1 Samuel 26:1-25
26 Ákohgo Gíbiyah kin haalʼáagi Saul nijigháago Zif honoojí dineʼé danilíinii łaʼ haa yíkaigo ádaaní, Tsʼídá tʼáá aaníí Jiisháíman honoojíijigo Hakíílah yanáalkʼidígi David nantʼin.
2 Ákohgo Saul dah diiyáago Ízrel dineʼé bitahdóó diné táadi míilgo néidiinilgo Zif honoojíígóó yił yíkai; Zif honoojíidi David hádazhdídóoʼįįł biniyé ádajitʼı̨́.
3 Áko Jiisháíman honoojíijigo Hakíílah yanáalkʼidgi atiin bąąhgóó Saul bisiláo yił dah yinééł. Nidi David éí honoojíidi nijigháago honoojíígóó Saul hakééʼ heedzáago baa ákozniizı̨́ı̨́ʼ.
4 Éí bąą David éí naalchiʼí ákǫ́ǫ́ adziisʼaʼgo Saul tʼáá aaníí níyáá lágo hoł bééhoozin.
5 Áádóó David dashdiiyáago Saul ninínánígóó jiníyá, áádóó David éí Saul índa Ner biyeʼ Ábner siláo yinanitʼaʼí nilíinii ałʼąą ałhoshgo dziiłtsą́. Dah oonéłígíí ałníiʼgi Saul sitı̨́įgo siláo binadeelʼá.
6 Ákohgo Ahímelek éí Het dineʼé nilíinii áádóó Jóʼab bikʼis Abísheiyai éí Zerowáíyah biyáázh nilíinii David ábidííniid, Háishąʼ Saul dah yinéłígóó shił dooʼash? Áko Abísheiyai ání, Shí ákóyaa nił deeshʼash.
7 Tʼáá éí bitłʼééʼ David áádóó Abísheiyai tʼáá ájíłah siláo dah yinéłí góyaa jiníʼáázh. Áko dah oonéłígíí ałníiʼgi Saul ałhoshgo bitsiidétáán bitsʼiiyahgi łeeh yíʼá. Áko hanaagóó siláo éí Ábner yił shijééʼ.
8 Ákohgo Abísheiyai éí David áyidííniid, Díí jı̨́ Diyin God éí niʼanaʼí nilíinii nílákʼee yidííʼą́ą́ lá; éí bąą kʼad, haaʼíyeeʼ tʼááłáhídi niʼjįʼ tsiidétáán bee bigháʼníshxíísh, baa nánooshkąąh, áko doo naakidi adooleeł da.
9 Nidi David éí Abísheiyai áyidííniid, Doo atídíílíił da, háálá Bóhólníihii akʼah yikʼi yayiiziidgo yiyíísı̨́įʼiishąʼ háí atíjiilaago doo ádihozhdiiltʼiʼ da doo?
10 Áko David ádííniid, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí Bóhólníihii hodiyoołhééł, doodaiiʼ dazhdootsaałjįʼ ahwíidoołkááł, doodaiiʼ anaaʼ baa naʼaldeehgóó jidoogáałgo dazdootsaał.
11 Bóhólníihii akʼah yikʼi yayiiziidgo yiyíísı̨́ʼígíí bikʼijįʼ nishłı̨́įgo atídeeshłíłígíí doo yee shá hasʼą́ą da, nidi tsiidétáán bitsʼiiyah sitánígíí nídidíítı̨́ı̨́ł, baa nánooshkąąh, áádóó tóshjeeh ałdóʼ bitsʼą́ą́ʼ nídidííʼáałgo tʼóó néitʼash dooleeł.
12 Ákohgo David éí tsiidétáán áádóó tóshjeeh Saul bitsʼiiyah sinil yę́ę nízhdiinilgo dah nízhdiitʼáázh. Diné tʼáadoo łaʼ hoołtsą́ą da, tʼáadoo łaʼ hóóniiʼ da, índa tʼáadoo łaʼ chʼénádzidí da, háálá Bóhólníihii bíniikʼehgo tʼáá íiyisí daʼjiiłhaazh lá.
13 Áko David éí yíldzisígíí haʼnaa nizhníyáago hataʼgi ayóó ánízáadgo dah yiskʼid léiʼ bighą́ąʼjįʼ hajiyá.
14 Áádóó David éí diné yichʼįʼ hadoolghaazhgo Ner biyeʼ Ábner áyidííniid, Ábner, doósh hadíídzih da? Áko Ábner haadzíiʼgo ání, Háishąʼ ánítʼı̨́įgo aláahgo naatʼáanii bichʼįʼ dílwosh?
