1 Samuel 28:1-25
28 Éí yoołkááł yę́ędą́ą́ʼ Filístiya dineʼé éí Ízrel dineʼé yikʼiidoojah biniyé bisiláo áłah ádayiilaa. Áko Éíkish éí David áyidííniid, Tʼáá aaníí nił bééhoozı̨́ı̨́ʼ: ni índa diné bił nanikaígíí bił łahdóó shíká anáhjahgo bichʼįʼ anaaʼ áńdahwiilʼįįh doo.
2 David éí Éíkish áyidííniid, Ná naalʼaʼí yaa nidoogaałígíí yíneelʼą́ągo tʼáá aaníí nił bééhodoozįįł. Áko Éíkish éí David ánéidooʼniid, Hágoóneeʼ, hoolʼáágóó shikʼi haʼídéesʼı̨́įʼii áńdeeshłííł.
Éndor kin shijaaʼgi Saul áádóó asdzání éí chʼı̨́įdii neídíłkidii
3 Sámuel éí daaztsą́ągo Ízrel dineʼé tʼáá ałtso haa dáácha áádóó tʼáá hó hakin haalʼáii Réímahgi yóóʼádahoolaa. Áko Saul éí chʼı̨́įdii yádabiiłtiʼii áádóó daʼdiłgąshii éí kéyahdóó nahjįʼ hainííłkaad.
4 Áko Filístiya dineʼé áłah silı̨́įʼgo niheeskaígíí Shúnem hazʼánígi nidahaazná, índa Saul éí Ízrel dineʼé tʼáá ałtso áłah áyiilaago Gilbówa hazʼánígi nidahaazná.
5 Áko Saul éí Filístiya dineʼé bisiláo dziiłtsą́ągo nídzísdzííd, áádóó ayóó átʼéego hatah hoditłid.
6 Áko Saul éí Bóhólníihii níjooskango tʼáadoo há yiʼiilaa da; naʼiigeeł bee nidi dooda, doodaiiʼ Yúrim bee nidi dooda, doodaiiʼ Diyin God yá dahalneʼii bee nidi dooda.
7 Áko Saul éí bá nidaalʼaʼí áyidííniid, Asdzání éí chʼı̨́įdii yábiiłtiʼii łaʼ shá hadanohtá; éí bichʼįʼ deesháałgo néideeshkąął. Áko bá nidaalʼaʼí ádabidííniid, Níláahdi Éndor kin shijaaʼgi asdzání éí chʼı̨́įdii yábiiłtiʼii łaʼ naaghá.
8 Ákohgo Saul łahgo ízhʼdiilyaago ééʼ łaʼ bee hazdiidzaa; diné nidiltʼéego bił dashdiikaigo tłʼéeʼgo asdzání baa jíkai. Áko ázhdííniid, Shá naʼídídííłkił nisin; tʼáá yízhiʼígíí shá bił hadííʼash.
9 Asdzání áhodííniid, Shoo, Saul yaa naayáhígíí nił bééhózin; chʼı̨́įdii yádabiiłtiʼii índa daʼdiłgąshii Ízrel kéyahdóó íísdįįd. Haʼátʼéegoshąʼ dadeestsaałgo łoh tʼéí bee shisíníłná?
10 Nidi Saul éí asdzání bichʼįʼ Bóhólníihii binahjįʼ ádee hazdoodzííʼ, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí doo atínidiʼdoolníił da.
11 Ákohgo asdzání ádííniid, Háishąʼ ná bił nídiishtʼaash? Áko ábijiní, Sámuel shá bił nídiitʼaash.
12 Nítʼééʼ asdzání éí Sámuel dziiłtsą́ągo tsʼídá yéego hazhdoolghaazhgo hajííchxa áádóó Saul ábizhdííniid, Haʼátʼéegoshąʼ shinaʼíloʼ? Jó, Saul ánítʼı̨́.
13 Aláahgo naatʼáanii áhodííniid, Tʼáadoo nił yéʼí. Haʼátʼíishąʼ yiniłtsą́? Áko asdzání éí Saul áyidííniid, Nahasdzáán biyiʼdę́ę́ʼ diyin łaʼ haagháahgo yiiłtsą́.
