1 Thessalonians 1:1-10
1 Shí Paul áádóó Silvéínas índa Timothy, Thesalonáíkagi oodlání danilíinii áłah nádleehígíí, éí Diyin God aTaaʼ nilíinii áádóó Bóhólníihii Jesus Christ bííʼ danilíinii bichʼįʼ naaltsoos ádeiilnééh:*
Diyin God áádóó Bóhólníihii Jesus Christ bibee ajoobaʼ áádóó bibee achʼįʼ hózhǫ́ náhásdlı̨́įʼii yee nihikʼijidlíi doo.
Thesalonáíkagi daʼoodlání kéédahatʼínígíí bidaʼoodląʼ dabidziil áádóó yáʼátʼéehgo deíkááh
2 Tʼáá áłahjįʼ danihííníijíigo sodadiilzingo Diyin God bichʼįʼ tʼáá ánółtso nihaa ahééh daniidzin.
3 Niheʼoodląʼ binahjįʼ baa nidaahkaígíí áádóó ayóóʼóʼóʼní bee deínółníshígíí índa hadaʼíínółníigo nihiBóhólníihii Jesus Christ bee nihił chodahooʼínígíí nihiDiyin God nihiTaaʼ binááł tʼáá áłahjįʼ nihéédeiilniih.
4 Nihikʼisóó, Diyin God ayóóʼánihóʼníinii, Diyin God atah nihiizláaʼgo nihił béédahózin.
5 Háálá haneʼ yáʼátʼéehii bee nihił dahwiilneʼii doo tʼóó saad tʼéí átʼée da, nidi Níłchʼi Diyinii bibee adziilii bee nihidziilgo índa tsʼídá tʼáá aaníinii átʼéego baa ákodanoodzı̨́įʼgo bee nihił dahwiilneʼ. Nihá yáʼátʼééh biniyé nihitahgi bee nisiidzı̨́ı̨́ nítʼéeʼii nihił béédahózin.
6 Áko nihidaʼołʼı̨́ dasoolı̨́ı̨́ʼ, Bóhólníihii ałdóʼ bidaʼołʼı̨́ dasoolı̨́ı̨́ʼ, háálá łą́ą́dę́ę́ʼ nihichʼįʼ nidahwiiʼnáa nidi, Níłchʼi Diyinii bee nihił dahózhǫ́ǫgo saad nídadoolá.
7 Áko Masedóniyagi índa Akéya hoolyéegi oodlání danilíinii tʼáá ałtso bikééʼ deíkáahii dasoolı̨́ı̨́ʼ.
8 Háálá nihitsʼą́ą́dóó Bóhólníihii bizaad adahideezdláád, doo Masedóniyagi índa Akéya hoolyéegi tʼéiyá da, nidi Diyin God deinohdlą́ągo baa dadzíínóhłíhígíí tʼáá ałtsogóó baa dahóóneʼ. Áko nihí tʼáadoo bee hanáádaodziihí da.
9 Háálá nihí nihaa niikai yę́ędą́ą́ʼ tʼáá íiyisí nihichʼįʼ kʼé danohdzin nítʼéeʼii éí diné tʼáá ałtso yee nihaa nidahalneʼ, áádóó edaʼalyaii bitsʼą́ąjįʼ Diyin God bichʼįʼ ninánohkaigo Diyin God hináanii índa tʼáá aaníí nilíinii bá nidaałʼaʼgo yee nihaa nidahalneʼ.
10 Índa Diyin God biYeʼ daaztsą́ą́dę́ę́ʼ néidiisáii yáʼąąshdę́ę́ʼ nídoodáłígíí bibaʼ ádanohtʼéego ałdóʼ yee nihaa nidahalneʼ. Jó, Diyin God tʼóó báhádzidgo bibee atéʼélʼíinii yee atíʼdoolíiłgo bichʼįʼ hoolzhishígíí bitsʼą́ąjįʼ Jesus yisdánihiinííł.
Footnotes
^ Gríis kéyah náhokǫsjígo Masedóniya hoolyéedi kin haalʼá Thesalonáíka hoolyéé nítʼééʼ. Áadi Paul nahasneʼ. Act 17:1.
