1 Samuel 6:1-21
6 Bóhólníihii bitsitsʼaaʼ dílzinii éí Filístiya dineʼé bikéyahdi siʼą́ągo tsostsʼid nídeezid.
2 Áádóó Filístiya dineʼé bidiyin yichʼįʼ náádaʼiiłniihii índa diné náásgóó ádahodooníiłii yaa dahalneʼii yíká adaʼasʼaʼgo ádaaní, Bóhólníihii bitsitsʼaaʼ dílziniishąʼ, haa dadiilnííł? Haaléitʼéego tʼáá bá hazʼą́ą́góó tʼą́ą́ʼ áńdadiilnííł lá? Éí bee nihił dahołneʼ.
3 Áko ádaaní, Ízrel dineʼé biDiyin God bitsitsʼaaʼ dílzinii tʼą́ą́ʼ áńdaahdlééh ládą́ą́ʼ tʼááká nááhániihii tʼáágééd tʼą́ą́ʼ áńdaohdlééh lágo, nidi ííshją́ą́ doo ákǫ́ǫ́ ájíítʼįįdjí nááhániihii bił tʼą́ą́ʼ áńdadoohdlííł. Ákohgo hadaałtʼé nídadoohdleeł, áádóó biniinaa Bóhólníihii bibee atíʼélʼíinii doo nihitsʼą́ąjįʼ kónéhígíí nihił béédahodoozįįł.
4 Áko ádaaní, Haʼátʼíí doo ákǫ́ǫ́ ájíítʼįįdjí nááhániihii shı̨́įshąʼ Bóhólníihii bichʼįʼ náádahidiilnih? Áko ádadííniid, Óola bee chʼozh ashdlaʼgo áádóó naʼatsʼǫǫsí ashdlaʼgo béédaʼalyaii, tʼáá Filístiya dineʼé binanitʼaʼí ánéeltʼeʼígíí bikʼehgo bichʼįʼ náádahidiilnih, háálá tʼááłáʼí bee atíʼélʼínígíí nihí tʼáá ánółtso nihinanitʼaʼí bił nihitah níłniiʼ.
5 Éí bąągo ííshją́ą́ chʼozh áádóó naʼatsʼǫǫsí éí kéyah dayííłchxǫʼígíí ádá béédaʼdoohdlííł, áádóó Ízrel dineʼé biDiyin God baa dahohniih; eii shı̨́ı̨́ áko Bóhólníihii bibee atíʼélʼíinii nihitsʼą́ąjįʼ kwíidoolííł, índa nihidiyin danilíinii áádóó nihikédaayah ałdóʼ bitsʼą́ąjįʼ kwíidoolííł.
6 Haʼátʼéegoshąʼ nihijéí daołtłʼis? Jó, Ííjip dineʼé áádóó Féro bijéí dayííłtłʼis yę́ęgi ádaohtʼı̨́. Shą́ą́ʼ, Bóhólníihii hatahgóó tʼóó bikʼedaʼayóii yaa naayáago Ízrel dineʼé béédaʼdzisniiʼgo dah diiná.
7 Éí bąągo kʼad tsinaabąąs naaldlózígíí ádadoohłííł áádóó béégashii néiʼnihí naakigo tʼah doo bizéédéetįįhígíí éí tsinaabąąs naaldlózígíí bighą́ą́h didoohnił, nidi biyázhí éí hooghangóó bitsʼą́ą́ʼ nídadoohʼish.
8 Áádóó Bóhólníihii bitsitsʼaaʼ dílzinii nídoohʼaahgo tsinaabąąs naaldlózígíí biih wohʼaah, áádóó óola bee béédaʼalyaii éí doo ákǫ́ǫ́ ájíítʼįįdjí nááhániihii Bóhólníihii bichʼįʼ náádahidoołnihígíí éí tsitsʼaaʼ biyiʼígíí tsitsʼaaʼ dílzinii bíighahgi ninohʼaah. Áádóó bił dah nídiʼdoobąs biniyé béédaʼdoołnih.
9 Áádóó tʼáá danółʼı̨́; tʼáá daatsʼí bí bikéyahjigo Beth-shíímesh kin shijaaʼgóó nídoodleeł, áádóó índa ayóó átʼéego atínihiilaii éí bí átʼı̨́įgo nihił béédahodoozįįł, nidi doo bí átʼı̨́ı̨́góó bí doo atínihiilaagóó nihił béédahoozingo éí tʼóó nihichʼįʼ ákóhóótʼįįd dooleeł.
10 Áko diné ákódaadzaago béégashii néiʼnihígíí naakigo bizééʼdazdeeztą́ągo tsinaabąąs naaldlózígíí bighą́ą́h dazdeeznil, áádóó biyázhí éí tʼáá hooghandi yah adadziznil.
11 Áádóó Bóhólníihii bitsitsʼaaʼ dílzinii áádóó óola bee naʼatsʼǫǫsí índa chʼozh béédaʼalyaii tsitsʼaaʼ bee tsinaabąąs biih dadzizʼą́.
