1 Samuel 30:1-31
30 Áko tááʼ yiską́ągo David áádóó diné hoł naakaígíí bił Zíklag kin haalʼáagi jíkaigo Ámalek dineʼé éí shádiʼáahjigo kéyah áádóó Zíklag kin haalʼáii yaatįįh yikai; Zíklag dineʼé yikʼeh dadeesdlı̨́įʼgo kin haalʼáii adeideeskʼą́ą́ʼ.
2 Áko sáanii áádóó ákwii kéédahatʼíinii tʼáá ałtso deisnáago tʼáá dahóyáanii índa áłchíní danilíinii tʼáadoo łaʼ dayiisxı̨́į da, nidi dah deidiiʼeezhgo anídeezhʼeezh.
3 Áko David índa diné hoł naakaígíí éí kin haalʼáajįʼ yíkai, nítʼééʼ jó, kin haalʼáhígíí adoolkʼą́ą́ʼ lá. Bidaʼasdzą́ą́ áádóó dabiyeʼké índa dabitsiʼké yisnááh ádaalyaa lá.
4 Ákohgo David áádóó diné hoł naakaígíí hoł hadadeeshghaazhgo dajíícha; tʼáá hó daznízinjįʼ dajíícha.
5 David hweʼasdzą́ą́ nidiltʼéhígíí ałdóʼ yisnááh ályaa lá. Ahínowam éí Jézriyeldóó naaghá, Ábigeil bąąh áhásdįįdii Néíbal beʼasdzą́ą́ nítʼééʼ yę́ę éí Kármeldóó naaghá.
6 Áko David tʼáá íiyisí ádił niseedzá; jó, diné hoł nidazdoołniiłgo yádaałtiʼ, háálá diné tʼáá ałtso dabiyeʼké índa dabitsiʼké yąąh dabíniʼ. Nidi David éí Bóhólníihii haDiyin God binahjįʼ hadziil ízhʼdiilyaa.
7 Áko David éí Ahímelek biyeʼ Abáíyathar nááʼiiłniihii nilíinii áyidííniid, Íífad wolyéii deʼníłtsóós, baa nánooshkąąh. Ákohgo Abáíyathar éí íífad David yeiníłtsooz.
8 Áko David éí Bóhólníihii náyookąąh, Daʼ díí dabiʼdisnánígíísh bikééʼ nídiishyeed? Daʼ shónídeideeshtʼeełísh? Nítʼééʼ áhodííniid, Bikééʼ nídiilyeedgo tʼáá aaníí tʼáá ałtso shónéidííłtʼeeł.
9 Ákohgo David dah diiyá, áádóó diné hastą́ądi neeznádiingo hoł naakaígíí ałdóʼ bił dashdiikai. Bíísor tó nílínígi jíkaigo łaʼ tʼáá ákwii nizhnínil.
10 Nidi David áádóó diné dı̨́įdi neeznádiin ánéelą́ąʼgo hweʼanaʼí bikééʼ ahijookai, nidi diné naakidi neeznádiin yiltʼéego nídínéeskaigo Bíísor tó nílínígíí haʼnaagóó dookahígíí doo yídáághahgóó tʼáá ákwii naháaztą́.
11 Ííjip dineʼé łaʼ kéyahgi bikʼídadziskaigo David bił baa jíkai. Bááh łaʼ badaʼdzistsoodgo yiyííyą́ą́ʼ; tó ałdóʼ łaʼ baa dadzizką́ągo yoodlą́ą́ʼ.
12 Tsin sikaadii fig wolyéhígíí bineestʼąʼ ahídiiłjéeʼii łaʼ neheestiʼgo áádóó chʼil naʼatłʼoʼii bąąh bineestʼąʼ dah naazyíinii nááltseii naakigo baazhnínilgo yiyííyą́ą́ʼ índa bíniʼ nááłdził, háálá tʼáadoo ayání áádóó tʼáadoo adlání tágí jı̨́ áádóó tágí tłʼééʼ azlı̨́ı̨́ʼ lá.
13 Áko David áháłní, Háishąʼ bííʼ nílı̨́, háádę́ęʼshąʼ naniná? Nítʼééʼ ání, Ííjip kéyahdóó dinééh nishłı̨́. Ámalek dineʼé łaʼ bá naalteʼ nishłı̨́ı̨́ nítʼééʼ. Tááʼ yiskánídą́ą́ʼ shitah honiigaigo shinanitʼaʼí tʼóó shitsʼą́ą́ʼ dah diiyá.
14 Kéreth dineʼé kéédahatʼínígíí shádiʼááhjígo áádóó Júdah kéyahgi índa Kéíleb bikéyah shádiʼááhjígo baatįįh yiikai áádóó Zíklag kin haalʼáii adahidiilkʼą́ą́ʼ.
15 Áko David áháłní, Daʼ díí dah oonéłígíísh bichʼįʼ tʼáá shił dííʼash? Áko áhodííniid, Diyin God bee shichʼįʼ ádee hadídziih, doo yéí shidiyííłhéeł da, doodaiiʼ shinanitʼaʼí doo baa náshididííʼáał da, ákótʼéego tʼéiyá ákóyaa nił deeshʼash.
