1 Samuel 31:1-13
31 Áko Filístiya dineʼé éí Ízrel dineʼé yikʼiijééʼ áádóó Ízrel dineʼé bisiláo éí Filístiya dineʼé yikʼee dadínéezhchą́ąʼgo Gilbówa dziłghą́ąʼgi nidabiʼdiztseed.
2 Nítʼééʼ Saul áádóó hayeʼké éí Filístiya dineʼé tʼáá íiyisí haatįįh yikaigo Jánathan áádóó Abínadab índa Malkishúwa éí Saul yiyeʼké danilíinii nidabiʼdiztseed.
3 Áko Saul hakʼijįʼ tʼáá íiyisí anaaʼ hazlı̨́įʼgo daʼdiłtʼohii dahaskahgo bikʼee tízhdiilyaa.
4 Nítʼééʼ Saul éí bee naʼabaahí há neijaahii ábijiní, Nidiltłish handzı̨́įsgo shighá níłgééd. Áko díí doo bąąh nídahineeshgizhii tʼááká ákódashóleʼgo shá nidahółtʼiʼ lágo. Nidi bee naʼabaahí há neijaahii doo íinízin da, háálá tʼáá íiyisí yináldzid. Éí bąą Saul tʼáá hó hadiltłish hadzíídzı̨́įzgo bikʼijįʼ tséʼyaa ízhʼdoolgoʼgo haghá níjilgo dadzistsą́.
5 Áko bee naʼabaahí há neijaahii Saul dadziztsą́ągo yaa ákoniizı̨́įʼgo bí ałdóʼ bidiltłish bikʼijįʼ tséʼyaa íʼdoolgoʼgo bighá níjilgo daaztsą́.
6 Kótʼéego Saul daaztsą́, áádóó hayeʼké táltʼéego ałdóʼ naaztseed; habee naʼabaahí há neijaahii áádóó diné hoł naakai yę́ę tʼáá ałtso ałdóʼ tʼáá éí bijı̨́ tʼáá łahjįʼ nidabiʼdiztseed.
7 Áko náyónaaníjí Jórdan tooh biláahdi Ízrel dineʼé kéédahatʼíinii éí Ízrel dineʼé bisiláo yóóʼadahineezhchą́ʼígíí índa Saul ałdóʼ biyeʼké bił nidabiʼdiztseedígíí yaa dahodiiztsʼą́ąʼgo bikin hadaasʼáii yóóʼadeideezʼą́ągo bí ałdóʼ yóóʼaheezhjééʼ, áko Filístiya dineʼé nidahaaznáago ákwii kéédahatʼı̨́ı̨́ nítʼééʼ.
8 Ákódzaadóó biiskání Filístiya dineʼé éí nidabiʼdiztseedígíí bindaalyeʼé yąąh dayídóobeeł yiniyé yíkaigo Gilbówa dziłghą́ąʼgi Saul áádóó biyeʼké táltʼéego nidabiʼdiztseed lá.
9 Áko bitsiitsʼiin kʼídeisneʼ índa béésh ééʼ yee naabaah yę́ę yaa deidiinil, áádóó Filístiya dineʼé bikéyahgóó idaʼiisʼaʼgo edaʼalyaii bichʼįʼ nidahadláagi índa diné bitahgóó ałdóʼ yaa nidahodeesdláád.
10 Áko Áshtarath diyin bidiʼníinii bikin yiyiʼ nidahałáhá góneʼ habéésh ééʼ nideiznil áádóó hatsʼíís éí Béthshan kin haalʼáagi binaa ahééʼítłʼinígíí biyiʼdę́ęʼgo bąąhjįʼ dah deistı̨́.
11 Nidi Jéíbesh-gíliyad dineʼé éí Filístiya dineʼé danilíinii Saul ádayííłʼįįdígíí yaa dahodiiztsʼą́ąʼgo
12 tʼáá éí bitłʼééʼ diné doo nídanilyéesii tʼáá ałtso dah diikaigo, Saul bitsʼíís índa biyeʼké dabitsʼíís ałdóʼ Béthshangi binaa ahééʼítłʼinígíí bąąhdóó nideiʼdiinil, áko índa Jéíbesh kin haalʼáagi yíkaigo áadi deidííłid.
13 Áko dabitsʼin nídeidiinilgo Jéíbeshgi tsin sikaad léiʼ biyaajįʼ yóóʼádayiilaa, áádóó tʼáadoo daʼayání tsostsʼid jı̨́ azlı̨́ı̨́ʼ.