15 Áko David éí Ábner áyidííniid, Daʼ doósh diné doo nánílyéesii nílı̨́į da? Háishąʼ nigi átʼéego Ízrel dineʼé yitahdóó ayóó átʼé? Haʼátʼéegoshąʼ ninanitʼaʼí aláahgo naatʼáanii nilíinii doo bikʼi haʼídíínílʼı̨́įʼ da? Háálá diné łaʼ éí ninanitʼaʼí aláahgo naatʼáanii yidiyoołhééł yiniyé nichʼįʼ niníyáá nítʼééʼ.
16 Ákónítʼı̨́įgo éí doo yáʼátʼéeh da, tsʼídá tʼáá aaníí Bóhólníihii hiná; ákótʼéego tsʼídá tʼáá aaníí aniné tʼéí bąąh anohłı̨́į doogo átʼé, háálá ninanitʼaʼí éí Bóhólníihii akʼah yikʼi yayiiziidgo yiyíísı̨́ʼígíí doo bikʼi haʼadíínílʼı̨́įʼ da. Jó, kʼad aláahgo naatʼáanii bitsiidétáán áádóó tóshjeeh bitsʼiiyah sinil yę́ęgi díníʼı̨́ı̨́ʼ.
17 Saul éí David biinééʼ yééhoosįįdgo ání, Shiyeʼ David niísh ádíní? Áko David ádííniid, Aooʼ, bóhonishníihii aláahgo naatʼáanii nílíinii, shí ádíshní.
18 Áko ánáázhdooʼniid, Shinanitʼaʼí nílíinii, haʼátʼíishąʼ biniyé ná naalʼaʼí nishłı̨́įgo shikééʼ nahídá? Haashąʼ yisdzaa? Haʼátʼíí doo yáʼáshóonii shı̨́įshąʼ baa niséyá?
19 Éí bąą kʼad nánooshkąąh, bóhonishníihii aláahgo naatʼáanii, ná naalʼaʼí nishłı̨́įgo shizaad diitsʼı̨́ı̨́h. Bóhólníihii naniiłáago shidinilkaalgo éí hániʼdii nááhániihii néidiilé, nidi diné ahijoolchíiłii tʼéí ádajitʼı̨́įgo éí Bóhólníihii binááł hóyéeʼgo há haʼdoodzih, háálá díí jı̨́ chʼídashineeshchą́ąʼgo Bóhólníihii bił hazʼáanii doo shííʼ dooleeł da biniyé ádashiłní, Nílááh, diyin dabidiʼníinii bichʼįʼ nahółá.
20 Éí bąą kʼad, Bóhólníihii binááł nahasdzáán bikáaʼgi doo shidił doonah da, háálá dziłghą́ą́ʼgóó dééłdánii hazhnitáhígi átʼéego Ízrel dineʼé aláahgo binanitʼaʼí éí łééchąąʼí biyaʼ haintá nahalingo shíkantá.
21 Saul ádííniid, Ádił asésiih, shiyeʼ David, shaa nánídááh; doo haada náándeeshdlíił da, háálá sheʼiinaʼ ílı̨́įgo baa nitsíníkees lá. Jó, shí éí doo áháshyą́ą da áádóó inaʼashłoʼgo baa naashá.
22 Áko David hanáánáádzíiʼgo ání, Kodi aláahgo naatʼáanii bitsiidétáán naashtin, hániʼdii dinééh ániid naagháii łaʼ yaa doogáałgo néididootı̨́ı̨́ł.
23 Bóhólníihii éí tʼááłáʼí jinítínígo tsʼídá tʼáá ákogi ádajítʼéego índa hadaʼahódlíigo ádajíítʼįįdígíí hachʼįʼ nidiʼyoolééł, háálá díí jı̨́ Bóhólníihii shílákʼee nihidííʼą́. Áko Bóhólníihii akʼah yikʼi yayiiziidgo atsʼáiníłtíinii doo atídeeshłíił da.
24 Jó, díí jı̨́ neʼiinaʼ tsʼídá ílı̨́įgo baa nitséskeesígi átʼéego sheʼiinaʼ ałdóʼ tsʼídá ílı̨́įgo Bóhólníihii shaa nitsíkees leʼ, áádóó ayóó átʼéego tiʼhooʼníhígíí tʼáá ałtso bitsʼą́ąjįʼ yisdáshiiłteeh leʼ.
25 Áko Saul éí David áyidííniid, Shiyeʼ David nílíinii, nikʼihojidlíi doo, ayóó ádaatʼéii tʼóó ahayóí áálíił doo áádóó ałdóʼ akʼeh dinídlı̨́į dooleeł. Ákohgo David dah nídiidzá, áádóó Saul ałdóʼ bikéyahgóó anáádzá.
