1 Samuel 9:1-27
9 Diné léiʼ Bénjamin dineʼé nilíinii Kish wolyé. Kish éí Éíbiyel biyeʼ, Éíbiyel éí Zíírar biyeʼ, Zíírar éí Biikórath biyeʼ, Biikórath éí Afáíyah biyeʼ, Afáíyah éí Bénjamin dineʼé nilı̨́. Kish wolyéhígíí atʼı̨́ áádóó bóhólnííh,
2 áádóó hó hayeʼ hólǫ́, éí Saul wolyé; éí diné ániid naagháii bíiyisii nilı̨́. Ízrel dineʼé bitahdóó doo łaʼ haláahgo bíiyis da; tʼáá íiyisí diné nineezii jílı̨́, áko diné tʼáá ałtso tʼáá hawosígo ádaníłtso.
3 Áko Saul bizhéʼé Kish bitélii yóóʼííjééʼ. Ákohgo Kish éí biyeʼ Saul áyidííniid, Nílááh, naalʼaʼí łaʼ nídiiłteehgo télii hanohtá.
4 Áádóó Dził Íífreiyim báhátis jííʼáázh, áádóó Shaláísha nahósʼaʼ biyiʼgóó chʼízhníʼáázh, nidi tʼáadoo bikʼínizhnítą́ąʼ da. Áádóó kéyah Shéílim nahósʼaʼ biyiʼgóó chʼízhníʼáázh, áko ákweʼé nidi ádin. Ákohgo Bénjamin dineʼé bikéyah biyiʼgóó chʼínáájítʼáázh, nidi tʼáadoo bikʼínizhnítą́ąʼ da.
5 Ákohgo Zuf hoolyéegi jiníʼáazhgo há naalʼaʼí bił jooʼashígíí ábijiní, Tįʼ, tʼą́ą́ʼ nikéédiitʼash; shizhéʼé daatsʼí télii yaa yooznahgo, jó, nihída nihikééʼ bíniʼ ííʼá.
6 Nidi naalʼaʼí ádííniid, Jó, diné léiʼ Diyin God bił hólóonii díí kin haalʼáhígi kééhatʼı̨́, áádóó éí diné ił nilíinii nilı̨́; tʼáá ałtsoní yee hahadziihii tʼáá aaníí neheleeh. Sołtįʼ, ákǫ́ǫ́ diitʼash; eii shı̨́ı̨́ náádiitʼashgóó yee nihił hodoolnih.
7 Ákohgo Saul há naalʼaʼí ábizhdííniid, Nidi ákǫ́ǫ́ diitʼáazhgo haʼátʼíishąʼ díí diné baa diilyééł? Háálá díí nihiʼazis biyiʼ chʼiyáán ásdįįd áádóó bikʼé nidoolyéełgo diné éí Diyin God bił hólóonii baa diilyéłígíí ádin. Haʼátʼíísh ałdóʼ nihee hólǫ́?
8 Áko naalʼaʼí éí Saul ánéidooʼniid, Naʼ, kǫ́ǫ́ béésh łigaii shékel wolyéhígíí dı̨́įʼgo shijaaʼígíí tʼááłáʼí siʼą́ bíighahgo shee hólǫ́, áko diné éí Diyin God bił hólóonii baa deeshniłgo náádiitʼashgóó yee nihił hodoolnih.
9 (Ałkʼidą́ą́ʼ Ízrel dineʼé bitahgi Diyin God neízhdídóołkiłgo ájíniih, Sołtįʼ, diné náásgóó ádahodooníiłii yaa halneʼii bichʼįʼ diikah; jó, éí kʼad Diyin God yá halneʼii wolyéhígíí éí ałkʼidą́ą́ʼ náásgóó áhodooníiłii yaa halneʼii wolyéé nítʼééʼ.)
10 Ákohgo Saul éí bá naalʼaʼí áyidííniid, Yáʼátʼéhígi ádííníniid, sołtįʼ, ákǫ́ǫ́ diitʼash. Ákohgo kin haalʼáágóó diné éí Diyin God bił hólóonii kééhatʼínígi jiníʼáázh.
11 Ákohgo kin haalʼáhígíí bichʼįʼ dah yiskʼid góde jooʼashgo chʼikéí tó hadeidiyoolohgóó deíkáahgo bidááshníʼáázh, áko ádabizhdííniid, Daʼ diné náásgóó áhodooníiłii yaa halneʼiísh kweʼé naaghá?
12 Nítʼééʼ ádahodííniid, Aooʼ, kweʼé naaghá; jó, tʼáá nihítséedi níyá. Tsxı̨́įłgo óhtʼı̨́, jı̨́ı̨́dą́ą́ʼ díí kin haalʼáhígi níyá, háálá aláahdi yanáalkʼid bikáaʼgi díí jı̨́ diné náádaʼiiłniihgo yaa nídiikai.
13 Tʼáá kin haalʼáhíjįʼ ooʼáázhgóó bikʼídínóotááł; tʼah doo aláahdi yanáalkʼid góde iʼniiyą́ą́ʼ yiniyé dah diighááhgóó, háálá bí áadi yigháahgo índa diné idaʼniiyı̨́ı̨́h; jó, hó nááhidoonihii bikʼi sozdilzįįh, áádóó índa hágo dabidiʼniihgo nehekáhígíí daʼayı̨́ı̨́h. Kʼad ákóde doohʼash, háálá tʼáadoo hodinaʼí bikʼídoohʼash.
