1 Samuel 5:1-12
5 Filístiya dineʼé éí Diyin God bitsitsʼaaʼ dílzinii nídeidiiʼą́ągo Ében-íízer kin shijaaʼdóó Áshdad kin haalʼáajįʼ deizʼą́,
2 áko Filístiya dineʼé éí Diyin God bitsitsʼaaʼ dílzinii nídeidiiʼą́ągo bidiyin bidiʼníinii Déígan wolyéii bikin góneʼ yah adeizʼą́. Eʼelyaii Déígan wolyéhígíí bíighahgi nideizʼą́.
3 Áádóó Áshdad dineʼé abíínídą́ą́ʼ nízhdiijééʼ nítʼééʼ, shoo, Déígan éí niʼjįʼ Bóhólníihii bitsitsʼaaʼ dílzinii yiyaajįʼ tséʼyaa íítłizh lá. Ákohgo Déígan nídazhdiidzı̨́įzgo nídabidziisįʼ.
4 Ákohgo biiskání abíínídą́ą́ʼ nínáázhdiijééʼ nítʼééʼ, shoo, Bóhólníihii bitsitsʼaaʼ dílzinii biyaajįʼ Déígan wolyéii éí chʼéʼétiin gónaa sitánígíí yikáaʼjįʼ tséʼyaa anáánáátłizh lá, áádóó bitsiitsʼiin índa bílaʼ heestǫʼgo nideeztąąd; tʼáá hazhóʼó Déígan bizhiʼ tʼéiyá yidzííʼ lá.
5 Éí bąą Áshdad kin haalʼáadi Déígan bináádaʼiiłniihii áádóó tʼáá ałtso Déígan bikin góneʼ yah anídaakahígíí díí jı̨́ı̨́góó chʼéʼétiin gónaa sitánígíí doo yikʼi dadiiltaał da.
6 Bóhólníihii éí tsʼídá yéego Áshdad dineʼé yichʼįʼ hodiyiisnáaʼgo chʼozh yee atíyiilaa; Áshdad dineʼé índa binaagóó kédaayahgóó kéédahatʼíinii ałdóʼ ákóyiilaa.
7 Áko Áshdad dineʼé éí áhootʼéhígíí yaa ákodaniizı̨́įʼgo ádadííniid, Ízrel dineʼé biDiyin God bitsitsʼaaʼ dílzinii doo tʼáá nihitah hólǫ́ǫ da doo, háálá nihí atínihiłʼı̨́ áádóó nihidiyin Déígan atííłʼı̨́.
8 Ákohgo Filístiya dineʼé aląąjįʼ bídahólníihii yíká adaʼiisʼaʼgo áłah ádayiilaago ádeidííniid, Ízrel dineʼé biDiyin God bitsitsʼaaʼ dílziniishąʼ, haa dadiilnííł? Áko hadaasdzíiʼgo ádaaní, Bíniʼdii Ízrel dineʼé biDiyin God bitsitsʼaaʼ dílzinii Gath kin haalʼáágóó nídootʼááł. Ákohgo Ízrel dineʼé biDiyin God bitsitsʼaaʼ dílzinii ákǫ́ǫ́ anídeizʼą́.
9 Nidi tádazhdííʼą́ągo Bóhólníihii éí kin haalʼáhígi ayóó átʼéego atíyiilaa, índa kin haalʼáhídi kéédahatʼíinii diné danilínígíí ániid nidaakaii áádóó hadaastihii tʼáá ałtso bijágiizhgóó chʼozh bąąh hadaaskai.
10 Ákohgo Diyin God bitsitsʼaaʼ dílzinii Ékran kin haalʼáajįʼ ánáádajiidlaa. Nidi Ékranjįʼ yítʼą́ągo Ékran dineʼé hahodííłdláadgo ádaaní, Ízrel dineʼé biDiyin God bitsitsʼaaʼ dílzinii nihitah deizʼą́ą́ lá, áko nihí áádóó nihił kéédahatʼíinii tʼáá bił ánihidoołdįįł.
11 Éí bąą Filístiya dineʼé binanitʼaʼí yichʼįʼ adaʼiisʼaʼgo tʼáá ałtso áłah ádayiilaago ádaaní, Ízrel dineʼé biDiyin God bitsitsʼaaʼ dílzinii níláhgóó kónáhdlééh, índa bíniʼdii tʼáá bí bá hazʼáníjįʼ ninátʼaah, áko nihí nihidineʼé tʼáá bił doo ánihidoołdįįł da. Háálá éí kin haalʼáhígi tʼáá átʼéé nítʼééʼ tʼóó báhádzidgo hahonííchaad. Diyin God ayóó átʼéego atíʼiilaa;
12 diné doo daneeznáanii éí chʼozh bitah níłniiʼ, áádóó kin haalʼáhídóó yáʼąąshiigóó chaał adahoyiinííh.