14 Áko asdzání ábizhdííniid, Haashąʼ noolnin? Áko asdzání ání, Hastiin haastih léiʼ ééʼ nineezígíí bił yisdisgo haayáago yiiłtsą́. Áko Saul éí Sámuel átʼı̨́įgo hoł bééhoozingo niʼjįʼ tséʼyaa jineeshjool.
15 Ákohgo Sámuel éí Saul áyidííniid, Haʼátʼíishąʼ biniyé jishchááʼdę́ę́ʼ náshidiniłtʼeʼgo shaa nísínítʼįįd? Saul áhodííniid, Doo hasohodoobéézhgóó yínííł nishłı̨́, háálá Filístiya dineʼé tʼáá íiyisí anaaʼ dashiłʼı̨́, áádóó Diyin God shitsʼáhoníleʼgo doo shichʼįʼ haadziih da hazlı̨́ı̨́ʼ; Diyin God yá dahalneʼii, doodaiiʼ tʼóó baa naʼiigeełígíí nidi ádin. Éí bąą níká ádííniid; ádeeshníiłgi shił bééhózingo áshidíílííł.
16 Áko Sámuel áhodííniid, Haʼátʼíí biniyé nashídíłkid? Jó, Bóhólníihii nitsʼą́ą́ʼ dahodiileʼgo niʼanaʼí silı̨́įʼgo yeeʼ ádíní.
17 Bóhólníihii éí shinahjįʼ nichʼįʼ yee haadzííʼ yę́ęgi ániilaa; jó, nílákʼeedóó aláahgo bee óhólníihgo bił hazʼáanii éí Bóhólníihii nitsʼáidiníʼą́, áádóó bił kééhonítʼíinii David yeidiníʼą́.
18 Háálá Bóhólníihii nichʼįʼ haadzíʼígíí doo bikʼeh hwííníłʼįįd da, doo nidi Ámalek dineʼé yichʼįʼ báhóóchįįdígíí tʼáadoo bá biʼiinilaa da. Éí bąą díí jı̨́ Bóhólníihii kóniilaa.
19 Áádóó ałdóʼ Bóhólníihii éí Ízrel dineʼé tʼáá nił Filístiya dineʼé yaa nihididooʼááł, áko yiską́ągo ni áádóó niyeʼké shił dahonohłǫ́ǫ doo; Bóhólníihii éí Ízrel dineʼé bisiláo danilíinii Filístiya dineʼé yílákʼee yididooʼááł.
20 Tʼáá áko Saul niʼjįʼ tséʼyaa ajíítłizhgo Sámuel bizaadígíí bikʼee tʼáá íiyisí hoł yééʼ hazlı̨́ı̨́ʼ áádóó hatah doo hwiinaʼ da, háálá tʼáadoo ajiyání iʼííʼą́ą́dóó yiską́.
21 Áko asdzání éí Saul baazhníyáago tʼáá íiyisí tsídoolyiz lágo dziiłtsą́, áko ábijiní, Shoo, ná naalʼaʼí nishłíinii ádínínígíí bikʼeh íisdzaago sheʼiinaʼ ninádiníʼą́, áádóó saad bee shichʼįʼ háínídzíʼígíí bikʼeh áníshtʼé.
22 Éí bąą kʼad, baa nánooshkąąh, ná naalʼaʼí nishłı̨́įgo shíísíníłtsʼą́ą́ʼ; bááh ádaałtsʼíísígíí łaʼ ná nídiishkaahgo dííyı̨́ı̨́ł, áko éí bee nidziilgo bikiin náánáádáał doo.
23 Nidi dooznízingóó ájíní, Doo deeshı̨́įł da. Nidi há nidaalʼaʼígíí éí asdzání yił hániʼ háʼádahoolaa. Ákohgo nízhdiiʼnaʼgo tsáskʼeh bikáaʼgi dasneezdá.
24 Áko asdzání bikin góneʼ béégashii yáázh neeskʼahígíí łaʼ hólǫ́ǫgo haneetehee néísʼah, áádóó akʼáán łaʼ hayííjaaʼgo tayoozniiʼ índa dííkʼǫsh tʼáágééd bááh áyiilaa.
25 Áko Saul áádóó bá nidaalʼaʼí yiyaa niyiizką́ągo dayííyą́ą́ʼ. Áádóó tʼáá éí bitłʼééʼ dah nízhdiikai.
