1 Samuel 24:1-22
24 Ákódzaadóó bikʼijįʼ Saul éí Filístiya dineʼé yikééʼ yijah yę́ę tʼą́ą́ʼ nákaigo, Shoo, David éí Engíídai nahósʼaʼ honoojíidi diné bił nijikai, hodooʼniid.
2 Ákohgo Saul éí Ízrel dineʼé bitahdóó naʼabaah yee danilíinii táadi mííl néidiinilgo Tłʼízí Ałchinii Bitsétah hoolyéégóó David índa diné bił naakaii há adeineeztą́ą́ʼ.
3 Áko atiingi dibé dabighan léiʼgóó jookah, ákweʼé tséʼáán góneʼ Saul niiʼozhdoogááł biniyé yah ajííyá. David ałdóʼ náʼáneʼídi diné hoł naakaígíí hoł naháaztą́.
4 Áko David éí diné bił nijikaígíí ádahodííniid, Tʼáá aaníí Bóhólníihii nichʼįʼ yee haadzíiʼii beiníłką́; jó, niʼanaʼí nílákʼee yidííʼą́. Áko nizhónígi átʼéego nichʼįʼ áhodooníłígi átʼéego bichʼįʼ ádíínííł. Áádóó hazhóóʼógo David nízhdiiʼnaʼgo Saul biʼéénééz łahjįʼ bitsʼą́ą́ʼ bizhdííłgizh.
5 Áádóó kódziidzaadóó bikʼijįʼ bikʼee David hwiiʼ hadahodéébįįd, háálá Saul biʼééʼ kʼízhnígizh.
6 Áádóó diné bił nijikaígíí ábizhdííniid, Bóhólníihii éí shinanitʼaʼí kódeeshłíiłgo doo yee shá hasʼą́ą da; Bóhólníihii akʼah yikʼi yayiiziidgo yiyíísı̨́įʼii doo ákwii ííłʼįįd da; jó, Bóhólníihii akʼah yikʼi yayiiziidgo yiyíísı̨́įʼii nilı̨́.
7 Áko David éí diné bił nijikaígíí díí saad bee bichʼįʼ hadzoodzíiʼgo tʼáadoo Saul yikʼiijéeʼ da. Nidi tséʼáándę́ę́ʼ Saul chʼíníyáago dah nídiidzá.
8 Ákódzaadóó bikʼijįʼ David nídiiʼnaʼgo tséʼáándę́ę́ʼ haayáago Saul yikééʼ hadoolghaazhgo ání, Bóhoníshníihii, aláahgo shinanitʼaʼí nílíinii. Áko nítʼééʼ Saul tʼą́ą́ʼ nídéétʼı̨́įʼgo hoołtsą́, tʼáá áko David yaa ádziidzaago niʼjįʼ tséʼyaa jineeshjool.
9 Áko David éí Saul áyidííniid, Shoo, haʼátʼéegoshąʼ saad yee hadahadziihgo yísíníłtsʼą́ą́ʼ, David atínídoolííł, daniłní?
10 Jó, tʼáá ninááʼ bee níníłʼı̨́, díí jı̨́ tséʼáandi Bóhólníihii shílákʼee nííłtı̨́ı̨́ nítʼééʼ. Łaʼ, Nidiʼyoolyééł, daniłníí nítʼééʼ nidi tʼáadoo ákóniishłaa da. Nidi ádíshní, Shí éí doo haa dahodeeshłíił da. Shinanitʼaʼí doo atídeeshłíił da, háálá Bóhólníihii bíísı̨́įʼgo atsʼábiníłtíinii nilı̨́.
11 Shoo, shizhéʼé, niʼééʼ bidííłgizhígíí dah yistsosgo níníłʼı̨́, háálá niʼééʼ bidííłgizhígíí áádóó tʼáadoo niyéłhı̨́į daígíí díí bee nił bééhózin: nił bééhózin índa yíníʼı̨́įgo doo yáʼáshónígi tʼáadoo ániishłaa da, doodaiiʼ bee hazʼáanii tʼáadoo nił kʼínítiʼ da índa tʼáadoo nichʼįʼ ádił asésiih da. Shidiyííłhééł biniyé shíkanítáá nítʼééʼ nidi tʼáadoo ná hashjaʼiishłaa da.
12 Bóhólníihii nihaa nídóotʼįįł, atíniishłaago éí Bóhólníihii atínáshidoodlííł, nidi shí éí doo atínídeeshłíił da.
13 Ałkʼidą́ą́ʼ hastóí dahóyáanii ádaaní, Doo yáʼáshóonii bitsʼą́ą́dę́ę́ʼ doo yáʼáshónígi áhátʼı̨́ nihwiileeh, nidi shí doo atínideeshłíił da.
14 Ízrel dineʼé aláahgo binanitʼaʼí háí lá yiniyé naaghá? Háishąʼ naníłchéego ánítʼı̨́? Łééchąąʼí daaztsáanii daatsʼí, naaldlooshii biyaʼ daatsʼí?
15 Éí bąą Bóhólníihii ánihwiiʼaahii nilı̨́į doo; éí nihaa nídóotʼįįł, áádóó ááshníiłii shá yooʼı̨́įgo shá naʼakʼíyáłtiʼgo nitsʼą́ąjįʼgo yisdáshidoołtééł.
16 Áádóó bikʼijįʼ David éí Saul bichʼįʼ díí saad ałtso bee yájííłtiʼgo Saul áháłní, David, shiyeʼ nílíinii, niísh ádíní? Áko Saul chánahgo haadzíiʼgo yícha.
17 Áko David áyidííniid, Shiláahgo tsʼídá tʼáá ákogi átʼéii nílı̨́ı̨́ lá, háálá yáʼátʼéhígi áshiinilaa, nidi shí éí doo yáʼáshónígi ániishłaa.
18 Jó, bééhózínígo haash yitʼéego díí jı̨́ yáʼátʼéhígi áshiinilaa, háálá éí Bóhólníihii nílákʼee shííłtı̨́įgo tʼáadoo shisíníłhı̨́į da.
19 Jó, diné łaʼda biʼanaʼí yikʼíníyáago, daʼ bíniʼdiísh yáʼátʼéehgo yiʼdoołnih? Éí bąą Bóhólníihii yáʼátʼéehgo nichʼįʼ niʼdoolééł, háálá díí jı̨́ yáʼátʼéhígi áshiinilaa.
20 Áko kʼad shoo, díí tsʼídá baa ákoniizı̨́ı̨́ʼ: tʼáá aaníí aláahgo naatʼáanii dííleeł lá, áádóó Ízrel dineʼé aláahgo bee bóhólníihgo bił hazʼáanii chánah ályaago nílákʼee dootʼą́ą doo lá.
21 Éí bąą Bóhólníihii binahjįʼ shichʼįʼ ádee hadídziihgo shaʼáłchíní shikééʼ nááʼahideeshchínígíí doo adííłdįįł da áádóó shizhéʼé baʼáłchíní náás daʼahílchííhgóó shízhiʼ doo bąąh dííʼįįł da.
22 Áko David éí Saul bichʼįʼ ádee hazdoodzíiʼgo Saul hooghangóó dah nídiidzá, nidi David áádóó diné bił nijikaígíí éí bidziilgo nahontʼin nahazʼą́ą́góó bił dah nízhdiikai.
