1 Samuel 4:1-22
4 Áko Sámuel ádííniidígíí Ízrel dineʼé tʼáá ałtso dayííniiʼ.
Íídą́ą́ʼ Ízrel dineʼé éí Filístiya dineʼé yił daʼahidoogą́ą́ł biniyé Ében-íízer kin shijaaʼgi niníná áádóó Filístiya dineʼé éí Éífek kin haalʼáagi niníná.
2 Filístiya dineʼé éí Ízrel dineʼé yichʼįʼ nídadiibaaʼgo yaa dahoneesná; éí nahósʼaʼgi diné dı̨́įdi mííl nidabiʼdiztseed.
3 Áádóó dah daʼínéhíjįʼ diné níjíkaigo Ízrel dineʼé yá aląąjįʼ naazíinii ádadííniid, Haʼátʼéegoshąʼ Bóhólníihii éí Filístiya dineʼé bitsʼąą daníichéehgo ánihiilaa? Sołtįʼ, Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii tʼáá bił Sháíloh hazʼánídę́ę́ʼ kojįʼ nídadidiitʼááł, áko deíníitʼaahgo éí nihiʼanaʼí tʼáá bił bitsʼą́ąjįʼ yisdánihidoonił.
Filístiya dineʼé éí tsitsʼaaʼ dílzinii deisná
4 Áko diné danilíinii Sháílohgóó adaʼasʼaʼ, áko tʼáá ałtsoní biBóhólníihii bitsitsʼaaʼ dílzinii éí bee ahaʼdeetʼáanii biiʼ sinilii áádę́ę́ʼ nídeidooʼááł; éí Bóhólníihii jílíinii diyingo naalʼaʼí chérabim wolyéii bitaʼgi wódahdi hojílǫ́, áko Íílai biyeʼké Háfnai áádóó Fíniyas áadi Diyin God bitsitsʼaaʼ dílzinii éí bee ahaʼdeetʼáanii biiʼ sinilii yéské.
5 Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii éí dah daʼínéhígi nídeizʼą́, áko Ízrel dineʼé tʼáá ałtso ayóó íitsʼaʼgo hadadeeshghaazh, ákohgo nihokááʼgóó hodiistsʼą́ą́ʼ.
6 Nítʼééʼ Filístiya dineʼé éí ayóó íitsʼaʼgo dazhdilwoshígíí deidiiztsʼą́ąʼgo ádaaní, Haʼátʼíishąʼ biniinaa Hííbrew dineʼé dah yinéłígi ayóogo hahóóʼá? Áko índa Bóhólníihii bitsitsʼaaʼ dílzinii éí dah daʼínéhígi nídeizʼą́ągo yaa ákodaniizı̨́ı̨́ʼ.
7 Áko Filístiya dineʼé tʼáá íiyisí nídaasdzííd, háálá ádaaní, Dah daʼínéehgi Diyin God gaʼ níyáá lá. Áko ádaaní, Hatíhíláaneʼeeʼ! Háálá tʼah doo kóhánéeh da nítʼééʼ.
8 Hatíhíláaneʼeeʼ! Háishąʼ díí diyin dabidziilii yitsʼą́ąjįʼ yisdánihidoonił? Díí diyinii éí honoojíidi bee atíʼélʼı̨́ ałtah áátʼeełii yee Ííjip dineʼé ałtso neistseedígíí ádaatʼı̨́ı̨́ lá.
9 Danihidziil leʼ índa diné bidziiliigi átʼéego ádaʼdíínółzin, Filístiya dineʼé danohłíinii, áko bí nihinaalteʼ danilı̨́ı̨́ nítʼééʼ yę́ęgi átʼéego doo Hííbrew dineʼé binaalteʼ dadoohłeeł da. Diné bidziiliigi átʼéego ádaʼdíínółzin áádóó bił daʼahohgą́.
10 Ákohgo Filístiya dineʼé hakʼiijééʼ, áádóó Ízrel dineʼé bikʼeh hodeesdlı̨́įʼgo dabiníbaal naaznilgóó tʼáá ałtso anídahineezhchą́ą́ʼ, áko ayóogo nidabiʼdiztseed; jó, kweʼé tádiindi mííl Ízrel bisiláo tʼáá niʼ nidaakaígíí biʼdoogą́ą́ʼ.
