2 Chronicles 13:1-22
13 Áko kʼad, Jerobówam aláahgo naatʼáanii nilı̨́įgo tseebíítsʼáadah náhááh góneʼ Abáíjah éí Júdah dineʼé yinanitʼaʼí silı̨́ı̨́ʼ.
2 Tááʼ nááhaijįʼ Jerúsalem kin haalʼáagi aláahgo naatʼáanii nilı̨́ı̨́ nítʼééʼ. Bimá éí Méíyakah wolyé; éí Gíbiyahdóó diné Yúriyel bitsiʼ.
Áko Abáíjah áádóó Jerobówam ałchʼįʼ anaaʼ hółǫ́ǫ́ nítʼééʼ.
3 Áko Abáíjah éí siláo ayóo nidaabaahígíí dı̨́įdi neeznádiindi míilgo néidiinilgo anaaʼ biniyé yichʼįʼ niʼahíʼnil. Jerobówam ałdóʼ siláo baa dahodzódlíii tseebíidi neeznádiindi míilgo néidiinilgo hachʼįʼ anaaʼ biniyé ałkééʼ niinínil.
4 Áádóó Íífreiyim dineʼé bikéyahdi deílkʼidígi éí Dził Zemaréíyim bighą́ą́ʼdóó Abáíjah dah yiizįʼgo ání, Jerobówam áádóó Ízrel dineʼé tʼáá ánółtso, dashíínółtsʼą́ą́ʼ.
5 Ízrel biBóhólníihii Diyin God éí David yę́ę áádóó biyeʼké tʼáá bił áshįįh* bee ahaʼdeetʼą́ągo Ízrel dineʼé bee óhólnííh hoolʼáágóó baa deetʼáanii nihił béédahózin.
6 Nítʼééʼ David yę́ę biyeʼ Sálaman yę́ę bá naalʼaʼí Nííbat biyeʼ Jerobówam nídiidzáago binanitʼaʼí yichʼįʼ naalteeh.
7 Áádóó bikʼijįʼ diné doo yáʼádaashóonii ahíikaigo baa yíkai; éí Sálaman yę́ę biyeʼ Riihobówam honiyé bidziilgo ídaʼdiilyaa; íídą́ą́ʼ Riihobówam tʼah ániid naagháago ádíkástiʼgo doo bohoníłdzil da nítʼééʼ.
8 Áko nihí tʼáá íiyisí tʼóó ahonohyóí índa Jerobówam éí óola bee dóola yáázh naakigo áyiilaago nihidiyin biniyé nihee hólǫ́ǫgo biniinaa kʼad David yę́ę biyeʼké éí Bóhólníihii bibee óhólnííh yeidiníʼánígíí bídadíníilʼąął danohsin.
9 Bóhólníihii yá náádaʼiiłniihii Éran áádóó Líívai dineʼé biyeʼké náás daʼahílchíiłii daʼ éísh doo nihił adaaníi da? Áko nílááhgóó kédaayahgóó ałʼąą dineʼé ádaatʼínígi átʼéego náádaʼiiłniihii ádá nidahisoonil. Áko tʼáá háiida éí dóola yázhí índa deenástsʼaaʼ tsostsʼidgo bee dílzin ádílnéehgo éí kʼehgo diyin dabidiʼníinii binááʼiiłniihii danilı̨́įgo ádaahłééh.
10 Nidi nihí éiyá Bóhólníihii nihiDiyin God nilı̨́, áádóó doo yóóʼadadiitʼą́ą da, índa nááʼiiłniihii danilínígíí Bóhólníihii yá nidaalʼaʼ; éí Éran biyeʼké danilı̨́ áádóó Líívai dineʼé éí nidaalʼaʼgi bindaanish.
