2 Chronicles 18:1-34
18 Ákohgo Jiiháshafat éí yódí índa bee ił ídlíinii tʼóó ahayóí boosąąd, áádóó Éíhab yighanjįʼ azyehgo yichʼijí silı̨́ı̨́ʼ.
2 Áádóó díkwíí shı̨́ı̨́ nááhaigo Samériya góyaa Éíhab bichʼįʼ jiníyá. Áko Éíhab éí dibé áádóó béégashii tʼóó ahayóí éí diné bił nijikaígíí bił há neistseed, áádóó Réímath-gíliyad góde shił dííʼash hałníigo hániʼ há áhoolaa.
3 Áko Ízrel dineʼé aláahgo binanitʼaʼí Éíhab éí Júdah dineʼé aláahgo binanitʼaʼí Jiiháshafat ííłní, Réímath-gíliyadgóó daatsʼí shił dííʼash? Áko ázhdííniid, Shí tʼáá nigi áníshtʼé, shidineʼé éí nidineʼégi ádaatʼé, áádóó anaaʼ náhádleehgo níká anéijah doo.
4 Áádóó Jiiháshafat éí Ízrel dineʼé aláahgo binanitʼaʼí ííłní, Bínaʼídíłkid, baa nánooshkąąh, Bóhólníihii haʼátʼíí didooniił díí jı̨́.
5 Éí bąą Ízrel dineʼé aláahgo binanitʼaʼí éí náásgóó áhodooníłígíí yaa dahalneʼii dı̨́įdi neeznádiingo diné áłah áyiilaago ííłní, Réímath-gíliyad daatsʼí bichʼįʼ dadiibah, doodaiiʼ ááhodeeshtʼįįł daatsʼí? Áko ádaaní, Ákóde dínááh, háálá Diyin God éí aláahgo naatʼáanii yeididooʼááł.
6 Áádóó Jiiháshafat ání, Díí kǫ́ǫ́ dahalneʼígíísh binaashiijí Bóhólníihii yá halneʼii nabídídíilkiłígíí doo łaʼ naagháa da?
7 Áko Ízrel dineʼé aláahgo binanitʼaʼí éí Jiiháshafat ííłní, Diné łaʼ tʼah yidziih, éí Ímlah biyeʼ Maikéíyah; éí shı̨́ı̨́ hwee Bóhólníihii nabídídíilkił, nidi éí jooshłá, háálá yáʼátʼéehii tsʼídá doo yee shaa halneʼ da, nidi doo yáʼáshóonii tʼéiyá yee shaa halneʼ. Áko Jiiháshafat ání, Aláahgo naatʼáanii nílíinii, tʼáadoo ádíníní yeeʼ.
8 Nítʼééʼ Ízrel dineʼé aláahgo binanitʼaʼí éí siláo binanitʼaʼí łaʼ hágo yidííniidgo ííłní, Tsxı̨́įłgo Ímlah biyeʼ Maikéíyah kweʼé bił nánítʼaash.
9 Áko Ízrel dineʼé aláahgo binanitʼaʼí índa Júdah dineʼé aláahgo binanitʼaʼí Jiiháshafat éí biʼéénééz yiih yíʼáazhgo Samériya dańʼdítı̨́įhgi tʼáá bíniʼ hazʼą́ą́ léiʼgi tʼáá ałʼąą bibikááʼdóó nahatʼáii yikááʼ dah siké, áko náás áhodooníiłii yaa dahalneʼii tʼáá ałtso hadááhdóó dahoolneʼ.
10 Áádóó Kiinéíyanah biyeʼ Zedekáíyah béésh yee adeeʼ áyiilaago ání, Bóhólníihii kóní, Díí bee Síriya dineʼé ałtso asíníłdįįdjįʼ bighá daʼdííshish.
11 Áko dahalneʼii tʼáá ałtso tʼáá ákótʼéego náás áhodoonííł yaa dahoolneʼgo ádaaní, Nílááh, Réímath-gíliyad góde dínáahgo łaʼ nilééh, háálá Bóhólníihii éí aláahgo naatʼáanii yeididooʼááł.
