Saul tʼáá ákwíí jı̨́ chʼééh hákantá, nidi Diyin God éí tʼáadoo yílákʼee hodííʼą́ą da.
15 Áko David éí Saul hákantáago hoł bééhoozin. David éí Zif honoojíigi tsintahgi nijigháá nítʼééʼ.
16 Áádóó Saul biyeʼ Jánathan nídiiʼnaʼgo tsintahdi David yaa níyáago Diyin God binahjįʼ chánah ánáhojiidlaa.
17 Áádóó áhozhdííniid, Tʼáadoo nił yéʼí, háálá shizhéʼé Saul doo shóniidoołtʼeeł da, áko Ízrel dineʼé aláahgo binanitʼaʼí dííleeł, índa shí éí tʼáá nikééʼ góneʼ sézı̨́į dooleeł; díí shizhéʼé Saul ałdóʼ bił bééhózin.
18 Áádóó Bóhólníihii binááł ahazhdeetʼą́ągo David éí tʼáá tsintah hodíłchʼilgi nijigháago Jánathan bighangóó anáádzá.
19 Ákohgo Zif honoojí dineʼé éí Gíbiyah kin haalʼáagi Saul yaa yíkaigo kódaaní, Bidziilgo nahazʼą́ądi tsintah hodíłchʼilgi David nantʼin; Hakáílah yanáalkʼidígi Jiisháíman honoojíhígíí shádiʼááhjí nantʼin.
20 Éí bąą kʼad, aláahgo naatʼáanii nílíinii, kodi nínááh. Niiʼ sizíinii tʼáá átʼé bee íinínízingo kodi nínáahgo nihí ałdóʼ naatʼáanii nílíinii nílákʼee dahodidiitʼááł.
21 Áádóó Saul ání, Bóhólníihii nihikʼijidlíi leʼ, háálá shaa aʼááh danoozı̨́ı̨́ʼ.
22 Nílááh, wohkah, baa nánihooshkąąh, áko nínádítʼı̨́hígi nihił béédahodoozįįł áádóó háishąʼ áadi biiłtsą́, háálá éí diné ayóogo binaʼadloʼgo shił hóóneʼ.
23 Éí bąą hádahósídóoʼı̨́įʼgo nínádítʼı̨́hígóó tsʼídá hazhóʼó nihił béédahodoozįįł, áádóó tʼáá yíní átʼéegi nihił béédahoozingo shaa nínáádoohkahgo ákǫ́ǫ́ nihił deeshkah. Áko éí bikʼijįʼ tʼáá aaníí éí kéyah biiʼ nijigháago Júdah dineʼé mííl yiltʼéhígíí bitahgóó hahodínéeshtaał.
24 Áko nídiijéeʼgo Zif honoojíígóó Saul yilą́ąjįʼ eekai, nidi David áádóó diné bił naakaígíí Méíyan honoojíidi naaldeeh; éí Jiisháíman honoojíhígíí shádiʼááh nahósʼaʼjí áhoolyé.
25 Saul áádóó diné bił naakaígíí háká dadínéeztą́ą́ʼ haʼníigo David hoł hóóneʼ. Éí bąągo tsékoohjigo ajoolwodgo Méíyan honoojíigi nijighá. Áádóó Saul díí dzidiiztsʼą́ąʼgo Méíyan honoojítahgóó David bikééʼ adziyoodzá.
26 Áko Saul áádóó diné bił naakaígíí łahjí dził yąąh híijééʼ; David áádóó diné bił nijikaígíí ałdóʼ łahjí ííjééʼ. Áko David éí Saul bikʼee hoł yéeʼgo tsxı̨́įłgo bił chʼídiijah jinízin, háálá Saul áádóó diné bił naakaígíí hoł nidadoodił biniyé kʼadę́ę honátʼih.
27 Áko naalʼaʼí łaʼ Saul yaa níyáago ání, Sołtįʼ, tsxı̨́įłgo ánítʼı̨́, háálá Filístiya dineʼé siláo nihikéyah yaatįįh yikai lá.
28 Ákohgo Saul éí David bikééʼ joojah yę́ędóó tʼą́ą́ʼ dah nízhdiijéeʼgo Filístiya dineʼé bichʼįʼ anaaʼ hodzisłı̨́ı̨́ʼ. Éí bąą éí tsékoohgi Tsé Baa Atsʼáʼooldeeʼii hoolyée doo, hodooʼniid.
29 Áko David áádę́ę́ʼ diné bił chʼééjíkaigo tʼáá ákwii Engíídai nahósʼaʼgi tsétahgi bidziilgo nahazʼą́ą́góó kéédahojitʼı̨́ı̨́ nítʼééʼ.
