2 Chronicles 16:1-14
16 Tádiindóó baʼaan hastą́ą́h náhááh góneʼ Éísa nantʼáago Ízrel dineʼé aláahgo binanitʼaʼí Béíyasha éí Júdah dineʼé yichʼįʼ nídiibaaʼ, áko Júdah dineʼé aláahgo binanitʼaʼí Éísa bichʼįʼ doo ałnáʼáhátʼı̨́į da doo biniyé Réímah kin haalʼá áyiilaa.
2 Ákohgo Éísa éí Bóhólníihii bikin biiʼ sohodizin góneʼ áádóó aláahgo naatʼáanii bighan góneʼ yódí bá hazʼánígi béésh łigaii índa óola niiʼnilígíí chʼíiníjaaʼ áádóó Síriya dineʼé aláahgo binanitʼaʼí Ben-héídad, éí Damáskasdi kééhatʼínígíí yichʼįʼ áyiilaago ání,
3 Shí índa ni ałdóʼ nihitaʼgi ałhaʼdeetʼą́ hólǫ́; shizhéʼé yę́ę áádóó nizhéʼé yę́ę ałdóʼ ałhaʼdeetʼą́ą́ nítʼééʼ; jó, aa doolyéełii béésh łigaii áádóó óola nichʼįʼ bił áhooshłaa; nílááh, Ízrel dineʼé aláahgo binanitʼaʼí Béíyasha shitsʼádoogááł biniyé bił ałhaʼdíínítʼáanii nahjįʼ kónílééh.
4 Ben-héídad éí aláahgo naatʼáanii Éísa ádííniidii yiʼiilaago siláo bindanitʼaʼí danilíinii Ízrel bikin hadaasʼáágóó yiʼiisʼniiʼgo Áíjan áádóó Dan áádóó Éíbel-méíyim índa Náftalaigi kin biiʼ nooh nídaʼachíihii tʼáá átʼé deisná.
5 Áádóó ákódzaago Béíyasha haa hodiiztsʼą́ąʼgo Réímah kin haalʼáii ííléhígíí yikʼi deeyáago binaanish ánéísįįd.
6 Ákohgo aláahgo naatʼáanii Éísa éí Júdah dineʼé tʼáá ałtso yił dah diináago Réímah kin haalʼáádóó tsé índa tsin éí Béíyasha yee hałbįʼ nítʼééʼ yę́ę yitsʼą́ą́ʼ ádayiizhjaaʼ áádóó éí yee Gííba áádóó Mízpah kin haalʼáago áyiilaa.
7 Áko íídą́ą́ʼ áhodoonííł yaa halneʼii Hanéínai éí Júdah dineʼé aláahgo binanitʼaʼí Éísa yaa níyáago íidííniid, Síriya dineʼé aláahgo binanitʼaʼí baa jiisínílííʼ; Bóhólníihii niDiyin God éí doo baa jiisínílíiʼ da; éí bąą Síriya dineʼé aláahgo binanitʼaʼí bisiláo doo bikʼeh didíídleeł da.
8 Daʼ doósh Iithiyópiya dineʼé áádóó Lúbim dineʼé ayóó átʼéego tsindaabąąs bijáád naakiígíí áádóó łı̨́ı̨́ʼ yee nidaabaahii yił tʼóó ahayóí dah yinéeł da? Nidi Bóhólníihii baa dzíínílíhígíí bąą neinínil.
9 Háálá Bóhólníihii éí diné dabijéí yee hachʼįʼ tʼáá ákogi ádaatʼéii yá bidziilgo íʼdólzin doo biniyé nihokááʼgóó tʼáá átʼéé nítʼééʼ haʼasííd. Doo áhólyánígi íinidzaaígíí biniinaa kʼad kodóó anaaʼ baa naníltin doo.
10 Ákohgo Éísa éí áhodoonííł yaa halneʼii yichʼįʼ báhóóchįįd, áádóó yah ayííłtʼeʼ; tʼáá díí biniinaa Éísa ayóó átʼéego hachʼįʼ bił hazhchxih, áádóó ákwii nahalzhiishgo Éísa éí diné łaʼ yide ádahósin nítʼééʼ.
11 Áádóó jó, Éísa łahjįʼ átsé índa akéeʼdi yaa naayáhígíí éí Júdah dineʼé índa Ízrel dineʼé aláahgo binanitʼaʼí danilíinii binaaltsoos bikʼinídaháasdzo.
12 Áko Éísa nantʼáago tádiindóó baʼaan náhástʼéí nááhaigo naałniih bee bikeeʼ bąąh dahooʼaʼ; azhą́ tʼóó tséʼédinda ádzaa nidi, Bóhólníihii tʼáadoo yichʼįʼ choʼoosʼįįd da, nidi azeeʼ ádeiłʼíní tʼéiyá yichʼįʼ choʼoołʼı̨́ı̨́ nítʼééʼ.
13 Áádóó Éísa nantʼáago dízdiindóó baʼaan tʼááłáʼí nááhaigo daaztsą́; dahazhéʼé yę́ę bitahjįʼ ajiiłhaazh.
14 Áko David yę́ę bikin haalʼáagi tʼáá hó tséníʼootséél ádá ájiilaa góneʼ yóóʼádahojiilaa. Áádóó spáis ádeiłʼíinii éí spáis hashtʼedayiilaii yee łikání halchingo ádahoolaa. Áádóó ayóó átʼéego yiyah dedeideeshjééʼ.
