1 Thessalonians 3:1-13
3 Áko tʼáá íiyisí nihídin daniidlı̨́įgo doo asoh dadeelʼįįdgóó, tʼáá Áthenzgi tʼáá sáhí neiitʼaash doogo bee lą́ daʼsiidlı̨́ı̨́ʼ,
2 áádóó nihitsilí Timothy, éí Christ baa haneʼ yáʼátʼéehii bee naʼnitin bee bił nideiilnishgo Diyin God yá naalʼaʼí nilíinii, chánah ánihidoolíiłgo, índa niheʼoodląʼ bidziilgo ádanihidoolííł biniyé nihichʼįʼ anáhwiilʼaʼ,
3 áko achʼįʼ nahwiiʼnáanii doo łaʼ bikʼee tʼą́ą́ʼ anáhidoohkah da. Achʼįʼ nahwiiʼná bichʼįʼ ninihiʼdeeʼnilgo nihił béédahózin.
4 Háálá tʼah nihitaiikai yę́ędą́ą́ʼ daʼoodlání atídabiʼdilʼı̨́į doogo tʼáá bítséedi bee nihił dahwiilneʼ, áko éí bohoolyaago nihił béédahoozin.
5 Áko níłchʼi bidaʼiiníziinii binanitʼaʼí nanihíneeztą́ąʼgo nihindashiilnishii tʼáá ádzaaí silı̨́ı̨́ʼ dóʼóshłí nisingo biniinaa tʼáá íiyisí shiʼdiiłʼáago niheʼoodląʼ shił bééhodoozįįł biniyé Timothy nihichʼįʼ ííłʼaʼ.
6 Kʼad nihitsʼą́ą́dę́ę́ʼ Timothy nihaa nádzáago, niheʼoodląʼ áádóó ayóóʼádaʼíínóhʼnínígíí yáʼátʼéehgo yee nihił náhoolneʼ, índa tʼáá áłahjįʼ yáʼátʼéehgo nihéédaałniihgo, nihídin daniidlı̨́įgo tʼáá kʼadę́ę nídanihiiltséhígi átʼéego nihí ałdóʼ nihídin danohłı̨́įgo kʼadę́ę nídanihoołtséehgo yee nihił náhoolneʼ.
7 Éí bąą nihikʼisóó, kodi nihí ląʼígóó nihichʼįʼ nidahwiiʼná índa atídanihiʼdilʼı̨́į nidi, niheʼoodląʼ bee chánah ánídanihoohdlaa,
8 háálá tʼahdii Bóhólníihii bee danihidziilgo nisoozínígíí bee tʼáá íiyisí chánah ánídanihoohdlaago tʼáá aaníí dahiniiʼná.
9 Dooládóʼ Diyin God bichʼįʼ nihaa ahééh daniidzin da! Tʼáá íiyisí ił hózhóonii bee nihiDiyin God binááł nihaa nihił dahózhǫ́.
10 Danihiidiiltsééł áádóó nihidaʼoodląʼ łahgo biʼoh áhádin ládą́ą́ʼ nihidaʼoodląʼ bidziilgo nihá ánídadiilnííł biniyé tʼáá yoołkááł bikʼeh haleebee bíká sodadiilzin.
11 NihiDiyin God nihiTaaʼ nilíinii tʼáá bí, áádóó nihiBóhólníihii Jesus Christ éí nihaa náádiikahígíí nihá bohónéedzą́ągo áyóleʼ!
12 Tʼáá ayóóʼádanihííníiʼnínígi átʼéego Bóhólníihii éí ayóóʼádaʼahíínóhʼníi dooígíí áádóó diné tʼáá ałtso ayóóʼádeínóhʼníi dooígíí tʼah yówehígo nooséełgo áyóleʼ.
13 Áko nihiBóhólníihii Jesus éí bidiyı̨́ı̨́ʼ danilíinii yił nákaigo nihiDiyin God nihiTaaʼ bidááhdóó daozįʼgo nihijéí dabidziilgo áádóó dadinohyingo tʼáadoo bee nihikʼídahótʼahígóó ánihidoolííł.
