1 Samuel 27:1-12
27 Áko David tʼáá ádíyiʼídi ájíní, Kʼad lá índa bikʼíiníłką́ągo Saul shidiyoołhéeł ni; Filístiya dineʼé bikéyahjįʼ yisdániichą́ąʼgo tsʼídá agháago shá yáʼátʼééh. Áko Saul shikʼee bąąh nahóókaadgo Ízrel dineʼé bikéyah nahazʼą́ą́góó doo hanááshintáa da doo, áko bitsʼąą yisdádeeshááł.
2 Ákohgo David dah diiyáago hastą́ądi neeznádiin diné hoł naakaígíí ałdóʼ hoł dah diikaigo Méíyak biyeʼ Éíkish éí Gath kin haalʼáagi aláahgo naatʼáanii yaa yíkai.
3 Áko David éí Gath kin haalʼáagi Éíkish bił kééhojitʼı̨́ı̨́ nítʼééʼ; diné bił nijikaígíí tʼááłáʼí nítínígo tʼáá bí bighandóó danilíinii yił kéédahatʼı̨́ı̨́ nítʼééʼ. Áko David hweʼasdzą́ą́ nidiltʼéego bił kééhojitʼı̨́, łaʼ Jézriyel kin shijaaʼdóó naagháago Ahínowam wolyé, náánáłaʼígíí éí Kármel kin shijaaʼdóó naagháago bąąh áhásdįįdii nilı̨́įgo Néíbal beʼasdzą́ą́ nítʼéʼígíí éí Ábigeil wolyé.
4 Áko David éí Gath kin haalʼáágóó anííchą́ąʼgo Saul bił nááhóóneʼ nidi tʼáadoo háká náádínéeztą́ąʼ da.
5 Ákohgo David éí Éíkish áyidííniid, Ajoobaʼ bee shichohaʼnéego shaa nitsíníkeesgo hániʼdii kintahgi łahgo kééhashtʼı̨́į doo biniyé kéyah shaa dahozhdidooʼááł. Haʼátʼíísh biniyé aláahgo naatʼáanii bighangi ná naalʼaʼí nił kééhatʼı̨́į doo?
6 Áko íídą́ą́ʼ Éíkish éí Zíklag kin haalʼáii haidiníʼą́; éí bąą díí jı̨́ı̨́góó Zíklag hoolyéii éí Júdah dineʼé aláahgo binanitʼaʼí bídadéétʼiʼ.
7 Áko éí yoołkááł yę́ędą́ą́ʼ Filístiya dineʼé bikéyahgi David kééhojitʼı̨́įgo nááhaidóó dı̨́ı̨́ʼ nídeezid.
8 Áko David áádóó diné bił naakaígíí yił Gíísher dineʼé áádóó Gíízer dineʼé índa Ámalek dineʼé danilíinii yaatįįh yikai; jó, éí ałʼąą dineʼé tʼáá ałkʼidą́ą́ʼ ákǫ́ǫ́ kéédahatʼı̨́; éí Shur honoojíígóó tʼáá níléí Ííjip kéyah bóhoneelʼą́ągo kéédahatʼı̨́.
9 Áko David éí díí kéyah nahazʼánígi kéédahatʼíinii nayísdįįd, éí diné áádóó asdzání tʼáadoo nidi łaʼ chʼééyáa da, nidi dibé áádóó béégashii áádóó télii índa ghą́ą́ʼaskʼidii áádóó ééʼ tʼáá ałtso áłah ádajiilaago Éíkish bichʼįʼ níjíkai.
10 Áko Éíkish nahódééłkidgo ání, Jı̨́ı̨́dą́ą́ʼshąʼ háí bichʼįʼ nidasoobaaʼ? David ání, Júdah dineʼé áádóó Jiiráhmiyel dineʼé índa Kííni dineʼé éí shádiʼáahjigo bikédaayah bichʼįʼ nidasiibaaʼ.
11 Áko David éí diné, doodaiiʼ asdzání tʼáadoo łaʼ tʼáá hináago ájiilaa da, áko Gath kin haalʼáajįʼ tʼáadoo hólneʼí da hodidooʼniił, David kwáátʼįįd lá, áádóó Filístiya dineʼé yił kééhatʼı̨́ yę́ędą́ą́ʼ gaʼ kweʼełʼı̨́ı̨́ nítʼééʼ lá.
12 Áko Éíkish éí David yaʼólíigo ání, Hodineʼé Ízrel tʼáá íiyisí tʼóó haaʼih dahóʼníigo ájiilaa; éí bąą hoolʼáágóó shá nijilʼaʼ doo.
