2 Chronicles 11:1-23
11 Riihobówam éí Jerúsalem kin haalʼáajįʼ níyáago Ízrel dineʼé yikʼiidoojahgo áádóó Riihobówam bee bóhólnííh yę́ę bííʼ nídoodleeł biniyé Júdah dineʼé éí Bénjamin dineʼé yił áłah áyiilaago, éí bitahdóó tʼááłáhídi neeznádiindóó baʼaan tseebídiindi mííl diné nidaabaah yéédahósinii yitaa yiizlááʼ.
2 Nidi Diyin God éí bá halneʼii Shemáíyah wolyéii yichʼįʼ haadzíiʼgo ání,
3 Júdah kéyahgi Sálaman biyeʼ aláahgo naatʼáanii Riihobówam áádóó Júdah dineʼé índa Bénjamin dineʼé tʼáá ałtso áádóó Ízrel dineʼé bichʼįʼ hadíídzihgo kóbididííniił,
4 Bóhólníihii kóní, Doo chʼídoohkah da, doodaiiʼ nihikʼisóó doo bikʼiidoohjah da. Diné tʼááłáʼí nootínígo danihighangóó nídadohkááh, háálá díí shí ádíshnínígíí átʼé. Áko Bóhólníihii bikʼeh dahojííłʼįįdgo tʼą́ą́ʼ aníjookaigo tʼáadoo Jerobówam bikʼi jiijéeʼ da.
Riihobówam náás adideesdéél
5 Riihobówam éí Jerúsalemgi kééhatʼı̨́ áádóó Júdah kéyahgi kin hadaasʼáago bineʼ adziihii biniyé ádayiilaa:
6 éí Béthlehem, Íítam, Tekówa,
7 Béth-zer, Sóko, Adálam,
8 Gath, Maríísha, Zif,
9 Adóreim, Léíkish, Azííkah,
10 Zórah, Éíjalan índa Hííbran éí Júdah kéyahgi áádóó Bénjamin kéyahgi kin hadaasʼáago éí ditą́ągo binaa ahéédaʼastłʼingo ádayiilaa.
11 Áko éí kin hadaasʼáii bidziilgo ádayiilaago chʼiyáán áádóó akʼah índa wáin biiʼ nooh nídaʼachíhígíí éí ádayiilaago ákǫ́ǫ́ siláo binanitʼaʼí bídahólníihgo niinínil.
12 Áádóó kin hadaasʼáágóó tʼáá átʼé naagé índa tsiidétáán nidayiiznilgo Júdah dineʼé áádóó Bénjamin dineʼé bichʼijí niinínilgo ayóo bidziilgo áhoolaa.
13 Áko náádaʼiiłniihii áádóó Líívai dineʼé éí Ízrel dineʼé tʼáá ałtso bitahdę́ę́ʼ tʼáá kéédahatʼı̨́ı̨́dę́ę́ʼ Riihobówam yaa haaskai.
14 Líívai dineʼé bikéyah dahootso índa dabighan yitsʼą́ą́ʼ dah diikaigo Júdah kéyahgi áádóó Jerúsalem kin haalʼáagi nidahaazná, háálá Jerobówam índa biyeʼké yił éí Bóhólníihii bichʼįʼ náádaʼjiiłniihgo nidajilʼaʼígíí nahgóó ahwiistłʼííd.
15 Áko ninádahałaah doo biniyé wódah nahazʼą́ągo ádaalyaaígi náádaʼiiłniihii niinínilgo níłchʼi bidaʼiiníziinii áádóó béégashii yáázh beʼelyaii áyiilaii yaa yisįįd.
16 Áádóó bikʼijįʼ Ízrel dineʼé tʼáá ałtso bitahdę́ę́ʼ hajéí bee Ízrel biDiyin God Bóhólníihii hádajitʼínígíí dahazhéʼé yę́ę biBóhólníihii Diyin God bichʼįʼ náádazhdiʼyoołnih biniyé Jerúsalemjįʼ nijiiskai.
17 Áko Júdah dineʼé éí bee óhólníihii bidziilgo ádayiilaa, áádóó tááʼ nááhaijįʼ Sálaman yę́ę biyeʼ Riihobówam bidziilgo ádayósin nítʼééʼ, háálá David áádóó Sálaman níʼázhígi átʼéego deíkáahgo tááʼ nááhai.
18 Áádóó Riihobówam éí David yę́ę biyeʼ Jériimath bitsiʼ Méíhalath áádóó Jésii yę́ę biyeʼ Iiláíyab bitsiʼ Ábiheil tʼáá áłah beʼasdzą́ą́ áyiilaa.
19 Éí hayeʼké há niyiishchı̨́: éí Jííʼash áádóó Shemaráíyah índa Zéíham daolyé.
20 Áádóó bikéédę́ę́ʼ éí Ábsalam bitsiʼ Méíyakah yá nááʼásgeh; éí Abáíjah áádóó Áteiyai áádóó Záíza índa Shelómith há niyiishchı̨́.
21 Nítʼééʼ Riihobówam bidaʼasdzą́ą́ áádóó bidaʼasdzą́ą́ yíłʼíní tʼáá ałtso éí biláahgo Méíyakah tʼáá íiyisí ayóóʼáyóʼní, háálá tseebíítsʼáadah beʼasdzą́ą́ áádóó beʼasdzą́ą́ yíłʼíní éí hastą́diin índa naadiin tseebíí biyeʼké áádóó bitsiʼké hastą́diin bá neheezhchı̨́.
22 Áko Riihobówam éí Méíyakah biyáázh Abáíjah dabikʼis bitahdóó yilą́ąjįʼ naatʼáanii nilı̨́įgo áyiilaa, háálá éí aláahgo naatʼáanii ádeeshłííł nízin nítʼééʼ.
23 Áádóó Riihobówam éí yaa hóyą́ągo Júdah kéyahgi áádóó Bénjamin kéyahgi kin hadaasʼáii ditą́ągo binídaʼastłʼingóó tʼáá ałtso biyeʼké łaʼ ákǫ́ǫ́ niyiiznil. Áko chʼiyáán tʼóó ahayóigo yeidiyiiʼaah nítʼééʼ, áádóó beʼasdzą́ą́ dadooleełii ląʼí yá hátʼı̨́ı̨́ nítʼééʼ.
