1 Samuel 7:1-17
7 Áko Kírjath-jíyarimdóó dineʼé yíkaigo Bóhólníihii bitsitsʼaaʼ dílzinii nídeidiiʼą́, índa yanáalkʼidgi Abínadab bighanjįʼ deizʼą́; éí biyeʼ Eliyéízar wolyéii jidiyingo ádahoolaago Bóhólníihii bitsitsʼaaʼ dílzinii baa áhojilyą́ą doo.
Sámuel éí Ízrel dineʼé yá nihodiyiiʼaah
2 Kírjath-jíyarimgi tsitsʼaaʼ dílzinii niitʼą́ bijı̨́ı̨́dóó nízaad nihoolzhiizh, naadiin nááhai, áádóó Ízrel dineʼé tʼáá ałtso Bóhólníihii yichʼįʼ atínídadindleeh.
3 Ákohgo Sámuel éí Ízrel dineʼé tʼáá ałtso ábizhdííniid, Danihijéí tʼáá átʼé bee Bóhólníihii bichʼįʼ nináhóhkááh, áko diyin dabidiʼníinii áádóó Áshtarath diyin dabidiʼníinii yóóʼadahidohʼaah; danihijéí Bóhólníihii baa dahidohʼaah, áádóó tʼáá bí tʼéiyá bá nidaałʼaʼ; ákódaahtʼı̨́įgo tʼéiyá Filístiya dineʼé bitsʼą́ąjįʼ yisdánihidoonił.
4 Ákohgo Ízrel dineʼé éí Béíyalim áádóó Áshtarath* yóóʼadeideezʼą́ągo Bóhólníihii tʼéiyá yichʼįʼ nidahałá.
5 Áko Sámuel ádííniid, Ízrel dineʼé tʼáá ánółtso Mízpeh kin shijaaʼdi áłah áńdoohʼnííł, áádóó Bóhólníihii bichʼįʼ nihá sodideeszįįł.
6 Áko Mízpehgi áłah daazlı̨́ı̨́ʼ áádóó tó hadajiileehgo Bóhólníihii binááł yadajiyiiziid, áádóó éí bijı̨́ hodílzingo doo adą́ baa nidziskai, índa ákweʼé ádazhdííniid, Bóhólníihii bichʼįʼ ádił nidaʼayeelzííʼ. Áádóó Mízpeh kin shijaaʼdi Sámuel éí Ízrel dineʼé bá nihozhdiyiiʼaah nítʼééʼ.
7 Áko íídą́ą́ʼ Filístiya dineʼé éí Mízpehgi Ízrel dineʼé áłah daazlı̨́įʼgo yaa dahodiiztsʼą́ą́ʼ, áko Filístiya dineʼé binanitʼaʼí danilíinii éí Ízrel dineʼé danilíinii yaa heekai, áádóó Ízrel dineʼé díí yaa dahodiiztsʼą́ąʼgo Filístiya dineʼé yéédaasdzííd.
8 Áko Ízrel dineʼé éí Sámuel ádeidííniid, Tʼáadoo áhodiilzéhí Bóhólníihii nihiDiyin God nihá néinikąąhgo Filístiya dineʼé bitsʼą́ąjįʼ yisdánihidoonił.
9 Ákohgo Sámuel éí dibé yázhí tʼahdii ałtʼoʼii didlidgo nááhániihii tʼáá átʼé Bóhólníihii yichʼįʼ nááyiisniiʼ, áádóó Sámuel éí Ízrel dineʼé bá níjookąąhgo Bóhólníihii hodiiztsʼą́ą́ʼ.
10 Áko Sámuel éí tʼahdii didlidgo nááhániihii náájiiłniihgo baa nijighá, nítʼééʼ Filístiya dineʼé tʼáá áyídíjįʼ hakʼiidoojah biniyé Ízrel dineʼé yaa heekai, nidi tʼáá éí bijı̨́ ayóó átʼéego iiʼniʼ nahalingo Bóhólníihii biinééʼ diistsʼą́ąʼgo yikʼee Filístiya dineʼé tʼóó bił dahóóląąd, áádóó Ízrel dineʼé yilą́ąjįʼ niníjéeʼgo nidabistseed.
11 Áko Mízpeh kin shijaaʼdóó Ízrel dineʼé chʼíheezhjééʼ, áádóó Filístiya dineʼé yikééʼ nídiijéeʼgo Béthkar hazʼánígíí biyaagóó deiníłtseed.
12 Áko Sámuel éí tsé néidiiʼą́ągo Mízpeh kin shijaaʼ áádóó Shen tsé yadiitʼąhí bitaʼgi ayíítsigo Ében-íízer hoolyée doo, dííniid, háálá ájíní, Kónízahjįʼ Bóhólníihii nihíká eelwod.
13 Áko Filístiya dineʼé baa honeezná áádóó Ízrel dineʼé bikéyahjįʼ tʼáadoo yah anáádaaskai da. Áádóó Bóhólníihii éí Filístiya dineʼé yikʼijįʼ nilı̨́įgo Sámuel bíiníłką́.
14 Ékran kin haalʼáádóó Gath kin haalʼáajįʼ Ízrel dineʼé bikin hadaasʼáago Filístiya dineʼé bighadeideestʼánígíí éí Ízrel dineʼé baa nídeetʼą́, áádóó Ízrel dineʼé danilíinii dabikéyah Filístiya dineʼé yigháádeideestʼą́. Áko Ízrel dineʼé áádóó Ámor dineʼé bitaʼgi hodéezyéél.
15 Sámuel niʼníłdįįd bijı̨́įjįʼ Ízrel dineʼé yá nihodiyiiʼaah nítʼééʼ.
16 Áádóó tʼáá nináháhááh bikʼeh Béthel hazʼánígi áádóó Gílgal kin shijaaʼgi índa Mízpeh kin shijaaʼgi Sámuel tázhdígháahgo éí Ízrel dineʼé bá nihozhdiyiiʼaah nítʼééʼ.
17 Ákohgo Réímah kin shijaaʼgi ninájiidááh nítʼééʼ, háálá ákweʼé haghan, áádóó ákweʼé ałdóʼ Ízrel dineʼé bá nihozhdiyiiʼaah nítʼééʼ. Áádóó ákweʼé Bóhólníihii bá bikááʼ nááʼiiniihí ájiilaa.
Footnotes
^ Béíyalim áádóó Áshtarath edaʼalyaii éí Kéínan dineʼé bidiyin dabidiʼníinii óolyé.
