1 Samuel 8:1-22
8 Áko Sámuel hadzistihgo hayeʼké éí Ízrel dineʼé yá nihodiyiiʼaahii danilı̨́įgo ájiilaa.
2 Áłtsé yizhchínígíí Jówel wolyé, áádóó naaki góneʼígíí Abáíyah wolyé; Bíyer-shííba kin shijaaʼdi á nihodiyiiʼaahii jílı̨́ı̨́ nítʼééʼ.
3 Áko hayeʼké doo hógi átʼéego naazhʼáazh da. Béeso yíchą́ʼíídéelniʼgo bee nahoʼdiiniihii bichʼįʼ násdláago tʼáadoo diné bá nihodiitʼaahgi átʼéégóó yá nihodiyiiʼaah nítʼééʼ.
4 Ákohgo Ízrel dineʼé aląąjįʼ naazíinii tʼááłáhíjįʼ ahíikaigo áádóó Réímah kin haalʼáadi Sámuel yaa yíkaigo
5 ádeidííniid, Jó, ni éí hasínítih áádóó niyeʼké éí doo ánítʼéhígi átʼéego yiʼash da; kʼad ałʼąą dineʼé ádaatʼéhígi átʼéego aláahgo naatʼáanii nihá nihodiyiiʼaah dooígíí łaʼ nihá nídidííłtééł.
6 Aláahgo naatʼáanii nihá nihodiyiiʼaah dooígíí nihá nídiiłteeh, dadííniidígíí Sámuel doo bił bííkʼeh da. Áko Sámuel sozdilzingo Bóhólníihii níjooskan.
7 Áádóó Sámuel éí Bóhólníihii ábidííniid, Diné tʼáá ałtso yee nichʼįʼ yaa yádaałtiʼígíí yísíníłtsʼą́ą́ʼ; jó, ni éí tʼáadoo doo daniniizı̨́įʼ da; nidi shí éí doo dashiniizı̨́įʼ da; éí doo binaanishtʼáa da doo biniyé ákódaatʼı̨́.
8 Ííjip kéyahdę́ę́ʼ chʼíníʼeezh bijı̨́ı̨́dóó díí jı̨́įjįʼ yaa ninádinikahii bikʼehgo yóóʼanídashidiʼáahgo diyin dabidiʼníinii yá nidaalʼaʼ nítʼééʼ; shichʼįʼ ádáátʼįįdígi átʼéego ni ałdóʼ ákódaniłʼı̨́.
9 Éí bąą kʼad ádaaníinii bikʼeh honíłʼįįh, nidi ni éí tsʼídá tʼáadoo naaki nilíní biʼdííłnih, áádóó aláahgo naatʼáanii átʼée dooígíí bił ííshjání ádíílííł.
10 Ákohgo Sámuel éí Bóhólníihii bizaad tʼáá átʼé bee diné bił hojoolneʼ; aláahgo naatʼáanii diné hódayókeedígíí bił ííshją́ą́ ájiilaa.
11 Áko Sámuel ání, Díigi átʼéego aláahgo naatʼáanii nihinantʼáa doo; tʼáá bí ádá danihiyeʼké néidiyoolahgo bitsindaabąąs bijáád naakiígíí áádóó łı̨́ı̨́ʼ bee naʼabaah yee danilı̨́į doo, áko łaʼ bitsindaabąąs bijáád naakiígíí deíłbąsii yilą́ąjįʼ deíjeeh doo.
12 Áádóó danihiyeʼké łaʼ siláo mííl yiltʼéego bindanitʼaʼí néidiyoolah, áádóó łaʼ ashdladiin yiltʼéego bindanitʼaʼí nínéidiyoodlah, áádóó łaʼ bá nidahwiiłdlaad doo, áádóó łaʼ bá daʼayizh doo, áádóó náádaałaʼ éí anaaʼ bichʼįʼ bee naʼabaahí índa bitsindaabąąs bijáád naakiígíí bee ádaalneʼígíí bá ádajileʼ doo.
13 Danihichʼéʼé éí łikání halchiní ádeiłʼíní áádóó chʼiyáán ádeiłʼíní índa bááh ádeiłʼíní danilı̨́įgo íidoolííł.
14 Nihidáʼákʼehígíí áádóó nihichʼil naʼatłʼoʼii kʼéédadohdléhígíí áádóó nihiʼáliv yílʼáhígíí kʼéédadohdléhígíí tsʼídá aláahgo yáʼádaatʼéehii bá nidaalʼaʼí yeididooʼááł.
15 Nihikʼeelyéí áádóó nihichʼil naʼatłʼoʼii neeznáá daníjaaʼígíí éí tʼááłáʼí shijaaʼ nínáyiidlahgo bá naatʼáanii danilíinii áádóó bá nidaalʼaʼí yitaa néiʼnih doo.
16 Áko diné nihá nidaalʼaʼígíí áádóó asdzání nihá nidaalʼaʼígíí áádóó nihitsíłkéí tsʼídá aláahdi bíiyisii índa nihitélii ałdóʼ néidiyoolahgo bá chʼídadoolnish.
17 Nihidibé neeznáá níjaaʼígíí bitahdę́ę́ʼ tʼááłáʼígo néidiyiiłteeh doo, áádóó nihí binaalteʼ danohłı̨́į doo.
18 Áko éí yoołkáłígíí biyiʼ tʼáá nihí ádá nihinaatʼáanii nídadoołtínígíí biniinaa chaał haołʼáa doo, nidi éí yoołkáłígíí biyiʼ Bóhólníihii doo nihichʼįʼ ééhodoosįįł da.
19 Nidi Ízrel dineʼé éí doo tʼáá kʼad Sámuel áníinii yikʼeh ádaadzaagóó ádaaní, Dooda! Aláahgo naatʼáanii yeeʼ łaʼ nihee hodooleeł daniidzin;
20 éí nihí ałdóʼ ałʼąą dineʼé ádaatʼéhígi ádaniitʼée dooleeł, áádóó aláahgo nihinaatʼáanii nihá nihodiyiiʼaahgo nanihiʼeesh doo áádóó nihá naabaah doo.
21 Ákohgo Sámuel éí diné ádaanínígíí tʼáá ałtso dzidiiztsʼą́ą́ʼ, áko Bóhólníihii bił náhojoolneʼ.
22 Áádóó Bóhólníihii éí Sámuel áyidííniid, Ádaanínígíí yísíníłtsʼą́ą́ʼ, áádóó aláahgo naatʼáanii łaʼ bá nídiiłteeh. Áko Sámuel éí Ízrel dineʼé áyidííniid, Nílááh, tʼááłáʼí nootínígo nihikin hadaasʼáágóó anáhóhkááh.
