2 Chronicles 15:1-19
15 Áko Diyin God biNíłchʼi éí Óded biyeʼ Azaráíyah bikʼi hooleʼ.
2 Áko dah diiyáago Éísa yidááh níyá, áko ííłní, Dashíínółtsʼą́ą́ʼ, Éísa áádóó Júdah dineʼé índa Bénjamin dineʼé tʼáá ánółtso, Bóhólníihii tʼah bił dahonohłǫ́ǫgo nihił hólǫ́, áádóó hádaohtʼı̨́įgo bikʼídadoohkah, nidi yóóʼádasidooʼą́ągo bí ałdóʼ yóóʼanihididooʼááł.
3 Kʼad nízaad nihoolzhiizhgo Ízrel dineʼé éí Diyin God tʼáá aaníinii tʼáágééd yildah áádóó nááʼiiłniihii nidíʼnóotįįłii ádin índa bee hazʼáanii tʼáágééd dahináá nítʼééʼ.
4 Nidi bide ádahoodzaago Ízrel biDiyin God Bóhólníihii hadeintáago yikʼídaaskaigo yichʼįʼ ninákai.
5 Áko tʼáá háiida doo hózhǫ́ǫgo chʼíjóyaʼ, doodaiiʼ doo yah anídzódzaʼ leʼ átʼée da nítʼééʼ, nidi éí kédaayahgóó kéédahatʼínígíí tʼóó báhádzidgo tiʼdahojiyoonííh nítʼééʼ.
6 Índa łaʼ dineʼé náánáłaʼ dineʼé ádayoołdįįł, áádóó łaʼ kin haalʼáii náánáłaʼ kin haalʼáii tídeiidileʼ, háálá Diyin God éí achʼįʼ nahwiiʼnáanii tʼáá ałtso yee hade áhósin nítʼééʼ.
7 Éí bąą danihidziil leʼ, tʼáadoo nihąą ninádahakaʼí, háálá nihinaanish bideená nihikʼidahozhdoodliił.
8 Áko Éísa díí saadígíí yidiiztsʼą́ą́ʼ, éí Diyin God yá halneʼii Óded yee hahaasdzíʼígíí yee haʼoosnííʼ, áko Júdah dineʼé bikéyah áádóó Bénjamin dineʼé bikéyahdóó tʼáá átʼé, índa Dził Íífreiyimgi kin hadaasʼáhígíí yisnánídóó doo daaldinii bidaʼalyaii nahjįʼ kóyiilaago áádóó Bóhólníihii bikin biiʼ sohodizin chahaʼoh bééniníʼánígíí bidáahgi Bóhólníihii bibikááʼ nááʼiiniihí hashtʼééyiidlaa.
9 Áko Éísa éí Júdah dineʼé áádóó Bénjamin dineʼé tʼáá ałtso índa Ízrel dineʼé bitahdóó Íífreiyim dineʼé áádóó Manáseh dineʼé índa Símiyan dineʼé dabitahdóó ałʼąą dóoneʼé danilíinii bił áłah ájiilaa, háálá haDiyin God Bóhólníihii hoł hólónígíí dayiiłtsą́ągo tʼóó ahayóí hohidiikai.
10 Éísa nantʼáago ashdlaʼáadah náhááh góneʼ tááʼ nídízííd binih Jerúsalem kin haalʼáagi áłah dzizlı̨́ı̨́ʼ.
11 Tʼáá éí bijı̨́ Bóhólníihii bichʼįʼ náádadziisniiʼ; bąąh daʼjííghą́ąʼgo nidajiizhjaaʼígíí łaʼ, tsostsʼidi neeznádiin béégashii índa tsostsʼidi mííl dibé,
12 áádóó dahazhéʼé yę́ę biBóhólníihii Diyin God éí hajéí tʼáá átʼé bee índa hwiiʼ sizíinii tʼáá átʼé bee hádajitʼı̨́į doo biniyé ahadazdeestʼą́.
13 Índa tʼáá háiida Ízrel dineʼé biBóhólníihii Diyin God doo hádaatʼíinii nidabiʼditseed doo, éí aʼohgo ádaatʼéii, doodaiiʼ ayóó ádaatʼéii, diné, doodaiiʼ asdzánída ákódoolnííł.
14 Áádóó Bóhólníihii bichʼįʼ ádee hadahizdeesdzíiʼgo iinééʼ ayóó íitsʼaʼgo áádóó dazhdilwoshgo béésh dilní bee íʼdílzoołí índa deenástsʼaaʼ bideeʼ bee íʼdílzoołí bee ádazhdííniid.
15 Áko Júdah dineʼé tʼáá ałtso díí ádee haʼoodzíʼígíí yaa bił nidahoozhǫǫh, háálá bijéí tʼáá átʼé yee nideideezʼánígíí índa deinízinígíí tʼáá átʼé yee Diyin God hádaatʼı̨́įgo yikʼídaaskai, áko Bóhólníihii tʼáá ałtsodę́ę́ʼ doo haa hwiinítʼı̨́ı̨́góó áhoolaa.
16 Nááʼáłdóʼ aláahgo naatʼáanii Éísa bimá Méíyakah éí asdzą́ą́ naatʼááh nilínídóó nahjįʼ hayííłtʼeʼ, háálá asdzání beʼelyaii doo daaldinii bidiyingo áyiilaa, áko éí habeʼelyaii Éísa hatsʼą́ą́ʼ niyiisneʼgo yiidííséigo Kídran tó nílínídi yidííłid.
17 Nidi ninádahałaah doo biniyé wódah nahazʼą́ągo ádaalyaaígíí éí Ízrel kéyahdóó tʼáadoo nahjįʼ kólyaa da; azhą́ ákótʼée nidi, Éísa bijéí yee tʼáá ákwii átʼéego bíiníłką́.
18 Áádóó Bóhólníihii bikin biiʼ sohodizin góneʼ yah ajiizhjaaʼii éí bizhéʼé yę́ę diyingo niidiyiizʼáanii índa tʼáá hó ałdóʼ diyingo nihizdeezʼáanii, éí béésh łigaii áádóó óola índa chodaoʼíinii átʼé.
19 Áko doo daʼahijigą́ą́góó Éísa nantʼáago tádiindóó baʼaan ashdlaʼ nááhai.