12 Áko haneʼ bił eelʼaʼgo Maikéíyah hágo bidiní biʼdooʼniidígíí hachʼįʼ haadzíiʼgo ání, Jó, kʼad dahalneʼii tʼáá łaʼ saad yáʼátʼéehii yee aláahgo naatʼáanii yichʼįʼ hadaasdzííʼ. Éí bąą bíniʼ nizaad bee hadíídzihígíí baa nánooshkąąh, tʼáá éí dabizaadígi átʼée doo; yáʼátʼéehii tʼéiyá bee hadíídzih.
13 Nidi Maikéíyah ání, Tsʼídá tʼáá aaníí Bóhólníihii hiná; tʼáá ákótʼéego tsʼídá tʼáá aaníí shiDiyin God shichʼįʼ yee haadzíʼígíí tʼéí bee hadeesdzih.
14 Kótʼéego aláahgo naatʼáanii baazhníyá, áko aláahgo naatʼáanii áháłní, Maikéíyah nílíinii, Réímath-gíliyadgóó daatsʼí dadiibah, doodaiiʼ daatsʼí áádahodiitʼįįł? Áko ábijiní, Nílááh, ákóde dohkáahgo łaʼ daałééh, háálá éí nílákʼedidootʼááł.
15 Áko aláahgo naatʼáanii áháłní, Haa lá néelą́ąʼdi bee nichʼįʼ háádeesdzih? Shą́ą́ʼ, tʼáadoo haʼátʼíhída bee shił hólneʼí, nidi tʼáá aaníinii bee shił hólneʼgo, Bóhólníihii bízhiʼ tʼéí bee shił hólneʼ, nidishníi niʼ.
16 Ákohgo ání, Ízrel dineʼé ałtso dziłgóó taozhjéeʼgo yiiłtsą́; dibé yaa áhályáanii ádinígíigi áhoodzaa. Bóhólníihii ání, Bíniʼ diné tʼáá ałtso bił dahodéezyéelgo dabighangóó anáhákáah leʼ.
17 Áko Ízrel dineʼé aláahgo binanitʼaʼí éí Jiiháshafat ííłní, Daʼ doósh nił hweeshneʼ da; eii yáʼátʼéehii doo yee shichʼįʼ haadziih da, nidi doo yáʼáshóonii tʼéiyá.
18 Nítʼééʼ Maikéíyah ánáádíʼní, Éí bąą Bóhólníihii ánínígíí diitsʼı̨́ı̨́h; Bóhólníihii bibikááʼdóó nahatʼáii yikááʼ dah sidáago yáʼąąshdi dah deínéehii tʼáá átʼé binishʼnáájí áádóó binishtłʼají bíighah naazı̨́įgo yiiłtsą́.
19 Áádóó Bóhólníihii ání, Háishąʼ Ízrel dineʼé aláahgo binanitʼaʼí Éíhab yíniʼ yáʼáhodoolíiłgo Réímath-gíliyadgóó doogááł, áko bikʼeh hodidoodleeł? Áádóó łaʼ kótʼéego ní, náánáłaʼ kótʼéego náádíʼní.
20 Ákohgo níłchʼi léiʼ chʼíníyáago Bóhólníihii yidááhdóó yiizįʼgo ání, Shí lá bíniʼ áhodeeshłíił ni. Áko Bóhólníihii ábíłní, Haʼátʼíishąʼ bee dooleeł?
21 Áko ání, Ákǫ́ǫ́ deeshááł, áádóó bá dahalneʼii tʼáá ałtso dabizééʼ góneʼ níłchʼi biyoochʼíidii nishłı̨́į doo. Áko Bóhólníihii ání, Nílááh, bíniʼ áhónílééh, áádóó ałdóʼ bikʼeh didíídleeł; nílááh, dínáahgo ákónínééh.
22 Éí bąą kʼad, Bóhólníihii éí níłchʼi biyoochʼíidii díí ná dahalneʼii tʼáá ałtso dabizééʼ góneʼ ayiisʼaʼ; jó, Bóhólníihii éí doo yáʼáshóonii yee ná haadzííʼ.
