2 Chronicles 12:1-16
12 Áádóó ákódzaago Riihobówam bibee óhólnííh bidziilgo áyiilaa índa bidziilgo íʼdiilyaago Bóhólníihii bibee hazʼáanii yóóʼiidííʼą́ągo Ízrel dineʼé tʼáá ałtso yił ákódáátʼįįd.
2 Nítʼééʼ Riihobówam aláahgo naatʼáanii nilı̨́įgo ashdlaʼ náhááh góneʼ Bóhólníihii bichʼįʼ nidaʼjiisíihgo biniinaa Ííjip dineʼé aláahgo binanitʼaʼí Sháíshak éí Jerúsalem yichʼįʼ nídiibaaʼ.
3 Áko tʼááłáhídi mííldóó baʼaan naakidi neeznádiin tsindaabąąs bijáád naakiígíí áádóó łı̨́ı̨́ʼ yee nidaabaahii hastą́diindi míilgo índa diné doo jóołtaʼ ánéelą́ąʼ da éí Lúbim dineʼé áádóó Sákaiyim dineʼé índa Iithiyópiya dineʼé danilíinii Ííjip kéyahdę́ę́ʼ yił níná.
4 Áádóó Júdah kéyahgi kin hadaasʼá ditą́ągo binaa ahéédaʼastłʼinígíí yisnáago Jerúsalem kin haalʼáajįʼ níná.
5 Ákohgo Diyin God yá halneʼii Shiiméíyah éí Riihobówam áádóó Júdah dineʼé binanitʼaʼí danilíinii Sháíshak biniinaa Jerúsalemgi ahííkaígíí yaa níyáago ííłní, Bóhólníihii kóní, Yóóʼadashidooʼą́ągo bąą shí ałdóʼ nihitsʼą́ą́ʼ dah diiyáago Sháíshak baa nihidiníʼą́.
6 Áko Ízrel dineʼé binanitʼaʼí danilíinii áádóó aláahgo naatʼáanii aʼohgo ádaʼdiilyaa áádóó ádadííniid, Bóhólníihii tʼáá ákogi átʼéii nilı̨́.
7 Áko Bóhólníihii éí aʼohgo ádazhdiilyaaígíí yiyiiłtsą́ągo Bóhólníihii bizaad yee Shiiméíyah yichʼįʼ haadzííʼ; tʼáá bí aʼohgo ádaʼdiilyaa; éí bąą doo áhodeeshdįįł da, nidi yee dadoodzihii baa dideeshʼááł áádóó Sháíshak binahjįʼ hashké nísdzinígíí doo Jerúsalem bikʼi yeideeshxéeł da.
8 Ákótʼée nidi Sháíshak bá naalʼaʼí dajílı̨́į doo, áko shí naʼashʼaʼígíí áádóó kéyahgóó bee ídahólníihii éí nidaʼałʼaʼígíí hoł béédahodoozįįł.
9 Áko Ííjip dineʼé aláahgo binanitʼaʼí Sháíshak éí Jerúsalem kin haalʼáii yaatįįh heedzáago yisnáago Bóhólníihii bikin biiʼ sohodizindóó índa aláahgo naatʼáanii bikindóó yódí daʼílíinii ałtso néidiinil, índa Sálaman éí óola bee naagé ádayiilaii ałdóʼ tʼáá átʼé ayííjaaʼ.
10 Áádóó aláahgo naatʼáanii Riihobówam éí naagé bitsáskʼehgi béésh łitsoii bee naagé ádayiilaa, áádóó siláo aląąjįʼ binanitʼaʼí éí aláahgo naatʼáanii bighan chʼéʼétiingi yaa ádahalyánígíí yeinínil.
11 Áko aláahgo naatʼáanii éí Bóhólníihii bikin biiʼ sohodizin góneʼ yah anádáahgo, aa ádahalyánígíí éí naagé nínádeidiiʼnił, áádóó bighan góneʼ ninádeiʼnił.
12 Áádóó aláahgo naatʼáanii aʼohgo íʼdiilyaago Bóhólníihii hashké niidzı̨́įʼii łahgo ánáyiidlaago tʼáadoo ałtso áhásdįįd da, áádóó Júdah kéyahgi ałdóʼ yáʼádahootʼééh nídahasdlı̨́ı̨́ʼ.
13 Ákohgo aláahgo naatʼáanii Riihobówam bidziilgo íʼdiilyaago Jerúsalem kin haalʼáagi nantʼáá nítʼééʼ. Dízdiindóó baʼaan tʼááłáʼí binááhaigo nantʼá silı̨́ı̨́ʼ áádóó Ízrel dineʼé tʼáá ałtso bitahdóó Jerúsalem kin haalʼáhígíí éí Bóhólníihii náhodiiʼánígíí bízhiʼ bee wójíi dooleełígi tsostsʼidtsʼáadah nááhaijįʼ nantʼáá nítʼééʼ. Bimá éí Áman dineʼé łaʼ nilı̨́įgo Néíyamah wolyéé nítʼééʼ.
14 Áádóó doo yáʼádaashóonii yaa naayá, háálá Bóhólníihii hátʼı̨́į dooleełígíí doo yee hashtʼeʼnitsíníkéez da.
15 Áko Riihobówam łahjįʼ yaa naayáii átséhígíí áádóó akéeʼdiígíí éí Diyin God yá halneʼii Shiiméíyah índa á ooʼı̨́ nilíinii Ído éí ałkééʼ oochííł bikʼehgo binaaltsoos bikʼinídaháasdzo. Riihobówam áádóó Jerobówam tʼáá áłahjįʼ yił anaaʼ hółǫ́ǫ́ nítʼééʼ.
16 Riihobówam dabizhéʼé yę́ę daʼiiłhaazhígi átʼéego iʼííłhaazhgo David yę́ę bikin haalʼáagi yóóʼábiʼdiilyaa, áádóó biyeʼ Abáíjah bitsáskʼehgi nantʼáá nítʼééʼ.