14 Ákohgo kin haalʼáá góde jiníʼáázh. Tsʼídá kʼadę́ę kintah góneʼ ajiʼaashgo, shoo, aláahgo yanáalkʼid góde Sámuel deeyáago hadááh níyá.
15 Bóhólníihii éí Sámuel yił hoolneʼgo tʼááłáʼí yiską́ hadziihgo Saul doogáałgo ání,
16 Yiską́ągo kóhoodzaago diné łaʼ naa deeshʼaałígíí éí dinéhígíí Bénjamin dineʼé bikéyahdę́ę́ʼ naaghá, áko akʼah bikʼi yeidííziłgo atsʼádííłtéełgo shidineʼé Ízrel yinantʼáa doo. Ákohgo Filístiya dineʼé bitsʼą́ąjįʼ shidineʼé yisdéidoonił, háálá shidineʼé bichʼįʼ nidahwiiʼnánígíí nishʼı̨́įgo shichʼįʼ daachago disétsʼą́ą́ʼ.
17 Áádóó Sámuel éí Saul yiyiiłtsą́ągo Bóhólníihii ábidííniid, Shoo, eii diné bee nił hweeshneʼígíí átʼı̨́! Díí lą́ą shidineʼé yinantʼáa doo.
18 Áko Saul chʼéʼétiingi Sámuel bichʼįʼ nizhníyáago ájíní, Shił hólneʼ, baa nánooshkąąh, háadishąʼ náásgóó ádahodooníiłii yaa halneʼii bighan?
19 Sámuel éí Saul áyidííniid, Shí náásgóó ádahodooníiłii yaa halneʼii nishłı̨́. Nílááh, aláahgo yanáalkʼid bikáaʼjįʼ shilą́ąjįʼ hasínááh, háálá díí jı̨́ nił adeeshı̨́ı̨́ł, áádóó yiską́ągo nééʼníshníihgo índa baa nitsíníkeesígíí tʼáá átʼé bee nił hodeeshnih.
20 Tááʼ yiskánídą́ą́ʼ nitélii yóóʼeekaígíí tʼáadoo bąąh níniʼí, háálá éí shónáoztʼeʼ. Háí diné shı̨́įshąʼ Ízrel dineʼé tʼáá ałtso yinízinii jílı̨́? Jó, éí tʼáá ni áádóó nizhéʼé bighandóó danilíinii ałdóʼ.
21 Saul ánáázhdíʼní, Shí éí Bénjamin dineʼé nishłı̨́įgo Ízrel dineʼé bitahdóó tʼáá ałtso biʼohgo áníiltʼeʼ. Áádóó shizhéʼé bighandóó Bénjamin dineʼé danilíinii tʼáá ałtso ayáhígo ádaatʼé. Haʼátʼéegishąʼ bee ákótʼéego shichʼįʼ yáníłtiʼ?
22 Ákohgo Sámuel éí Saul áádóó bá naalʼaʼí yił dah yidiiʼeezhgo wóneʼé yah ayííʼeezh; áadi ándaʼiikaah bá hazʼánígi yił daʼdooyı̨́ı̨́ł biniyé yił dah dineezbin.
23 Sámuel éí chʼiyáán ííłʼíní áyidííniid, Atsįʼ hashtʼeʼnidííkááł, nidííniid yę́ę nídiikaah; tádiin daatsʼí yiltʼéego nidahaaskai lá.
24 Áko chʼiyáán ííłʼíní éí ajáád tʼáá átʼé nízhdiiką́ągo Saul biyaa nizhníką́, áádóó Sámuel ádííniid, Shoo, kǫ́ǫ́ náʼánászįįdígíí niyaa niiką́ągo niyą́. Diné bee biʼníłniiʼdóó wóshdę́ę́ʼ ná hashtʼeʼsiką́ągo áajįʼ ahoolzhiizh. Éí bijı̨́ Saul éí Sámuel bił ajííyą́ą́ʼ.
25 Áádóó aláahgo yanáalkʼidę́ę́ʼ hadáájootʼáazhgo kin haalʼáhíjįʼ ajííʼáázh. Kin bighą́ąʼdi Sámuel éí Saul bił ahił nahodzisneʼ.
26 Ákohgo hayííłką́ągo Sámuel éí kin bighą́ą́ʼgóó Saul yíká ádííniid, Nídiidááh, níláhgóó nééʼdeeshnih. Ákohgo Saul nídiiʼnaʼ áádóó tʼáá ájíłah kin bitah chʼídaʼiiztiiníjįʼ chʼízhníʼáázh.
27 Áádóó kʼadę́ę kin haalʼáádóó chʼíjíkáahgo Sámuel éí Saul áyidííniid, Ninaalʼaʼí nihilą́ąjįʼ yínááł, bidiní, áádóó ákǫ́ǫ́ dah diiyáago ni éí tʼáá kweʼé tʼóó kónízahíjįʼ shibaʼ sínízı̨́į doo, áko Diyin God bizaad bee nił hodeeshnih.
