2 Chronicles 17:1-19
17 Áádóó Éísa hatsáskʼehgi hayeʼ Jiiháshafat aláahgo nantʼá silı̨́įʼgo Ízrel dineʼé yichʼįʼ bidziilgo hashtʼediidzaa.
2 Áko Júdah kéyahgi tʼáá átʼé kin hadaasʼáii ditą́ągo binídaʼastłʼinígóó siláo dah deínéehgo áyiilaa, índa Júdah kéyah áádóó Íífreiyim dineʼé bikin hadaasʼáhígíí éí Éísa hazhéʼé yę́ę yisnánígi siláo niyiiznil.
3 Jiiháshafat éí Bóhólníihii bił hólǫ́, háálá átséédą́ą́ʼ hazhéʼé David yę́ę hinánígi átʼéego jiníyá; Béíyalim éí doo hátʼı̨́į da nítʼééʼ.
4 Nidi hazhéʼé yę́ę biDiyin God Bóhólníihii hájítʼı̨́įgo áádóó bibikʼeh óʼooʼníiłii bikʼeh hojíłʼı̨́įgo jiníyá; doo éí Ízrel dineʼé ádaatʼínígíí bikʼehgo jiníyáa da.
5 Éí bąą Bóhólníihii éí bee óhólníihii chánah áyiilaago yee hóhoosʼnííʼ, áko Júdah dineʼé tʼáá ałtso aa doolyéełii Jiiháshafat yaa dayiiznilgo yódí índa bee ił ídlíinii tʼóó ahayóí bee hazlı̨́ı̨́ʼ nítʼééʼ.
6 Áádóó éí Bóhólníihii bikʼehgo honítʼiʼjí yaa bił honeeni áádóó ninádahałaah doo biniyé wódah nahazʼą́ągo ádaalyaaígíí áádóó asdzání bidaʼalyaii Júdah kéyahdóó nahjįʼ kóyiilaa.
7 Índa nantʼáago tááʼ náhááh góneʼ ałdóʼ bá naatʼáanii danilíinii Ben-héíyil áádóó Obadáíyah áádóó Zekaráíyah áádóó Niithániyel índa Maikéíyah éí nidaʼnitin dooleeł biniyé Júdah dineʼé bikin hadaasʼáágóó ayiisʼaʼ.
8 Áádóó Líívai dineʼé dah deidiiłʼaʼ éí Shiiméíyah, Nethanáíyah, Zebadáíyah, Éísahel, Shiimíramath, Jiihánathan, Adonáíjah, Tobáíjah áádóó Tab-adonáíjah, díí éí Líívai dineʼé danilı̨́įgo nááʼiiłniihii Iilíshama áádóó Jiihóram yił dayííłʼaad.
9 Áko Bóhólníihii bibee hazʼáanii naaltsoos bee dahólǫ́ǫgo Júdah dineʼé bikin hadaasʼáágóó tʼáá átʼéé nítʼééʼ diné yitahgóó nidaʼneeztą́ą́ʼ.
10 Áádóó Júdah dineʼé bikʼi dinaago bee óhólnííh bił nahazʼą́ą́góó éí Bóhólníihii béédadzisdzíidgo biniinaa Jiiháshafat tʼáadoo bikʼi jiijéeʼ da.
11 Nítʼééʼ Filístiya dineʼé aa deidooléełii índa béésh łigaii nehelyéhígíí Jiiháshafat yaa deizhjaaʼ, índa Árab dineʼé éí deenástsʼaaʼ áádóó tłʼízíchǫǫh tʼáá ałʼąą tsostsʼidi miildóó baʼaan tsostsʼidi neeznádiingo haa deineeskaad.
12 Áko Jiiháshafat adeestʼįįdgo tsʼídá ayóó átʼéii yileeł. Áádóó Júdah kéyahgi kin binídaʼastłʼinígíí áádóó kin hadaasʼáii kin biiʼ nooh nídaʼachíihii ádayiilaa.
13 Áádóó Júdah kéyahgi kin hadaasʼáágóó naanish bee ádaʼíízįįd índa Jerúsalem kin haalʼáagi siláo dahayóii índa dabíiyisii kéédahatʼı̨́.
14 Áko díí éí dabizhéʼé yę́ę badaʼáłchíní bikʼehgo dayééltaʼ: Júdah dineʼé bitahdóó siláo míilgo yindanitʼaʼí: alą́ąjįʼ siláo binanitʼaʼí Ádna éí diné dahayóii táadi neeznádiindi mííl yił dah yinééł.
15 Áádóó náábíkééʼ góneʼ éí siláo binanitʼaʼí Jiihohéínan naakidi neeznádiindóó baʼaan tseebídiindi mííl siláo yił dah yinééł.
16 Nááʼákóneʼ éí Zíkrai biyeʼ Amasáíyah, éí Bóhólníihii yichʼįʼ niʼádeetʼánígíí diné dahayóii naakidi neeznádiindi mííl yił dah yinééł.
17 Bénjamin dineʼé nilíinii Iiláíyada, éí diné hayóii nilı̨́; éí naakidi neeznádiindi mííl siláo éí kʼaaʼ áádóó naagé nideijaahii yił dah yinééł.
18 Náábíkéédę́ę́ʼ éí Jiihózabad tʼááłáhídi neeznádiindóó baʼaan tseebídiindi mííl siláo dah yinéłígíí yił anaaʼ yiniyé hashtʼedadeeʼnééh.
19 Díí éí aláahgo naatʼáanii yá nidaalʼaʼ; Júdah kéyahgi tʼáá átʼéé nítʼééʼ kin hadaasʼá ditą́ągo binaa ahéédaʼastłinígóó siláo niyiiznilígíí ałdóʼ aláahgo naatʼáanii yá nidaalʼaʼ.
