2 Chronicles 14:1-15
14 Áko Abáíjah éí dahazhéʼé yę́ę daʼiiłhaazhígi átʼéego ajiiłhaazhgo David yę́ę bikin haalʼáhígi yóóʼáhoʼdiilyaa, áádóó hayeʼ Éísa hatsáskʼehgi aláahgo nantʼá silı̨́ı̨́ʼ. Áko bíyoołkááł yę́ędą́ą́ʼ kéyahgi hodéezyéelgo neeznáá nááhai.
2 Áádóó Éísa biDiyin God Bóhólníihii binááł yáʼádaatʼéehii índa tʼáá ákogi átʼéii yaa naagháá nítʼééʼ.
3 Áko diyin dabidiʼníinii łahgo ádaatʼéii bidaʼalyaii bibikááʼ náádaʼiiniihí índa ninádahałaah doo biniyé wódah nahazʼą́ągo ádaalyaaígíí nahjįʼ kóyiilaa áádóó edaʼalyaii niyiiztiʼ índa asdzání bidaʼalyaii naazínígíí niyiiztséél.
4 Áádóó Júdah dineʼé yichʼįʼ haadzíiʼgo ííłní, Danihizhéʼé yę́ę biDiyin God Bóhólníihii hádaahtʼı̨́ áádóó bibee hazʼáanii índa bibikʼeh óʼooʼníiłii bikʼeh ádanohtʼé.
5 Nááʼáłdóʼ Júdah kéyahgi kin hadaasʼáádóó tʼáá átʼé edaʼalyaii índa ninádahałaah doo biniyé wódah nahazʼą́ągo ádaalyaaígíí nahjįʼ kóyiilaa, áádóó aláahgo bee óhólníihgo bił hazʼą́ągi hoł hodéezyéelgo hooʼaʼ.
6 Áádóó Júdah kéyahgi kin hadaasʼá ditą́ągo binaa ahéédaʼastłʼingo ádayiilaa, háálá kéyahgi háádajilyı̨́ı̨́h nítʼééʼ; éí deíháhígíí biyiʼ doo anaaʼ hólǫ́ǫ da nítʼééʼ; jó, Bóhólníihii háázhdooyįhgo haidiníʼą́.
7 Éí bąą Júdah dineʼé áyidííniid, Kéyah tʼah kǫ́ǫ́ hólónídą́ą́ʼ, haaʼíshąʼ kin hadaasʼáii éí ditą́ągo binaagóó ahéédaʼastłʼinii áádóó yadaʼiitłʼinii áádóó dáńʼdadilkałii índa bichʼą́ą́h dah nídaʼatı̨́įhii bee hólǫ́ǫgo ádadiilnííł, háálá Bóhólníihii nihiDiyin God hádeiitʼı̨́įgo tʼáá ałtsojįʼ hááʼdooyįh nihaidiníʼą́. Kótʼéego dahasbįʼ áádóó náás dadiʼyeesdéél.
8 Áko Éísa éí Júdah dineʼé bisiláo táadi neeznádiindi míilgo bee hólǫ́; éí naagé áádóó tsiidétáán nideijaah, áádóó Bénjamin dineʼé naakidi neeznádiindóó baʼaan tseebídiindi míilgo siláo éí naagé índa kʼaaʼ nideijaah, áko díí tʼáá ałtso diné dahayóii danilı̨́.
9 Iithiyópiya dineʼé Zíírah wolyéii éí tʼááłáhídi mííltsoh siláo áádóó táadi neeznádiingo tsindaabąąs bijáád naakiígíí yee hachʼįʼ nídiibaaʼgo Marííshahjįʼ níná.
10 Ákohgo Éísa ákǫ́ǫ́ yichʼįʼ chʼíníná, áko Marííshahgi Zéfathah honítsʼaaʼígi yichʼįʼ anaaʼ biniyé niʼahíʼnil.
11 Áko Éísa biDiyin God Bóhólníihii yichʼįʼ ádííniidgo ání, Bóhólníihii nílíinii, dabidziilii, doodaiiʼ doo dabidziilii bíká adíílwołgi doo nániłdzil da; nihíká anilyeed, Bóhólníihii nihiDiyin God nílíinii, naa dadzííníidlí, índa díí ayóó ázhnéelą́ʼígíí nízhiʼ bee bikʼijįʼ niniikai, Bóhólníihii nílíinii, ni éí nihiDiyin God nílı̨́; tʼááká diné łaʼ nikʼeh dódleʼ yíilaʼ.
12 Kótʼéego Éísa áádóó Júdah dineʼé dabinááł Bóhólníihii éí Iithiyópiya dineʼé yikʼeh deesdlı̨́įʼgo Iithiyópiya dineʼé adahineezhchą́ą́ʼ.
13 Áko Éísa áádóó bisiláo yił naakaígíí níléí Gíírar kin haalʼáajįʼ yikééʼ deíjeehgo, áko Iithiyópiya dineʼé bisiláo tʼóó ahayóí chʼééh ádáátʼįįdgo naaztseed, háálá Bóhólníihii áádóó bisiláo ałtso hakʼeh dadeesdlı̨́ı̨́ʼ áádóó yisnááh bąąh daʼoogą́ʼígíí tʼóó ahayóí adayiizyı̨́.
14 Áádóó Gíírar kéyah nahósʼaʼ binaagóó kin hadaasʼáhígíí tʼáá átʼé atídayiilaa, háálá Bóhólníihii yikʼee bił yééʼ dahazlı̨́ı̨́ʼ áádóó kin hadaasʼáágóó tʼáá átʼé adayiizyı̨́, háálá yisnááh tʼáá íiyisí tʼóó ahayóí.
15 Áádóó ałdóʼ daʼalı̨́ı̨́ʼ dah deinéełkaadii dabiníbaal atídayiilaago dibé índa ghą́ą́ʼaskʼidii tʼóó ahayóí adeineeskaadgo Jerúsalem kin haalʼáágóó anídahaaskai.