11 Áádóó Diyin God bitsitsʼaaʼ dílzinii nídiitʼą́, áádóó Íílai biyeʼ nidiltʼéhígíí, Háfnai áádóó Fíniyas, tʼáá áłah nabiʼdiztseed.
12 Tʼáá éí bijı̨́ Bénjamin dineʼé nilíinii łaʼ bitsiijįʼ łeezhgo áádóó biʼééʼ neheesdǫ́ǫzgo daʼahijigánídę́ę́ʼ Sháíloh hazʼánígi yílwod.
13 Áko jílwodgo Íílai éí haʼízdéesʼı̨́įʼgo atiin bąąhgi bikʼi dah asdáhí yikááʼ dah sidá, háálá Diyin God bitsitsʼaaʼ dílzinii bąąh hániʼ. Áko díí diné yílwodígíí kin haalʼáhí góneʼ eelwodgo áhóótʼįįdígíí yaa hoolneʼ; nítʼééʼ diné tʼáá ałtso hahodííłdláád.
14 Hahodííłdládígíí Íílai yidiiztsʼą́ąʼgo ání, Díísh haʼátʼíí biniinaa hahóóʼá? Áádóó diné éí tsxı̨́įłgo Íílai yaa yílwodgo yił hoolneʼ.
15 Áko íídą́ą́ʼ Íílai náhástʼédiindóó baʼaan tseebíí binááhai; hanáʼoh halbáago doo hazhóʼó ajooʼı̨́į da.
16 Áko diné éí Íílai áyidííniid, Shí daʼahijigánídę́ę́ʼ nánísdzá; jı̨́ı̨́dą́ą́ʼ daʼahijigánídę́ę́ʼ yóóʼeeshwod. Áko Íílai ání, Áadi haa dahatʼı̨́, shiyeʼ?
17 Áko haneʼ yiníʼánígíí ání, Ízrel dineʼé éí Filístiya dineʼé yikʼee yóóʼadahineezhchą́ą́ʼ, áádóó diné tʼóó ahayóí nidabiʼdiztseed, áádóó niyeʼké Háfnai áádóó Fíniyas tʼáá áłah ałdóʼ neezná, índa Diyin God bitsitsʼaaʼ dílzinii nídiitʼą́.
18 Ákódzaago Diyin God bitsitsʼaaʼ dílzinii nídiitʼánígíí bee Íílai bił chʼíhozhníʼą́ągo chʼéʼétiingi bikʼi dah asdáhí bikááʼdóó tséde íítłizh, áko bikʼos kʼéʼéltǫʼgo daaztsą́, háálá tʼáá íiyisí hadzistih áádóó hatah hódaaz. Ízrel dineʼé bá nihozhdiyiiʼaahgo dízdiin nááhai.
19 Íílai bizhááʼáád, éí Fíniyas beʼasdzą́ą́, yiltsą́ągo kʼadę́ę iʼniiłchı̨́. Ákohgo Diyin God bitsitsʼaaʼ dílzinii nídiitʼą́ągo áádóó bizhááʼáád jílíní daaztsą́ągo índa hahastiin ałdóʼ daaztsą́ągo baa hozdiiztsʼą́ąʼgo áhozdiilzeeʼgo izhʼniiłchı̨́, háálá hoł náhodíníigai.
20 Áádóó kʼadę́ę nihozhneełʼąąhgo asdzání haa ádahalyánígíí ádahałní, Tʼáadoo nił yéʼí, háálá ashkii shíníłchı̨́. Nidi tʼáadoo háádzoodzííʼgóó tʼóó nahonizhníłʼąąd.
21 Áko íídą́ą́ʼ awééʼ ashkii éí Íkabad* bee jíízhiʼgo kózhdííniid, Ízrel dineʼé bee ayóó ájítʼéii hatsʼą́ą́ʼ dahodiileʼ! Háálá Diyin God bitsitsʼaaʼ dílzinii hatsʼą́ą́ʼ nídiitʼą́ áádóó asdzání yizhááʼáád nilíinii daaztsą́ índa hahastiin ałdóʼ daaztsą́.
22 Jó, kójíní, Ízrel dineʼé bee ayóó ájítʼé hatsʼą́ą́ʼ dahodiileʼ, háálá Diyin God bitsitsʼaaʼ dílzinii hatsʼą́ą́ʼ nídiitʼą́.
Footnotes
^ Íkabad jiníigo éí Hííbrew kʼehjígo yee ayóó átʼéii ásdįįd, jiníigo óolyé.