12 Áádóó béégashii áníigo tʼáá kʼéhézdon Beth-shíímesh kin shijaaʼ bichʼįʼ atiingóó oołbąs, tʼáadoo nidi nishʼnáajigo, doodaiiʼ nishtłʼajigo kódzaa da, áádóó Filístiya dineʼé binanitʼaʼí Beth-shíímesh kin shijaaʼ bihoodzojįʼ yikééʼ niikai.
13 Íídą́ą́ʼ Beth-shíímesh dineʼé éí yíldzis góyaa dádaʼakʼehgi tłʼoh naadą́ą́ʼ deiyizh, áádóó hadaazghal nítʼééʼ tsitsʼaaʼ dílzinii bił náʼoobąsgo dayiiłtsą́, áko yaa bił dahóózhǫǫd.
14 Díí tsinaabąąs Beth-shíímeshdóó diné, Jáshowa wolyéii, bidáʼákʼehgi tsé ayóó áníłtso siʼánígi niʼníbą́ą́z, áádóó tsin neheeshjííʼ tsinaabąąs bee ályaii nidayiiztiʼgo yee dadeideeshjééʼ, áádóó béégashii nideistseedgo Bóhólníihii bichʼįʼ didlidgo náádayiisniiʼ.
15 Áádóó Líívai dineʼé éí Bóhólníihii bitsitsʼaaʼ dílzinii áádóó éí bíighahgi óola bee béédaʼalyaii tsitsʼaaʼ biyiʼ sinilígíí adadeizʼą́ągo, tsé ayóó áníłtsoii yikáaʼgi dah deiznil, áko Beth-shíímesh dineʼé éí didlidgo náádahaniihii índa náádahidoonihgo náádahaniihii tʼáá éí bijı̨́ Bóhólníihii yichʼįʼ náádayiisniiʼ.
16 Ákohgo Filístiya dineʼé binanitʼaʼí ashdlaltʼéego éí dayiiłtsą́ągo tʼáá éí bijı̨́ Ékran kin haalʼáágóó anáákai.
17 Díí óola bee chʼozh béédaʼalyaii éí doo ákǫ́ǫ́ ájíítʼįįdjí nááhániihii átʼéego Filístiya dineʼé éí Bóhólníihii yichʼįʼ náádayiisniiʼii átʼé: łaʼ éí Áshdad kin haalʼáii bá, łaʼ éí Géíza kin haalʼáii bá, łaʼ éí Áshkelan kin haalʼáii bá, łaʼ éí Gath kin haalʼáii bá, łaʼ éí Ékran kin haalʼáii bá náádayiisniiʼ.
18 Áádóó óola bee naʼatsʼǫǫsí béédaʼalyaii náádayiisniiʼ: Filístiya dineʼé yinanitʼaʼí ashdlaltʼéego bikin hadaasʼáii tʼáá ałtso bikʼehgo, łaʼ ditą́ągo binaa ahéédaʼastłʼinii áádóó kin dashijaaʼ éí yá náádayiisniiʼ; tsé ayóó áníłtso siʼáníjįʼ Bóhólníihii yichʼįʼ náádayiisniiʼ. Díí tsé ayóó áníłtsoígíí bikáaʼgi Bóhólníihii bitsitsʼaaʼ dílzinii dah dadzizʼánígíí éí tsé díí jı̨́įdi tʼahdii Beth-shíímesh kin shijaaʼdóó diné nilíinii, Jáshowa wolyéii bidáʼákʼehgi siʼą́.
19 Áádóó Bóhólníihii éí Beth-shíímeshdi kéédahatʼínígíí łaʼ yiyííghą́ą́ʼ, háálá Bóhólníihii bitsitsʼaaʼ dílzinii biyiʼ góneʼ dazhdééʼı̨́ı̨́ʼ; éí bąą ashdladiindi mííldóó baʼaan tsostsʼidiin diné hoʼdoogą́ą́ʼ, áko diné bikwáʼásiní yę́ę yaa daacha, háálá Bóhólníihii tʼáá íiyisí ayóó átʼéego hatahgi diné neistseed.
20 Ákohgo diné Beth-shíímesh kin shijaaʼdi kéédahatʼínígíí ádadííniid, Háishąʼ éí Bóhólníihii Diyin God diyinii bidááhdóó yizdoozįįłgo bízhneelʼą́? Háishąʼ nihitahdóó Bóhólníihii hachʼįʼ biʼdoolnih?
21 Ákohgo nidaalʼaʼí danilíinii Kírjath-jíyarim kin shijaaʼdi kéédahatʼíinii yichʼįʼ adaʼasʼaʼgo kódaaní, Filístiya dineʼé éí Bóhólníihii bitsitsʼaaʼ dílzinii nídeizʼą́. Aadę́ę́ʼ nihaa danohkáahgo nílááh nihikéyahgóó nídadohʼaah.
