1 Samuel 29:1-11
29 Áko Filístiya dineʼé bisiláo tʼáá ałtso Éífek kin shijaaʼígi áłah silı̨́ı̨́ʼ, índa Ízrel dineʼé éí Jézriyel nahósʼaʼ tó háálínígi dah yinééł.
2 Filístiya dineʼé bindanitʼaʼí éí neeznádiingo áádóó miil daaltʼéego ałkééʼ deínééh, índa David áádóó diné hoł naakaígíí éí Éíkish bił akéédę́ę́ʼ níná.
3 Filístiya dineʼé bindanitʼaʼí ádadííniid, Díí Hííbrew dineʼéshąʼ kweʼé haʼátʼíí yaa naakai? Áko Éíkish éí Filístiya dineʼé bindanitʼaʼí áyidííniid, Díísh doo David átʼı̨́į da? Éí Ízrel dineʼé aláahgo binanitʼaʼí Saul yá naalʼaʼí, tʼáá shił tádíʼaashgo díí jı̨́ı̨́góó yoołkááł áádóó nináháháahgo hoolzhish, áko tʼáá shichʼįʼ dah diiyáádóó díísh jı̨́įjįʼ doo aaníinii doo łaʼ bá shił bééhoozin da.
4 Nidi Filístiya dineʼé bindanitʼaʼí doo hashtʼéʼégóó hachʼįʼ hashké daniidzı̨́ı̨́ʼ áádóó ádahodííniid, Díí diné nihééníłʼá, áko kéyah baa dííníʼą́ yę́ęgóó nihéédoodááł; bíniʼdii anaaʼgóó doo nihił jidoobah da, áko anaaʼgi doo nihiʼanaʼí dooleeł da. Haash yitʼéego binanitʼaʼí yił kʼénáʼahididooʼniił? Doósh nihisiláo bitsiitsʼiin hizhdoołniiłígíí bee ákójíléeh da?
5 Daʼ díísh doo David átʼı̨́į da? Éí baa hoł dahózhǫ́ǫgo daʼjilzhishgo dahojitaałgo kódabizhdííniid, Saul éí damíilgo neistseed, índa David éí neeznáá damííl biláahgo neistseed.
6 Ákohgo Éíkish éí David hágo yidííniidgo ííłní, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí tʼáá ákóneʼ ánítʼı̨́, índa hidínááhgóó tsʼídá nizhónígo shinááł shił anaaʼ áníłʼı̨́, háálá yoołkááłdę́ę́ʼ shéíníyáádóó díí jı̨́įjįʼ doo aaníinii tsʼídá tʼáadoo łaʼ ná shił bééhoozin da. Azhą́ ákótʼée nidi naatʼáanii danilíinii doo nichʼijí naʼastą́ą da.
7 Nílááh, tʼóó náádááł; nił hózhǫ́ǫgo náádááł, áko Filístiya dineʼé bindanitʼaʼí bił dahoníshǫ́ǫgo yáʼátʼééh.
8 Áádóó David éí Éíkish ábizhdííniid, Haashąʼ yítʼįįd? Yoołkááłdę́ę́ʼ nił naashʼaashgo díí jı̨́įdi haʼátʼíí ná naalʼaʼí bá nił bééhoozin? Bóhonishníihii aláahgo naatʼáanii nílíinii, haʼátʼéegoshąʼ niʼanaʼí doo bił daʼahideeshgą́ął da?
9 Áko Éíkish éí David ánéídooʼniid, Diyin God bidiyingo naalʼaʼí nahonílingo shinááł tsʼídá tʼáadoo bee nikʼíhótʼahí daígíí shił bééhózin, nidi Filístiya dineʼé bindanitʼaʼí ádaaní, Anaaʼgóó doo nihił dajidoobah da.
10 Ákohgo tʼáá íiyisí yikáíhdą́ą́ʼ ninanitʼaʼí bá nidaalʼaʼí nił yíkaígíí chʼéédaasdzidgo ałtso hoosʼįįdgo dah nídidoohkah.
11 Áko David éí diné bił nijikaígíí tʼah abíínídą́ą́ʼ chʼéédaasdzidgo Filístiya dineʼé bikéyahgóó aníjookai. Nidi Filístiya dineʼé éí Jézriyel nahósʼaʼ góde dah diiná.
