1 Timothy 1:1-20
1 Diyin God Yisdánihiiníiłii áádóó Bóhólníihii Jesus Christ bee nihił chodahooʼíinii yee hoołʼaʼgo shí Paul éí Jesus Christ yá yilʼaadii nishłı̨́.
2 Timothy,* oodlą́ bee tʼáá aaníí shiyeʼ nilíinii bichʼįʼ naaltsoos áshłééh:
Diyin God nihiTaaʼ índa Jesus Christ nihiBóhólníihii bibee ajoobaʼ áádóó bibee aa aʼááh hasinii índa bibee achʼįʼ hózhǫ́ náhásdlı̨́įʼii yee nikʼijidlíi doo.
Naʼnitin doo tʼáá aaníinii bitsʼąą ádaa áháyą́
3 Masedóniyagóó dah diishááh yę́ędą́ą́ʼ, Éfesasgi sínídáa doogo baa nániisiskan yę́ę tʼahdii tʼáá ákónidishníigo baa nánooshkąąh. Éfesasgi diné nidaʼnitinígíí łaʼ, Naʼnitin łahgo átʼéii tsʼídá tʼáadoo bee nidaʼnohtiní, bididííniił.
4 Índa, Haneʼ tʼóó ádaalyaii áádóó náás daʼahílchíihii doo ałtso baa hóneʼ ádaatʼéii* tʼáadoo baa nitsídaahkeesí, bidiníi doo, háálá saad bee naʼídíkidii tʼóó náás anooʼahii átʼé, áko Diyin God yee hooʼáałii oodlą́ bee nídidoolyéełgi doo náás ííléeh da.
5 Nidi díí biniyé naʼnítin, hajéí chin bąąh ádingo áádóó tʼáá ákogi ájítʼı̨́įgo bee ádaa ákoznidzingo índa tʼáá aaníí ajoodlą́ągo ayóóʼájóʼníi doo.
6 Łaʼ éí díí deisiihgo atsʼáhaaskai, áko biniinaa yátiʼ tʼáadoo nánídlíinii yee yádaałtiʼ.
7 Bee hazʼáanii Mózes baa deetʼáanii bee naʼnishtin doo, daznízin, nidi ááhdajiníinii índa bidziilgo bee yádajiłtiʼ dooleełígíí doo bikʼidazhʼdiitįįhgóó ádajiní.
8 Jó, bee hazʼáanii bikʼehgo chooʼı̨́įgo tʼáá éí bee hazʼáanii yáʼátʼéehii átʼéego nihił béédahózin.
9 Kótʼéego nihił béédahózin: diné tsʼídá tʼáá ákogi ááníiłii bee hazʼáanii doo bá ályaa da, nidi doo yikʼehgóó ádaaníiłii índa doo akʼeh dahółʼíinii bá ályaa, áádóó doo Diyin God kʼehgo ádaatʼéii índa bąąhági ádaaníiłii ałdóʼ bá ályaa, doo bił dahodiyinii índa Diyin God yee daʼódziihii, bizhéʼé índa bimá nideiłtseedii, diné nideiłtseedii bá ályaa,
10 naʼageh yee tsiʼnidaakaii, diné tʼóó baa yáhásingo tʼáá bí ahaa ninádaaldeehii, diné deiniʼįįhii, dabiyoochʼíidii, ádee hadahididziihgo tʼáá ádzaagóó nidahalneʼii, índa tʼáá ákogi átʼéego naʼnitinii yitsʼą́ą́jí danilíinii ałdóʼ bá ályaa.
11 Tʼáá ákogi átʼéego naʼnitinígíí éí Diyin God baa haʼniihii baa haneʼ yáʼátʼéehii ayóó átʼéii bikʼehgo átʼéii átʼé. Éí baa hashneʼ doogo shaʼahoosdlííʼ.
Diyin God yee aʼááh nízinii éí Paul yaa ahééh nízin
12 Christ Jesus nihiBóhólníihii bee adziil sheiníláii bichʼįʼ baa ahééh nisin, háálá shaa dzólíigo shaa nitsíkeesgo binaanish nilíinii yiniyé nishiníłtı̨́.
13 Tʼah doo ooshdląąh yę́ędą́ą́ʼ Jesus tʼóó baaʼihgo baa yááłtiʼ áádóó atííłʼįįd índa yéédzííʼ, nidi Diyin God shaa aʼááh niizı̨́ı̨́ʼ, háálá doo ooshdlą́ą́góó índa doo shił bééhózingóó íítʼįįd.
14 NihiBóhólníihii bibee ajoobaʼ, oodlą́ bee aʼódlí índa ayóóʼóʼóʼní Christ Jesus bee hólóonii bóltąʼgo shilááh néésʼąąd.
15 Diyin God bichʼįʼ diné ádił nidaʼiilzíihii Christ Jesus yisdábidiyoonił yiniyé nihokáaʼjįʼ níyá, haʼnínígíí éí tʼáá aaníí, áádóó tʼáá ádzíłtso doo hoł naaki nilı̨́ı̨́góó nízhdidooléełgo yą́ą́h nilı̨́. Jó, shí éí tsʼídá aláahgo Diyin God bichʼįʼ ádił niʼiilzíihii nishłı̨́.
16 Nidi díí biniyé Diyin God shaa aʼááh niizı̨́ı̨́ʼ, aláahgo bąąhági ááníiłii nishłı̨́į nidi, shinahjįʼ Jesus Christ nízaadgóó haʼólnínígíí ííshjání áyiilaa, áko dabiidoodląąłígíí éí bee béédahózin dooleełgo iiná doo ninítʼiʼii bee dahólǫ́ǫ dooleeł.
17 Doo nihonítʼiʼgóó hoogáałii biyiʼ Aláahgo Naatʼáanii, doo daatsaahii, doo yitʼíinii, tʼáá bí tʼéí Diyin God [hóyáanii], hoolʼáágóó ahóyéelʼáágóó ił nilı̨́į doo, índa baa haʼniih doo! Tʼáá ákótʼée doo.
18 Shiyeʼ Timothy, naʼííníshłíigo ánidishní, Tʼáá bítséedi bee naa hóóneʼii bikʼehgo yáʼátʼéehii yéego bichʼą́ą́h nanibaah.
19 Neʼoodląʼ bidziilgo índa tʼáá ákogi ánítʼı̨́įgo bee ádaa ákonínídzin doo. Éí łaʼ doo deiniizı̨́ı̨́ʼgóó tsinaaʼeeł neheestǫʼígíí nahalingo biʼoodląʼ dayííłchxǫʼ.
20 Éí bitahdóó Haimeníyas índa Alezáander Diyin God doo tʼóó baaʼihgo baa yájíłtiʼ daígíí bíhwiizhdoołʼááł biniyé Séítan bichʼįʼ hoʼníłniiʼ.
Footnotes
^ Timothy éí dinééh nilı̨́įgo Paul yił tádíʼaashgo yitsʼą́ą́dóó íhoołʼą́ą́ʼ. Acts 16:1.
^ Jew dineʼé dahataaʼ yę́ę náás daʼahílchíiłii áádóó ádáátʼįįdii naaltsoos bee siʼą́ągo éí bił danilı̨́ı̨́ nítʼééʼ.