11 Áádóó tʼáá ákwíí bíní áádóó eʼeʼáahgo Bóhólníihii bichʼįʼ didlidgo nááhániihii índa tsin bijeeh dilidgo łikání halchinii nínáádayiiłnih, áádóó Diyin God bichʼįʼ bááh nááhániihii ałdóʼ éí bikáá adání chin bąąh ádinii yikááʼ ninádeiʼnił índa bee dahoolʼiní bá yadaʼiiʼáhígíí éí bee dahoolʼiní tʼáá bił óola bee ályaaígíí akʼah bił eʼeʼáahgo dadiltłiʼ biniyé hashtʼéédayiilʼįįh, háálá nihí éí Bóhólníihii nihiDiyin God yichʼįʼ nihííłʼaadígíí bikʼeh dahoniilʼı̨́, nidi nihí éí yóóʼadahosidooʼą́.
12 Áádóó jó, Diyin God éí tʼáá bí nihinanitʼaʼí nilı̨́įgo nihił hólǫ́, áádóó bináádaʼiiłniihii éí béésh dilní bee íʼdílzoołí nihichʼįʼ deididoołtsʼı̨́įłgo yee nihidaʼdoołnih. Ízrel dineʼé nohłíinii, danihizhéʼé yę́ę biDiyin God Bóhólníihii tʼáadoo bikʼijįʼ danohłíní, háálá doo łaʼdadoohłíił da.
13 Nidi Jerobówam bisiláo łaʼ haneʼdę́ęʼgo haa héeshjéeʼgo áyiilaa; łaʼ éí Júdah dineʼé bidááhdę́ęʼgo yaa héeshjééʼ, áádóó łaʼ yineʼdę́ęʼgo yaa héeshjééʼ.
14 Áko Júdah dineʼé tʼą́ą́ʼ nídadéétʼı̨́ı̨́ʼ nítʼééʼ, jó, hadááhdę́ę́ʼ índa haneʼdę́ę́ʼ hweʼanaʼí yílʼá, áko Bóhólníihii bichʼįʼ hadazhdeeshghaazhgo náádaʼiiłniihii béésh dilní bee íʼdílzoołí yee ádadííniid.
15 Ákohgo Júdah dineʼé hadadeeshghaazh, áko dazhdilwoshgo, Diyin God éí Abáíjah áádóó Júdah dineʼé binááł Jerobówam áádóó Ízrel dineʼé tʼáá ałtso atíyiilaa.
16 Áádóó Júdah dineʼé yikʼee Ízrel dineʼé dadínéezhchą́ą́ʼ, áko Diyin God éí Júdah dineʼé yaa hodiníʼą́.
17 Áádóó Abáíjah bidineʼé yił éí siláo tʼóó ahayóí nideistseed, áko ashdladi neeznádiindi mííl Ízrel bisiláo náhaasdláaʼii naaztseed.
18 Íídą́ą́ʼ kótʼéego Ízrel dineʼé hakʼeh dahodeesdlı̨́ı̨́ʼ, índa Júdah dineʼé éí dahoneesná, háálá éí tʼéiyá dabizhéʼé yę́ę biDiyin God Bóhólníihii yaa dadzólíí nítʼééʼ.
19 Áko Abáíjah éí Jerobówam yinoołchéełgo, áko kin hadaasʼáii éí Béthel áádóó Jiishéínah índa Íífrayin, kin dah naazhjaaʼígíí tʼáá daabił yighaideetʼą́.
20 Abáíjah bíyoołkááł yę́ędą́ą́ʼ Jerobówam éí tʼáadoo bidziil násdlı̨́įʼ da. Áádóó Bóhólníihii atíhoolaago dadziztsą́.
21 Nidi Abáíjah éí ayóó átʼé silı̨́ı̨́ʼ. Baʼákéí éí dı̨́ı̨́ʼtsʼáadah shóyoostʼeʼ, áko biyeʼké éí naadiin naaki áádóó bitsiʼké éí hastą́ʼáadah nítʼééʼ.
22 Áádóó Abáíjah łahjįʼ ádzaaígíí áádóó átʼé nítʼéʼígíí índa hahaasdzíiʼii éí Diyin God yá halneʼii Ído baa haneʼ bikʼinídaháasdzoh.
Footnotes
^ Áshįįh choʼı̨́įgo éí ahaʼdeetʼáanii hoolʼáágóó biʼjiłʼı̨́ jiníigo óolyé.