23 Ákohgo Kiinéíyanah biyeʼ Zedekáíyah hwíighahjįʼ niníyáago Maikéíyah biniitsįʼ néidííkaadgo ání, Shitsʼą́ą́dóó lá háajigo Bóhólníihii biNíłchʼi dahodiileʼgo nichʼįʼ haadzííʼ?
24 Maikéíyah ání, Jó, nídidíítʼı̨́ı̨́ł biniyé náʼáneʼí góneʼ yah ííníyáago éí bijı̨́ yidííłtsééł.
25 Ákohgo Ízrel dineʼé aláahgo binanitʼaʼí ání, Maikéíyah daosiłgo kin haalʼáádóó naatʼáanii Éíman áádóó aláahgo naatʼáanii biyeʼ Jóʼash bichʼįʼ bił nídadohkááh.
26 Ádabidohní, Aláahgo naatʼáanii ání, Díí diné awáalyaadi yah adaołtʼeʼgo hodiiyeelgo nánísdzáajįʼ tʼáá achʼįʼ nahwiiʼnánígo bááh éí tó bił banídaʼołtsoʼ.
27 Ákohgo Maikéíyah ání, Hodiiyeelgo néínídzáá ládą́ą́ʼ, Bóhólníihii doo shee haadzíiʼ da doo. Áádóó ání, Dineʼé nohłíinii, tʼáá ánółtso daʼíísółtsʼą́ą́ʼ.
28 Kótʼéego Ízrel dineʼé aláahgo binanitʼaʼí índa Júdah dineʼé aláahgo binanitʼaʼí Jiiháshafat éí Réímath-gíliyad góde ííná.
29 Áko Ízrel dineʼé aláahgo binanitʼaʼí éí Jiiháshafat ííłní, Łahgo áneeshningo ádiʼdeeshníiłgo atah deeshbah, nidi ni éí niʼéénééz biih ninááh. Áádóó Ízrel dineʼé aláahgo binanitʼaʼí łahgo ánoolningo íʼdiilyaago atah ííbaaʼ.
30 Nidi Síriya dineʼé aláahgo binanitʼaʼí éí tsindaabąąs bijáád naakiígíí yindanitʼaʼí bił naakaígíí yiʼníłniiʼgo ání, Aʼohgo danilínígíí, doodaiiʼ ayóó ádaatʼéhígíí tʼáadoo bił daʼahohgání, nidi Ízrel dineʼé aláahgo binanitʼaʼí tʼéiyá.
31 Áádóó tsindaabąąs bijáád naakiígíí yindanitʼaʼí éí Jiiháshafat dayiiłtsą́ągo ádaaní, Ízrel dineʼé aláahgo binanitʼaʼí átʼı̨́; éí bąą yił daʼahidoogą́ą́ł yiniyé yináshzhiizh, nidi Jiiháshafat hadoolghaazhgo Bóhólníihii bíká eelwod, áádóó Diyin God dabidiisnáaʼgo hatsʼą́ąjįʼ dah diikai.
32 Áko tsindaabąąs bijáád naakiígíí yindanitʼaʼí éí doo Ízrel dineʼé aláahgo binanitʼaʼí átʼı̨́į dago yaa ákodaniizı̨́įʼgo baa daʼígháahii tʼóó nináhaazhjééʼ.
33 Áko diné léiʼ tʼóó dzólníí góneʼ beʼełtı̨́ı̨́ʼ yił kʼídeeshchidgo Ízrel dineʼé aláahgo binanitʼaʼí bibéésh ééʼ ahidadiiʼá bitaʼ góneʼ yiskah. Éí bąą Éíhab hatsinaabąąs bijáád naakiígíí neiloʼígíí ábijiní, Hashiʼdoolkʼehéii; naaʼíʼíléehgo nahjįʼ shił haʼíłbąąs.
34 Íídą́ą́ʼ éí bijı̨́ı̨́ góneʼ tʼóó yówehda ałkʼi jiijééʼ, áko iʼííʼą́ąjįʼ Ízrel dineʼé aláahgo binanitʼaʼí bitsinaabąąs bijáád naakiígíí biyiʼdóó Síriya dineʼé yichʼįʼgo de ízdólzin nítʼééʼ, áko jı̨́honaaʼéí ííyáago índa dadziztsą́.
