1 Samuel 3:1-21
3 Kʼad ashkii Sámuel éí Íílai binááł Bóhólníihii yá naalʼaʼ. Éí yoołkááł yę́ędą́ą́ʼ Bóhólníihii bizaad bee ił haneʼii tʼáá bídin hóyééʼ nítʼééʼ, háálá tʼáá bééhózínígo ił chʼóhodooʼáałii ádin.
2 Éí hoolzhish yę́ędą́ą́ʼ Íílai tʼáá hó názhnítéhígi dziztı̨́, áádóó hanáʼoh halbáago doo ajooʼı̨́į da dzizlı̨́ı̨́ʼ;
3 éí Bóhólníihii bikin biiʼ sohodizinii biyiʼ góneʼ Diyin God bitsitsʼaaʼ dílzinii siʼánígi bee hoolʼiní tʼah doo nitséésgóó Sámuel éí iizhdoołhosh biniyé jineeztı̨́įgo
4 Bóhólníihii éí Sámuel yiyíízhiʼ. Áko ájíní, Kǫ́ǫ́ sétı̨́.
5 Áko Íílai baa jílwodgo ájíní, Shíínízhiʼgo bąą naa níyá. Nidi áháłní, Doo níízhiʼ da; nílááh, náníteeh. Áko názneeztı̨́.
6 Nítʼééʼ Bóhólníihii nááhóózhiʼgo, Sámuel, nááhodiʼní. Áko Sámuel nínáázhdiiʼnaʼgo Íílai baa náájílwodgo ájíní, Tʼáá aaníí nááshííníjiʼgo bąą naa nááníshwod. Nidi áháłní, Doo nííníshíi da, shiyeʼ; nílááh, nínááníteeh.
7 Sámuel éí Bóhólníihii tʼah doo bééhodzoosįįh da, áádóó Bóhólníihii bizaad tʼah doo hachʼįʼ yitʼíní álnéeh da.
8 Ákohgo táadi aleeh góneʼ Bóhólníihii éí Sámuel nááyiyíízhiʼ. Áko nínáázhdiiʼnaʼgo Íílai baa náájílwodgo ájíní, Tʼáá aaníí nááshííníjiʼgo bąą naa nááníshwod. Ákohgo Íílai ákozniizı̨́įʼgo Bóhólníihii éí ashkii yózhíí lá.
9 Éí bąą Íílai éí Sámuel ábizhdííniid, Nílááh, náníteeh, náánoojiʼgo ábididííniił, Bóhólníihii, handziih, háálá ná naalʼaʼí nishłíinii íísístsʼą́ą́ʼ. Áko Sámuel dashdiiyáago tʼáá jinitéhígi níjineestı̨́.
10 Áádóó tʼáá áłtséédą́ą́ʼ ádzaa yę́ęgi átʼéego Bóhólníihii haa honíleʼgo yiizįʼgo nááhoojiʼgo ání, Sámuel! Sámuel! Áádóó Sámuel ání, Handziih, ná naalʼaʼí nishłíinii íísístsʼą́ą́ʼ.
11 Ákohgo Bóhólníihii éí Sámuel áyidííniid, Jó, Ízrel dineʼé bitahgi baa nideeshaałígíí éí tʼááłáʼí jinítínígo dazhdiitsʼaʼígíí hajaaʼ tʼáá ałchʼijí hajeeh dahosiiltsʼı̨́įh doo.
12 Éí bijı̨́įdi Íílai áádóó bitsʼą́ą́dóó ahoolchíiłii bikʼijįʼ bee haasdzíiʼii baa nídiisdzáádóó ałtso áshłaajįʼ bohodoolnííł.
13 Jó, hoł hweeshneʼgo ádííniid, Haʼáłchíní náás ahoolchíiłii beiníshtʼı̨́įgo ahoolʼáa doo; jó, doo ákwii áhátʼíinii baa ákoznízingo hayeʼké ádíkʼijįʼ hoolchxįʼgo índa doo yóweh bijiníígóó bá nihodeeshʼááł.
14 Éí bąą Íílai baʼáłchíní náás ahoolchíiłii bichʼįʼ bee ádee hadeesdzíiʼgo ádííniid, Ádił nidaʼayoosíiʼgo éí didlidgo nááhániihii índa nááhániihii bee doo nihąąh nahjįʼ kólyaagóó ahoolʼáa doo.
15 Sámuel tʼóó dziztı̨́įgo hoosʼįįd; Bóhólníihii bikin biiʼ sohodizin bidáádílkał ąą ádajiilaa. Áádóó Sámuel hoł áhoodzaaígíí éí Íílai bił hozhdoolnihígi tʼáá íiyisí bikʼee hoł yééʼ.
16 Nidi Íílai éí Sámuel hágo yidííniidgo ání, Sámuel, shiyeʼ. Áko ábizhdííniid, Kǫ́ǫ́ naa níyá.
17 Áko Íílai áhodííniid, Bóhólníihii lá haʼátʼíí yee nił hoolneʼ? Tʼáadoo shitsʼąą naníłʼiní, baa nánooshkąąh. Tʼáadoo leʼé yee nił hoolneʼígíí shitsʼąą naníłʼingo éí Diyin God atínidoolííł, áádóó tʼah yówehígi átʼéego atínidoolííł.
18 Ákohgo Sámuel éí tʼáá ałtsoní tʼáadoo nazhniłʼinígóó tʼáá átʼé bee bił hojoolneʼ. Áádóó Íílai ájíní, Díí Bóhólníihii átʼı̨́; bíniʼdii bił yáʼátʼéhígi átʼéego íidoolííł.
19 Áko Sámuel noosééł, índa Bóhólníihii bił hólǫ́ǫgo bizaad doo tʼáá ádzaaí yileeh da.
20 Dan kin haalʼáádóó Bíyer-shííba kin shijaaʼjįʼ Ízrel dineʼé kéédahatʼíinii tʼáá ałtso díí bił béédahoozin. Sámuel éí Bóhólníihii chánah ábiilaago yá halneʼii silı̨́ı̨́ʼ lá.
21 Sháíloh hazʼánígi Bóhólníihii yitʼíní ánááʼdiilyaa, háálá Sháílohgi Bóhólníihii tʼáá bí bizaad binahjįʼ Sámuel yichʼįʼ yitʼíní íʼdiilyaa.
