1 Thessalonians 4:1-18
4 Áádóó nihikʼisóó, Bóhólníihii Jesus bee nidanihiniitingo nihiyadahoniidlįįhgo nídanihiikąąh, éí Diyin God bił dahonohshǫ́ǫgo dayínóhkáah dooleeł biniyé nihitsʼą́ą́dóó bídahoołʼą́ʼígi átʼéego dayínóhkáhígíí tʼah biláhídi yáʼátʼéehgo dayínóhkáah leʼ.
2 Háálá Bóhólníihii Jesus bee nihá dahwiilʼaʼii nihił béédahózin.
3 Diyin God nihá íinízingo diyingo ádanihidiʼdoolníiłgo naʼageh bee tsiʼnaʼadá bitsʼą́ąjįʼ ádaʼdíínółzin doo.
4 Índa diné danohłíinii, dadíínóhsingo asdzání baa dahonohsą́ągo nihedaʼasdzą́ą́ ádaahłeʼ,
5 doo Jew dineʼé danilíinii Diyin God doo yéédahósinii ádaatʼínígi átʼéego tʼóó ałdáhonooní tʼéí biniyé ádaahtʼı̨́įgo éí dooda.
6 Áko kweʼé nahaztʼiʼgi diné łaʼ bikʼis yaaʼdólééł lágo, háálá ákódaatʼíinii Bóhólníihii atíbidoolíłígíí tʼáá bítséedi hazhóʼó bee nihidaʼayeelniiʼ niʼ.
7 Diyin God éí baaʼihgo dahiniiʼnáa dooleełígíí doo yiniyé nihíká ádííniid da, nidi diyingo dahiniiʼnáa dooleeł biniyé nihíká ádííniid.
8 Éí bąą diné łaʼ díí naʼnitin doo jiniizı̨́ʼígíí éí diné doo jinízinii doo éí átʼée da, nidi Diyin God doo jiniizı̨́ı̨́ʼgóó átʼé. Jó, Diyin God tʼáá bí biNíłchʼi Diyinii nihaidiiʼaah.
9 Kʼad Christ bee nihikʼis danilíinii ayóóʼádeínóhʼníi doogi doo łaʼ bee nihichʼįʼ akʼeʼashchíi da, háálá ayóóʼádaʼahíínóhʼníi doogo Diyin God tʼáá íídą́ą́ʼ nanihineeztą́ą́ʼ.
10 Áko Masedóniyagi tʼáá átʼéé nítʼééʼ Christ yee nihikʼisóó danilíinii tʼáá ałtso ayóóʼádeínóhʼní. Nidi nihikʼisóó danohłíinii, tʼah náábíláhídi ádaahtʼı̨́į doogo baa nídanihiikąąh.
11 Tʼáá bee nidanihineetą́ąʼii bikʼehgo hashtʼehodítʼéego dahinohnáa dooígíí bídahoołʼaah, áádóó tʼáá nihí nihídadéétʼiʼii baa ádahołyą́, índa tʼáá nihí ákʼinidaałdzil doogi bidadoołkaal.
12 Áko doo daʼoodlání danilíinii binááł tʼáadoo nihindaʼadloʼí dahinohná, áádóó tʼáadoo bee nihichʼįʼ anáhóótʼiʼí da dooleeł.
Bóhólníihii náádoodááł
13 Nihikʼisóó danohłíinii, daneeznáanii éí tʼáá nihił béédahózin doo danihííníiʼní, áko łaʼ ił chohooʼı̨́ bee ádaadinii yínííł danilínígi átʼéego doo yínííł biih dínóohdah da.
14 Háálá Jesus daaztsáanii náádiidzáago deiniidlą́, áko Jesus biiʼ dahojílǫ́ǫgo daʼjiiłhaazhígíí* ałdóʼ Diyin God éí Jesus bił dah náhodidooʼish.
15 Díí Bóhólníihii bizaad bee ádanihidiiʼní, tʼah tʼáá kǫ́ǫ́ dahiniiʼnánígíí Bóhólníihii nádzáago daʼoodlání daneeznáanii tsʼídá doo tʼáá bítsé dah didiikah da.
16 Háálá Bóhólníihii tʼáá bí yáʼąąshdę́ę́ʼ hadahooleełgo ayóó íitsʼaʼgo hadoodzih, áádóó aláahgo diyingo naalʼaʼí biinééʼ índa Diyin God bidilní ayóó íitsʼaʼgo didootsʼı̨́ı̨́ł. Áko Christ dayoodlą́ągo daneeznáanii áłtsé náábidiʼdooljah,
17 áádóó índa nihokáaʼgi tʼah dahiniiʼnánígíí éí daʼoodlání náábiʼdiiljéeʼii bił wótʼááhgóó dah diikaigo kʼos biyiʼjįʼ Bóhólníihii bidááh diikah, áko índa hoolʼáágóó áádóó ahóyéelʼáágóó Bóhólníihii bił dahoniidlǫ́ǫ doo.
18 Éí bąą díí saad bee ahił dahołneʼgo bee hadaʼíínółní.
Footnotes
^ Jesus dayoodlą́ągo daneeznánígíí ááhyiłní.