16 Áádóó ákóyaa hoł níʼáazhgo, shoo, kéyahgi tʼáá átʼéé nítʼééʼ diné yílʼáago łaʼ daʼayą́ áádóó daʼadlą́ índa azhish baa naʼaldeeh, háálá Filístiya dineʼé bikéyahdóó índa Júdah kéyahdóó naalyeʼé tʼóó ahayóí deisnáá lá.
17 Áko hiłiijı̨́ı̨́dóó náábiiskání iʼííʼą́ąjįʼ David ałtso nahastseed. Áko tʼáadoo diné łaʼ ánéísįįd da, tʼáá hazhóʼó dinééh dı̨́įdi neeznádiin ánéelą́ąʼgo ghą́ą́ʼaskʼidii bił yóóʼaheezhjéʼígíí tʼéí yisdáhaazhjééʼ.
18 Áko David éí Ámalek dineʼé hondaalyeʼé deisná yę́ę tʼáá átʼé shóníjoostʼeʼgo índa hweʼasdzą́ą́ tʼáá áłah shóníjoostʼeʼgo yisdájíínil.
19 Tʼáá ałtso neheesdzííʼ lá: ayáhígo ádaatʼéii áádóó ayóó ádaatʼéii, ayeʼké áádóó atsiʼké danilíinii áádóó binaalyeʼé índa tʼáadoo leʼé deisná yę́ę tʼáá átʼé shónáyoostʼeʼ lá.
20 David éí dibé nidanilkaadii áádóó béégashii nidanilkaadii tʼáá átʼé néísná. Áko diné dabilı̨́ʼígíí alą́ąjįʼ atsʼádeineeskaadgo ádaaní, Díí David binaalyeʼé ádaatʼé.
21 Áko David éí diné naakidi neeznádiingo Bíísor tó nílínídi nídínéeskaigo naháaztą́ yę́ę baa nídzídzá; nítʼééʼ David índa diné yił náákahígíí yidááh heezhjééʼ. Áko David éí diné baazhníyáago kʼé bizhdííniid.
22 Ákohgo diné doo yáʼádaashóonii índa tʼáá bóhólníhígíí tʼáá ałtso David yił nidaazbaaʼígíí ádadííniid, Shónídeisiiltʼeʼii doo łaʼ haa dadiiʼnił da, háálá doo nihił nidadzizbaaʼ da. Nidi diné dajílíinii hwedaʼasdzą́ą́ áádóó hadaʼáłchíní hachʼįʼ béédaʼdiyiilnihgo hániʼdii nídajíʼéésh.
23 Nidi David ádííniid, Shikʼisóó danohłíinii, Bóhólníihii nihaidiníʼánígíí tʼááká nahjįʼ kódaołeʼ lágo. Éíyeeʼ tʼáá bí nihaa áhályą́ índa nihidadiilkaalii nihílákʼee yidííʼą́.
24 Díí kótʼéhígíí biniinaa háishąʼ nihíistsʼą́ąʼ doo? Azhą́ nidasoobaaʼ nidi tʼáá kǫ́ǫ́ naalyeʼé yaa ádahalyą́ą́ nítʼéʼígíí tʼáá aheełtʼéego nihił ałtsʼą́ą́ʼ daʼíłkʼiiz doo.
25 Áko íídą́ą́ʼ ákódzaago neeʼnijįʼ yee nihoníʼáanii áádóó bikʼehgo hoogáałii Ízrel dineʼé bá ájiilaago díí jı̨́ı̨́góó bá ákótʼé.
26 Áko David éí Zíklag kin haalʼáagi jiníyáago anaʼí binaalyeʼé łaʼ Júdah dineʼé aląąjįʼ naazíinii dahakʼisígíí bichʼįʼ dadeeshjaaʼgo ájíní, Shoo, Bóhólníihii bidaʼanaʼí binaalyeʼé łaʼ bee nihikʼidahojisdliʼii ádaatʼé.
27 Béthel kin haalʼáagi kéédahatʼínígíí bá dooleeł. Réímath shádiʼááhjígo kin haalʼáagi kéédahatʼínígíí ałdóʼ, Játer kin shijaaʼgóoda,
28 Aróʼer kin shijaaʼgóoda, Sífmath hazʼánígóoda, Éshtiimowa kin haalʼáágóoda,
29 Réíkal hazʼánígóoda, Jiiráhmiyel dineʼé bikin hadaasʼáágóoda, Kííni dineʼé bikin hadaasʼáágóoda,
30 Hórmah kin haalʼáágóoda, Kárashan hazʼánígóoda, Éíthak kin haalʼáágóoda,
31 Hííbran kin haalʼáágóoda índa náádaałahgóó tʼáá ałtsogi David áádóó diné hoł tádíkááh nítʼéʼígíí bił tázhdookai yę́ęgóó kéédahatʼínígíí ałdóʼ bee bikʼidahojisdliʼ.
