2 Chronicles 10:1-19
10 Riihobówam éí Shííkem kin haalʼáágóó ííyá, háálá Shííkemgi Ízrel dineʼé éí aláahgo naatʼáanii ádahodoolííł biniyé tʼáá átʼé neheeskai.
2 Áko Nííbat biyeʼ Jerobówam éí tʼah Ííjip kéyahdi kééhojitʼı̨́įgo díí jííniiʼ, áko Ííjipdę́ę́ʼ nídzídzá; jó, Sálaman bitsʼąą Ííjipgóó yóóʼajoolwod nítʼééʼ.
3 Háká adaʼasʼaʼgo hágo dahodííniid, áko Jerobówam áádóó Ízrel dineʼé tʼáá ałtso áłah nilínígíí yíkaigo Riihobówam yichʼįʼ hadaasdzíiʼgo ádaaní,
4 Nizhéʼé yę́ę nihiyéél nidaazgo áyósin nítʼééʼ; éí bąą kʼad, nizhéʼé yę́ę bikʼee tiʼdahwiiʼníihgo bá nidasiilʼaʼígíí áádóó hééł nidaazgo nihá áyósin nítʼééʼ yę́ę ászólígo nihá áníléehgo ná nideiilʼaʼ dooleeł.
5 Áko áyidííniid, Tááʼ yiską́ągo shaa nínáádoohkah. Áko diné anídahaaskai.
6 Áko aláahgo naatʼáanii Riihobówam éí hastóí kótʼé daaníinii, éí hazhéʼé Sálaman yę́ę tʼah hiná yę́ędą́ą́ʼ yidááhdóó naazı̨́ı̨́ nítʼéʼígíí bił baa nídadzistʼįįdgo ájíní, Haash yitʼéego díí diné bichʼįʼ tʼą́ą́ʼ háádeesdzihgo bee bił nídahodeeshnihígíí bee shił dahołneʼ?
7 Áádóó hachʼįʼ hadaasdzíiʼgo ádaaní, Díí dineʼé bichʼįʼ náʼáhwiinítʼı̨́ʼígo áádóó bił dahoníshǫ́ǫgo índa saad yáʼádaatʼéehii bee bichʼįʼ hahídziih ládą́ą́ʼ ná nidaalʼaʼí danilı̨́įgo ahoolʼáa doo.
8 Áko hastóí danilíinii hachʼįʼ kótʼé daaníigo hąąh nideizláhígíí doo bázniizı̨́įʼ da, nidi dinééh danilíinii bił dazhneeyáanii bił nabikʼíyádajiłtiʼgo hadááhdóó naazı̨́ı̨́ nítʼééʼ.
9 Áko ábijiní, Haash yitʼéego nabikʼíyádasoołtiʼii bee díí diné bichʼįʼ bee háádadiidzih? Éí shichʼįʼ hadaasdzíiʼgo ádashidííniid, Nizhéʼé yę́ę nihiyéél nidaazgo áyósin nítʼééʼ yę́ę ászólígo nihá ánílééh.
10 Áko dinééh hoł daneeyánígíí hachʼįʼ hadaasdzíiʼgo ádahałní, Díí dineʼé nichʼįʼ hadaasdzíʼígíí kótʼéego bichʼįʼ hadíídzihgo kódidííniił, Éí nizhéʼé yę́ę nihiyéél nidaazgo áyósin nítʼééʼ yę́ę ászólígo nihá ánílééh, daniłnínígíí kóbididííniił, Shíláyázhí éí shizhéʼé yę́ę binííʼ áníłtsááz yę́ę biláahgo áníldíil doo.
11 Índa shizhéʼé yę́ę nihiyéél nidaazgo nihá áyósin nítʼééʼ yę́ę tʼah biláhígi átʼéego nihiyéél nidaazgo nihá ádeeshłííł; shizhéʼé yę́ę éí bee atsxis yee atínihiłʼı̨́ı̨́ nítʼééʼ, nidi shí éí séígoʼ adishish nahalingo shibee atsxis bee atínihishʼı̨́į doo.
12 Ákohgo aláahgo naatʼáanii, Tááʼ yiską́ągo shaa nídoohkah, hałníigo há nihoníʼáanii bikʼehgo tááʼ yiską́ągo Jerobówam áádóó dineʼé tʼáá ałtso Riihobówam yaa haaskai.
13 Áko aláahgo naatʼáanii tʼáá naʼníleʼdii diné bichʼįʼ hadziisdzííʼ; jó, aláahgo naatʼáanii Riihobówam éí hastóí kótʼé dabiłníí nítʼéʼígíí doo yiniizı̨́įʼ da.
14 Dinééh danilíinii kótʼéego dahałnínígíí bee bichʼįʼ hadzoodzíiʼgo ájíní, Shizhéʼé yę́ę nihiyéél nidaazgo áyósin nítʼééʼ, nidi shí éí tʼah biláhígi átʼéego nihiyéél nidaazgo ádeeshłííł; shizhéʼé yę́ę ałdóʼ bee atsxis yee atínihiłʼı̨́ı̨́ nítʼééʼ, nidi shí éí séígoʼ adishish nahalingo bee atsxis bee atínihishʼı̨́į dooleeł.
15 Ákohgo aláahgo naatʼáanii éí dineʼé doo yiyíistsʼą́ąʼ da; jó, Diyin God bitsʼą́ą́dóó ádzaa, áko Bóhólníihii tʼáá bí bizaad éí Sháíloh hazʼánídóó diné nilíinii Aháíjah binahjįʼ Nííbat biyeʼ Jerobówam yichʼįʼ yee hahaasdzíiʼii bikʼeh áhodoonííł.
16 Áko Ízrel dineʼé tʼáá ałtso éí aláahgo naatʼáanii doo hwíistsʼą́ą́ʼgóó baa ákodazniizı̨́įʼgo diné éí aláahgo naatʼáanii ánáádeidooʼniidgo ádaaní, David yę́ę bitsʼą́ą́dóó haʼátʼíísh nihee dahólǫ́? Jésii biyeʼ bitsʼą́ą́dóó ííʼ dooleełii doo łaʼ nihee hólǫ́ǫ da. Ízrel dineʼé danohłíinii, danihiníbaalgóó nídadohkááh. David dineʼé danohłíinii, nihaʼáłchíní náás ahoolchíiłii baa ádahołyą́. Ákohgo Ízrel dineʼé dabiníbaalgóó anídahaaskai.
17 Nidi Ízrel dineʼé éí Júdah kin hadaasʼáagi kéédahatʼínígíí Riihobówam honantʼáá nítʼééʼ.
18 Ákohgo aláahgo naatʼáanii Riihobówam éí Adóram wolyéii naanish bíʼnílchééh yinanitʼaʼí nilíinii ayííłʼaʼgo Ízrel dineʼé tʼáá ałtso tsé yee nídahoneesneʼgo hoł nidadzisneʼ, nidi aláahgo naatʼáanii Riihobówam bitsinaabąąs bijáád naakiígíí tsxı̨́įłgo yiih yíyáago Jerúsalem kin haalʼáágóó anííchą́ą́ʼ.
19 Áádóó Ízrel dineʼé éí David yę́ę baʼáłchíní náás ahoolchíiłii yichʼįʼ nidaalteehgo díí jı̨́ı̨́góó ákótʼé.
