2 Chronicles 1:1-17
1 David biyeʼ Sálaman éí bee bóhólníhígíí tʼáá íiyisí bóhólníihgo ábiʼdiilyaa, áko haBóhólníihii Diyin God hoł hólǫ́ǫgo tʼáá íiyisí ayóó átʼéii jílı̨́įgo áhoolaa.
2 Ákohgo Sálaman éí Ízrel dineʼé tʼáá ałtso, siláo daamííl níjaaʼgo áádóó siláo neeznádiin níjaaʼgo yindanitʼaʼí áádóó ádahwéeʼaahiida índa Ízrel dineʼé tʼáá ałtso binanitʼaʼí danilíinii díidí azhéʼé aláahgo bídahólníhígíí yichʼįʼ haadzííʼ.
3 Áko Sálaman áádóó áłah ílínígíí tʼáá ałtso bił wókʼą́ądi Gíbiyan kin haalʼáadi jíkai, háálá Diyin God biníbaal biiʼ dahozdísinii áadi siʼą́; éí Bóhólníihii bá naalʼaʼí Mózes honoojíidi áyiilaa.
4 Nidi David éí Kírjath-jíyarimdę́ę́ʼ Diyin God bitsitsʼaaʼ dílzinii yá hashtʼehoolaaíjįʼ niiníʼą́, háálá Jerúsalem kin haalʼáagi níbaal niiníʼą́.
5 Nááʼáłdóʼ Her binálí Biizáliyel éí Yúrai biyeʼ nilíinii bikááʼ nááʼiiniihí béésh łitsoii yee áyiilaii, éí Bóhólníihii biníbaal biiʼ hodílzinii bichʼéédą́ąʼgi siʼą́. Áko Sálaman índa áłah ílínígíí bił ákǫ́ǫ́ jíkai.
6 Áko Sálaman dah diiyáago bikááʼ nááʼiiniihí béésh łitsoii bee ályaii siʼáníjįʼ Bóhólníihii binááł hajiyá; éí níbaal biiʼ dahozdísiniigi siʼą́; ákwii tʼááłáhídi míilgo didlidgo nááhániihii nááyiisniiʼ.
7 Tʼáá éí bitłʼééʼ Diyin God éí Sálaman yichʼįʼ yitʼíní íʼdiilyaago ííłní, Tʼáá shííníkeedígíí naa dideeshʼááł.
8 Áko Sálaman éí Diyin God ííłní, Shizhéʼé David yę́ę tʼáá íiyisí ayóó átʼéego baa aʼááh nínízingo bitsáskʼehgi nanishtʼáago áshiinilaa.
9 Bóhólníihii Diyin God nílíinii, shizhéʼé David yę́ę baa dííníʼą́ yę́ę éí kʼad bidziilgo ánílééh, háálá łaʼ dineʼé łeezh nahalingo ayóó ánéelą́ąʼgo éí aláahgo binanishtʼáago áshiinilaa.
10 Kʼad bee hódzą́ áádóó ił ééhózin shaa diníʼaahgo díí dineʼé binááł chʼínáshdááh áádóó yah anáshdáah doo. Háíyeeʼ díí nidineʼé tʼáadoo bee néelą́ʼígóó yílʼáhígíí yá nihodiyiiʼaah doo?
11 Áádóó Diyin God éí Sálaman ííłní, Díí nijéí biyiʼdi nitsíníkeesgo yódí, atʼı̨́, ił ídlı̨́, doodaiiʼ niʼanaʼí nidootsiłgida áádóó nízaadgóó hinínáa dooleełii tʼáadoo ádá yííníkeed da, nidi shidineʼé bá aláahgo naatʼáanii ániishłaaígíí bee bá nahóʼáa doo biniyé bee hódzą́ áádóó ił ééhózin ádá yííníkeed,
12 bee hódzą́ áádóó ił ééhózin éí naa deetʼą́, áko yódí áádóó atʼı̨́ índa ił ídlı̨́ naa dideeshʼááł; éí nítséedi aláahgo naatʼáanii danilı̨́ı̨́ nítʼééʼ yę́ę tʼáadoo łaʼ ákódaatʼéii bee dahazlı̨́įʼ da, doo nidi nikéédę́ę́ʼ náánáłaʼda ákódaatʼéii bee hodooleeł da.
13 Áko Sálaman éí Gíbiyan kin haalʼáadi wókʼą́ądi hazʼánídę́ę́ʼ áádóó níbaal biiʼ dahozdísinii siʼą́ą́dę́ę́ʼ dah nízdiidzáago Jerúsalem kin haalʼáajįʼ nídzídzáago Ízrel dineʼé binazhnitʼáá nítʼééʼ.
Sálaman éí łı̨́ı̨́ʼ áádóó tsinaabąąs bijáád naakiígíí nayiisʼniiʼ (1Kgs. 10:26-29; 2Chr. 9:25-28)
14 Áádóó Sálaman éí tsindaabąąs bijáád naakiígíí áádóó łı̨́ı̨́ʼ yee nidaabaahii áłah áyiilaa, áko tʼááłáhídi mííldóó baʼaan dı̨́įdi neeznádiingo tsindaabąąs bijáád naakiígíí áádóó naakitsʼáadahdi miilgo łı̨́ı̨́ʼ yee nidaabaahii, díí éí bá hashtʼedahodítʼéego kin hadaasʼáágóó niyiiznil, áádóó Jerúsalemgi aláahgo naatʼáanii binaashiigóó łaʼ niinínil.
15 Áádóó aláahgo naatʼáanii tsé yílʼáhígíigi átʼéego Jerúsalem kin haalʼáagi béésh łigaii índa óola bee ádaʼazįįdgo áádóó honítsʼaaʼgi síkamor naazkaadii yílʼáhígíigi átʼéego dilkʼis bee ádaʼazįįdgo áyiilaa.
16 Áko Sálaman éí łı̨́ı̨́ʼ baa neelkaadígíí éí Ííjip kéyahdę́ę́ʼ áádóó Kwéi hoolyéédę́ę́ʼ shóoztʼeʼ; aláahgo naatʼáanii bá nidaʼiiłniihígíí Kwéi* hoolyéédę́ę́ʼ łı̨́ı̨́ʼ nideiniiłkaadígíí tʼáá bą́ą́h daʼílínígíí bíighahgo nídayíísʼniiʼ.
17 Áádóó Ííjip kéyahdę́ę́ʼ tsinaabąąs bijáád naakiígíí nidahaazniiʼígíí éí tʼááłáʼí níʼánígo hastą́ądi neeznádiin béésh łigaii shékel wolyéii bą́ą́h nidaʼiizlı̨́ı̨́ʼ áádóó łı̨́ı̨́ʼ ałdóʼ tʼááłáʼí nítínígo tʼááłáhídi neeznádiindóó baʼaan ashdladiin bą́ą́h nidaʼiizlı̨́ı̨́ʼ; kótʼéego Het dineʼé aláahgo binanitʼaʼí danilíinii índa Síriya dineʼé aláahgo binanitʼaʼí danilíinii tʼáá ałtso yichʼįʼ nináádayiisʼniiʼ.
Footnotes
^ Kwéi éí Ízrel kéyahdóó náhookǫsjígo kéyah biiʼ hazʼánígi áhoolyé. Naʼatʼą́hí łigaii ditsʼidígíí doo ááhyiłníi da. Deut. 17:16.
